| Library / Tipiṭaka / д̇ибидага • Tipiṭaka / ж̇аад̇ага-адтагат̇аа • Jātaka-aṭṭhakathā |
6. чагганибаад̇о
6. Chakkanipāto
1. аваарияаваг̇г̇о
1. Avāriyavaggo
[376] 1. аваарияаж̇аад̇агаван̣н̣анаа
[376] 1. Avāriyajātakavaṇṇanā
маасу гуж̇жха бхуумибад̇ийд̇и ид̣̇ам̣ сад̇т̇аа ж̇зд̇аванз вихаранд̇о згам̣ д̇ид̇т̇анаавигам̣ аараб̣бха гат̇зси. со гира б̣аало ахоси ан̃н̃аан̣о, нзва со б̣уд̣̇д̇хаад̣̇ийнам̣ рад̇анаанам̣, на ан̃н̃зсам̣ буг̇г̇алаанам̣ г̇ун̣ам̣ ж̇аанаад̇и, жан̣д̣о парусо саахасиго. ат̇зго ж̇аанабад̣̇о бхигку ‘‘б̣уд̣̇д̇хубадтаанам̣ гариссаамий’’д̇и ааг̇ажчанд̇о сааяам̣ ажиравад̇ийд̇ид̇т̇ам̣ бад̇ваа д̇ам̣ звамааха ‘‘убаасага, барад̇ийрам̣ г̇амиссаами, наавам̣ мз д̣̇зхий’’д̇и. ‘‘бханд̇з, ид̣̇аани агаало, згасмим̣ таанз васассуу’’д̇и. ‘‘убаасага, ид̇ха гухим̣ васиссаами, мам̣ г̇ан̣хид̇ваа г̇ажчаа’’д̇и. со гуж̇жхид̇ваа ‘‘зхи рз саман̣а, вахаамий’’д̇и т̇зрам̣ наавам̣ ааробзд̇ваа уж̇угам̣ аг̇анд̇ваа хздтаа наавам̣ нзд̇ваа уллол̣ам̣ гад̇ваа д̇асса бад̇д̇ажийварам̣ д̇змзд̇ваа гиламзд̇ваа д̇ийрам̣ бад̇ваа анд̇хагааравзлааяам̣ уяяож̇зси. ат̇а со вихаарам̣ г̇анд̇ваа д̇ам̣ д̣̇ивасам̣ б̣уд̣̇д̇хубадтаанасса огаасам̣ алабхид̇ваа бунад̣̇ивасз сад̇т̇аарам̣ убасан̇гамид̇ваа ванд̣̇ид̇ваа згаманд̇ам̣ нисийд̣̇ид̇ваа сад̇т̇аараа гад̇абадисант̇ааро ‘‘гад̣̇аа ааг̇ад̇осий’’д̇и вуд̇д̇з ‘‘хияяо, бханд̇з’’д̇и вад̇ваа ‘‘ат̇а гасмаа аж̇ж̇а б̣уд̣̇д̇хубадтаанам̣ ааг̇ад̇осий’’д̇и вуд̇д̇з д̇амад̇т̇ам̣ аарожзси. д̇ам̣ суд̇ваа сад̇т̇аа ‘‘на ко бхигку ид̣̇аанзва, буб̣б̣збзса жан̣д̣о парусо саахасиго, ид̣̇аани бана д̇зна д̇вам̣ гиламид̇о, буб̣б̣збзса бан̣д̣ид̇з гиламзсий’’д̇и вад̇ваа д̇зна яаажид̇о ад̇ийд̇ам̣ аахари.
