| Library / Tipiṭaka / ತಿಪಿಟಕ • Tipiṭaka / ಅಙ್ಗುತ್ತರನಿಕಾಯ (ಅಟ್ಠಕಥಾ) • Aṅguttaranikāya (aṭṭhakathā) |
(೧೫) ೫. ತಿಕಣ್ಡಕೀವಗ್ಗೋ
(15) 5. Tikaṇḍakīvaggo
೧. ಅವಜಾನಾತಿಸುತ್ತವಣ್ಣನಾ
1. Avajānātisuttavaṇṇanā
೧೪೧. ಪಞ್ಚಮಸ್ಸ ಪಠಮೇ ಸಂವಾಸೇನಾತಿ ಏಕತೋವಾಸೇನ। ಆದೇಯ್ಯಮುಖೋತಿ ಆದಿಯನಮುಖೋ, ಗಹಣಮುಖೋತಿ ಅತ್ಥೋ। ತಮೇನಂ ದತ್ವಾ ಅವಜಾನಾತೀತಿ ‘‘ಅಯಂ ದಿನ್ನಂ ಪಟಿಗ್ಗಹೇತುಮೇವ ಜಾನಾತೀ’’ತಿ ಏವಂ ಅವಮಞ್ಞತಿ। ತಮೇನಂ ಸಂವಾಸೇನ ಅವಜಾನಾತೀತಿ ಅಪ್ಪಮತ್ತಕೇ ಕಿಸ್ಮಿಞ್ಚಿದೇವ ಕುಜ್ಝಿತ್ವಾ ‘‘ಜಾನಾಮಹಂ ತಯಾ ಕತಕಮ್ಮಂ, ಏತ್ತಕಂ ಅದ್ಧಾನಂ ಅಹಂ ಕಿಂ ಕರೋನ್ತೋ ವಸಿಂ, ನನು ತುಯ್ಹಮೇವ ಕತಾಕತಂ ವೀಮಂಸನ್ತೋ’’ತಿಆದೀನಿ ವತ್ತಾ ಹೋತಿ। ಅಥ ಇತರೋ ‘‘ಅದ್ಧಾ ಕೋಚಿ ಮಯ್ಹಂ ದೋಸೋ ಭವಿಸ್ಸತೀ’’ತಿ ಕಿಞ್ಚಿ ಪಟಿಪ್ಫರಿತುಂ ನ ಸಕ್ಕೋತಿ। ತಂ ಖಿಪ್ಪಞ್ಞೇವ ಅಧಿಮುಚ್ಚಿತಾ ಹೋತೀತಿ ತಂ ವಣ್ಣಂ ವಾ ಅವಣ್ಣಂ ವಾ ಸೀಘಮೇವ ಸದ್ದಹತಿ। ಸದ್ದಹನಟ್ಠೇನ ಹಿ ಆದಾನೇನ ಏಸ ಆದಿಯನಮುಖೋತಿ ವುತ್ತೋ। ಆಧೇಯ್ಯಮುಖೋತಿ ಪಾಳಿಯಾ ಪನ ಠಪಿತಮುಖೋತಿ ಅತ್ಥೋ। ಮಗ್ಗೇ ಖಟಆವಾಟೋ ವಿಯ ಆಗತಾಗತಂ ಉದಕಂ ವಣ್ಣಂ ವಾ ಅವಣ್ಣಂ ವಾ ಸದ್ದಹನವಸೇನ ಸಮ್ಪಟಿಚ್ಛಿತುಂ ಠಪಿತಮುಖೋತಿ ವುತ್ತಂ ಹೋತಿ।
141. Pañcamassa paṭhame saṃvāsenāti ekatovāsena. Ādeyyamukhoti ādiyanamukho, gahaṇamukhoti attho. Tamenaṃ datvā avajānātīti ‘‘ayaṃ dinnaṃ paṭiggahetumeva jānātī’’ti evaṃ avamaññati. Tamenaṃ saṃvāsena avajānātīti appamattake kismiñcideva kujjhitvā ‘‘jānāmahaṃ tayā katakammaṃ, ettakaṃ addhānaṃ ahaṃ kiṃ karonto vasiṃ, nanu tuyhameva katākataṃ vīmaṃsanto’’tiādīni vattā hoti. Atha itaro ‘‘addhā koci mayhaṃ doso bhavissatī’’ti kiñci paṭippharituṃ na sakkoti. Taṃ khippaññeva adhimuccitā hotīti taṃ vaṇṇaṃ vā avaṇṇaṃ vā sīghameva saddahati. Saddahanaṭṭhena hi ādānena esa ādiyanamukhoti vutto. Ādheyyamukhoti pāḷiyā pana ṭhapitamukhoti attho. Magge khaṭaāvāṭo viya āgatāgataṃ udakaṃ vaṇṇaṃ vā avaṇṇaṃ vā saddahanavasena sampaṭicchituṃ ṭhapitamukhoti vuttaṃ hoti.
