| Library / Tipiṭaka / তিপিটক • Tipiṭaka / অঙ্গুত্তরনিকায (টীকা) • Aṅguttaranikāya (ṭīkā) |
১০. অৰকুজ্জসুত্তৰণ্ণনা
10. Avakujjasuttavaṇṇanā
৩০. দসমে অৰকুজ্জপঞ্ঞোতি নিক্কুজ্জপঞ্ঞো। তেনাহ ‘‘অধোমুখপঞ্ঞো’’তি। পুব্বপট্ঠপনাতি পঠমারম্ভো। সন্নিট্ঠানন্তি কথাপরিযোসানং। অপ্পনাতি দেসনায নিট্ঠাপনং। অনেকে ৰা অনুসন্ধিযোতি যোজেতব্বং। সমাধি ৰাতিআদীসু লোকুত্তরধম্মা পরমত্থতো সাসনন্তি তদত্থোপাদকসমাধি তস্স আদীতি ৰুত্তো, তদাসন্নত্তা ৰিপস্সনা, তস্স মূলভাৰেন একদেসত্তা মগ্গো।
30. Dasame avakujjapaññoti nikkujjapañño. Tenāha ‘‘adhomukhapañño’’ti. Pubbapaṭṭhapanāti paṭhamārambho. Sanniṭṭhānanti kathāpariyosānaṃ. Appanāti desanāya niṭṭhāpanaṃ. Aneke vā anusandhiyoti yojetabbaṃ. Samādhi vātiādīsu lokuttaradhammā paramatthato sāsananti tadatthopādakasamādhi tassa ādīti vutto, tadāsannattā vipassanā, tassa mūlabhāvena ekadesattā maggo.
সাসনস্স পারিপূরিসুদ্ধিযো নাম সত্থারা দেসিতনিযামেনেৰ সিদ্ধা, তা পনেত্থ কথেন্তস্স ৰসেন গহেতব্বাতি দস্সেতুং ‘‘অনূনং কত্ৰা দেসেন্তী’’তি, ‘‘নিগ্গণ্ঠিং কত্ৰা দেসেন্তী’’তি চ ৰুত্তং। তত্থ নিজ্জটন্তি নিগ্গুম্বং অনাকুলং। নিগ্গণ্ঠিন্তি গণ্ঠিট্ঠানরহিতং সুৰিঞ্ঞেয্যং কত্ৰা।
Sāsanassa pāripūrisuddhiyo nāma satthārā desitaniyāmeneva siddhā, tā panettha kathentassa vasena gahetabbāti dassetuṃ ‘‘anūnaṃ katvā desentī’’ti, ‘‘niggaṇṭhiṃ katvā desentī’’ti ca vuttaṃ. Tattha nijjaṭanti niggumbaṃ anākulaṃ. Niggaṇṭhinti gaṇṭhiṭṭhānarahitaṃ suviññeyyaṃ katvā.
আকিণ্ণানীতি আকিরিত্ৰা সংকিরিত্ৰা ঠপিতানীতি অত্থো। তেনাহ ‘‘পক্খিত্তানী’’তি। উচ্ছঙ্গো ৰিয উচ্ছঙ্গপঞ্ঞো পুগ্গলো দট্ঠব্বোতি উচ্ছঙ্গসদিসপঞ্ঞতায উচ্ছঙ্গপঞ্ঞো। এৰং পঞ্ঞা ৰিয পুগ্গলোপি উচ্ছঙ্গো ৰিয হোতি, তস্মিং ধম্মানং অচিরট্ঠানতোতি অধিপ্পাযেন ৰুত্তং। যথা চ উচ্ছঙ্গসদিসা পঞ্ঞা, এৰং নিক্কুজ্জকুম্ভসদিসা পঞ্ঞা এৰাতি দট্ঠব্বা।
Ākiṇṇānīti ākiritvā saṃkiritvā ṭhapitānīti attho. Tenāha ‘‘pakkhittānī’’ti. Ucchaṅgo viya ucchaṅgapañño puggalo daṭṭhabboti ucchaṅgasadisapaññatāya ucchaṅgapañño. Evaṃ paññā viya puggalopi ucchaṅgo viya hoti, tasmiṃ dhammānaṃ aciraṭṭhānatoti adhippāyena vuttaṃ. Yathā ca ucchaṅgasadisā paññā, evaṃ nikkujjakumbhasadisā paññā evāti daṭṭhabbā.
সংৰিদহনপঞ্ঞাযাতি ‘‘এৰং কতে ইদং নাম ভৰিস্সতী’’তি এৰং তংতংঅত্থকিচ্চং সংৰিধাতুং সমত্থতায ৰিচারণপঞ্ঞায রহিতো। সেয্যোতি সেট্ঠো পাসংসো। পুব্বভাগপটিপদন্তি চিত্তৰিসুদ্ধিআদিকং অরিযমগ্গস্স অধিগমায পুব্বভাগপটিপত্তিং।
Saṃvidahanapaññāyāti ‘‘evaṃ kate idaṃ nāma bhavissatī’’ti evaṃ taṃtaṃatthakiccaṃ saṃvidhātuṃ samatthatāya vicāraṇapaññāya rahito. Seyyoti seṭṭho pāsaṃso. Pubbabhāgapaṭipadanti cittavisuddhiādikaṃ ariyamaggassa adhigamāya pubbabhāgapaṭipattiṃ.
অৰকুজ্জসুত্তৰণ্ণনা নিট্ঠিতা।
Avakujjasuttavaṇṇanā niṭṭhitā.
পুগ্গলৰগ্গৰণ্ণনা নিট্ঠিতা।
Puggalavaggavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / অঙ্গুত্তরনিকায • Aṅguttaranikāya / ১০. অৰকুজ্জসুত্তং • 10. Avakujjasuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) / ১০. অৰকুজ্জসুত্তৰণ্ণনা • 10. Avakujjasuttavaṇṇanā
