| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
(15) 5. திகண்ட³கீவக்³கோ³
(15) 5. Tikaṇḍakīvaggo
1. அவஜானாதிஸுத்தவண்ணனா
1. Avajānātisuttavaṇṇanā
141. பஞ்சமஸ்ஸ பட²மே த³த்வா அவஜானாதீதி எத்த² ஏகோ பி⁴க்கு² மஹாபுஞ்ஞோ சதுபச்சயலாபீ⁴ ஹோதி, ஸோ சீவராதீ³னி லபி⁴த்வா அஞ்ஞங் அப்பபுஞ்ஞங் ஆபுச்ச²தி. ஸோபி தஸ்மிங் புனப்புனங் ஆபுச்ச²ந்தேபி க³ண்ஹாதியேவ. அத²ஸ்ஸ இதரோ தோ²கங் குபிதோ ஹுத்வா மங்குபா⁴வங் உப்பாதே³துகாமோ வத³தி ‘‘அயங் அத்தனோ த⁴ம்மதாய சீவராதீ³னி ந லப⁴தி, அம்ஹே நிஸ்ஸாய லப⁴தீ’’தி. ஏவம்பி த³த்வா அவஜானாதி நாம. ஏகோ பன ஏகேன ஸத்³தி⁴ங் த்³வே தீணி வஸ்ஸானி வஸந்தோ புப்³பே³ தங் புக்³க³லங் க³ருங் கத்வா க³ச்ச²ந்தே க³ச்ச²ந்தே காலே சித்தீகாரங் ந கரோதி, ஆஸனநிஸின்னட்டா²னம்பி ந க³ச்ச²தி. அயம்பி புக்³க³லோ ஸங்வாஸேன அவஜானாதி நாம. ஆதெ⁴ய்யமுகோ²தி ஆதி³தோ தெ⁴ய்யமுகோ², பட²மவசனஸ்மிங்யேவ ட²பிதமுகோ²தி அத்தோ². தத்தா²யங் நயோ – ஏகோ புக்³க³லோ ஸாருப்பங்யேவ பி⁴க்கு²ங் ‘‘அஸாருப்போ ஏஸோ’’தி கதே²தி. தங் ஸுத்வா ஏஸ நிட்ட²ங் க³ச்ச²தி, புன அஞ்ஞேன ஸபா⁴கே³ன பி⁴க்கு²னா ‘‘ஸாருப்போ அய’’ந்தி வுத்தேபி தஸ்ஸ வசனங் ந க³ண்ஹாதி. அஸுகேன நாம ‘‘அஸாருப்போ அய’’ந்தி அம்ஹாகங் கதி²தந்தி புரிமபி⁴க்கு²னோவ கத²ங் க³ண்ஹாதி. அபரோபிஸ்ஸ து³ஸ்ஸீலங் ‘‘ஸீலவா’’தி கதே²தி. தஸ்ஸ வசனங் ஸத்³த³ஹித்வா புன அஞ்ஞேன ‘‘அஸாருப்போ ஏஸோ பி⁴க்கு², நாயங் தும்ஹாகங் ஸந்திகங் உபஸங்கமிதுங் யுத்தோ’’தி வுத்தேபி தஸ்ஸ வசனங் அக்³க³ஹெத்வா புரிமங்யேவ கத²ங் க³ண்ஹாதி. அபரோ வண்ணம்பி கதி²தங் க³ண்ஹாதி, அவண்ணம்பி கதி²தங் க³ண்ஹாதியேவ. அயம்பி ஆதெ⁴ய்யமுகோ²யேவ நாம ஆதா⁴தப்³ப³முகோ², யங் யங் ஸுணாதி, தத்த² தத்த² ட²பிதமுகோ²தி அத்தோ².
