| Library / Tipiṭaka / তিপিটক • Tipiṭaka / সংযুত্তনিকায (অট্ঠকথা) • Saṃyuttanikāya (aṭṭhakathā) |
৮. আৰরণনীৰরণসুত্তৰণ্ণনা
8. Āvaraṇanīvaraṇasuttavaṇṇanā
২১৯. অট্ঠমে পঞ্ঞায দুব্বলীকরণাতি পঞ্ঞায মন্দভাৰকরা। নীৰরণানঞ্হি অভিণ্হুপ্পাদে সতি অন্তরন্তরা উপ্পজ্জমানা পঞ্ঞা দুব্বলা হোতি মন্দা অৰিসদা।
219. Aṭṭhame paññāya dubbalīkaraṇāti paññāya mandabhāvakarā. Nīvaraṇānañhi abhiṇhuppāde sati antarantarā uppajjamānā paññā dubbalā hoti mandā avisadā.
পঞ্চ নীৰরণা তস্মিং সমযে ন হোন্তি। সত্তবোজ্ঝঙ্গা তস্মিং সমযে ভাৰনাপারিপূরিং গচ্ছন্তীতি অরিযসাৰকস্স হি সপ্পাযধম্মস্সৰনং সুণন্তস্স পঞ্চ নীৰরণা দূরে হোন্তি। সো সচে তস্মিংযেৰ ঠানে ৰিসেসং নিব্বত্তেতুং সক্কোতি, এৰমস্স সত্ত বোজ্ঝঙ্গা ভাৰনাপারিপূরিং গচ্ছন্তি। নো চে সক্কোতি, ততো ৰুট্ঠায রত্তিট্ঠানদিৰাট্ঠানং গতো তমেৰ পীতিং অৰিজহন্তো পঞ্চ নীৰরণে ৰিক্খম্ভেত্ৰা ৰিসেসং নিব্বত্তেস্সতি। তত্থ অসক্কোন্তোপি যাৰ সত্তদিৰসব্ভন্তরা তমেৰ পীতিং অৰিজহন্তো নীৰরণে ৰিক্খম্ভেত্ৰা ৰিসেসং নিব্বত্তেস্সতীতি ইদং সন্ধাযেতং ৰুত্তং। ধম্মস্সৰনৰসেন সকিং পীতিপামোজ্জপক্খিযা পটিলদ্ধবোজ্ঝঙ্গা হি কম্মারামতাদীনি আগম্ম নস্সন্তি, তথারূপং পন উতুসপ্পাযাদিং লভিত্ৰা পুন উপ্পজ্জন্তাপি তস্মিং সমযে ভাৰনাপারিপূরিং গচ্ছন্তি ইচ্চেৰ ৰুচ্চতি।
Pañca nīvaraṇā tasmiṃ samaye na honti. Sattabojjhaṅgā tasmiṃ samaye bhāvanāpāripūriṃ gacchantīti ariyasāvakassa hi sappāyadhammassavanaṃ suṇantassa pañca nīvaraṇā dūre honti. So sace tasmiṃyeva ṭhāne visesaṃ nibbattetuṃ sakkoti, evamassa satta bojjhaṅgā bhāvanāpāripūriṃ gacchanti. No ce sakkoti, tato vuṭṭhāya rattiṭṭhānadivāṭṭhānaṃ gato tameva pītiṃ avijahanto pañca nīvaraṇe vikkhambhetvā visesaṃ nibbattessati. Tattha asakkontopi yāva sattadivasabbhantarā tameva pītiṃ avijahanto nīvaraṇe vikkhambhetvā visesaṃ nibbattessatīti idaṃ sandhāyetaṃ vuttaṃ. Dhammassavanavasena sakiṃ pītipāmojjapakkhiyā paṭiladdhabojjhaṅgā hi kammārāmatādīni āgamma nassanti, tathārūpaṃ pana utusappāyādiṃ labhitvā puna uppajjantāpi tasmiṃ samaye bhāvanāpāripūriṃ gacchanti icceva vuccati.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya / ৮. আৰরণনীৰরণসুত্তং • 8. Āvaraṇanīvaraṇasuttaṃ
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ৮. আৰরণনীৰরণসুত্তৰণ্ণনা • 8. Āvaraṇanīvaraṇasuttavaṇṇanā
