| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
2. து³தியபண்ணாஸகங்
2. Dutiyapaṇṇāsakaṃ
(6) 1. நீவரணவக்³கோ³
(6) 1. Nīvaraṇavaggo
1-2. ஆவரணஸுத்தாதி³வண்ணனா
1-2. Āvaraṇasuttādivaṇṇanā
51-52. து³தியஸ்ஸ பட²மே ஆவரந்தீதி ஆவரணா, நீவாரயந்தீதி நீவரணா. எத்த² ச ஆவரந்தீதி குஸலத⁴ம்முப்பத்திங் ஆதி³தோ பரிவாரெந்தி. நீவாரயந்தீதி நிரவஸேஸதோ வாரயந்தீதி அத்தோ², தஸ்மா ஆவரணவஸேனாதி ஆதி³தோ குஸலுப்பத்திவாரணவஸேன. நீவரணவஸேனாதி நிரவஸேஸதோ வாரணவஸேனாதி ஏவமெத்த² அத்தோ² த³ட்ட²ப்³போ³. யஸ்மா பஞ்ச நீவரணா உப்பஜ்ஜமானா அனுப்பன்னாய லோகியலோகுத்தராய பஞ்ஞாய உப்பஜ்ஜிதுங் ந தெ³ந்தி, உப்பன்னாபி அட்ட² ஸமாபத்தியோ பஞ்ச வா அபி⁴ஞ்ஞா உபச்சி²ந்தி³த்வா பாதெந்தி, தஸ்மா ‘‘பஞ்ஞாய து³ப்³ப³லீகரணா’’தி வுச்சந்தி. உபச்சி²ந்த³னங் பாதனஞ்செத்த² தாஸங் பஞ்ஞானங் அனுப்பன்னானங் உப்பஜ்ஜிதுங் அப்பதா³னமேவ. இதி மஹக்³க³தானுத்தரபஞ்ஞானங் ஏகச்சாய ச பரித்தபஞ்ஞாய அனுப்பத்திஹேதுபூ⁴தா நீவரணத⁴ம்மா இதராஸங் ஸமத்த²தங் விஹனந்தியேவாதி பஞ்ஞாய து³ப்³ப³லீகரணா வுத்தா. பா⁴வனாமனஸிகாரேன வினா பகதியா மனுஸ்ஸேஹி நிப்³ப³த்தேதப்³போ³ த⁴ம்மோதி மனுஸ்ஸத⁴ம்மோ, மனுஸ்ஸத்தபா⁴வாவஹோ வா த⁴ம்மோ மனுஸ்ஸத⁴ம்மோ, அனுளாரங் பரித்தகுஸலங். யங் அஸதிபி பு³த்³து⁴ப்பாதே³ வத்ததி, யஞ்ச ஸந்தா⁴யாஹ ‘‘ஹீனேன ப்³ரஹ்மசரியேன, க²த்தியே உபபஜ்ஜதீ’’தி (ஜா॰ 1.8.75). அலங் அரியாய அரியபா⁴வாயாதி அலமரியோ, அரியபா⁴வாய ஸமத்தோ²தி வுத்தங் ஹோதி. ஞாணத³ஸ்ஸனமேவ ஞாணத³ஸ்ஸனவிஸேஸோ, அலமரியோ ச ஸோ ஞாணத³ஸ்ஸனவிஸேஸோ சாதி அலமரியஞாணத³ஸ்ஸனவிஸேஸோ.