Māsukujjha bhūmipatīti idaṃ satthā jetavane viharanto ekaṃ titthanāvikaṃ ārabbha kathesi. So kira bālo ahosi aññāṇo, neva so buddhādīnaṃ ratanānaṃ, na aññesaṃ puggalānaṃ guṇaṃ jānāti, caṇḍo pharuso sāhasiko. Atheko jānapado bhikkhu ‘‘buddhupaṭṭhānaṃ karissāmī’’ti āgacchanto sāyaṃ aciravatītitthaṃ patvā taṃ evamāha ‘‘upāsaka, paratīraṃ gamissāmi, nāvaṃ me dehī’’ti. ‘‘Bhante, idāni akālo, ekasmiṃ ṭhāne vasassū’’ti. ‘‘Upāsaka, idha kuhiṃ vasissāmi, maṃ gaṇhitvā gacchā’’ti. So kujjhitvā ‘‘ehi re samaṇa, vahāmī’’ti theraṃ nāvaṃ āropetvā ujukaṃ agantvā heṭṭhā nāvaṃ netvā ulloḷaṃ katvā tassa pattacīvaraṃ temetvā kilametvā tīraṃ patvā andhakāravelāyaṃ uyyojesi. Atha so vihāraṃ gantvā taṃ divasaṃ buddhupaṭṭhānassa okāsaṃ alabhitvā punadivase satthāraṃ upasaṅkamitvā vanditvā ekamantaṃ nisīditvā satthārā katapaṭisanthāro ‘‘kadā āgatosī’’ti vutte ‘‘hiyyo, bhante’’ti vatvā ‘‘atha kasmā ajja buddhupaṭṭhānaṃ āgatosī’’ti vutte tamatthaṃ ārocesi. Taṃ sutvā satthā ‘‘na kho bhikkhu idāneva, pubbepesa caṇḍo pharuso sāhasiko, idāni pana tena tvaṃ kilamito, pubbepesa paṇḍite kilamesī’’ti vatvā tena yācito atītaṃ āhari.
ад̇ийд̇з б̣аараан̣асияам̣ б̣рахмад̣̇ад̇д̇з раж̇ж̇ам̣ гаарзнд̇з б̣од̇хисад̇д̇о б̣раахман̣агулз ниб̣б̣ад̇д̇ид̇ваа ваяаббад̇д̇о д̇аггасилааяам̣ саб̣б̣асиббаани уг̇г̇ан̣хид̇ваа исибаб̣б̣аж̇ж̇ам̣ баб̣б̣аж̇ид̇ваа д̣̇ийгхамад̣̇д̇хаанам̣ химаванд̇з палаапалзна яаабзд̇ваа лон̣амб̣иласзванад̇т̇ааяа б̣аараан̣асим̣ бад̇ваа рааж̇уяяаанз васид̇ваа бунад̣̇ивасз наг̇арам̣ бхигкааяа баависи. ат̇а нам̣ рааж̇ан̇г̇ан̣аббад̇д̇ам̣ рааж̇аа д̣̇исваа д̇асса ирияаабат̇з басийд̣̇ид̇ваа анд̇збурам̣ аанзд̇ваа бхож̇зд̇ваа бадин̃н̃ам̣ г̇ахзд̇ваа рааж̇уяяаанз васаабзси, д̣̇звасигам̣ убадтаанам̣ аг̇амааси. д̇амзнам̣ б̣од̇хисад̇д̇о ‘‘ран̃н̃аа наама, махаарааж̇а, жад̇д̇аари аг̇ад̇иг̇аманаани важ̇ж̇зд̇ваа аббамад̇д̇зна канд̇имзд̇д̇аануд̣̇д̣̇аяасамбаннзна худ̇ваа д̇хаммзна раж̇ж̇ам̣ гаарзд̇аб̣б̣а’’нд̇и вад̇ваа д̣̇звасигам̣ овад̣̇анд̇о –
Atīte bārāṇasiyaṃ brahmadatte rajjaṃ kārente bodhisatto brāhmaṇakule nibbattitvā vayappatto takkasilāyaṃ sabbasippāni uggaṇhitvā isipabbajjaṃ pabbajitvā dīghamaddhānaṃ himavante phalāphalena yāpetvā loṇambilasevanatthāya bārāṇasiṃ patvā rājuyyāne vasitvā punadivase nagaraṃ bhikkhāya pāvisi. Atha naṃ rājaṅgaṇappattaṃ rājā disvā tassa iriyāpathe pasīditvā antepuraṃ ānetvā bhojetvā paṭiññaṃ gahetvā rājuyyāne vasāpesi, devasikaṃ upaṭṭhānaṃ agamāsi. Tamenaṃ bodhisatto ‘‘raññā nāma, mahārāja, cattāri agatigamanāni vajjetvā appamattena khantimettānuddayasampannena hutvā dhammena rajjaṃ kāretabba’’nti vatvā devasikaṃ ovadanto –
1.
