| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) |
2. දුතියපණ්‌ණාසකං
2. Dutiyapaṇṇāsakaṃ
(6) 1. නීවරණවග්‌ගො
(6) 1. Nīvaraṇavaggo
1. ආවරණසුත්‌තවණ්‌ණනා
1. Āvaraṇasuttavaṇṇanā
51. දුතියස්‌ස පඨමෙ ආවරණවසෙන ආවරණා. නීවරණවසෙන නීවරණා. චෙතො අජ්‌ඣාරුහන්‌තීති චෙතසො අජ්‌ඣාරුහා. විපස්‌සනාපඤ්‌ඤඤ්‌ච මග්‌ගපඤ්‌ඤඤ්‌ච උප්‌පත්‌තිනිවාරණට්‌ඨෙන දුබ්‌බලං කරොන්‌තීති පඤ්‌ඤාය දුබ්‌බලීකරණා. යා වා එතෙහි සද්‌ධිං වොකිණ්‌ණා පඤ්‌ඤා උප්‌පජ්‌ජති, තං දුබ්‌බලං කරොන්‌තීතිපි පඤ්‌ඤාය දුබ්‌බලීකරණා. අබලායාති පඤ්‌චනීවරණපරියොනද්‌ධත්‌තා අපගතබලාය. උත්‌තරි වා මනුස්‌සධම්‌මා අලමරියඤාණදස්‌සනවිසෙසන්‌ති දසකුසලකම්‌මපථසඞ්‌ඛාතා මනුස්‌සධම්‌මා උත්‌තරි අරියභාවං කාතුං සමත්‌ථං ඤාණදස්‌සනවිසෙසං. හාරහාරිනීති හරිතබ්‌බං හරිතුං සමත්‌ථා. නඞ්‌ගලමුඛානීති මාතිකාමුඛානි. තානි හි නඞ්‌ගලසරික්‌ඛකත්‌තා නඞ්‌ගලෙහි ච ඛතත්‌තා නඞ්‌ගලමුඛානීති වුච්‌චන්‌ති.
51. Dutiyassa paṭhame āvaraṇavasena āvaraṇā. Nīvaraṇavasena nīvaraṇā. Ceto ajjhāruhantīti cetaso ajjhāruhā. Vipassanāpaññañca maggapaññañca uppattinivāraṇaṭṭhena dubbalaṃ karontīti paññāya dubbalīkaraṇā. Yā vā etehi saddhiṃ vokiṇṇā paññā uppajjati, taṃ dubbalaṃ karontītipi paññāya dubbalīkaraṇā. Abalāyāti pañcanīvaraṇapariyonaddhattā apagatabalāya. Uttari vā manussadhammā alamariyañāṇadassanavisesanti dasakusalakammapathasaṅkhātā manussadhammā uttari ariyabhāvaṃ kātuṃ samatthaṃ ñāṇadassanavisesaṃ. Hārahārinīti haritabbaṃ harituṃ samatthā. Naṅgalamukhānīti mātikāmukhāni. Tāni hi naṅgalasarikkhakattā naṅgalehi ca khatattā naṅgalamukhānīti vuccanti.
එවමෙව ඛොති එත්‌ථ සොතං විය විපස්‌සනාඤාණං දට්‌ඨබ්‌බං, උභතො නඞ්‌ගලමුඛානං විවරණකාලො විය ඡසු ද්‌වාරෙසු සංවරස්‌ස විස්‌සට්‌ඨකාලො, මජ්‌ඣෙනදියා රුක්‌ඛපාදෙ කොට්‌ටෙත්‌වා පලාලතිණමත්‌තිකාහි ආවරණෙ කතෙ උදකස්‌ස වික්‌ඛිත්‌තවිසටබ්‍යාදිණ්‌ණකාලො විය පඤ්‌චහි නීවරණෙහි පරියොනද්‌ධකාලො, එවං ආවරණෙ කතෙ විහතවෙගස්‌ස උදකස්‌ස තිණපලාලාදීනි පරිකඩ්‌ඪිත්‌වා සමුද්‌දං පාපුණිතුං අසමත්‌ථකාලො විය විපස්‌සනාඤාණෙන සබ්‌බාකුසලෙ විද්‌ධංසෙත්‌වා නිබ්‌බානසාගරං පාපුණිතුං අසමත්‌ථකාලො වෙදිතබ්‌බො. සුක්‌කපක්‌ඛෙ වුත්‌තවිපල්‌ලාසෙන යොජනා කාතබ්‌බා. ඉමස්‌මිං සුත්‌තෙ වට්‌ටවිවට්‌ටං කථිතං. දුතියං උත්‌තානත්‌ථමෙව.
Evameva khoti ettha sotaṃ viya vipassanāñāṇaṃ daṭṭhabbaṃ, ubhato naṅgalamukhānaṃ vivaraṇakālo viya chasu dvāresu saṃvarassa vissaṭṭhakālo, majjhenadiyā rukkhapāde koṭṭetvā palālatiṇamattikāhi āvaraṇe kate udakassa vikkhittavisaṭabyādiṇṇakālo viya pañcahi nīvaraṇehi pariyonaddhakālo, evaṃ āvaraṇe kate vihatavegassa udakassa tiṇapalālādīni parikaḍḍhitvā samuddaṃ pāpuṇituṃ asamatthakālo viya vipassanāñāṇena sabbākusale viddhaṃsetvā nibbānasāgaraṃ pāpuṇituṃ asamatthakālo veditabbo. Sukkapakkhe vuttavipallāsena yojanā kātabbā. Imasmiṃ sutte vaṭṭavivaṭṭaṃ kathitaṃ. Dutiyaṃ uttānatthameva.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / අඞ්‌ගුත්‌තරනිකාය • Aṅguttaranikāya / 1. ආවරණසුත්‌තං • 1. Āvaraṇasuttaṃ
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 1-2. ආවරණසුත්‌තාදිවණ්‌ණනා • 1-2. Āvaraṇasuttādivaṇṇanā
