| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
8. ආවරණනීවරණසුත්‌තං
8. Āvaraṇanīvaraṇasuttaṃ
219. ‘‘පඤ්‌චිමෙ, භික්‌ඛවෙ, ආවරණා නීවරණා චෙතසො උපක්‌කිලෙසා පඤ්‌ඤාය දුබ්‌බලීකරණා. කතමෙ පඤ්‌ච? කාමච්‌ඡන්‌දො, භික්‌ඛවෙ, ආවරණො නීවරණො චෙතසො උපක්‌කිලෙසො පඤ්‌ඤාය දුබ්‌බලීකරණො. බ්‍යාපාදො, භික්‌ඛවෙ, ආවරණො නීවරණො චෙතසො උපක්‌කිලෙසො පඤ්‌ඤාය දුබ්‌බලීකරණො. ථිනමිද්‌ධං, භික්‌ඛවෙ, ආවරණං නීවරණං චෙතසො උපක්‌කිලෙසං පඤ්‌ඤාය දුබ්‌බලීකරණං. උද්‌ධච්‌චකුක්‌කුච්‌චං , භික්‌ඛවෙ, ආවරණං නීවරණං චෙතසො උපක්‌කිලෙසං පඤ්‌ඤාය දුබ්‌බලීකරණං. විචිකිච්‌ඡා, භික්‌ඛවෙ, ආවරණා නීවරණා චෙතසො උපක්‌කිලෙසා පඤ්‌ඤාය දුබ්‌බලීකරණා. ඉමෙ ඛො, භික්‌ඛවෙ, පඤ්‌ච ආවරණා නීවරණා චෙතසො උපක්‌කිලෙසා පඤ්‌ඤාය දුබ්‌බලීකරණා.
219. ‘‘Pañcime, bhikkhave, āvaraṇā nīvaraṇā cetaso upakkilesā paññāya dubbalīkaraṇā. Katame pañca? Kāmacchando, bhikkhave, āvaraṇo nīvaraṇo cetaso upakkileso paññāya dubbalīkaraṇo. Byāpādo, bhikkhave, āvaraṇo nīvaraṇo cetaso upakkileso paññāya dubbalīkaraṇo. Thinamiddhaṃ, bhikkhave, āvaraṇaṃ nīvaraṇaṃ cetaso upakkilesaṃ paññāya dubbalīkaraṇaṃ. Uddhaccakukkuccaṃ , bhikkhave, āvaraṇaṃ nīvaraṇaṃ cetaso upakkilesaṃ paññāya dubbalīkaraṇaṃ. Vicikicchā, bhikkhave, āvaraṇā nīvaraṇā cetaso upakkilesā paññāya dubbalīkaraṇā. Ime kho, bhikkhave, pañca āvaraṇā nīvaraṇā cetaso upakkilesā paññāya dubbalīkaraṇā.
‘‘සත්‌තිමෙ , භික්‌ඛවෙ, බොජ්‌ඣඞ්‌ගා අනාවරණා අනීවරණා චෙතසො අනුපක්‌කිලෙසා භාවිතා බහුලීකතා විජ්‌ජාවිමුත්‌තිඵලසච්‌ඡිකිරියාය සංවත්‌තන්‌ති. කතමෙ සත්‌ත? සතිසම්‌බොජ්‌ඣඞ්‌ගො, භික්‌ඛවෙ, අනාවරණො අනීවරණො චෙතසො අනුපක්‌කිලෙසො භාවිතො බහුලීකතො විජ්‌ජාවිමුත්‌තිඵලසච්‌ඡිකිරියාය සංවත්‌තති…පෙ.… උපෙක්‌ඛාසම්‌බොජ්‌ඣඞ්‌ගො, භික්‌ඛවෙ, අනාවරණො අනීවරණො චෙතසො අනුපක්‌කිලෙසො භාවිතො බහුලීකතො විජ්‌ජාවිමුත්‌තිඵලසච්‌ඡිකිරියාය සංවත්‌තති. ඉමෙ ඛො, භික්‌ඛවෙ, සත්‌ත බොජ්‌ඣඞ්‌ගා අනාවරණා අනීවරණා චෙතසො අනුපක්‌කිලෙසා භාවිතා බහුලීකතා විජ්‌ජාවිමුත්‌තිඵලසච්‌ඡිකිරියාය සංවත්‌තන්‌තීති.
‘‘Sattime , bhikkhave, bojjhaṅgā anāvaraṇā anīvaraṇā cetaso anupakkilesā bhāvitā bahulīkatā vijjāvimuttiphalasacchikiriyāya saṃvattanti. Katame satta? Satisambojjhaṅgo, bhikkhave, anāvaraṇo anīvaraṇo cetaso anupakkileso bhāvito bahulīkato vijjāvimuttiphalasacchikiriyāya saṃvattati…pe… upekkhāsambojjhaṅgo, bhikkhave, anāvaraṇo anīvaraṇo cetaso anupakkileso bhāvito bahulīkato vijjāvimuttiphalasacchikiriyāya saṃvattati. Ime kho, bhikkhave, satta bojjhaṅgā anāvaraṇā anīvaraṇā cetaso anupakkilesā bhāvitā bahulīkatā vijjāvimuttiphalasacchikiriyāya saṃvattantīti.
