| Library / Tipiṭaka / তিপিটক • Tipiṭaka / পরিৰার-অট্ঠকথা • Parivāra-aṭṭhakathā |
(৪) অৰন্দনীযপুগ্গলাদিৰণ্ণনা
(4) Avandanīyapuggalādivaṇṇanā
৪৭৭. দস পুগ্গলা নাভিৰাদেতব্বাতি সেনাসনক্খন্ধকে ৰুত্তা দস জনা। অঞ্জলি সামীচেন চাতি সামীচিকম্মেন সদ্ধিং অঞ্জলি চ তেসং ন কাতব্বো, নেৰ পানীযাপুচ্ছনতালৰণ্টগ্গহণাদি খন্ধকৰত্তং তেসং দস্সেতব্বং, ন অঞ্জলি পগ্গণ্হিতব্বোতি অত্থো। দসন্নং দুক্কটন্তি তেসংযেৰ দসন্নং এৰং করোন্তস্স দুক্কটং হোতি। দস চীৰরধারণাতি দস দিৰসানি অতিরেকচীৰরস্স ধারণা অনুঞ্ঞাতাতি অত্থো।
477.Dasa puggalā nābhivādetabbāti senāsanakkhandhake vuttā dasa janā. Añjali sāmīcena cāti sāmīcikammena saddhiṃ añjali ca tesaṃ na kātabbo, neva pānīyāpucchanatālavaṇṭaggahaṇādi khandhakavattaṃ tesaṃ dassetabbaṃ, na añjali paggaṇhitabboti attho. Dasannaṃ dukkaṭanti tesaṃyeva dasannaṃ evaṃ karontassa dukkaṭaṃ hoti. Dasa cīvaradhāraṇāti dasa divasāni atirekacīvarassa dhāraṇā anuññātāti attho.
পঞ্চন্নং ৰস্সংৰুট্ঠানং, দাতব্বং ইধ চীৰরন্তি পঞ্চন্নং সহধম্মিকানং সম্মুখাৰ দাতব্বং। সত্তন্নং সন্তেতি দিসাপক্কন্তউম্মত্তকখিত্তচিত্তৰেদনাট্টানং তিণ্ণঞ্চ উক্খিত্তকানন্তি ইমেসং সত্তন্নং সন্তে পতিরূপে গাহকে পরম্মুখাপি দাতব্বং। সোল়সন্নং ন দাতব্বন্তি সেসানং চীৰরক্খন্ধকে ৰুত্তানং পণ্ডকাদীনং সোল়সন্নং ন দাতব্বং।
Pañcannaṃ vassaṃvuṭṭhānaṃ, dātabbaṃ idha cīvaranti pañcannaṃ sahadhammikānaṃ sammukhāva dātabbaṃ. Sattannaṃ santeti disāpakkantaummattakakhittacittavedanāṭṭānaṃ tiṇṇañca ukkhittakānanti imesaṃ sattannaṃ sante patirūpe gāhake parammukhāpi dātabbaṃ. Soḷasannaṃ na dātabbanti sesānaṃ cīvarakkhandhake vuttānaṃ paṇḍakādīnaṃ soḷasannaṃ na dātabbaṃ.
কতিসতং রত্তিসতং, আপত্তিযো ছাদযিত্ৰানাতি কতিসতং আপত্তিযো রত্তিসতং ছাদযিত্ৰান। দসসতং রত্তিসতং, আপত্তিযো ছাদযিত্ৰানাতি দসসতং আপত্তিযো রত্তিসতং ছাদযিত্ৰান। অযঞ্হেত্থ সঙ্খেপত্থো – যো দিৰসে সতং সতং সঙ্ঘাদিসেসাপত্তিযো আপজ্জিত্ৰা দস দস দিৰসে পটিচ্ছাদেতি, তেন রত্তিসতং আপত্তিসহস্সং পটিচ্ছাদিতং হোতি, সো সব্বাৰ তা আপত্তিযো দসাহপটিচ্ছন্নাতি পরিৰাসং যাচিত্ৰা দস রত্তিযো ৰসিত্ৰান মুচ্চেয্য পারিৰাসিকোতি।
Katisataṃ rattisataṃ, āpattiyo chādayitvānāti katisataṃ āpattiyo rattisataṃ chādayitvāna. Dasasataṃ rattisataṃ, āpattiyo chādayitvānāti dasasataṃ āpattiyo rattisataṃ chādayitvāna. Ayañhettha saṅkhepattho – yo divase sataṃ sataṃ saṅghādisesāpattiyo āpajjitvā dasa dasa divase paṭicchādeti, tena rattisataṃ āpattisahassaṃ paṭicchāditaṃ hoti, so sabbāva tā āpattiyo dasāhapaṭicchannāti parivāsaṃ yācitvā dasa rattiyo vasitvāna mucceyya pārivāsikoti.
