| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
৮. আৰরণনীৰরণসুত্তং
8. Āvaraṇanīvaraṇasuttaṃ
২১৯. ‘‘পঞ্চিমে, ভিক্খৰে, আৰরণা নীৰরণা চেতসো উপক্কিলেসা পঞ্ঞায দুব্বলীকরণা। কতমে পঞ্চ? কামচ্ছন্দো, ভিক্খৰে, আৰরণো নীৰরণো চেতসো উপক্কিলেসো পঞ্ঞায দুব্বলীকরণো। ব্যাপাদো, ভিক্খৰে, আৰরণো নীৰরণো চেতসো উপক্কিলেসো পঞ্ঞায দুব্বলীকরণো। থিনমিদ্ধং, ভিক্খৰে, আৰরণং নীৰরণং চেতসো উপক্কিলেসং পঞ্ঞায দুব্বলীকরণং। উদ্ধচ্চকুক্কুচ্চং , ভিক্খৰে, আৰরণং নীৰরণং চেতসো উপক্কিলেসং পঞ্ঞায দুব্বলীকরণং। ৰিচিকিচ্ছা, ভিক্খৰে, আৰরণা নীৰরণা চেতসো উপক্কিলেসা পঞ্ঞায দুব্বলীকরণা। ইমে খো, ভিক্খৰে, পঞ্চ আৰরণা নীৰরণা চেতসো উপক্কিলেসা পঞ্ঞায দুব্বলীকরণা।
219. ‘‘Pañcime, bhikkhave, āvaraṇā nīvaraṇā cetaso upakkilesā paññāya dubbalīkaraṇā. Katame pañca? Kāmacchando, bhikkhave, āvaraṇo nīvaraṇo cetaso upakkileso paññāya dubbalīkaraṇo. Byāpādo, bhikkhave, āvaraṇo nīvaraṇo cetaso upakkileso paññāya dubbalīkaraṇo. Thinamiddhaṃ, bhikkhave, āvaraṇaṃ nīvaraṇaṃ cetaso upakkilesaṃ paññāya dubbalīkaraṇaṃ. Uddhaccakukkuccaṃ , bhikkhave, āvaraṇaṃ nīvaraṇaṃ cetaso upakkilesaṃ paññāya dubbalīkaraṇaṃ. Vicikicchā, bhikkhave, āvaraṇā nīvaraṇā cetaso upakkilesā paññāya dubbalīkaraṇā. Ime kho, bhikkhave, pañca āvaraṇā nīvaraṇā cetaso upakkilesā paññāya dubbalīkaraṇā.
‘‘সত্তিমে , ভিক্খৰে, বোজ্ঝঙ্গা অনাৰরণা অনীৰরণা চেতসো অনুপক্কিলেসা ভাৰিতা বহুলীকতা ৰিজ্জাৰিমুত্তিফলসচ্ছিকিরিযায সংৰত্তন্তি। কতমে সত্ত? সতিসম্বোজ্ঝঙ্গো, ভিক্খৰে, অনাৰরণো অনীৰরণো চেতসো অনুপক্কিলেসো ভাৰিতো বহুলীকতো ৰিজ্জাৰিমুত্তিফলসচ্ছিকিরিযায সংৰত্ততি…পে॰… উপেক্খাসম্বোজ্ঝঙ্গো, ভিক্খৰে, অনাৰরণো অনীৰরণো চেতসো অনুপক্কিলেসো ভাৰিতো বহুলীকতো ৰিজ্জাৰিমুত্তিফলসচ্ছিকিরিযায সংৰত্ততি। ইমে খো, ভিক্খৰে, সত্ত বোজ্ঝঙ্গা অনাৰরণা অনীৰরণা চেতসো অনুপক্কিলেসা ভাৰিতা বহুলীকতা ৰিজ্জাৰিমুত্তিফলসচ্ছিকিরিযায সংৰত্তন্তীতি।
‘‘Sattime , bhikkhave, bojjhaṅgā anāvaraṇā anīvaraṇā cetaso anupakkilesā bhāvitā bahulīkatā vijjāvimuttiphalasacchikiriyāya saṃvattanti. Katame satta? Satisambojjhaṅgo, bhikkhave, anāvaraṇo anīvaraṇo cetaso anupakkileso bhāvito bahulīkato vijjāvimuttiphalasacchikiriyāya saṃvattati…pe… upekkhāsambojjhaṅgo, bhikkhave, anāvaraṇo anīvaraṇo cetaso anupakkileso bhāvito bahulīkato vijjāvimuttiphalasacchikiriyāya saṃvattati. Ime kho, bhikkhave, satta bojjhaṅgā anāvaraṇā anīvaraṇā cetaso anupakkilesā bhāvitā bahulīkatā vijjāvimuttiphalasacchikiriyāya saṃvattantīti.