141. Pañcamassa paṭhame datvā avajānātīti ettha eko bhikkhu mahāpuñño catupaccayalābhī hoti, so cīvarādīni labhitvā aññaṃ appapuññaṃ āpucchati. Sopi tasmiṃ punappunaṃ āpucchantepi gaṇhātiyeva. Athassa itaro thokaṃ kupito hutvā maṅkubhāvaṃ uppādetukāmo vadati ‘‘ayaṃ attano dhammatāya cīvarādīni na labhati, amhe nissāya labhatī’’ti. Evampi datvā avajānāti nāma. Eko pana ekena saddhiṃ dve tīṇi vassāni vasanto pubbe taṃ puggalaṃ garuṃ katvā gacchante gacchante kāle cittīkāraṃ na karoti, āsananisinnaṭṭhānampi na gacchati. Ayampi puggalo saṃvāsena avajānāti nāma. Ādheyyamukhoti ādito dheyyamukho, paṭhamavacanasmiṃyeva ṭhapitamukhoti attho. Tatthāyaṃ nayo – eko puggalo sāruppaṃyeva bhikkhuṃ ‘‘asāruppo eso’’ti katheti. Taṃ sutvā esa niṭṭhaṃ gacchati, puna aññena sabhāgena bhikkhunā ‘‘sāruppo aya’’nti vuttepi tassa vacanaṃ na gaṇhāti. Asukena nāma ‘‘asāruppo aya’’nti amhākaṃ kathitanti purimabhikkhunova kathaṃ gaṇhāti. Aparopissa dussīlaṃ ‘‘sīlavā’’ti katheti. Tassa vacanaṃ saddahitvā puna aññena ‘‘asāruppo eso bhikkhu, nāyaṃ tumhākaṃ santikaṃ upasaṅkamituṃ yutto’’ti vuttepi tassa vacanaṃ aggahetvā purimaṃyeva kathaṃ gaṇhāti. Aparo vaṇṇampi kathitaṃ gaṇhāti, avaṇṇampi kathitaṃ gaṇhātiyeva. Ayampi ādheyyamukhoyeva nāma ādhātabbamukho, yaṃ yaṃ suṇāti, tattha tattha ṭhapitamukhoti attho.
லோலோதி ஸத்³தா⁴தீ³னங் இத்தரகாலப்பதிதத்தா அஸ்ஸத்³தி⁴யாதீ³ஹி லுலிதபா⁴வேன லோலோ. இத்தரப⁴த்தீதிஆதீ³ஸு புனப்புனங் ப⁴ஜனேன ஸத்³தா⁴வ ப⁴த்திபேமங். ஸத்³தா⁴பேமம்பி கே³ஹஸ்ஸிதபேமம்பி வட்டதி, பஸாதோ³ ஸத்³தா⁴பஸாதோ³. ஏவங் புக்³க³லோ லோலோ ஹோதீதி ஏவங் இத்தரஸத்³தா⁴தி³தாய புக்³க³லோ லோலோ நாம ஹோதி. ஹலித்³தி³ராகோ³ விய, து²ஸராஸிம்ஹி கொட்டிதகா²னுகோ விய, அஸ்ஸபிட்டி²யங் ட²பிதகும்ப⁴ண்ட³ங் விய ச அனிப³த்³த⁴ட்டா²னே முஹுத்தேன குப்பதி. மந்தோ³ மோமூஹோதி அஞ்ஞாணபா⁴வேன மந்தோ³, அவிஸயதாய மோமூஹோ, மஹாமூள்ஹோதி அத்தோ².
Loloti saddhādīnaṃ ittarakālappatitattā assaddhiyādīhi lulitabhāvena lolo. Ittarabhattītiādīsu punappunaṃ bhajanena saddhāva bhattipemaṃ. Saddhāpemampi gehassitapemampi vaṭṭati, pasādo saddhāpasādo. Evaṃ puggalo lolo hotīti evaṃ ittarasaddhāditāya puggalo lolo nāma hoti. Haliddirāgo viya, thusarāsimhi koṭṭitakhānuko viya, assapiṭṭhiyaṃ ṭhapitakumbhaṇḍaṃ viya ca anibaddhaṭṭhāne muhuttena kuppati. Mando momūhoti aññāṇabhāvena mando, avisayatāya momūho, mahāmūḷhoti attho.
அவஜானாதிஸுத்தவண்ணனா நிட்டி²தா.
Avajānātisuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 1. அவஜானாதிஸுத்தங் • 1. Avajānātisuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 1. அவஜானாதிஸுத்தவண்ணனா • 1. Avajānātisuttavaṇṇanā