1.
‘‘маасу гуж̇жха бхуумибад̇и, маасу гуж̇жха рат̇зсабха;
‘‘Māsu kujjha bhūmipati, māsu kujjha rathesabha;
гуд̣̇д̇хам̣ аббадигуж̇жханд̇о, рааж̇аа радтасса бууж̇ид̇о.
Kuddhaṃ appaṭikujjhanto, rājā raṭṭhassa pūjito.
2.
2.
‘‘г̇аамз ваа яад̣̇и вааран̃н̃з, ниннз ваа яад̣̇и ваа т̇алз;
‘‘Gāme vā yadi vāraññe, ninne vā yadi vā thale;
саб̣б̣ад̇т̇а анусаасаами, маасу гуж̇жха рат̇зсабхаа’’д̇и. – д̣̇вз г̇аат̇аа абхааси;
Sabbattha anusāsāmi, māsu kujjha rathesabhā’’ti. – dve gāthā abhāsi;
д̇ад̇т̇а радтасса бууж̇ид̇од̇и зваруубо рааж̇аа радтасса бууж̇анийяо ход̇ийд̇и ад̇т̇о. саб̣б̣ад̇т̇а анусаасаамийд̇и зд̇зсу г̇аамаад̣̇ийсу яад̇т̇а гад̇т̇ажи васанд̇обаахам̣ махаарааж̇а, имааяа зва анусидтияаа д̇аманусаасаами, зд̇зсу ваа г̇аамаад̣̇ийсу яад̇т̇а гад̇т̇ажи згасмимби згасад̇д̇зби анусаасаами. маасу гуж̇жха рат̇зсабхаад̇и звамзваахам̣ д̇ам̣ анусаасаами, ран̃н̃аа наама гуж̇жхад̇ум̣ на ваддад̇и. гим̣гааран̣аа? рааж̇аано наама ваажаавуд̇хаа, д̇зсам̣ гуд̣̇д̇хаанам̣ важанамад̇д̇знзва б̣ахуу ж̇ийвид̇агкаяам̣ баабун̣анд̇ийд̇и.
Tattha raṭṭhassa pūjitoti evarūpo rājā raṭṭhassa pūjanīyo hotīti attho. Sabbattha anusāsāmīti etesu gāmādīsu yattha katthaci vasantopāhaṃ mahārāja, imāya eva anusiṭṭhiyā tamanusāsāmi, etesu vā gāmādīsu yattha katthaci ekasmimpi ekasattepi anusāsāmi. Māsu kujjha rathesabhāti evamevāhaṃ taṃ anusāsāmi, raññā nāma kujjhatuṃ na vaṭṭati. Kiṃkāraṇā? Rājāno nāma vācāvudhā, tesaṃ kuddhānaṃ vacanamatteneva bahū jīvitakkhayaṃ pāpuṇantīti.
