| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය (ටීකා) • Aṅguttaranikāya (ṭīkā) |
10. අවකුජ්‌ජසුත්‌තවණ්‌ණනා
10. Avakujjasuttavaṇṇanā
30. දසමෙ අවකුජ්‌ජපඤ්‌ඤොති නික්‌කුජ්‌ජපඤ්‌ඤො. තෙනාහ ‘‘අධොමුඛපඤ්‌ඤො’’ති. පුබ්‌බපට්‌ඨපනාති පඨමාරම්‌භො. සන්‌නිට්‌ඨානන්‌ති කථාපරියොසානං. අප්‌පනාති දෙසනාය නිට්‌ඨාපනං. අනෙකෙ වා අනුසන්‌ධියොති යොජෙතබ්‌බං. සමාධි වාතිආදීසු ලොකුත්‌තරධම්‌මා පරමත්‌ථතො සාසනන්‌ති තදත්‌ථොපාදකසමාධි තස්‌ස ආදීති වුත්‌තො, තදාසන්‌නත්‌තා විපස්‌සනා, තස්‌ස මූලභාවෙන එකදෙසත්‌තා මග්‌ගො.
30. Dasame avakujjapaññoti nikkujjapañño. Tenāha ‘‘adhomukhapañño’’ti. Pubbapaṭṭhapanāti paṭhamārambho. Sanniṭṭhānanti kathāpariyosānaṃ. Appanāti desanāya niṭṭhāpanaṃ. Aneke vā anusandhiyoti yojetabbaṃ. Samādhi vātiādīsu lokuttaradhammā paramatthato sāsananti tadatthopādakasamādhi tassa ādīti vutto, tadāsannattā vipassanā, tassa mūlabhāvena ekadesattā maggo.
සාසනස්‌ස පාරිපූරිසුද්‌ධියො නාම සත්‌ථාරා දෙසිතනියාමෙනෙව සිද්‌ධා, තා පනෙත්‌ථ කථෙන්‌තස්‌ස වසෙන ගහෙතබ්‌බාති දස්‌සෙතුං ‘‘අනූනං කත්‌වා දෙසෙන්‌තී’’ති, ‘‘නිග්‌ගණ්‌ඨිං කත්‌වා දෙසෙන්‌තී’’ති ච වුත්‌තං. තත්‌ථ නිජ්‌ජටන්‌ති නිග්‌ගුම්‌බං අනාකුලං. නිග්‌ගණ්‌ඨින්‌ති ගණ්‌ඨිට්‌ඨානරහිතං සුවිඤ්‌ඤෙය්‍යං කත්‌වා.
Sāsanassa pāripūrisuddhiyo nāma satthārā desitaniyāmeneva siddhā, tā panettha kathentassa vasena gahetabbāti dassetuṃ ‘‘anūnaṃ katvā desentī’’ti, ‘‘niggaṇṭhiṃ katvā desentī’’ti ca vuttaṃ. Tattha nijjaṭanti niggumbaṃ anākulaṃ. Niggaṇṭhinti gaṇṭhiṭṭhānarahitaṃ suviññeyyaṃ katvā.
ආකිණ්‌ණානීති ආකිරිත්‌වා සංකිරිත්‌වා ඨපිතානීති අත්‌ථො. තෙනාහ ‘‘පක්‌ඛිත්‌තානී’’ති. උච්‌ඡඞ්‌ගො විය උච්‌ඡඞ්‌ගපඤ්‌ඤො පුග්‌ගලො දට්‌ඨබ්‌බොති උච්‌ඡඞ්‌ගසදිසපඤ්‌ඤතාය උච්‌ඡඞ්‌ගපඤ්‌ඤො. එවං පඤ්‌ඤා විය පුග්‌ගලොපි උච්‌ඡඞ්‌ගො විය හොති, තස්‌මිං ධම්‌මානං අචිරට්‌ඨානතොති අධිප්‌පායෙන වුත්‌තං. යථා ච උච්‌ඡඞ්‌ගසදිසා පඤ්‌ඤා, එවං නික්‌කුජ්‌ජකුම්‌භසදිසා පඤ්‌ඤා එවාති දට්‌ඨබ්‌බා.
Ākiṇṇānīti ākiritvā saṃkiritvā ṭhapitānīti attho. Tenāha ‘‘pakkhittānī’’ti. Ucchaṅgo viya ucchaṅgapañño puggalo daṭṭhabboti ucchaṅgasadisapaññatāya ucchaṅgapañño. Evaṃ paññā viya puggalopi ucchaṅgo viya hoti, tasmiṃ dhammānaṃ aciraṭṭhānatoti adhippāyena vuttaṃ. Yathā ca ucchaṅgasadisā paññā, evaṃ nikkujjakumbhasadisā paññā evāti daṭṭhabbā.
සංවිදහනපඤ්‌ඤායාති ‘‘එවං කතෙ ඉදං නාම භවිස්‌සතී’’ති එවං තංතංඅත්‌ථකිච්‌චං සංවිධාතුං සමත්‌ථතාය විචාරණපඤ්‌ඤාය රහිතො. සෙය්‍යොති සෙට්‌ඨො පාසංසො. පුබ්‌බභාගපටිපදන්‌ති චිත්‌තවිසුද්‌ධිආදිකං අරියමග්‌ගස්‌ස අධිගමාය පුබ්‌බභාගපටිපත්‌තිං.
Saṃvidahanapaññāyāti ‘‘evaṃ kate idaṃ nāma bhavissatī’’ti evaṃ taṃtaṃatthakiccaṃ saṃvidhātuṃ samatthatāya vicāraṇapaññāya rahito. Seyyoti seṭṭho pāsaṃso. Pubbabhāgapaṭipadanti cittavisuddhiādikaṃ ariyamaggassa adhigamāya pubbabhāgapaṭipattiṃ.
අවකුජ්‌ජසුත්‌තවණ්‌ණනා නිට්‌ඨිතා.
Avakujjasuttavaṇṇanā niṭṭhitā.
පුග්‌ගලවග්‌ගවණ්‌ණනා නිට්‌ඨිතා.
Puggalavaggavaṇṇanā niṭṭhitā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / අඞ්‌ගුත්‌තරනිකාය • Aṅguttaranikāya / 10. අවකුජ්‌ජසුත්‌තං • 10. Avakujjasuttaṃ
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) / 10. අවකුජ්‌ජසුත්‌තවණ්‌ණනා • 10. Avakujjasuttavaṇṇanā