‘‘যস্মিং, ভিক্খৰে, সমযে অরিযসাৰকো অট্ঠিং কত্ৰা মনসি কত্ৰা সব্বং চেতসো সমন্নাহরিত্ৰা ওহিতসোতো ধম্মং সুণাতি, ইমস্স পঞ্চ নীৰরণা তস্মিং সমযে ন হোন্তি। সত্ত বোজ্ঝঙ্গা তস্মিং সমযে ভাৰনাপারিপূরিং গচ্ছন্তি।
‘‘Yasmiṃ, bhikkhave, samaye ariyasāvako aṭṭhiṃ katvā manasi katvā sabbaṃ cetaso samannāharitvā ohitasoto dhammaṃ suṇāti, imassa pañca nīvaraṇā tasmiṃ samaye na honti. Satta bojjhaṅgā tasmiṃ samaye bhāvanāpāripūriṃ gacchanti.
‘‘কতমে পঞ্চ নীৰরণা তস্মিং সমযে ন হোন্তি? কামচ্ছন্দনীৰরণং তস্মিং সমযে ন হোতি, ব্যাপাদনীৰরণং তস্মিং সমযে ন হোতি, থিনমিদ্ধনীৰরণং তস্মিং সমযে ন হোতি, উদ্ধচ্চকুক্কুচ্চনীৰরণং তস্মিং সমযে ন হোতি, ৰিচিকিচ্ছানীৰরণং তস্মিং সমযে ন হোতি। ইমস্স পঞ্চ নীৰরণা তস্মিং সমযে ন হোন্তি।
‘‘Katame pañca nīvaraṇā tasmiṃ samaye na honti? Kāmacchandanīvaraṇaṃ tasmiṃ samaye na hoti, byāpādanīvaraṇaṃ tasmiṃ samaye na hoti, thinamiddhanīvaraṇaṃ tasmiṃ samaye na hoti, uddhaccakukkuccanīvaraṇaṃ tasmiṃ samaye na hoti, vicikicchānīvaraṇaṃ tasmiṃ samaye na hoti. Imassa pañca nīvaraṇā tasmiṃ samaye na honti.
‘‘কতমে সত্ত বোজ্ঝঙ্গা তস্মিং সমযে ভাৰনাপারিপূরিং গচ্ছন্তি ? সতিসম্বোজ্ঝঙ্গো তস্মিং সমযে ভাৰনাপারিপূরিং গচ্ছতি…পে॰… উপেক্খাসম্বোজ্ঝঙ্গো তস্মিং সমযে ভাৰনাপারিপূরিং গচ্ছতি। ইমে সত্ত বোজ্ঝঙ্গা তস্মিং সমযে ভাৰনাপারিপূরিং গচ্ছন্তি। যস্মিং , ভিক্খৰে, সমযে অরিযসাৰকো অট্ঠিং কত্ৰা মনসি কত্ৰা সব্বং চেতসো সমন্নাহরিত্ৰা ওহিতসোতো ধম্মং সুণাতি, ইমস্স পঞ্চ নীৰরণা তস্মিং সমযে ন হোন্তি। ইমে সত্ত বোজ্ঝঙ্গা তস্মিং সমযে ভাৰনাপারিপূরিং গচ্ছন্তী’’তি। অট্ঠমং।
‘‘Katame satta bojjhaṅgā tasmiṃ samaye bhāvanāpāripūriṃ gacchanti ? Satisambojjhaṅgo tasmiṃ samaye bhāvanāpāripūriṃ gacchati…pe… upekkhāsambojjhaṅgo tasmiṃ samaye bhāvanāpāripūriṃ gacchati. Ime satta bojjhaṅgā tasmiṃ samaye bhāvanāpāripūriṃ gacchanti. Yasmiṃ , bhikkhave, samaye ariyasāvako aṭṭhiṃ katvā manasi katvā sabbaṃ cetaso samannāharitvā ohitasoto dhammaṃ suṇāti, imassa pañca nīvaraṇā tasmiṃ samaye na honti. Ime satta bojjhaṅgā tasmiṃ samaye bhāvanāpāripūriṃ gacchantī’’ti. Aṭṭhamaṃ.
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৮. আৰরণনীৰরণসুত্তৰণ্ণনা • 8. Āvaraṇanīvaraṇasuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ৮. আৰরণনীৰরণসুত্তৰণ্ণনা • 8. Āvaraṇanīvaraṇasuttavaṇṇanā