দ্ৰাদস কম্মদোসা ৰুত্তাতি অপলোকনকম্মং অধম্মেনৰগ্গং, অধম্মেনসমগ্গং, ধম্মেনৰগ্গং, তথা ঞত্তিকম্মঞত্তিদুতিযকম্মঞত্তিচতুত্থকম্মানিপীতি এৰং একেকস্মিং কম্মে তযো তযো কত্ৰা দ্ৰাদস কম্মদোসা ৰুত্তা।
Dvādasa kammadosā vuttāti apalokanakammaṃ adhammenavaggaṃ, adhammenasamaggaṃ, dhammenavaggaṃ, tathā ñattikammañattidutiyakammañatticatutthakammānipīti evaṃ ekekasmiṃ kamme tayo tayo katvā dvādasa kammadosā vuttā.
চতস্সো কম্মসম্পত্তিযোতি অপলোকনকম্মং ধম্মেনসমগ্গং, তথা সেসানিপীতি এৰং চতস্সো কম্মসম্পত্তিযো ৰুত্তা।
Catasso kammasampattiyoti apalokanakammaṃ dhammenasamaggaṃ, tathā sesānipīti evaṃ catasso kammasampattiyo vuttā.
ছ কম্মানীতি অধম্মেনৰগ্গকম্মং, অধম্মেনসমগ্গকম্মং, ধম্মপতিরূপকেনৰগ্গকম্মং, ধম্মপতিরূপকেনসমগ্গকম্মং, ধম্মেনৰগ্গকম্মং, ধম্মেনসমগ্গকম্মন্তি এৰং ছ কম্মানি ৰুত্তানি। একেত্থ ধম্মিকা কতাতি একং ধম্মেন সমগ্গকম্মমেৰেত্থ ধম্মিকং কতন্তি অত্থো। দুতিযগাথাৰিস্সজ্জনেপি এতদেৰ ধম্মিকং।
Cha kammānīti adhammenavaggakammaṃ, adhammenasamaggakammaṃ, dhammapatirūpakenavaggakammaṃ, dhammapatirūpakenasamaggakammaṃ, dhammenavaggakammaṃ, dhammenasamaggakammanti evaṃ cha kammāni vuttāni. Ekettha dhammikā katāti ekaṃ dhammena samaggakammamevettha dhammikaṃ katanti attho. Dutiyagāthāvissajjanepi etadeva dhammikaṃ.