звам̣ б̣од̇хисад̇д̇о ран̃н̃о ааг̇ад̇ааг̇ад̇ад̣̇ивасз имаа д̣̇вз г̇аат̇аа абхааси. рааж̇аа анусидтияаа басаннажид̇д̇о махаасад̇д̇асса сад̇асахассудтаанагам̣ згам̣ г̇аамаварам̣ ад̣̇ааси, б̣од̇хисад̇д̇о бадигкиби. ид̇и со д̇ад̇т̇зва д̣̇ваад̣̇асасам̣важчарам̣ васид̇ваа ‘‘ад̇ижирам̣ нивуд̇т̇омхи, ж̇анабад̣̇ажааригам̣ д̇аава жарид̇ваа ааг̇амиссаамий’’д̇и ран̃н̃о агат̇зд̇ваава уяяаанабаалам̣ ааманд̇зд̇ваа ‘‘д̇аад̇а, угган̣тид̇аруубосми, ж̇анабад̣̇ам̣ жарид̇ваа ааг̇амиссаами, д̇вам̣ ран̃н̃о гат̇зяяаасий’’д̇и вад̇ваа багганд̇о г̇ан̇г̇ааяа нааваад̇ид̇т̇ам̣ баабун̣и. д̇ад̇т̇а аваарияабид̇аа наама наавиго ахоси. со б̣аало нзва г̇ун̣аванд̇аанам̣ г̇ун̣ам̣ ж̇аанаад̇и, на ад̇д̇ано ааяаабааяам̣ ж̇аанаад̇и, со г̇ан̇г̇ам̣ д̇арид̇угаамам̣ ж̇анам̣ батамам̣ д̇аарзд̇ваа бажчаа взд̇анам̣ яаажад̇и, взд̇анам̣ ад̣̇знд̇зхи сад̣̇д̇хим̣ галахам̣ гаронд̇о аггосаббахаарзязва б̣ахуу лабхад̇и, аббам̣ лаабхам̣, зваруубо анд̇хаб̣аало. д̇ам̣ санд̇хааяа сад̇т̇аа абхисамб̣уд̣̇д̇хо худ̇ваа д̇ад̇ияам̣ г̇аат̇амааха –
Evaṃ bodhisatto rañño āgatāgatadivase imā dve gāthā abhāsi. Rājā anusiṭṭhiyā pasannacitto mahāsattassa satasahassuṭṭhānakaṃ ekaṃ gāmavaraṃ adāsi, bodhisatto paṭikkhipi. Iti so tattheva dvādasasaṃvaccharaṃ vasitvā ‘‘aticiraṃ nivutthomhi, janapadacārikaṃ tāva caritvā āgamissāmī’’ti rañño akathetvāva uyyānapālaṃ āmantetvā ‘‘tāta, ukkaṇṭhitarūposmi, janapadaṃ caritvā āgamissāmi, tvaṃ rañño katheyyāsī’’ti vatvā pakkanto gaṅgāya nāvātitthaṃ pāpuṇi. Tattha avāriyapitā nāma nāviko ahosi. So bālo neva guṇavantānaṃ guṇaṃ jānāti, na attano āyāpāyaṃ jānāti, so gaṅgaṃ taritukāmaṃ janaṃ paṭhamaṃ tāretvā pacchā vetanaṃ yācati, vetanaṃ adentehi saddhiṃ kalahaṃ karonto akkosappahāreyeva bahū labhati, appaṃ lābhaṃ, evarūpo andhabālo. Taṃ sandhāya satthā abhisambuddho hutvā tatiyaṃ gāthamāha –
3.
3.
‘‘аваарияабид̇аа наама, аху г̇ан̇г̇ааяа наавиго;
‘‘Avāriyapitā nāma, ahu gaṅgāya nāviko;
буб̣б̣з ж̇анам̣ д̇аарзд̇ваана, бажчаа яаажад̇и взд̇анам̣;
Pubbe janaṃ tāretvāna, pacchā yācati vetanaṃ;
д̇знасса бхан̣д̣анам̣ ход̇и, на жа бхог̇зхи вад̣дхад̇ий’’д̇и.
Tenassa bhaṇḍanaṃ hoti, na ca bhogehi vaḍḍhatī’’ti.
д̇ад̇т̇а аваарияабид̇аа наамаад̇и аваарияаа наама д̇асса д̇хийд̇аа, д̇ассаа васзна аваарияабид̇аа наама ж̇аад̇о. д̇знасса бхан̣д̣ананд̇и д̇зна гааран̣зна, д̇зна ваа бажчаа яаажияамаанзна ж̇анзна сад̣̇д̇хим̣ д̇асса бхан̣д̣анам̣ ход̇и.
Tattha avāriyapitā nāmāti avāriyā nāma tassa dhītā, tassā vasena avāriyapitā nāma jāto. Tenassa bhaṇḍananti tena kāraṇena, tena vā pacchā yāciyamānena janena saddhiṃ tassa bhaṇḍanaṃ hoti.