ಇತ್ತರಸದ್ಧೋತಿ ಪರಿತ್ತಕಸದ್ಧೋ। ಕುಸಲಾಕುಸಲೇ ಧಮ್ಮೇ ನ ಜಾನಾತೀತಿಆದೀಸು ಕುಸಲೇ ಧಮ್ಮೇ ‘‘ಇಮೇ ಕುಸಲಾ’’ತಿ ನ ಜಾನಾತಿ, ಅಕುಸಲೇ ಧಮ್ಮೇ ‘‘ಇಮೇ ಅಕುಸಲಾ’’ತಿ ನ ಜಾನಾತಿ। ತಥಾ ಸಾವಜ್ಜೇ ಸದೋಸಧಮ್ಮೇ ‘‘ಇಮೇ ಸಾವಜ್ಜಾ’’ತಿ, ಅನವಜ್ಜೇ ಚ ನಿದ್ದೋಸಧಮ್ಮೇ ‘‘ಇಮೇ ಅನವಜ್ಜಾ’’ತಿ, ಹೀನೇ ಹೀನಾತಿ, ಪಣೀತೇ ಪಣೀತಾತಿ। ಕಣ್ಹಸುಕ್ಕಸಪ್ಪಟಿಭಾಗೇತಿ ‘‘ಇಮೇ ಕಣ್ಹಾ ಸುಕ್ಕೇ ಪಟಿಬಾಹೇತ್ವಾ ಠಿತತ್ತಾ ಸಪ್ಪಟಿಭಾಗಾ ನಾಮ, ಇಮೇ ಚ ಸುಕ್ಕಾ ಕಣ್ಹೇ ಪಟಿಬಾಹಿತ್ವಾ ಠಿತತ್ತಾ ಸಪ್ಪಟಿಭಾಗಾ’’ತಿ ನ ಜಾನಾತಿ।
Ittarasaddhoti parittakasaddho. Kusalākusale dhamme na jānātītiādīsu kusale dhamme ‘‘ime kusalā’’ti na jānāti, akusale dhamme ‘‘ime akusalā’’ti na jānāti. Tathā sāvajje sadosadhamme ‘‘ime sāvajjā’’ti, anavajje ca niddosadhamme ‘‘ime anavajjā’’ti, hīne hīnāti, paṇīte paṇītāti. Kaṇhasukkasappaṭibhāgeti ‘‘ime kaṇhā sukke paṭibāhetvā ṭhitattā sappaṭibhāgā nāma, ime ca sukkā kaṇhe paṭibāhitvā ṭhitattā sappaṭibhāgā’’ti na jānāti.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಅಙ್ಗುತ್ತರನಿಕಾಯ • Aṅguttaranikāya / ೧. ಅವಜಾನಾತಿಸುತ್ತಂ • 1. Avajānātisuttaṃ
ಟೀಕಾ • Tīkā / ಸುತ್ತಪಿಟಕ (ಟೀಕಾ) • Suttapiṭaka (ṭīkā) / ಅಙ್ಗುತ್ತರನಿಕಾಯ (ಟೀಕಾ) • Aṅguttaranikāya (ṭīkā) / ೧. ಅವಜಾನಾತಿಸುತ್ತವಣ್ಣನಾ • 1. Avajānātisuttavaṇṇanā
