| Library / Tipiṭaka / ཏིཔིཊཀ • Tipiṭaka / ཨངྒུཏྟརནིཀཱཡ (ཊཱིཀཱ) • Aṅguttaranikāya (ṭīkā) |
༡༠. ཨཝཀུཛྫསུཏྟཝཎྞནཱ
10. Avakujjasuttavaṇṇanā
༣༠. དསམེ ཨཝཀུཛྫཔཉྙོཏི ནིཀྐུཛྫཔཉྙོ། ཏེནཱཧ ‘‘ཨདྷོམུཁཔཉྙོ’’ཏི། པུབྦཔཊྛཔནཱཏི པཋམཱརམྦྷོ། སནྣིཊྛཱནནྟི ཀཐཱཔརིཡོསཱནཾ། ཨཔྤནཱཏི དེསནཱཡ ནིཊྛཱཔནཾ། ཨནེཀེ ཝཱ ཨནུསནྡྷིཡོཏི ཡོཛེཏབྦཾ། སམཱདྷི ཝཱཏིཨཱདཱིསུ ལོཀུཏྟརདྷམྨཱ པརམཏྠཏོ སཱསནནྟི ཏདཏྠོཔཱདཀསམཱདྷི ཏསྶ ཨཱདཱིཏི ཝུཏྟོ, ཏདཱསནྣཏྟཱ ཝིཔསྶནཱ, ཏསྶ མཱུལབྷཱཝེན ཨེཀདེསཏྟཱ མགྒོ།
30. Dasame avakujjapaññoti nikkujjapañño. Tenāha ‘‘adhomukhapañño’’ti. Pubbapaṭṭhapanāti paṭhamārambho. Sanniṭṭhānanti kathāpariyosānaṃ. Appanāti desanāya niṭṭhāpanaṃ. Aneke vā anusandhiyoti yojetabbaṃ. Samādhi vātiādīsu lokuttaradhammā paramatthato sāsananti tadatthopādakasamādhi tassa ādīti vutto, tadāsannattā vipassanā, tassa mūlabhāvena ekadesattā maggo.
སཱསནསྶ པཱརིཔཱུརིསུདྡྷིཡོ ནཱམ སཏྠཱརཱ དེསིཏནིཡཱམེནེཝ སིདྡྷཱ, ཏཱ པནེཏྠ ཀཐེནྟསྶ ཝསེན གཧེཏབྦཱཏི དསྶེཏུཾ ‘‘ཨནཱུནཾ ཀཏྭཱ དེསེནྟཱི’’ཏི, ‘‘ནིགྒཎྛིཾ ཀཏྭཱ དེསེནྟཱི’’ཏི ཙ ཝུཏྟཾ། ཏཏྠ ནིཛྫཊནྟི ནིགྒུམྦཾ ཨནཱཀུལཾ། ནིགྒཎྛིནྟི གཎྛིཊྛཱནརཧིཏཾ སུཝིཉྙེཡྻཾ ཀཏྭཱ།
Sāsanassa pāripūrisuddhiyo nāma satthārā desitaniyāmeneva siddhā, tā panettha kathentassa vasena gahetabbāti dassetuṃ ‘‘anūnaṃ katvā desentī’’ti, ‘‘niggaṇṭhiṃ katvā desentī’’ti ca vuttaṃ. Tattha nijjaṭanti niggumbaṃ anākulaṃ. Niggaṇṭhinti gaṇṭhiṭṭhānarahitaṃ suviññeyyaṃ katvā.
ཨཱཀིཎྞཱནཱིཏི ཨཱཀིརིཏྭཱ སཾཀིརིཏྭཱ ཋཔིཏཱནཱིཏི ཨཏྠོ། ཏེནཱཧ ‘‘པཀྑིཏྟཱནཱི’’ཏི། ཨུཙྪངྒོ ཝིཡ ཨུཙྪངྒཔཉྙོ པུགྒལོ དཊྛབྦོཏི ཨུཙྪངྒསདིསཔཉྙཏཱཡ ཨུཙྪངྒཔཉྙོ། ཨེཝཾ པཉྙཱ ཝིཡ པུགྒལོཔི ཨུཙྪངྒོ ཝིཡ ཧོཏི, ཏསྨིཾ དྷམྨཱནཾ ཨཙིརཊྛཱནཏོཏི ཨདྷིཔྤཱཡེན ཝུཏྟཾ། ཡཐཱ ཙ ཨུཙྪངྒསདིསཱ པཉྙཱ, ཨེཝཾ ནིཀྐུཛྫཀུམྦྷསདིསཱ པཉྙཱ ཨེཝཱཏི དཊྛབྦཱ།
Ākiṇṇānīti ākiritvā saṃkiritvā ṭhapitānīti attho. Tenāha ‘‘pakkhittānī’’ti. Ucchaṅgo viya ucchaṅgapañño puggalo daṭṭhabboti ucchaṅgasadisapaññatāya ucchaṅgapañño. Evaṃ paññā viya puggalopi ucchaṅgo viya hoti, tasmiṃ dhammānaṃ aciraṭṭhānatoti adhippāyena vuttaṃ. Yathā ca ucchaṅgasadisā paññā, evaṃ nikkujjakumbhasadisā paññā evāti daṭṭhabbā.
སཾཝིདཧནཔཉྙཱཡཱཏི ‘‘ཨེཝཾ ཀཏེ ཨིདཾ ནཱམ བྷཝིསྶཏཱི’’ཏི ཨེཝཾ ཏཾཏཾཨཏྠཀིཙྩཾ སཾཝིདྷཱཏུཾ སམཏྠཏཱཡ ཝིཙཱརཎཔཉྙཱཡ རཧིཏོ། སེཡྻོཏི སེཊྛོ པཱསཾསོ། པུབྦབྷཱགཔཊིཔདནྟི ཙིཏྟཝིསུདྡྷིཨཱདིཀཾ ཨརིཡམགྒསྶ ཨདྷིགམཱཡ པུབྦབྷཱགཔཊིཔཏྟིཾ།
Saṃvidahanapaññāyāti ‘‘evaṃ kate idaṃ nāma bhavissatī’’ti evaṃ taṃtaṃatthakiccaṃ saṃvidhātuṃ samatthatāya vicāraṇapaññāya rahito. Seyyoti seṭṭho pāsaṃso. Pubbabhāgapaṭipadanti cittavisuddhiādikaṃ ariyamaggassa adhigamāya pubbabhāgapaṭipattiṃ.
ཨཝཀུཛྫསུཏྟཝཎྞནཱ ནིཊྛིཏཱ།
Avakujjasuttavaṇṇanā niṭṭhitā.
པུགྒལཝགྒཝཎྞནཱ ནིཊྛིཏཱ།
Puggalavaggavaṇṇanā niṭṭhitā.
Related texts:
ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / ཨངྒུཏྟརནིཀཱཡ • Aṅguttaranikāya / ༡༠. ཨཝཀུཛྫསུཏྟཾ • 10. Avakujjasuttaṃ
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / ཨངྒུཏྟརནིཀཱཡ (ཨཊྛཀཐཱ) • Aṅguttaranikāya (aṭṭhakathā) / ༡༠. ཨཝཀུཛྫསུཏྟཝཎྞནཱ • 10. Avakujjasuttavaṇṇanā