б̣од̇хисад̇д̇о д̇ам̣ наавигам̣ убасан̇гамид̇ваа ‘‘аавусо, барад̇ийрам̣ мам̣ нзхий’’д̇и ааха. д̇ам̣ суд̇ваа со ааха ‘‘саман̣а, гим̣ мз нааваавзд̇анам̣ д̣̇ассасий’’д̇и? ‘‘аавусо, ахам̣ бхог̇авад̣дхим̣ ад̇т̇авад̣дхим̣ д̇хаммавад̣дхим̣ наама д̇з гат̇зссаамий’’д̇и. д̇ам̣ суд̇ваа наавиго ‘‘д̇хувам̣ зса маяхам̣ гин̃жи д̣̇ассад̇ий’’д̇и д̇ам̣ барад̇ийрам̣ нзд̇ваа ‘‘д̣̇зхи мз наавааяа взд̇ана’’нд̇и ааха. со д̇асса ‘‘саад̇ху, аавусо’’д̇и батамам̣ бхог̇авад̣дхим̣ гат̇знд̇о –
Bodhisatto taṃ nāvikaṃ upasaṅkamitvā ‘‘āvuso, paratīraṃ maṃ nehī’’ti āha. Taṃ sutvā so āha ‘‘samaṇa, kiṃ me nāvāvetanaṃ dassasī’’ti? ‘‘Āvuso, ahaṃ bhogavaḍḍhiṃ atthavaḍḍhiṃ dhammavaḍḍhiṃ nāma te kathessāmī’’ti. Taṃ sutvā nāviko ‘‘dhuvaṃ esa mayhaṃ kiñci dassatī’’ti taṃ paratīraṃ netvā ‘‘dehi me nāvāya vetana’’nti āha. So tassa ‘‘sādhu, āvuso’’ti paṭhamaṃ bhogavaḍḍhiṃ kathento –
4.
4.
‘‘ад̇ин̣н̣ам̣язва яаажассу, абаарам̣ д̇аад̇а наавига;
‘‘Atiṇṇaṃyeva yācassu, apāraṃ tāta nāvika;
ан̃н̃о хи д̇ин̣н̣асса мано, ан̃н̃о ход̇и баарзсино’’д̇и. – г̇аат̇амааха;
Añño hi tiṇṇassa mano, añño hoti pāresino’’ti. – gāthamāha;
д̇ад̇т̇а абааранд̇и д̇аад̇а, наавига барад̇ийрам̣ ад̇ин̣н̣амзва ж̇анам̣ оримад̇ийрз тид̇ан̃н̃зва взд̇анам̣ яаажассу, д̇ад̇о лад̣̇д̇хан̃жа г̇ахзд̇ваа г̇уд̇д̇адтаанз табзд̇ваа бажчаа мануссз барад̇ийрам̣ нзяяааси, звам̣ д̇з бхог̇авад̣дхи бхависсад̇и. ан̃н̃о хи д̇ин̣н̣асса манод̇и д̇аад̇а наавига, барад̇ийрам̣ г̇ад̇асса ан̃н̃о мано бхавад̇и, ад̣̇ад̇ваава г̇анд̇угаамо ход̇и. яо банзса баарзсий наама барад̇ийрам̣ зсад̇и, барад̇ийрам̣ г̇анд̇угаамо ход̇и, со ад̇ирзгамби д̣̇ад̇ваа г̇анд̇угаамо ход̇и, ид̇и баарзсино ан̃н̃о мано ход̇и, д̇асмаа д̇вам̣ ад̇ин̣н̣амзва яаажзяяааси, аяам̣ д̇аава д̇з бхог̇аанам̣ вад̣дхи наамаад̇и.
Tattha apāranti tāta, nāvika paratīraṃ atiṇṇameva janaṃ orimatīre ṭhitaññeva vetanaṃ yācassu, tato laddhañca gahetvā guttaṭṭhāne ṭhapetvā pacchā manusse paratīraṃ neyyāsi, evaṃ te bhogavaḍḍhi bhavissati. Añño hi tiṇṇassa manoti tāta nāvika, paratīraṃ gatassa añño mano bhavati, adatvāva gantukāmo hoti. Yo panesa pāresī nāma paratīraṃ esati, paratīraṃ gantukāmo hoti, so atirekampi datvā gantukāmo hoti, iti pāresino añño mano hoti, tasmā tvaṃ atiṇṇameva yāceyyāsi, ayaṃ tāva te bhogānaṃ vaḍḍhi nāmāti.
