| Library / Tipiṭaka / ཏིཔིཊཀ • Tipiṭaka / པཱཙིཏྱཱདིཡོཛནཱཔཱལི༹ • Pācityādiyojanāpāḷi |
(༤) ཨཝནྡནཱིཡཔུགྒལཱདིཝཎྞནཱ
(4) Avandanīyapuggalādivaṇṇanā
༤༧༧. ཏེསནྟི དསནྣཾ པུགྒལཱནཾ། ‘‘སདྡྷི’’ནྟི ཨིམིནཱ སཱམཱིཙེནཱཏི ཨེཏྠ སཧཏྠེ ཀརཎཝཙནནྟི དསྶེཏི། སཱམཱིཙེནཱཏི ཙ སཱམཱིཙིནཱ ཀཏྟབྦཾ སཱམཱིཙཾ ཀམྨཾ, ཏེན སཱམཱིཙེན། དས ཙཱིཝརདྷཱརཎཱཏི པདསྶ སམཱསབྷཱཝཾ པཊིཀྑིཔནྟོ ཨཱཧ ‘‘དས དིཝསཱནི ཨཏིརེཀཙཱིཝརསྶ དྷཱརཎཱ’’ཏི།
477.Tesanti dasannaṃ puggalānaṃ. ‘‘Saddhi’’nti iminā sāmīcenāti ettha sahatthe karaṇavacananti dasseti. Sāmīcenāti ca sāmīcinā kattabbaṃ sāmīcaṃ kammaṃ, tena sāmīcena. Dasa cīvaradhāraṇāti padassa samāsabhāvaṃ paṭikkhipanto āha ‘‘dasa divasāni atirekacīvarassa dhāraṇā’’ti.
ཀཏིསཏནྟིཨཱདཱིསུ དྭཱིསུ གཱཐཱཔཱདེསུ ཙཏཱུསུ ཝིབྷཏྱནྟཔདེསུ པུརིམཾ པུརིམེན, པཙྪིམཉྩ པཙྪིམེན ཡཐཱཀྐམཾ ཡོཛེཏབྦནྟི དསྶེནྟོ ཨཱཧ ‘‘ཀཏིསཏཾ ཨཱཔཏྟིཡོ རཏྟིསཏཾ ཚཱདཡིཏྭཱནཱ’’ཏི། པཙྪིམགཱཐཱཡ པུབྦཌྜྷེཔི ཨེསེཝ ནཡོ། ཨཡཾ ཧཱིཏི ཨཡཾ ཨེཝ ཝཀྑམཱནོ། ཨེཏྠཱཏི གཱཐཱཡཾ། ཡོཏི བྷིཀྑུ, པཊིཙྪཱདེཏཱིཏི སམྦནྡྷོ། ཨིཏཱིཏི ཨཡཾ སངྑེཔཏྠོ།
Katisatantiādīsu dvīsu gāthāpādesu catūsu vibhatyantapadesu purimaṃ purimena, pacchimañca pacchimena yathākkamaṃ yojetabbanti dassento āha ‘‘katisataṃ āpattiyo rattisataṃ chādayitvānā’’ti. Pacchimagāthāya pubbaḍḍhepi eseva nayo. Ayaṃ hīti ayaṃ eva vakkhamāno. Etthāti gāthāyaṃ. Yoti bhikkhu, paṭicchādetīti sambandho. Itīti ayaṃ saṅkhepattho.
ཧེཊྛཱ ཝུཏྟེསུ ཙཏཱུསུ ཙཏུཀྐེསུ དྷམྨེན སམགྒཾ ཨཔནེཏྭཱ དྭཱདས ཀམྨདོསཱ ཝུཏྟཱཏི དཊྛབྦཾ། ཨདྷམྨེན ཝགྒཀམྨཾ, ཨདྷམྨེན སམགྒཀམྨནྟི ཡོཛེཏབྦཾ།
Heṭṭhā vuttesu catūsu catukkesu dhammena samaggaṃ apanetvā dvādasa kammadosā vuttāti daṭṭhabbaṃ. Adhammena vaggakammaṃ, adhammena samaggakammanti yojetabbaṃ.
