| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) |
10. අවකුජ්‌ජසුත්‌තවණ්‌ණනා
10. Avakujjasuttavaṇṇanā
30. දසමෙ අවකුජ්‌ජපඤ්‌ඤොති අධොමුඛපඤ්‌ඤො. උච්‌ඡඞ්‌ගපඤ්‌ඤොති උච්‌ඡඞ්‌ගසදිසපඤ්‌ඤො. පුථුපඤ්‌ඤොති විත්‌ථාරිකපඤ්‌ඤො. ආදිකල්‍යාණන්‌තිආදීසු ආදීති පුබ්‌බපට්‌ඨපනා. මජ්‌ඣන්‌ති කථාවෙමජ්‌ඣං. පරියොසානන්‌ති සන්‌නිට්‌ඨානං. ඉතිස්‌ස තෙ ධම්‌මං කථෙන්‌තා පුබ්‌බපට්‌ඨපනෙපි කල්‍යාණං භද්‌දකං අනවජ්‌ජමෙව කත්‌වා කථෙන්‌ති, වෙමජ්‌ඣෙපි පරියොසානෙපි. එත්‌ථ ච අත්‌ථි දෙසනාය ආදිමජ්‌ඣපරියොසානානි, අත්‌ථි සාසනස්‌ස. තත්‌ථ දෙසනාය තාව චතුප්‌පදිකගාථාය පඨමපදං ආදි, ද්‌වෙ පදානි මජ්‌ඣං, අවසානපදං පරියොසානං. එකානුසන්‌ධිකස්‌ස සුත්‌තස්‌ස නිදානං ආදි, අනුසන්‌ධි මජ්‌ඣං, ඉදමවොචාති අප්‌පනා පරියොසානං. අනෙකානුසන්‌ධිකස්‌ස පඨමො අනුසන්‌ධි ආදි, තතො පරං එකො වා අනෙකෙ වා මජ්‌ඣං, පච්‌ඡිමො පරියොසානං. අයං තාව දෙසනාය නයො. සාසනස්‌ස පන සීලං ආදි, සමාධි මජ්‌ඣං, විපස්‌සනා පරියොසානං. සමාධි වා ආදි, විපස්‌සනා මජ්‌ඣං, මග්‌ගො පරියොසානං. විපස්‌සනා වා ආදි, මග්‌ගො මජ්‌ඣං, ඵලං පරියොසානං. මග්‌ගො වා ආදි, ඵලං මජ්‌ඣං, නිබ්‌බානං පරියොසානං. ද්‌වෙ ද්‌වෙ වා කයිරමානෙ සීලසමාධයො ආදි, විපස්‌සනාමග්‌ගා මජ්‌ඣං, ඵලනිබ්‌බානානි පරියොසානං.
30. Dasame avakujjapaññoti adhomukhapañño. Ucchaṅgapaññoti ucchaṅgasadisapañño. Puthupaññoti vitthārikapañño. Ādikalyāṇantiādīsu ādīti pubbapaṭṭhapanā. Majjhanti kathāvemajjhaṃ. Pariyosānanti sanniṭṭhānaṃ. Itissa te dhammaṃ kathentā pubbapaṭṭhapanepi kalyāṇaṃ bhaddakaṃ anavajjameva katvā kathenti, vemajjhepi pariyosānepi. Ettha ca atthi desanāya ādimajjhapariyosānāni, atthi sāsanassa. Tattha desanāya tāva catuppadikagāthāya paṭhamapadaṃ ādi, dve padāni majjhaṃ, avasānapadaṃ pariyosānaṃ. Ekānusandhikassa suttassa nidānaṃ ādi, anusandhi majjhaṃ, idamavocāti appanā pariyosānaṃ. Anekānusandhikassa paṭhamo anusandhi ādi, tato paraṃ eko vā aneke vā majjhaṃ, pacchimo pariyosānaṃ. Ayaṃ tāva desanāya nayo. Sāsanassa pana sīlaṃ ādi, samādhi majjhaṃ, vipassanā pariyosānaṃ. Samādhi vā ādi, vipassanā majjhaṃ, maggo pariyosānaṃ. Vipassanā vā ādi, maggo majjhaṃ, phalaṃ pariyosānaṃ. Maggo vā ādi, phalaṃ majjhaṃ, nibbānaṃ pariyosānaṃ. Dve dve vā kayiramāne sīlasamādhayo ādi, vipassanāmaggā majjhaṃ, phalanibbānāni pariyosānaṃ.