যং দেসিতাতি যানি দেসিতানি ৰুত্তানি পকাসিতানি। অনন্তজিনেনাতিআদীসু পরিযন্তপরিচ্ছেদভাৰরহিতত্তা অনন্তং ৰুচ্চতি নিব্বানং, তং ভগৰতা রঞ্ঞা সপত্তগণং অভিমদ্দিত্ৰা রজ্জং ৰিয কিলেসগণং অভিমদ্দিত্ৰা জিতং ৰিজিতং অধিগতং সম্পত্তং, তস্মা ভগৰা ‘‘অনন্তজিনো’’তি ৰুচ্চতি। স্ৰেৰ ইট্ঠানিট্ঠেসু নিব্বিকারতায তাদি, ৰিক্খম্ভনতদঙ্গসমুচ্ছেদপটিপস্সদ্ধিনিস্সরণৰিৰেকসঙ্খাতং ৰিৰেকপঞ্চকং অদ্দসাতি ৰিৰেকদস্সী; তেন অনন্তজিনেন তাদিনা ৰিৰেকদস্সিনা যানি আপত্তিক্খন্ধানি দেসিতানি ৰুত্তানি। একেত্থ সম্মতি ৰিনা সমথেহীতি অযমেত্থ পদসম্বন্ধো, যানি সত্থারা সত্ত আপত্তিক্খন্ধানি দেসিতানি, তত্থ একাপি আপত্তি ৰিনা সমথেহি ন সম্মতি, অথ খো ছ সমথা চত্তারি অধিকরণানীতি সব্বেপিমে ধম্মা সম্মুখাৰিনযেন সম্মন্তি, সমাযোগং গচ্ছন্তি। এত্থ পন একো সম্মুখাৰিনযোৰ ৰিনা সমথেহি সম্মতি, সমথভাৰং গচ্ছতি। ন হি তস্স অঞ্ঞেন সমথেন ৰিনা অনিপ্ফত্তি নাম অত্থি। তেন ৰুত্তং – ‘‘একেত্থ সম্মতি ৰিনা সমথেহী’’তি। ইমিনা তাৰ অধিপ্পাযেন অট্ঠকথাসু অত্থো ৰুত্তো। মযং পন ‘‘ৰিনা’’তি নিপাতস্স পটিসেধনমত্তমত্থং গহেত্ৰা ‘‘একেত্থ সম্মতি ৰিনা সমথেহী’’তি এতেসু সত্তসু আপত্তিক্খন্ধেসু একো পারাজিকাপত্তিক্খন্ধো ৰিনা সমথেহি সম্মতীতি এতমত্থং রোচেয্যাম। ৰুত্তম্পি চেতং ‘‘যা সা আপত্তি অনৰসেসা, সা আপত্তি ন কতমেন অধিকরণেন কতমম্হি ঠানে ন কতমেন সমথেন সম্মতী’’তি।
Yaṃ desitāti yāni desitāni vuttāni pakāsitāni. Anantajinenātiādīsu pariyantaparicchedabhāvarahitattā anantaṃ vuccati nibbānaṃ, taṃ bhagavatā raññā sapattagaṇaṃ abhimadditvā rajjaṃ viya kilesagaṇaṃ abhimadditvā jitaṃ vijitaṃ adhigataṃ sampattaṃ, tasmā bhagavā ‘‘anantajino’’ti vuccati. Sveva iṭṭhāniṭṭhesu nibbikāratāya tādi, vikkhambhanatadaṅgasamucchedapaṭipassaddhinissaraṇavivekasaṅkhātaṃ vivekapañcakaṃ addasāti vivekadassī; tena anantajinena tādinā vivekadassinā yāni āpattikkhandhāni desitāni vuttāni. Ekettha sammati vinā samathehīti ayamettha padasambandho, yāni satthārā satta āpattikkhandhāni desitāni, tattha ekāpi āpatti vinā samathehi na sammati, atha kho cha samathā cattāri adhikaraṇānīti sabbepime dhammā sammukhāvinayena sammanti, samāyogaṃ gacchanti. Ettha pana eko sammukhāvinayova vinā samathehi sammati, samathabhāvaṃ gacchati. Na hi tassa aññena samathena vinā anipphatti nāma atthi. Tena vuttaṃ – ‘‘ekettha sammati vinā samathehī’’ti. Iminā tāva adhippāyena aṭṭhakathāsu attho vutto. Mayaṃ pana ‘‘vinā’’ti nipātassa paṭisedhanamattamatthaṃ gahetvā ‘‘ekettha sammati vinā samathehī’’ti etesu sattasu āpattikkhandhesu eko pārājikāpattikkhandho vinā samathehi sammatīti etamatthaṃ roceyyāma. Vuttampi cetaṃ ‘‘yā sā āpatti anavasesā, sā āpatti na katamena adhikaraṇena katamamhi ṭhāne na katamena samathena sammatī’’ti.
