| Library / Tipiṭaka / តិបិដក • Tipiṭaka / សំយុត្តនិកាយ (ដីកា) • Saṃyuttanikāya (ṭīkā) |
៨. អាវរណនីវរណសុត្តវណ្ណនា
8. Āvaraṇanīvaraṇasuttavaṇṇanā
២១៩. បញ្ញា ទុព្ពលា ហោតិ, ន ពលវតី បដិបក្ខេន ឧបក្កិលិដ្ឋភាវតោ។ តេនាហ ‘‘មន្ទា អវិសទា’’តិ។
219.Paññādubbalā hoti, na balavatī paṭipakkhena upakkiliṭṭhabhāvato. Tenāha ‘‘mandā avisadā’’ti.
បញ្ច នីវរណា ទូរេ ហោន្តិ អាវរណាភាវតោ។ តមេវ បីតិន្តិ សប្បាយធម្មសវនេ ឧប្បន្នំ បីតិំ។ តស្សា តទា ឧប្បន្នាការសល្លក្ខណេន អវិជហន្តោ បុនប្បុនំ តស្សា និព្ពត្តនេន។ តេនាហ ‘‘បញ្ច នីវរណេ វិក្ខម្ភេត្វា’’តិ។ ឥទំ សន្ធាយាតិ ឯត្តកេ ទិវសេបិ ន វិនស្សន្តិ, សា ធម្មបីតិ លទ្ធបច្ចយា ហុត្វា វិសេសាវហាតិ ឥមមត្ថំ សន្ធាយ ឯតំ ‘‘ឥមស្ស បញ្ច នីវរណា តស្មិំ សមយេ ន ហោន្តី’’តិអាទិ វុត្តំ។ បីតិបាមោជ្ជបក្ខិយាតិ បីតិបាមោជ្ជបច្ចយា។ នស្សន្តីតិ និរោធបច្ចយវសេន បវត្តនតោ នស្សន្តិ។ សភាគបច្ចយវសេន បុន ឧប្បជ្ជន្តាបិ…បេ.… វុច្ចតិ កិច្ចសាធនវសេន បវត្តនតោ។
Pañca nīvaraṇā dūre honti āvaraṇābhāvato. Tameva pītinti sappāyadhammasavane uppannaṃ pītiṃ. Tassā tadā uppannākārasallakkhaṇena avijahanto punappunaṃ tassā nibbattanena. Tenāha ‘‘pañca nīvaraṇe vikkhambhetvā’’ti. Idaṃ sandhāyāti ettake divasepi na vinassanti, sā dhammapīti laddhapaccayā hutvā visesāvahāti imamatthaṃ sandhāya etaṃ ‘‘imassa pañca nīvaraṇā tasmiṃ samaye na hontī’’tiādi vuttaṃ. Pītipāmojjapakkhiyāti pītipāmojjapaccayā. Nassantīti nirodhapaccayavasena pavattanato nassanti. Sabhāgapaccayavasena puna uppajjantāpi…pe… vuccati kiccasādhanavasena pavattanato.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / សំយុត្តនិកាយ • Saṃyuttanikāya / ៨. អាវរណនីវរណសុត្តំ • 8. Āvaraṇanīvaraṇasuttaṃ
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / សំយុត្តនិកាយ (អដ្ឋកថា) • Saṃyuttanikāya (aṭṭhakathā) / ៨. អាវរណនីវរណសុត្តវណ្ណនា • 8. Āvaraṇanīvaraṇasuttavaṇṇanā