සාත්‌ථන්‌ති සාත්‌ථකං කත්‌වා දෙසෙන්‌ති. සබ්‍යඤ්‌ජනන්‌ති අක්‌ඛරපාරිපූරිං කත්‌වා දෙසෙන්‌ති. කෙවලපරිපුණ්‌ණන්‌ති සකලපරිපුණ්‌ණං අනූනං කත්‌වා දෙසෙන්‌ති. පරිසුද්‌ධන්‌ති පරිසුද්‌ධං නිජ්‌ජටං නිග්‌ගණ්‌ඨිං කත්‌වා දෙසෙන්‌ති. බ්‍රහ්‌මචරියං පකාසෙන්‌තීති එවං දෙසෙන්‌තා ච සෙට්‌ඨචරියභූතං සික්‌ඛත්‌තයසඞ්‌ගහිතං අරියං අට්‌ඨඞ්‌ගිකං මග්‌ගං පකාසෙන්‌ති. නෙව ආදිං මනසි කරොතීති නෙව පුබ්‌බපට්‌ඨපනං මනසි කරොති.
Sātthanti sātthakaṃ katvā desenti. Sabyañjananti akkharapāripūriṃ katvā desenti. Kevalaparipuṇṇanti sakalaparipuṇṇaṃ anūnaṃ katvā desenti. Parisuddhanti parisuddhaṃ nijjaṭaṃ niggaṇṭhiṃ katvā desenti. Brahmacariyaṃ pakāsentīti evaṃ desentā ca seṭṭhacariyabhūtaṃ sikkhattayasaṅgahitaṃ ariyaṃ aṭṭhaṅgikaṃ maggaṃ pakāsenti. Neva ādiṃ manasi karotīti neva pubbapaṭṭhapanaṃ manasi karoti.
කුම්‌භොති ඝටො. නිකුජ්‌ජොති අධොමුඛො ඨපිතො. එවමෙව ඛොති එත්‌ථ කුම්‌භො නිකුජ්‌ජො විය අවකුජ්‌ජපඤ්‌ඤො පුග්‌ගලො දට්‌ඨබ්‌බො, උදකාසිඤ්‌චනකාලො විය ධම්‌මදෙසනාය ලද්‌ධකාලො, උදකස්‌ස විවට්‌ටනකාලො විය තස්‌මිං ආසනෙ නිසින්‌නස්‌ස උග්‌ගහෙතුං අසමත්‌ථකාලො, උදකස්‌ස අසණ්‌ඨානකාලො විය වුට්‌ඨහිත්‌වා අසල්‌ලක්‌ඛණකාලො වෙදිතබ්‌බො.
Kumbhoti ghaṭo. Nikujjoti adhomukho ṭhapito. Evameva khoti ettha kumbho nikujjo viya avakujjapañño puggalo daṭṭhabbo, udakāsiñcanakālo viya dhammadesanāya laddhakālo, udakassa vivaṭṭanakālo viya tasmiṃ āsane nisinnassa uggahetuṃ asamatthakālo, udakassa asaṇṭhānakālo viya vuṭṭhahitvā asallakkhaṇakālo veditabbo.
ආකිණ්‌ණානීති පක්‌ඛිත්‌තානි. සතිසම්‌මොසාය පකිරෙය්‍යාති මුට්‌ඨස්‌සතිතාය විකිරෙය්‍ය. එවමෙව ඛොති එත්‌ථ උච්‌ඡඞ්‌ගො විය උච්‌ඡඞ්‌ගපඤ්‌ඤො පුග්‌ගලො දට්‌ඨබ්‌බො, නානාඛජ්‌ජකානි විය නානප්‌පකාරං බුද්‌ධවචනං, උච්‌ඡඞ්‌ගෙ නානාඛජ්‌ජකානි ඛාදන්‌තස්‌ස නිසින්‌නකාලො විය තස්‌මිං ආසනෙ නිසින්‌නස්‌ස උග්‌ගණ්‌හනකාලො, වුට්‌ඨහන්‌තස්‌ස සතිසම්‌මොසා පකිරණකාලො විය තස්‌මා ආසනා වුට්‌ඨාය ගච්‌ඡන්‌තස්‌ස අසල්‌ලක්‌ඛණකාලො වෙදිතබ්‌බො.
