| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
8. ஆவரணனீவரணஸுத்தங்
8. Āvaraṇanīvaraṇasuttaṃ
219. ‘‘பஞ்சிமே, பி⁴க்க²வே, ஆவரணா நீவரணா சேதஸோ உபக்கிலேஸா பஞ்ஞாய து³ப்³ப³லீகரணா. கதமே பஞ்ச? காமச்ச²ந்தோ³, பி⁴க்க²வே, ஆவரணோ நீவரணோ சேதஸோ உபக்கிலேஸோ பஞ்ஞாய து³ப்³ப³லீகரணோ. ப்³யாபாதோ³, பி⁴க்க²வே, ஆவரணோ நீவரணோ சேதஸோ உபக்கிலேஸோ பஞ்ஞாய து³ப்³ப³லீகரணோ. தி²னமித்³த⁴ங், பி⁴க்க²வே, ஆவரணங் நீவரணங் சேதஸோ உபக்கிலேஸங் பஞ்ஞாய து³ப்³ப³லீகரணங். உத்³த⁴ச்சகுக்குச்சங் , பி⁴க்க²வே, ஆவரணங் நீவரணங் சேதஸோ உபக்கிலேஸங் பஞ்ஞாய து³ப்³ப³லீகரணங். விசிகிச்சா², பி⁴க்க²வே, ஆவரணா நீவரணா சேதஸோ உபக்கிலேஸா பஞ்ஞாய து³ப்³ப³லீகரணா. இமே கோ², பி⁴க்க²வே, பஞ்ச ஆவரணா நீவரணா சேதஸோ உபக்கிலேஸா பஞ்ஞாய து³ப்³ப³லீகரணா.
219. ‘‘Pañcime, bhikkhave, āvaraṇā nīvaraṇā cetaso upakkilesā paññāya dubbalīkaraṇā. Katame pañca? Kāmacchando, bhikkhave, āvaraṇo nīvaraṇo cetaso upakkileso paññāya dubbalīkaraṇo. Byāpādo, bhikkhave, āvaraṇo nīvaraṇo cetaso upakkileso paññāya dubbalīkaraṇo. Thinamiddhaṃ, bhikkhave, āvaraṇaṃ nīvaraṇaṃ cetaso upakkilesaṃ paññāya dubbalīkaraṇaṃ. Uddhaccakukkuccaṃ , bhikkhave, āvaraṇaṃ nīvaraṇaṃ cetaso upakkilesaṃ paññāya dubbalīkaraṇaṃ. Vicikicchā, bhikkhave, āvaraṇā nīvaraṇā cetaso upakkilesā paññāya dubbalīkaraṇā. Ime kho, bhikkhave, pañca āvaraṇā nīvaraṇā cetaso upakkilesā paññāya dubbalīkaraṇā.
‘‘ஸத்திமே , பி⁴க்க²வே, பொ³ஜ்ஜ²ங்கா³ அனாவரணா அனீவரணா சேதஸோ அனுபக்கிலேஸா பா⁴விதா ப³ஹுலீகதா விஜ்ஜாவிமுத்திப²லஸச்சி²கிரியாய ஸங்வத்தந்தி. கதமே ஸத்த? ஸதிஸம்பொ³ஜ்ஜ²ங்கோ³, பி⁴க்க²வே, அனாவரணோ அனீவரணோ சேதஸோ அனுபக்கிலேஸோ பா⁴விதோ ப³ஹுலீகதோ விஜ்ஜாவிமுத்திப²லஸச்சி²கிரியாய ஸங்வத்ததி…பே॰… உபெக்கா²ஸம்பொ³ஜ்ஜ²ங்கோ³, பி⁴க்க²வே, அனாவரணோ அனீவரணோ சேதஸோ அனுபக்கிலேஸோ பா⁴விதோ ப³ஹுலீகதோ விஜ்ஜாவிமுத்திப²லஸச்சி²கிரியாய ஸங்வத்ததி. இமே கோ², பி⁴க்க²வே, ஸத்த பொ³ஜ்ஜ²ங்கா³ அனாவரணா அனீவரணா சேதஸோ அனுபக்கிலேஸா பா⁴விதா ப³ஹுலீகதா விஜ்ஜாவிமுத்திப²லஸச்சி²கிரியாய ஸங்வத்தந்தீதி.
‘‘Sattime , bhikkhave, bojjhaṅgā anāvaraṇā anīvaraṇā cetaso anupakkilesā bhāvitā bahulīkatā vijjāvimuttiphalasacchikiriyāya saṃvattanti. Katame satta? Satisambojjhaṅgo, bhikkhave, anāvaraṇo anīvaraṇo cetaso anupakkileso bhāvito bahulīkato vijjāvimuttiphalasacchikiriyāya saṃvattati…pe… upekkhāsambojjhaṅgo, bhikkhave, anāvaraṇo anīvaraṇo cetaso anupakkileso bhāvito bahulīkato vijjāvimuttiphalasacchikiriyāya saṃvattati. Ime kho, bhikkhave, satta bojjhaṅgā anāvaraṇā anīvaraṇā cetaso anupakkilesā bhāvitā bahulīkatā vijjāvimuttiphalasacchikiriyāya saṃvattantīti.