ছঊনদিযড্ঢসতাতি ‘‘ইধ, উপালি, ভিক্খু অধম্মং ধম্মোতি দীপেতি, তস্মিং অধম্মদিট্ঠি ভেদে অধম্মদিট্ঠি, তস্মিং অধম্মদিট্ঠি ভেদে ধম্মদিট্ঠি, তস্মিং অধম্মদিট্ঠি ভেদে ৰেমতিকো, তস্মিং ধম্মদিট্ঠি ভেদে অধম্মদিট্ঠি, তস্মিং ধম্মদিট্ঠি ভেদে ৰেমতিকো, তস্মিং ৰেমতিকো ভেদে অধম্মদিট্ঠি, তস্মিং ৰেমতিকো ভেদে ধম্মদিট্ঠি, তস্মিং ৰেমতিকো ভেদে ৰেমতিকো’’তি এৰং যানি অট্ঠারসন্নং ভেদকরৰত্থূনং ৰসেন অট্ঠারস অট্ঠকানি সঙ্ঘভেদকক্খন্ধকে ৰুত্তানি, তেসং ৰসেন ছঊনদিযড্ঢসতং আপাযিকা ৰেদিতব্বা।
Chaūnadiyaḍḍhasatāti ‘‘idha, upāli, bhikkhu adhammaṃ dhammoti dīpeti, tasmiṃ adhammadiṭṭhi bhede adhammadiṭṭhi, tasmiṃ adhammadiṭṭhi bhede dhammadiṭṭhi, tasmiṃ adhammadiṭṭhi bhede vematiko, tasmiṃ dhammadiṭṭhi bhede adhammadiṭṭhi, tasmiṃ dhammadiṭṭhi bhede vematiko, tasmiṃ vematiko bhede adhammadiṭṭhi, tasmiṃ vematiko bhede dhammadiṭṭhi, tasmiṃ vematiko bhede vematiko’’ti evaṃ yāni aṭṭhārasannaṃ bhedakaravatthūnaṃ vasena aṭṭhārasa aṭṭhakāni saṅghabhedakakkhandhake vuttāni, tesaṃ vasena chaūnadiyaḍḍhasataṃ āpāyikā veditabbā.
অট্ঠারস অনাপাযিকাতি ‘‘ইধ, উপালি, ভিক্খু অধম্মং ধম্মোতি দীপেতি, তস্মিং ধম্মদিট্ঠি ভেদে ধম্মদিট্ঠি অৰিনিধায দিট্ঠিং অৰিনিধায খন্তিং অৰিনিধায রুচিং অৰিনিধায ভাৰং অনুস্সাৰেতি, সলাকং গাহেতি ‘অযং ধম্মো, অযং ৰিনযো, ইদং সত্থুসাসনং, ইমং গণ্হথ, ইমং রোচেথা’তি, অযম্পি খো, উপালি, সঙ্ঘভেদকো ন আপাযিকো ন নেরযিকো ন কপ্পট্ঠো ন অতেকিচ্ছো’’তি এৰং একেকস্মিং ৰত্থুস্মিং একেকং কত্ৰা সঙ্ঘভেদকক্খন্ধকাৰসানে ৰুত্তা অট্ঠারস জনা। অট্ঠারস অট্ঠকা ছঊনদিযড্ঢসতৰিস্সজ্জনে ৰুত্তাযেৰ।
Aṭṭhārasa anāpāyikāti ‘‘idha, upāli, bhikkhu adhammaṃ dhammoti dīpeti, tasmiṃ dhammadiṭṭhi bhede dhammadiṭṭhi avinidhāya diṭṭhiṃ avinidhāya khantiṃ avinidhāya ruciṃ avinidhāya bhāvaṃ anussāveti, salākaṃ gāheti ‘ayaṃ dhammo, ayaṃ vinayo, idaṃ satthusāsanaṃ, imaṃ gaṇhatha, imaṃ rocethā’ti, ayampi kho, upāli, saṅghabhedako na āpāyiko na nerayiko na kappaṭṭho na atekiccho’’ti evaṃ ekekasmiṃ vatthusmiṃ ekekaṃ katvā saṅghabhedakakkhandhakāvasāne vuttā aṭṭhārasa janā. Aṭṭhārasa aṭṭhakā chaūnadiyaḍḍhasatavissajjane vuttāyeva.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / পরিৰারপাল়ি • Parivārapāḷi / ৪. অৰন্দনীযপুগ্গলাদি • 4. Avandanīyapuggalādi
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / অৰন্দনীযপুগ্গলাদিৰণ্ণনা • Avandanīyapuggalādivaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / অৰন্দনীযপুগ্গলাদিৰণ্ণনা • Avandanīyapuggalādivaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / (৪) অৰন্দনীযপুগ্গলাদিৰণ্ণনা • (4) Avandanīyapuggalādivaṇṇanā