ཨེཏྠཱཏི ཚསུ ཀམྨེསུ། ཨེཏདེཝཱཏི དྷམྨེན སམགྒཀམྨམེཝ།
Etthāti chasu kammesu. Etadevāti dhammena samaggakammameva.
ཡཾ དེསིཏཱཏི ཨེཏྠ ཡཾསདྡོ ཝཙནཝིཔལླཱསོཏི ཨཱཧ ‘‘ཡཱནི དེསིཏཱནཱི’’ཏི། ‘‘དེསིཏཱནཱི’’ཏི ཨིམིནཱ དེསིཏཱཏི ཨེཏྠ ནིཀཱརསྶ ཨཱཀཱརཱདེསབྷཱཝཾ དསྶེཏི། ‘‘པརིཡནྟཔརིཙྪེདབྷཱཝརཧིཏཏྟཱ’’ཏི ཨིམིནཱ ནཏྠི ཨནྟཾ པརིཡནྟམེཏསྶཱཏི ཨནནྟནྟི ཝཙནཏྠཾ དསྶེཏི། ཏནྟི ནིབྦཱནཾ, ཛིཏནྟི སམྦནྡྷོ། ཀེན ཀཾ ཀིནྟི ཀཏྭཱ ཛིཏནྟི ཨཱཧ ‘‘བྷགཝཏཱ ཀིལེསགཎཾ ཨབྷིམདྡིཏྭཱ’’ཏི། ཀེན ཀཾ ཀིནྟི ཀཏྭཱ ཀིཾ ཛིཏཾ ཝིཡཱཏི ཨཱཧ ‘‘རཉྙཱ སཔཏྟགཎཾ ཨབྷིམདྡིཏྭཱ རཛྫཾ ཝིཡཱ’’ཏི། ཏཏྠ ‘‘རཉྙཱ’’ཏི ཨིམིནཱ ‘‘ཀེནཱ’’ཏི པུཙྪཾ ཝིསྶཛྫེསི། ‘‘སཔཏྟགཎ’’ནྟི ཨིམིནཱ ‘‘ཀ’’ནྟི པུཙྪཾ ཝིསྶཛྫེསི། ‘‘ཨབྷིམདྡིཏྭཱ’’ཏི ཨིམིནཱ ‘‘ཀིནྟི ཀཏྭཱ’’ཏི པུཙྪཾ ཝིསྶཛྫེསི། ‘‘རཛྫ’’ནྟི ཨིམིནཱ ‘‘ཀི’’ནྟི པུཙྪཾ ཝིསྶཛྫེསི། སཔཏྟགཎནྟི ཝེརིགཎཾ། ཨཡཾ པནེཏྠ ཡོཛནཱ – རཉྙཱ སཔཏྟགཎཾ ཨབྷིམདྡིཏྭཱ རཛྫཾ རཱཛབྷཱཝཾ ཛིཏཾ ཝིཡ, བྷགཝཏཱ ཀིལེསགཎཾ ཨབྷིམདྡིཏྭཱ ནིབྦཱནཾ ཛིཏནྟི། སྭེཝཱཏི བྷགཝཱ ཨེཝ། ‘‘ནིབྦིཀཱརཏཱཡཱ’’ཏི ཨིམིནཱ ཏཱདིསདྡོ ནིབྦིཀཱརཏྠཝཱཙཀོ ཨནིཔྥནྣཔཱཊིཔདིཀོཏི དསྶེཏི། ‘‘ཝིཝེཀཔཉྩཀ’’ནྟི ཨིམིནཱ ཀཱཡཙིཏྟཨུཔདྷིཝསེན ཝིཝེཀཏྟཡམྤི གཧེཏབྦཾ ཝིཝེཀབྷཱཝེན སམཱནཏྟཱ། ཏེན བྷགཝཏཱཏི སམྦནྡྷོ། ‘‘ཡཱནི སཏྟ ཨཱཔཏྟིཀྑནྡྷཱནཱི’’ཏི ཨིམིནཱ ཨེཀེཏྠཱཏི ཨེཏྠ ཨེཀསདྡསྶ ཝིསཡཾ དསྶེཏི། ཏཏྠཱཏི སཏྟསུ ཨཱཔཏྟིཀྑནྡྷེསུ། ཨེཏྠ པནཱཏི སམཐེསུ པན། ཧཱིཏི སཙྩཾ། ཏསྶཱཏི སམྨུཁཱཝིནཡསྶ། ཨཊྛཀཐཱསཱུཏི སབྦཨཊྛཀཐཱསུ། མཡཾ པནཱཏི སངྒཧཀཱརཀཱ ཨམྷེ པན, བུདྡྷགྷོསནཱམཀཱ མཡཾ པནཱཏི ཨཏྠོ, རོཙཡཱམཱཏི སམྦནྡྷོ། ཀསྶ ཀིམཏྠཾ གཧེཏྭཱ རོཙེསཱིཏི ཨཱཧ ‘‘ཝིནཱཏི ནིཔཱཏསྶ པཊིསེདྷནམཏྠམཏྟ’’ནྟི། ‘‘ཝིནཱཏི ནིཔཱཏསྶཱ’’ཏི པདཾ ‘‘ཨཏྠམཏྟ’’ནྟི པདེ ཝཱཙཀསམྦནྡྷོ། ཨཏྟནོ སཱདྷྱཝཙནཾ བུདྡྷཝཙནསངྑཱཏེན སཱདྷཀཝཙནེན སཱདྷེནྟོ ཨཱཧ ‘‘ཝུཏྟམྤི ཙེཏ’’ནྟིཨཱདི།
