| Library / Tipiṭaka / តិបិដក • Tipiṭaka / អង្គុត្តរនិកាយ (អដ្ឋកថា) • Aṅguttaranikāya (aṭṭhakathā) |
២. ទុតិយបណ្ណាសកំ
2. Dutiyapaṇṇāsakaṃ
(៦) ១. នីវរណវគ្គោ
(6) 1. Nīvaraṇavaggo
១. អាវរណសុត្តវណ្ណនា
1. Āvaraṇasuttavaṇṇanā
៥១. ទុតិយស្ស បឋមេ អាវរណវសេន អាវរណា។ នីវរណវសេន នីវរណា។ ចេតោ អជ្ឈារុហន្តីតិ ចេតសោ អជ្ឈារុហា។ វិបស្សនាបញ្ញញ្ច មគ្គបញ្ញញ្ច ឧប្បត្តិនិវារណដ្ឋេន ទុព្ពលំ ករោន្តីតិ បញ្ញាយ ទុព្ពលីករណា។ យា វា ឯតេហិ សទ្ធិំ វោកិណ្ណា បញ្ញា ឧប្បជ្ជតិ, តំ ទុព្ពលំ ករោន្តីតិបិ បញ្ញាយ ទុព្ពលីករណា។ អពលាយាតិ បញ្ចនីវរណបរិយោនទ្ធត្តា អបគតពលាយ។ ឧត្តរិ វា មនុស្សធម្មា អលមរិយញាណទស្សនវិសេសន្តិ ទសកុសលកម្មបថសង្ខាតា មនុស្សធម្មា ឧត្តរិ អរិយភាវំ កាតុំ សមត្ថំ ញាណទស្សនវិសេសំ។ ហារហារិនីតិ ហរិតព្ពំ ហរិតុំ សមត្ថា។ នង្គលមុខានីតិ មាតិកាមុខានិ។ តានិ ហិ នង្គលសរិក្ខកត្តា នង្គលេហិ ច ខតត្តា នង្គលមុខានីតិ វុច្ចន្តិ។
51. Dutiyassa paṭhame āvaraṇavasena āvaraṇā. Nīvaraṇavasena nīvaraṇā. Ceto ajjhāruhantīti cetaso ajjhāruhā. Vipassanāpaññañca maggapaññañca uppattinivāraṇaṭṭhena dubbalaṃ karontīti paññāya dubbalīkaraṇā. Yā vā etehi saddhiṃ vokiṇṇā paññā uppajjati, taṃ dubbalaṃ karontītipi paññāya dubbalīkaraṇā. Abalāyāti pañcanīvaraṇapariyonaddhattā apagatabalāya. Uttari vā manussadhammā alamariyañāṇadassanavisesanti dasakusalakammapathasaṅkhātā manussadhammā uttari ariyabhāvaṃ kātuṃ samatthaṃ ñāṇadassanavisesaṃ. Hārahārinīti haritabbaṃ harituṃ samatthā. Naṅgalamukhānīti mātikāmukhāni. Tāni hi naṅgalasarikkhakattā naṅgalehi ca khatattā naṅgalamukhānīti vuccanti.
ឯវមេវ ខោតិ ឯត្ថ សោតំ វិយ វិបស្សនាញាណំ ទដ្ឋព្ពំ, ឧភតោ នង្គលមុខានំ វិវរណកាលោ វិយ ឆសុ ទ្វារេសុ សំវរស្ស វិស្សដ្ឋកាលោ, មជ្ឈេនទិយា រុក្ខបាទេ កោដ្ដេត្វា បលាលតិណមត្តិកាហិ អាវរណេ កតេ ឧទកស្ស វិក្ខិត្តវិសដព្យាទិណ្ណកាលោ វិយ បញ្ចហិ នីវរណេហិ បរិយោនទ្ធកាលោ, ឯវំ អាវរណេ កតេ វិហតវេគស្ស ឧទកស្ស តិណបលាលាទីនិ បរិកឌ្ឍិត្វា សមុទ្ទំ បាបុណិតុំ អសមត្ថកាលោ វិយ វិបស្សនាញាណេន សព្ពាកុសលេ វិទ្ធំសេត្វា និព្ពានសាគរំ បាបុណិតុំ អសមត្ថកាលោ វេទិតព្ពោ។ សុក្កបក្ខេ វុត្តវិបល្លាសេន យោជនា កាតព្ពា។ ឥមស្មិំ សុត្តេ វដ្ដវិវដ្ដំ កថិតំ។ ទុតិយំ ឧត្តានត្ថមេវ។
Evameva khoti ettha sotaṃ viya vipassanāñāṇaṃ daṭṭhabbaṃ, ubhato naṅgalamukhānaṃ vivaraṇakālo viya chasu dvāresu saṃvarassa vissaṭṭhakālo, majjhenadiyā rukkhapāde koṭṭetvā palālatiṇamattikāhi āvaraṇe kate udakassa vikkhittavisaṭabyādiṇṇakālo viya pañcahi nīvaraṇehi pariyonaddhakālo, evaṃ āvaraṇe kate vihatavegassa udakassa tiṇapalālādīni parikaḍḍhitvā samuddaṃ pāpuṇituṃ asamatthakālo viya vipassanāñāṇena sabbākusale viddhaṃsetvā nibbānasāgaraṃ pāpuṇituṃ asamatthakālo veditabbo. Sukkapakkhe vuttavipallāsena yojanā kātabbā. Imasmiṃ sutte vaṭṭavivaṭṭaṃ kathitaṃ. Dutiyaṃ uttānatthameva.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / អង្គុត្តរនិកាយ • Aṅguttaranikāya / ១. អាវរណសុត្តំ • 1. Āvaraṇasuttaṃ
ដីកា • Tīkā / សុត្តបិដក (ដីកា) • Suttapiṭaka (ṭīkā) / អង្គុត្តរនិកាយ (ដីកា) • Aṅguttaranikāya (ṭīkā) / ១-២. អាវរណសុត្តាទិវណ្ណនា • 1-2. Āvaraṇasuttādivaṇṇanā