Ākiṇṇānīti pakkhittāni. Satisammosāya pakireyyāti muṭṭhassatitāya vikireyya. Evameva khoti ettha ucchaṅgo viya ucchaṅgapañño puggalo daṭṭhabbo, nānākhajjakāni viya nānappakāraṃ buddhavacanaṃ, ucchaṅge nānākhajjakāni khādantassa nisinnakālo viya tasmiṃ āsane nisinnassa uggaṇhanakālo, vuṭṭhahantassa satisammosā pakiraṇakālo viya tasmā āsanā vuṭṭhāya gacchantassa asallakkhaṇakālo veditabbo.
උක්‌කුජ්‌ජොති උපරිමුඛො ඨපිතො. සණ්‌ඨාතීති පතිට්‌ඨහති. එවමෙව ඛොති එත්‌ථ උපරිමුඛො ඨපිතො කුම්‌භො විය පුථුපඤ්‌ඤො පුග්‌ගලො දට්‌ඨබ්‌බො, උදකස්‌ස ආසිත්‌තකාලො විය දෙසනාය ලද්‌ධකාලො, උදකස්‌ස සණ්‌ඨානකාලො විය තත්‌ථ නිසින්‌නස්‌ස උග්‌ගණ්‌හනකාලො, නො විවට්‌ටනකාලො විය වුට්‌ඨාය ගච්‌ඡන්‌තස්‌ස සල්‌ලක්‌ඛණකාලො වෙදිතබ්‌බො.
Ukkujjoti uparimukho ṭhapito. Saṇṭhātīti patiṭṭhahati. Evameva khoti ettha uparimukho ṭhapito kumbho viya puthupañño puggalo daṭṭhabbo, udakassa āsittakālo viya desanāya laddhakālo, udakassa saṇṭhānakālo viya tattha nisinnassa uggaṇhanakālo, no vivaṭṭanakālo viya vuṭṭhāya gacchantassa sallakkhaṇakālo veditabbo.
දුම්‌මෙධොති නිප්‌පඤ්‌ඤො. අවිචක්‌ඛණොති සංවිදහනපඤ්‌ඤාය රහිතො. ගන්‌තාති ගමනසීලො. සෙය්‍යො එතෙන වුච්‌චතීති එතස්‌මා පුග්‌ගලා උත්‌තරිතරොති වුච්‌චති. ධම්‌මානුධම්‌මප්‌පටිපන්‌නොති නවලොකුත්‌තරධම්‌මස්‌ස අනුධම්‌මං සහ සීලෙන පුබ්‌බභාගපටිපදං පටිපන්‌නො. දුක්‌ඛස්‌සාති වට්‌ටදුක්‌ඛස්‌ස. අන්‌තකරො සියාති කොටිකරො පරිච්‌ඡෙදකරො පරිවටුමකරො භවෙය්‍යාති.
Dummedhoti nippañño. Avicakkhaṇoti saṃvidahanapaññāya rahito. Gantāti gamanasīlo. Seyyo etena vuccatīti etasmā puggalā uttaritaroti vuccati. Dhammānudhammappaṭipannoti navalokuttaradhammassa anudhammaṃ saha sīlena pubbabhāgapaṭipadaṃ paṭipanno. Dukkhassāti vaṭṭadukkhassa. Antakaro siyāti koṭikaro paricchedakaro parivaṭumakaro bhaveyyāti.
පුග්‌ගලවග්‌ගො තතියො.
Puggalavaggo tatiyo.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / අඞ්‌ගුත්‌තරනිකාය • Aṅguttaranikāya / 10. අවකුජ්‌ජසුත්‌තං • 10. Avakujjasuttaṃ
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 10. අවකුජ්‌ජසුත්‌තවණ්‌ණනා • 10. Avakujjasuttavaṇṇanā