Yaṃ desitāti ettha yaṃsaddo vacanavipallāsoti āha ‘‘yāni desitānī’’ti. ‘‘Desitānī’’ti iminā desitāti ettha nikārassa ākārādesabhāvaṃ dasseti. ‘‘Pariyantaparicchedabhāvarahitattā’’ti iminā natthi antaṃ pariyantametassāti anantanti vacanatthaṃ dasseti. Tanti nibbānaṃ, jitanti sambandho. Kena kaṃ kinti katvā jitanti āha ‘‘bhagavatā kilesagaṇaṃ abhimadditvā’’ti. Kena kaṃ kinti katvā kiṃ jitaṃ viyāti āha ‘‘raññā sapattagaṇaṃ abhimadditvā rajjaṃ viyā’’ti. Tattha ‘‘raññā’’ti iminā ‘‘kenā’’ti pucchaṃ vissajjesi. ‘‘Sapattagaṇa’’nti iminā ‘‘ka’’nti pucchaṃ vissajjesi. ‘‘Abhimadditvā’’ti iminā ‘‘kinti katvā’’ti pucchaṃ vissajjesi. ‘‘Rajja’’nti iminā ‘‘ki’’nti pucchaṃ vissajjesi. Sapattagaṇanti verigaṇaṃ. Ayaṃ panettha yojanā – raññā sapattagaṇaṃ abhimadditvā rajjaṃ rājabhāvaṃ jitaṃ viya, bhagavatā kilesagaṇaṃ abhimadditvā nibbānaṃ jitanti. Svevāti bhagavā eva. ‘‘Nibbikāratāyā’’ti iminā tādisaddo nibbikāratthavācako anipphannapāṭipadikoti dasseti. ‘‘Vivekapañcaka’’nti iminā kāyacittaupadhivasena vivekattayampi gahetabbaṃ vivekabhāvena samānattā. Tena bhagavatāti sambandho. ‘‘Yāni satta āpattikkhandhānī’’ti iminā eketthāti ettha ekasaddassa visayaṃ dasseti. Tatthāti sattasu āpattikkhandhesu. Ettha panāti samathesu pana. Hīti saccaṃ. Tassāti sammukhāvinayassa. Aṭṭhakathāsūti sabbaaṭṭhakathāsu. Mayaṃ panāti saṅgahakārakā amhe pana, buddhaghosanāmakā mayaṃ panāti attho, rocayāmāti sambandho. Kassa kimatthaṃ gahetvā rocesīti āha ‘‘vināti nipātassa paṭisedhanamatthamatta’’nti. ‘‘Vināti nipātassā’’ti padaṃ ‘‘atthamatta’’nti pade vācakasambandho. Attano sādhyavacanaṃ buddhavacanasaṅkhātena sādhakavacanena sādhento āha ‘‘vuttampi ceta’’ntiādi.