51-52. Dutiyassa paṭhame āvarantīti āvaraṇā, nīvārayantīti nīvaraṇā. Ettha ca āvarantīti kusaladhammuppattiṃ ādito parivārenti. Nīvārayantīti niravasesato vārayantīti attho, tasmā āvaraṇavasenāti ādito kusaluppattivāraṇavasena. Nīvaraṇavasenāti niravasesato vāraṇavasenāti evamettha attho daṭṭhabbo. Yasmā pañca nīvaraṇā uppajjamānā anuppannāya lokiyalokuttarāya paññāya uppajjituṃ na denti, uppannāpi aṭṭha samāpattiyo pañca vā abhiññā upacchinditvā pātenti, tasmā ‘‘paññāya dubbalīkaraṇā’’ti vuccanti. Upacchindanaṃ pātanañcettha tāsaṃ paññānaṃ anuppannānaṃ uppajjituṃ appadānameva. Iti mahaggatānuttarapaññānaṃ ekaccāya ca parittapaññāya anuppattihetubhūtā nīvaraṇadhammā itarāsaṃ samatthataṃ vihanantiyevāti paññāya dubbalīkaraṇā vuttā. Bhāvanāmanasikārena vinā pakatiyā manussehi nibbattetabbo dhammoti manussadhammo, manussattabhāvāvaho vā dhammo manussadhammo, anuḷāraṃ parittakusalaṃ. Yaṃ asatipi buddhuppāde vattati, yañca sandhāyāha ‘‘hīnena brahmacariyena, khattiye upapajjatī’’ti (jā. 1.8.75). Alaṃ ariyāya ariyabhāvāyāti alamariyo, ariyabhāvāya samatthoti vuttaṃ hoti. Ñāṇadassanameva ñāṇadassanaviseso, alamariyo ca so ñāṇadassanaviseso cāti alamariyañāṇadassanaviseso.
ஞாணத³ஸ்ஸனந்தி ச தி³ப்³ப³சக்கு²பி விபஸ்ஸனாபி மக்³கோ³பி ப²லம்பி பச்சவெக்க²ணஞாணம்பி ஸப்³ப³ஞ்ஞுதஞ்ஞாணம்பி வுச்சதி. ‘‘அப்பமத்தோ ஸமானோ ஞாணத³ஸ்ஸனங் ஆராதே⁴தீ’’தி (ம॰ நி॰ 1.311) ஹி எத்த² தி³ப்³ப³சக்கு² ஞாணத³ஸ்ஸனங் நாம. ‘‘ஞாணத³ஸ்ஸனாய சித்தங் அபி⁴னீஹரதி அபி⁴னின்னாமேதீ’’தி (தீ³॰ நி॰ 1.234) எத்த² விபஸ்ஸனாஞாணங். ‘‘அப⁴ப்³பா³ தே ஞாணாய த³ஸ்ஸனாய அனுத்தராய ஸம்போ³தா⁴யா’’தி (அ॰ நி॰ 4.196) எத்த² மக்³கோ³. ‘‘அயமஞ்ஞோ உத்தரிமனுஸ்ஸத⁴ம்மா அலமரியஞாணத³ஸ்ஸனவிஸேஸோ அதி⁴க³தோ பா²ஸுவிஹாரோ’’தி (ம॰ நி॰ 1.328) எத்த² ப²லங். ‘‘ஞாணஞ்ச பன மே த³ஸ்ஸனங் உத³பாதி³, அகுப்பா மே விமுத்தி, அயமந்திமா ஜாதி, நத்தி² தா³னி புனப்³ப⁴வோ’’தி (ஸங்॰ நி॰ 5.1081; மஹாவ॰ 16; படி॰ ம॰ 2.30) எத்த² பச்சவெக்க²ணஞாணங். ‘‘ஞாணஞ்ச பன மே த³ஸ்ஸனங் உத³பாதி³ ‘ஸத்தாஹகாலகதோ ஆளாரோ காலாமோ’’’தி (ம॰ நி॰ 1.284; 2.340) எத்த² ஸப்³ப³ஞ்ஞுதஞ்ஞாணங். இத⁴ பன லோகுத்தரத⁴ம்மோ அதி⁴ப்பேதோ. எத்த² ச ரூபாயதனங் ஜானாதி சக்கு²விஞ்ஞாணங் விய