‘‘යස්‌මිං, භික්‌ඛවෙ, සමයෙ අරියසාවකො අට්‌ඨිං කත්‌වා මනසි කත්‌වා සබ්‌බං චෙතසො සමන්‌නාහරිත්‌වා ඔහිතසොතො ධම්‌මං සුණාති, ඉමස්‌ස පඤ්‌ච නීවරණා තස්‌මිං සමයෙ න හොන්‌ති. සත්‌ත බොජ්‌ඣඞ්‌ගා තස්‌මිං සමයෙ භාවනාපාරිපූරිං ගච්‌ඡන්‌ති.
‘‘Yasmiṃ, bhikkhave, samaye ariyasāvako aṭṭhiṃ katvā manasi katvā sabbaṃ cetaso samannāharitvā ohitasoto dhammaṃ suṇāti, imassa pañca nīvaraṇā tasmiṃ samaye na honti. Satta bojjhaṅgā tasmiṃ samaye bhāvanāpāripūriṃ gacchanti.
‘‘කතමෙ පඤ්‌ච නීවරණා තස්‌මිං සමයෙ න හොන්‌ති? කාමච්‌ඡන්‌දනීවරණං තස්‌මිං සමයෙ න හොති, බ්‍යාපාදනීවරණං තස්‌මිං සමයෙ න හොති, ථිනමිද්‌ධනීවරණං තස්‌මිං සමයෙ න හොති, උද්‌ධච්‌චකුක්‌කුච්‌චනීවරණං තස්‌මිං සමයෙ න හොති, විචිකිච්‌ඡානීවරණං තස්‌මිං සමයෙ න හොති. ඉමස්‌ස පඤ්‌ච නීවරණා තස්‌මිං සමයෙ න හොන්‌ති.
‘‘Katame pañca nīvaraṇā tasmiṃ samaye na honti? Kāmacchandanīvaraṇaṃ tasmiṃ samaye na hoti, byāpādanīvaraṇaṃ tasmiṃ samaye na hoti, thinamiddhanīvaraṇaṃ tasmiṃ samaye na hoti, uddhaccakukkuccanīvaraṇaṃ tasmiṃ samaye na hoti, vicikicchānīvaraṇaṃ tasmiṃ samaye na hoti. Imassa pañca nīvaraṇā tasmiṃ samaye na honti.
‘‘කතමෙ සත්‌ත බොජ්‌ඣඞ්‌ගා තස්‌මිං සමයෙ භාවනාපාරිපූරිං ගච්‌ඡන්‌ති ? සතිසම්‌බොජ්‌ඣඞ්‌ගො තස්‌මිං සමයෙ භාවනාපාරිපූරිං ගච්‌ඡති…පෙ.… උපෙක්‌ඛාසම්‌බොජ්‌ඣඞ්‌ගො තස්‌මිං සමයෙ භාවනාපාරිපූරිං ගච්‌ඡති. ඉමෙ සත්‌ත බොජ්‌ඣඞ්‌ගා තස්‌මිං සමයෙ භාවනාපාරිපූරිං ගච්‌ඡන්‌ති. යස්‌මිං , භික්‌ඛවෙ, සමයෙ අරියසාවකො අට්‌ඨිං කත්‌වා මනසි කත්‌වා සබ්‌බං චෙතසො සමන්‌නාහරිත්‌වා ඔහිතසොතො ධම්‌මං සුණාති, ඉමස්‌ස පඤ්‌ච නීවරණා තස්‌මිං සමයෙ න හොන්‌ති. ඉමෙ සත්‌ත බොජ්‌ඣඞ්‌ගා තස්‌මිං සමයෙ භාවනාපාරිපූරිං ගච්‌ඡන්‌තී’’ති. අට්‌ඨමං.
‘‘Katame satta bojjhaṅgā tasmiṃ samaye bhāvanāpāripūriṃ gacchanti ? Satisambojjhaṅgo tasmiṃ samaye bhāvanāpāripūriṃ gacchati…pe… upekkhāsambojjhaṅgo tasmiṃ samaye bhāvanāpāripūriṃ gacchati. Ime satta bojjhaṅgā tasmiṃ samaye bhāvanāpāripūriṃ gacchanti. Yasmiṃ , bhikkhave, samaye ariyasāvako aṭṭhiṃ katvā manasi katvā sabbaṃ cetaso samannāharitvā ohitasoto dhammaṃ suṇāti, imassa pañca nīvaraṇā tasmiṃ samaye na honti. Ime satta bojjhaṅgā tasmiṃ samaye bhāvanāpāripūriṃ gacchantī’’ti. Aṭṭhamaṃ.
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 8. ආවරණනීවරණසුත්‌තවණ්‌ණනා • 8. Āvaraṇanīvaraṇasuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 8. ආවරණනීවරණසුත්‌තවණ්‌ණනා • 8. Āvaraṇanīvaraṇasuttavaṇṇanā
