| Library / Tipiṭaka / তিপিটক • Tipiṭaka / অঙ্গুত্তরনিকায (টীকা) • Aṅguttaranikāya (ṭīkā) |
(১৫) ৫. তিকণ্ডকীৰগ্গো
(15) 5. Tikaṇḍakīvaggo
১. অৰজানাতিসুত্তৰণ্ণনা
1. Avajānātisuttavaṇṇanā
১৪১. পঞ্চমস্স পঠমে দত্ৰা অৰজানাতীতি এত্থ একো ভিক্খু মহাপুঞ্ঞো চতুপচ্চযলাভী হোতি, সো চীৰরাদীনি লভিত্ৰা অঞ্ঞং অপ্পপুঞ্ঞং আপুচ্ছতি। সোপি তস্মিং পুনপ্পুনং আপুচ্ছন্তেপি গণ্হাতিযেৰ। অথস্স ইতরো থোকং কুপিতো হুত্ৰা মঙ্কুভাৰং উপ্পাদেতুকামো ৰদতি ‘‘অযং অত্তনো ধম্মতায চীৰরাদীনি ন লভতি, অম্হে নিস্সায লভতী’’তি। এৰম্পি দত্ৰা অৰজানাতি নাম। একো পন একেন সদ্ধিং দ্ৰে তীণি ৰস্সানি ৰসন্তো পুব্বে তং পুগ্গলং গরুং কত্ৰা গচ্ছন্তে গচ্ছন্তে কালে চিত্তীকারং ন করোতি, আসননিসিন্নট্ঠানম্পি ন গচ্ছতি। অযম্পি পুগ্গলো সংৰাসেন অৰজানাতি নাম। আধেয্যমুখোতি আদিতো ধেয্যমুখো, পঠমৰচনস্মিংযেৰ ঠপিতমুখোতি অত্থো। তত্থাযং নযো – একো পুগ্গলো সারুপ্পংযেৰ ভিক্খুং ‘‘অসারুপ্পো এসো’’তি কথেতি। তং সুত্ৰা এস নিট্ঠং গচ্ছতি, পুন অঞ্ঞেন সভাগেন ভিক্খুনা ‘‘সারুপ্পো অয’’ন্তি ৰুত্তেপি তস্স ৰচনং ন গণ্হাতি। অসুকেন নাম ‘‘অসারুপ্পো অয’’ন্তি অম্হাকং কথিতন্তি পুরিমভিক্খুনোৰ কথং গণ্হাতি। অপরোপিস্স দুস্সীলং ‘‘সীলৰা’’তি কথেতি। তস্স ৰচনং সদ্দহিত্ৰা পুন অঞ্ঞেন ‘‘অসারুপ্পো এসো ভিক্খু, নাযং তুম্হাকং সন্তিকং উপসঙ্কমিতুং যুত্তো’’তি ৰুত্তেপি তস্স ৰচনং অগ্গহেত্ৰা পুরিমংযেৰ কথং গণ্হাতি। অপরো ৰণ্ণম্পি কথিতং গণ্হাতি, অৰণ্ণম্পি কথিতং গণ্হাতিযেৰ। অযম্পি আধেয্যমুখোযেৰ নাম আধাতব্বমুখো, যং যং সুণাতি, তত্থ তত্থ ঠপিতমুখোতি অত্থো।
141. Pañcamassa paṭhame datvā avajānātīti ettha eko bhikkhu mahāpuñño catupaccayalābhī hoti, so cīvarādīni labhitvā aññaṃ appapuññaṃ āpucchati. Sopi tasmiṃ punappunaṃ āpucchantepi gaṇhātiyeva. Athassa itaro thokaṃ kupito hutvā maṅkubhāvaṃ uppādetukāmo vadati ‘‘ayaṃ attano dhammatāya cīvarādīni na labhati, amhe nissāya labhatī’’ti. Evampi datvā avajānāti nāma. Eko pana ekena saddhiṃ dve tīṇi vassāni vasanto pubbe taṃ puggalaṃ garuṃ katvā gacchante gacchante kāle cittīkāraṃ na karoti, āsananisinnaṭṭhānampi na gacchati. Ayampi puggalo saṃvāsena avajānāti