பஸ்ஸதி சாதி ஞாணத³ஸ்ஸனங், தி³ப்³ப³சக்கு². ஸம்மஸனூபசாரே ச த⁴ம்மலக்க²ணத்தயஞ்ச ததா² ஜானாதி பஸ்ஸதி சாதி ஞாணத³ஸ்ஸனங், விபஸ்ஸனா. நிப்³பா³னங் சத்தாரி வா ஸச்சானி அஸம்மோஹப்படிவேத⁴தோ ஜானாதி பஸ்ஸதி சாதி ஞாணத³ஸ்ஸனங், மக்³கோ³. ப²லங் பன நிப்³பா³னவஸேனேவ யோஜேதப்³ப³ங். பச்சவெக்க²ணா மக்³கா³தி⁴க³தஸ்ஸ அத்த²ஸ்ஸ ஸப்³ப³ஸோ ஜோதனட்டே²ன ஞாணத³ஸ்ஸனங். ஸப்³ப³ஞ்ஞுதா அனாவரணதாய ஸமந்தசக்கு²தாய ச ஞாணத³ஸ்ஸனங். ப்³யாதி³ண்ணகாலோதி பரியாதி³ன்னகாலோ. து³தியங் உத்தானமேவ.
Ñāṇadassananti ca dibbacakkhupi vipassanāpi maggopi phalampi paccavekkhaṇañāṇampi sabbaññutaññāṇampi vuccati. ‘‘Appamatto samāno ñāṇadassanaṃ ārādhetī’’ti (ma. ni. 1.311) hi ettha dibbacakkhu ñāṇadassanaṃ nāma. ‘‘Ñāṇadassanāya cittaṃ abhinīharati abhininnāmetī’’ti (dī. ni. 1.234) ettha vipassanāñāṇaṃ. ‘‘Abhabbā te ñāṇāya dassanāya anuttarāya sambodhāyā’’ti (a. ni. 4.196) ettha maggo. ‘‘Ayamañño uttarimanussadhammā alamariyañāṇadassanaviseso adhigato phāsuvihāro’’ti (ma. ni. 1.328) ettha phalaṃ. ‘‘Ñāṇañca pana me dassanaṃ udapādi, akuppā me vimutti, ayamantimā jāti, natthi dāni punabbhavo’’ti (saṃ. ni. 5.1081; mahāva. 16; paṭi. ma. 2.30) ettha paccavekkhaṇañāṇaṃ. ‘‘Ñāṇañca pana me dassanaṃ udapādi ‘sattāhakālakato āḷāro kālāmo’’’ti (ma. ni. 1.284; 2.340) ettha sabbaññutaññāṇaṃ. Idha pana lokuttaradhammo adhippeto. Ettha ca rūpāyatanaṃ jānāti cakkhuviññāṇaṃ viya passati cāti ñāṇadassanaṃ, dibbacakkhu. Sammasanūpacāre ca dhammalakkhaṇattayañca tathā jānāti passati cāti ñāṇadassanaṃ, vipassanā. Nibbānaṃ cattāri vā saccāni asammohappaṭivedhato jānāti passati cāti ñāṇadassanaṃ, maggo. Phalaṃ pana nibbānavaseneva yojetabbaṃ. Paccavekkhaṇā maggādhigatassa atthassa sabbaso jotanaṭṭhena ñāṇadassanaṃ. Sabbaññutā anāvaraṇatāya samantacakkhutāya ca ñāṇadassanaṃ. Byādiṇṇakāloti pariyādinnakālo. Dutiyaṃ uttānameva.
ஆவரணஸுத்தாதி³வண்ணனா நிட்டி²தா.
Āvaraṇasuttādivaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya
1. ஆவரணஸுத்தங் • 1. Āvaraṇasuttaṃ
2. அகுஸலராஸிஸுத்தங் • 2. Akusalarāsisuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 1. ஆவரணஸுத்தவண்ணனா • 1. Āvaraṇasuttavaṇṇanā