д̇ам̣ суд̇ваа наавиго жинд̇зси ‘‘аяам̣ д̇аава мз оваад̣̇о бхависсад̇и, ид̣̇аани банзса ан̃н̃ам̣ гин̃жи маяхам̣ д̣̇ассад̇ий’’д̇и. ат̇а нам̣ б̣од̇хисад̇д̇о ‘‘аяам̣ д̇аава д̇з, аавусо, бхог̇авад̣дхи, ид̣̇аани ад̇т̇ад̇хаммавад̣дхим̣ сун̣аахий’’д̇и вад̇ваа овад̣̇анд̇о –
Taṃ sutvā nāviko cintesi ‘‘ayaṃ tāva me ovādo bhavissati, idāni panesa aññaṃ kiñci mayhaṃ dassatī’’ti. Atha naṃ bodhisatto ‘‘ayaṃ tāva te, āvuso, bhogavaḍḍhi, idāni atthadhammavaḍḍhiṃ suṇāhī’’ti vatvā ovadanto –
5.
5.
‘‘г̇аамз ваа яад̣̇и вааран̃н̃з, ниннз ваа яад̣̇и ваа т̇алз;
‘‘Gāme vā yadi vāraññe, ninne vā yadi vā thale;
саб̣б̣ад̇т̇а анусаасаами, маасу гуж̇жхид̇т̇а наавигаа’’д̇и. – г̇аат̇амааха;
Sabbattha anusāsāmi, māsu kujjhittha nāvikā’’ti. – gāthamāha;
ид̇исса имааяа г̇аат̇ааяа ад̇т̇ад̇хаммавад̣дхим̣ гат̇зд̇ваа ‘‘аяам̣ д̇з ад̇т̇авад̣дхи жа д̇хаммавад̣дхи жаа’’д̇и ааха. со бана д̣̇анд̇хабурисо д̇ам̣ оваад̣̇ам̣ на гин̃жи ман̃н̃амаано ‘‘ид̣̇ам̣, саман̣а, д̇аяаа маяхам̣ д̣̇иннам̣ нааваавзд̇ана’’нд̇и ааха. ‘‘аамаавусо’’д̇и. ‘‘маяхам̣ иминаа гаммам̣ над̇т̇и, ан̃н̃ам̣ мз д̣̇зхий’’д̇и. ‘‘аавусо, ид̣̇ам̣ табзд̇ваа маяхам̣ ан̃н̃ам̣ над̇т̇ий’’д̇и. ‘‘ат̇а д̇вам̣ гасмаа мама наавам̣ аарул̣хосий’’д̇и д̇аабасам̣ г̇ан̇г̇аад̇ийрз баад̇зд̇ваа урз нисийд̣̇ид̇ваа мукамзвасса бот̇зси.
Itissa imāya gāthāya atthadhammavaḍḍhiṃ kathetvā ‘‘ayaṃ te atthavaḍḍhi ca dhammavaḍḍhi cā’’ti āha. So pana dandhapuriso taṃ ovādaṃ na kiñci maññamāno ‘‘idaṃ, samaṇa, tayā mayhaṃ dinnaṃ nāvāvetana’’nti āha. ‘‘Āmāvuso’’ti. ‘‘Mayhaṃ iminā kammaṃ natthi, aññaṃ me dehī’’ti. ‘‘Āvuso, idaṃ ṭhapetvā mayhaṃ aññaṃ natthī’’ti. ‘‘Atha tvaṃ kasmā mama nāvaṃ āruḷhosī’’ti tāpasaṃ gaṅgātīre pātetvā ure nisīditvā mukhamevassa pothesi.