nāma. Ādheyyamukhoti ādito dheyyamukho, paṭhamavacanasmiṃyeva ṭhapitamukhoti attho. Tatthāyaṃ nayo – eko puggalo sāruppaṃyeva bhikkhuṃ ‘‘asāruppo eso’’ti katheti. Taṃ sutvā esa niṭṭhaṃ gacchati, puna aññena sabhāgena bhikkhunā ‘‘sāruppo aya’’nti vuttepi tassa vacanaṃ na gaṇhāti. Asukena nāma ‘‘asāruppo aya’’nti amhākaṃ kathitanti purimabhikkhunova kathaṃ gaṇhāti. Aparopissa dussīlaṃ ‘‘sīlavā’’ti katheti. Tassa vacanaṃ saddahitvā puna aññena ‘‘asāruppo eso bhikkhu, nāyaṃ tumhākaṃ santikaṃ upasaṅkamituṃ yutto’’ti vuttepi tassa vacanaṃ aggahetvā purimaṃyeva kathaṃ gaṇhāti. Aparo vaṇṇampi kathitaṃ gaṇhāti, avaṇṇampi kathitaṃ gaṇhātiyeva. Ayampi ādheyyamukhoyeva nāma ādhātabbamukho, yaṃ yaṃ suṇāti, tattha tattha ṭhapitamukhoti attho.
লোলোতি সদ্ধাদীনং ইত্তরকালপ্পতিতত্তা অস্সদ্ধিযাদীহি লুলিতভাৰেন লোলো। ইত্তরভত্তীতিআদীসু পুনপ্পুনং ভজনেন সদ্ধাৰ ভত্তিপেমং। সদ্ধাপেমম্পি গেহস্সিতপেমম্পি ৰট্টতি, পসাদো সদ্ধাপসাদো। এৰং পুগ্গলো লোলো হোতীতি এৰং ইত্তরসদ্ধাদিতায পুগ্গলো লোলো নাম হোতি। হলিদ্দিরাগো ৰিয, থুসরাসিম্হি কোট্টিতখানুকো ৰিয, অস্সপিট্ঠিযং ঠপিতকুম্ভণ্ডং ৰিয চ অনিবদ্ধট্ঠানে মুহুত্তেন কুপ্পতি। মন্দো মোমূহোতি অঞ্ঞাণভাৰেন মন্দো, অৰিসযতায মোমূহো, মহামূল়্হোতি অত্থো।
Loloti saddhādīnaṃ ittarakālappatitattā assaddhiyādīhi lulitabhāvena lolo. Ittarabhattītiādīsu punappunaṃ bhajanena saddhāva bhattipemaṃ. Saddhāpemampi gehassitapemampi vaṭṭati, pasādo saddhāpasādo. Evaṃ puggalo lolo hotīti evaṃ ittarasaddhāditāya puggalo lolo nāma hoti. Haliddirāgo viya, thusarāsimhi koṭṭitakhānuko viya, assapiṭṭhiyaṃ ṭhapitakumbhaṇḍaṃ viya ca anibaddhaṭṭhāne muhuttena kuppati. Mando momūhoti aññāṇabhāvena mando, avisayatāya momūho, mahāmūḷhoti attho.
অৰজানাতিসুত্তৰণ্ণনা নিট্ঠিতা।
Avajānātisuttavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / অঙ্গুত্তরনিকায • Aṅguttaranikāya / ১. অৰজানাতিসুত্তং • 1. Avajānātisuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) / ১. অৰজানাতিসুত্তৰণ্ণনা • 1. Avajānātisuttavaṇṇanā
