| Library / Tipiṭaka / তিপিটক • Tipiṭaka / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) |
২. দুতিযপণ্ণাসকং
2. Dutiyapaṇṇāsakaṃ
(৬) ১. নীৰরণৰগ্গো
(6) 1. Nīvaraṇavaggo
১. আৰরণসুত্তৰণ্ণনা
1. Āvaraṇasuttavaṇṇanā
৫১. দুতিযস্স পঠমে আৰরণৰসেন আৰরণা। নীৰরণৰসেন নীৰরণা। চেতো অজ্ঝারুহন্তীতি চেতসো অজ্ঝারুহা। ৰিপস্সনাপঞ্ঞঞ্চ মগ্গপঞ্ঞঞ্চ উপ্পত্তিনিৰারণট্ঠেন দুব্বলং করোন্তীতি পঞ্ঞায দুব্বলীকরণা। যা ৰা এতেহি সদ্ধিং ৰোকিণ্ণা পঞ্ঞা উপ্পজ্জতি, তং দুব্বলং করোন্তীতিপি পঞ্ঞায দুব্বলীকরণা। অবলাযাতি পঞ্চনীৰরণপরিযোনদ্ধত্তা অপগতবলায। উত্তরি ৰা মনুস্সধম্মা অলমরিযঞাণদস্সনৰিসেসন্তি দসকুসলকম্মপথসঙ্খাতা মনুস্সধম্মা উত্তরি অরিযভাৰং কাতুং সমত্থং ঞাণদস্সনৰিসেসং। হারহারিনীতি হরিতব্বং হরিতুং সমত্থা। নঙ্গলমুখানীতি মাতিকামুখানি। তানি হি নঙ্গলসরিক্খকত্তা নঙ্গলেহি চ খতত্তা নঙ্গলমুখানীতি ৰুচ্চন্তি।
51. Dutiyassa paṭhame āvaraṇavasena āvaraṇā. Nīvaraṇavasena nīvaraṇā. Ceto ajjhāruhantīti cetaso ajjhāruhā. Vipassanāpaññañca maggapaññañca uppattinivāraṇaṭṭhena dubbalaṃ karontīti paññāya dubbalīkaraṇā. Yā vā etehi saddhiṃ vokiṇṇā paññā uppajjati, taṃ dubbalaṃ karontītipi paññāya dubbalīkaraṇā. Abalāyāti pañcanīvaraṇapariyonaddhattā apagatabalāya. Uttari vā manussadhammā alamariyañāṇadassanavisesanti dasakusalakammapathasaṅkhātā manussadhammā uttari ariyabhāvaṃ kātuṃ samatthaṃ ñāṇadassanavisesaṃ. Hārahārinīti haritabbaṃ harituṃ samatthā. Naṅgalamukhānīti mātikāmukhāni. Tāni hi naṅgalasarikkhakattā naṅgalehi ca khatattā naṅgalamukhānīti vuccanti.
এৰমেৰ খোতি এত্থ সোতং ৰিয ৰিপস্সনাঞাণং দট্ঠব্বং, উভতো নঙ্গলমুখানং ৰিৰরণকালো ৰিয ছসু দ্ৰারেসু সংৰরস্স ৰিস্সট্ঠকালো, মজ্ঝেনদিযা রুক্খপাদে কোট্টেত্ৰা পলালতিণমত্তিকাহি আৰরণে কতে উদকস্স ৰিক্খিত্তৰিসটব্যাদিণ্ণকালো ৰিয পঞ্চহি নীৰরণেহি পরিযোনদ্ধকালো, এৰং আৰরণে কতে ৰিহতৰেগস্স উদকস্স তিণপলালাদীনি পরিকড্ঢিত্ৰা সমুদ্দং পাপুণিতুং অসমত্থকালো ৰিয ৰিপস্সনাঞাণেন সব্বাকুসলে ৰিদ্ধংসেত্ৰা নিব্বানসাগরং পাপুণিতুং অসমত্থকালো ৰেদিতব্বো। সুক্কপক্খে ৰুত্তৰিপল্লাসেন যোজনা কাতব্বা। ইমস্মিং সুত্তে ৰট্টৰিৰট্টং কথিতং। দুতিযং উত্তানত্থমেৰ।
Evameva khoti ettha sotaṃ viya vipassanāñāṇaṃ daṭṭhabbaṃ, ubhato naṅgalamukhānaṃ vivaraṇakālo viya chasu dvāresu saṃvarassa vissaṭṭhakālo, majjhenadiyā rukkhapāde koṭṭetvā palālatiṇamattikāhi āvaraṇe kate udakassa vikkhittavisaṭabyādiṇṇakālo viya pañcahi nīvaraṇehi pariyonaddhakālo, evaṃ āvaraṇe kate vihatavegassa udakassa tiṇapalālādīni parikaḍḍhitvā samuddaṃ pāpuṇituṃ asamatthakālo viya vipassanāñāṇena sabbākusale viddhaṃsetvā nibbānasāgaraṃ pāpuṇituṃ asamatthakālo veditabbo. Sukkapakkhe vuttavipallāsena yojanā kātabbā. Imasmiṃ sutte vaṭṭavivaṭṭaṃ kathitaṃ. Dutiyaṃ uttānatthameva.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / অঙ্গুত্তরনিকায • Aṅguttaranikāya / ১. আৰরণসুত্তং • 1. Āvaraṇasuttaṃ
টীকা • Tīkā / সুত্তপিটক (টীকা) • Suttapiṭaka (ṭīkā) / অঙ্গুত্তরনিকায (টীকা) • Aṅguttaranikāya (ṭīkā) / ১-২. আৰরণসুত্তাদিৰণ্ণনা • 1-2. Āvaraṇasuttādivaṇṇanā