‘‘யஸ்மிங், பி⁴க்க²வே, ஸமயே அரியஸாவகோ அட்டி²ங் கத்வா மனஸி கத்வா ஸப்³ப³ங் சேதஸோ ஸமன்னாஹரித்வா ஓஹிதஸோதோ த⁴ம்மங் ஸுணாதி, இமஸ்ஸ பஞ்ச நீவரணா தஸ்மிங் ஸமயே ந ஹொந்தி. ஸத்த பொ³ஜ்ஜ²ங்கா³ தஸ்மிங் ஸமயே பா⁴வனாபாரிபூரிங் க³ச்ச²ந்தி.
‘‘Yasmiṃ, bhikkhave, samaye ariyasāvako aṭṭhiṃ katvā manasi katvā sabbaṃ cetaso samannāharitvā ohitasoto dhammaṃ suṇāti, imassa pañca nīvaraṇā tasmiṃ samaye na honti. Satta bojjhaṅgā tasmiṃ samaye bhāvanāpāripūriṃ gacchanti.
‘‘கதமே பஞ்ச நீவரணா தஸ்மிங் ஸமயே ந ஹொந்தி? காமச்ச²ந்த³னீவரணங் தஸ்மிங் ஸமயே ந ஹோதி, ப்³யாபாத³னீவரணங் தஸ்மிங் ஸமயே ந ஹோதி, தி²னமித்³த⁴னீவரணங் தஸ்மிங் ஸமயே ந ஹோதி, உத்³த⁴ச்சகுக்குச்சனீவரணங் தஸ்மிங் ஸமயே ந ஹோதி, விசிகிச்சா²னீவரணங் தஸ்மிங் ஸமயே ந ஹோதி. இமஸ்ஸ பஞ்ச நீவரணா தஸ்மிங் ஸமயே ந ஹொந்தி.
‘‘Katame pañca nīvaraṇā tasmiṃ samaye na honti? Kāmacchandanīvaraṇaṃ tasmiṃ samaye na hoti, byāpādanīvaraṇaṃ tasmiṃ samaye na hoti, thinamiddhanīvaraṇaṃ tasmiṃ samaye na hoti, uddhaccakukkuccanīvaraṇaṃ tasmiṃ samaye na hoti, vicikicchānīvaraṇaṃ tasmiṃ samaye na hoti. Imassa pañca nīvaraṇā tasmiṃ samaye na honti.
‘‘கதமே ஸத்த பொ³ஜ்ஜ²ங்கா³ தஸ்மிங் ஸமயே பா⁴வனாபாரிபூரிங் க³ச்ச²ந்தி ? ஸதிஸம்பொ³ஜ்ஜ²ங்கோ³ தஸ்மிங் ஸமயே பா⁴வனாபாரிபூரிங் க³ச்ச²தி…பே॰… உபெக்கா²ஸம்பொ³ஜ்ஜ²ங்கோ³ தஸ்மிங் ஸமயே பா⁴வனாபாரிபூரிங் க³ச்ச²தி. இமே ஸத்த பொ³ஜ்ஜ²ங்கா³ தஸ்மிங் ஸமயே பா⁴வனாபாரிபூரிங் க³ச்ச²ந்தி. யஸ்மிங் , பி⁴க்க²வே, ஸமயே அரியஸாவகோ அட்டி²ங் கத்வா மனஸி கத்வா ஸப்³ப³ங் சேதஸோ ஸமன்னாஹரித்வா ஓஹிதஸோதோ த⁴ம்மங் ஸுணாதி, இமஸ்ஸ பஞ்ச நீவரணா தஸ்மிங் ஸமயே ந ஹொந்தி. இமே ஸத்த பொ³ஜ்ஜ²ங்கா³ தஸ்மிங் ஸமயே பா⁴வனாபாரிபூரிங் க³ச்ச²ந்தீ’’தி. அட்ட²மங்.
‘‘Katame satta bojjhaṅgā tasmiṃ samaye bhāvanāpāripūriṃ gacchanti ? Satisambojjhaṅgo tasmiṃ samaye bhāvanāpāripūriṃ gacchati…pe… upekkhāsambojjhaṅgo tasmiṃ samaye bhāvanāpāripūriṃ gacchati. Ime satta bojjhaṅgā tasmiṃ samaye bhāvanāpāripūriṃ gacchanti. Yasmiṃ , bhikkhave, samaye ariyasāvako aṭṭhiṃ katvā manasi katvā sabbaṃ cetaso samannāharitvā ohitasoto dhammaṃ suṇāti, imassa pañca nīvaraṇā tasmiṃ samaye na honti. Ime satta bojjhaṅgā tasmiṃ samaye bhāvanāpāripūriṃ gacchantī’’ti. Aṭṭhamaṃ.
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 8. ஆவரணனீவரணஸுத்தவண்ணனா • 8. Āvaraṇanīvaraṇasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 8. ஆவரணனீவரணஸுத்தவண்ணனா • 8. Āvaraṇanīvaraṇasuttavaṇṇanā
