| Library / Tipiṭaka / တိပိဋက • Tipiṭaka / အင္ဂုတ္တရနိကာယ (ဋီကာ) • Aṅguttaranikāya (ṭīkā) |
၁၀. အဝကုဇ္ဇသုတ္တဝဏ္ဏနာ
10. Avakujjasuttavaṇṇanā
၃၀. ဒသမေ အဝကုဇ္ဇပညောတိ နိက္ကုဇ္ဇပညော။ တေနာဟ ‘‘အဓောမုခပညော’’တိ။ ပုဗ္ဗပဋ္ဌပနာတိ ပဌမာရမ္ဘော။ သန္နိဋ္ဌာနန္တိ ကထာပရိယောသာနံ။ အပ္ပနာတိ ဒေသနာယ နိဋ္ဌာပနံ။ အနေကေ ဝာ အနုသန္ဓိယောတိ ယောဇေတဗ္ဗံ။ သမာဓိ ဝာတိအာဒီသု လောကုတ္တရဓမ္မာ ပရမတ္ထတော သာသနန္တိ တဒတ္ထောပာဒကသမာဓိ တသ္သ အာဒီတိ ဝုတ္တော, တဒာသန္နတ္တာ ဝိပသ္သနာ, တသ္သ မူလဘာဝေန ဧကဒေသတ္တာ မဂ္ဂော။
30. Dasame avakujjapaññoti nikkujjapañño. Tenāha ‘‘adhomukhapañño’’ti. Pubbapaṭṭhapanāti paṭhamārambho. Sanniṭṭhānanti kathāpariyosānaṃ. Appanāti desanāya niṭṭhāpanaṃ. Aneke vā anusandhiyoti yojetabbaṃ. Samādhi vātiādīsu lokuttaradhammā paramatthato sāsananti tadatthopādakasamādhi tassa ādīti vutto, tadāsannattā vipassanā, tassa mūlabhāvena ekadesattā maggo.
သာသနသ္သ ပာရိပူရိသုဒ္ဓိယော နာမ သတ္ထာရာ ဒေသိတနိယာမေနေဝ သိဒ္ဓာ, တာ ပနေတ္ထ ကထေန္တသ္သ ဝသေန ဂဟေတဗ္ဗာတိ ဒသ္သေတုံ ‘‘အနူနံ ကတ္ဝာ ဒေသေန္တီ’’တိ, ‘‘နိဂ္ဂဏ္ဌိံ ကတ္ဝာ ဒေသေန္တီ’’တိ စ ဝုတ္တံ။ တတ္ထ နိဇ္ဇဋန္တိ နိဂ္ဂုမ္ဗံ အနာကုလံ။ နိဂ္ဂဏ္ဌိန္တိ ဂဏ္ဌိဋ္ဌာနရဟိတံ သုဝိညေယ္ယံ ကတ္ဝာ။
Sāsanassa pāripūrisuddhiyo nāma satthārā desitaniyāmeneva siddhā, tā panettha kathentassa vasena gahetabbāti dassetuṃ ‘‘anūnaṃ katvā desentī’’ti, ‘‘niggaṇṭhiṃ katvā desentī’’ti ca vuttaṃ. Tattha nijjaṭanti niggumbaṃ anākulaṃ. Niggaṇṭhinti gaṇṭhiṭṭhānarahitaṃ suviññeyyaṃ katvā.
အာကိဏ္ဏာနီတိ အာကိရိတ္ဝာ သံကိရိတ္ဝာ ဌပိတာနီတိ အတ္ထော။ တေနာဟ ‘‘ပက္ခိတ္တာနီ’’တိ။ ဥစ္ဆင္ဂော ဝိယ ဥစ္ဆင္ဂပညော ပုဂ္ဂလော ဒဋ္ဌဗ္ဗောတိ ဥစ္ဆင္ဂသဒိသပညတာယ ဥစ္ဆင္ဂပညော။ ဧဝံ ပညာ ဝိယ ပုဂ္ဂလောပိ ဥစ္ဆင္ဂော ဝိယ ဟောတိ, တသ္မိံ ဓမ္မာနံ အစိရဋ္ဌာနတောတိ အဓိပ္ပာယေန ဝုတ္တံ။ ယထာ စ ဥစ္ဆင္ဂသဒိသာ ပညာ, ဧဝံ နိက္ကုဇ္ဇကုမ္ဘသဒိသာ ပညာ ဧဝာတိ ဒဋ္ဌဗ္ဗာ။
Ākiṇṇānīti ākiritvā saṃkiritvā ṭhapitānīti attho. Tenāha ‘‘pakkhittānī’’ti. Ucchaṅgo viya ucchaṅgapañño puggalo daṭṭhabboti ucchaṅgasadisapaññatāya ucchaṅgapañño. Evaṃ paññā viya puggalopi ucchaṅgo viya hoti, tasmiṃ dhammānaṃ aciraṭṭhānatoti adhippāyena vuttaṃ. Yathā ca ucchaṅgasadisā paññā, evaṃ nikkujjakumbhasadisā paññā evāti daṭṭhabbā.
သံဝိဒဟနပညာယာတိ ‘‘ဧဝံ ကတေ ဣဒံ နာမ ဘဝိသ္သတီ’’တိ ဧဝံ တံတံအတ္ထကိစ္စံ သံဝိဓာတုံ သမတ္ထတာယ ဝိစာရဏပညာယ ရဟိတော။ သေယ္ယောတိ သေဋ္ဌော ပာသံသော။ ပုဗ္ဗဘာဂပဋိပဒန္တိ စိတ္တဝိသုဒ္ဓိအာဒိကံ အရိယမဂ္ဂသ္သ အဓိဂမာယ ပုဗ္ဗဘာဂပဋိပတ္တိံ။
Saṃvidahanapaññāyāti ‘‘evaṃ kate idaṃ nāma bhavissatī’’ti evaṃ taṃtaṃatthakiccaṃ saṃvidhātuṃ samatthatāya vicāraṇapaññāya rahito. Seyyoti seṭṭho pāsaṃso. Pubbabhāgapaṭipadanti cittavisuddhiādikaṃ ariyamaggassa adhigamāya pubbabhāgapaṭipattiṃ.
အဝကုဇ္ဇသုတ္တဝဏ္ဏနာ နိဋ္ဌိတာ။
Avakujjasuttavaṇṇanā niṭṭhitā.
ပုဂ္ဂလဝဂ္ဂဝဏ္ဏနာ နိဋ္ဌိတာ။
Puggalavaggavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / အင္ဂုတ္တရနိကာယ • Aṅguttaranikāya / ၁၀. အဝကုဇ္ဇသုတ္တံ • 10. Avakujjasuttaṃ
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) / ၁၀. အဝကုဇ္ဇသုတ္တဝဏ္ဏနာ • 10. Avakujjasuttavaṇṇanā