ཨཊྛཱརས ཨཊྛཀཱནཱིཏི ཨདྷམྨདིཊྛིབྷེད, དྷམྨདིཊྛིབྷེད, ཝེམཏིཀབྷེདེསུ ཏཱིསུ ཨེཀམེཀཾ མཱུལཾ ཀཏྭཱ ཏཡོ ཏཡོ མཱུལིཾ ཀཏྭཱ ནཝ ཧོནྟི, ཏེསུ དྷམྨདིཊྛིབྷེདེསུ དྷམྨདིཊྛིབྷེདཾ ཨཔནེཏྭཱ ཨཊྛ ཧོནྟི, ཏཱནི ཨཊྛཱརས བྷེདཀརཝཏྠཱུསུ ཡོཛེཏྭཱ ཨཊྛཱརས ཨཊྛཀཱནི ཧོནྟཱིཏི དཊྛབྦཾ། ཚཨཱུནདིཡཌྜྷསཏནྟི ཙཏུཙཏྟཱལཱིསཱདྷིཀཾ སཏནྟི ཝུཏྟཾ ཧོཏི།
Aṭṭhārasa aṭṭhakānīti adhammadiṭṭhibheda, dhammadiṭṭhibheda, vematikabhedesu tīsu ekamekaṃ mūlaṃ katvā tayo tayo mūliṃ katvā nava honti, tesu dhammadiṭṭhibhedesu dhammadiṭṭhibhedaṃ apanetvā aṭṭha honti, tāni aṭṭhārasa bhedakaravatthūsu yojetvā aṭṭhārasa aṭṭhakāni hontīti daṭṭhabbaṃ. Chaūnadiyaḍḍhasatanti catucattālīsādhikaṃ satanti vuttaṃ hoti.
ཨེཀེཀཝཏྠུསྨིནྟི ཨཊྛཱརསསུ བྷེདཀརཝཏྠཱུསུ ཨེཀེཀསྨིཾ ཝཏྠུསྨིཾ།
Ekekavatthusminti aṭṭhārasasu bhedakaravatthūsu ekekasmiṃ vatthusmiṃ.
ཨིཏི གཱཐཱསངྒཎིཀཝཎྞནཱཡ ཡོཛནཱ སམཏྟཱ།
Iti gāthāsaṅgaṇikavaṇṇanāya yojanā samattā.
Related texts:
ཏིཔིཊཀ (མཱུལ) • Tipiṭaka (Mūla) / ཝིནཡཔིཊཀ • Vinayapiṭaka / པརིཝཱརཔཱལི༹ • Parivārapāḷi / ༤. ཨཝནྡནཱིཡཔུགྒལཱདི • 4. Avandanīyapuggalādi
ཨཊྛཀཐཱ • Aṭṭhakathā / ཝིནཡཔིཊཀ (ཨཊྛཀཐཱ) • Vinayapiṭaka (aṭṭhakathā) / པརིཝཱར-ཨཊྛཀཐཱ • Parivāra-aṭṭhakathā / (༤) ཨཝནྡནཱིཡཔུགྒལཱདིཝཎྞནཱ • (4) Avandanīyapuggalādivaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝཛིརབུདྡྷི-ཊཱིཀཱ • Vajirabuddhi-ṭīkā / ཨཝནྡནཱིཡཔུགྒལཱདིཝཎྞནཱ • Avandanīyapuggalādivaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝིམཏིཝིནོདནཱི-ཊཱིཀཱ • Vimativinodanī-ṭīkā / ཨཝནྡནཱིཡཔུགྒལཱདིཝཎྞནཱ • Avandanīyapuggalādivaṇṇanā