сад̇т̇аа ‘‘ид̇и со, бхигкавз, д̇аабасо яам̣ оваад̣̇ам̣ д̣̇ад̇ваа ран̃н̃о санд̇игаа г̇аамаварам̣ лабхи, д̇амзва оваад̣̇ам̣ анд̇хаб̣ааласса наавигасса гат̇зд̇ваа мукабот̇анам̣ баабун̣и, д̇асмаа оваад̣̇ам̣ д̣̇знд̇зна яуд̇д̇аж̇анассзва д̣̇аад̇аб̣б̣о, на аяуд̇д̇аж̇анассаа’’д̇и вад̇ваа абхисамб̣уд̣̇д̇хо худ̇ваа д̇ад̣̇ананд̇арам̣ г̇аат̇амааха –
Satthā ‘‘iti so, bhikkhave, tāpaso yaṃ ovādaṃ datvā rañño santikā gāmavaraṃ labhi, tameva ovādaṃ andhabālassa nāvikassa kathetvā mukhapothanaṃ pāpuṇi, tasmā ovādaṃ dentena yuttajanasseva dātabbo, na ayuttajanassā’’ti vatvā abhisambuddho hutvā tadanantaraṃ gāthamāha –
6.
6.
‘‘яааязваанусаасанияаа, рааж̇аа г̇аамаварам̣ ад̣̇аа;
‘‘Yāyevānusāsaniyā, rājā gāmavaraṃ adā;
д̇ааязваанусаасанияаа, наавиго бахарий мука’’нд̇и.
Tāyevānusāsaniyā, nāviko paharī mukha’’nti.
д̇асса д̇ам̣ бахаранд̇ассзва бхарияаа бхад̇д̇ам̣ г̇ахзд̇ваа ааг̇ад̇аа баабабурисам̣ д̣̇исваа ‘‘саами, аяам̣ д̇аабасо наама рааж̇агулуубаго, маа бахарий’’д̇и ааха. со гуж̇жхид̇ваа ‘‘д̇вам̣ мз имам̣ гуудад̇аабасам̣ бахарид̇ум̣ на д̣̇зсий’’д̇и удтааяа д̇ам̣ бахарид̇ваа баад̇зси. ат̇а бхад̇д̇абаад̇и бад̇ид̇ваа бхиж̇ж̇и, д̇ассаа жа бана г̇аруг̇аб̣бхааяа г̇аб̣бхо бхуумияам̣ бад̇и. ат̇а нам̣ мануссаа самбариваарзд̇ваа ‘‘бурисагхаад̇агажоро’’д̇и г̇ахзд̇ваа б̣анд̇хид̇ваа ран̃н̃о д̣̇ассзсум̣. рааж̇аа винижчинид̇ваа д̇асса рааж̇аан̣ам̣ гаарзси. сад̇т̇аа абхисамб̣уд̣̇д̇хо худ̇ваа д̇амад̇т̇ам̣ багаасзнд̇о осаанаг̇аат̇амааха –
Tassa taṃ paharantasseva bhariyā bhattaṃ gahetvā āgatā pāpapurisaṃ disvā ‘‘sāmi, ayaṃ tāpaso nāma rājakulūpako, mā paharī’’ti āha. So kujjhitvā ‘‘tvaṃ me imaṃ kūṭatāpasaṃ paharituṃ na desī’’ti uṭṭhāya taṃ paharitvā pātesi. Atha bhattapāti patitvā bhijji, tassā ca pana garugabbhāya gabbho bhūmiyaṃ pati. Atha naṃ manussā samparivāretvā ‘‘purisaghātakacoro’’ti gahetvā bandhitvā rañño dassesuṃ. Rājā vinicchinitvā tassa rājāṇaṃ kāresi. Satthā abhisambuddho hutvā tamatthaṃ pakāsento osānagāthamāha –
7.
7.
‘‘бхад̇д̇ам̣ бхиннам̣ хад̇аа бхарияаа, г̇аб̣бхо жа бад̇ид̇о чамаа;
‘‘Bhattaṃ bhinnaṃ hatā bhariyā, gabbho ca patito chamā;
миг̇ова ж̇аад̇аруубзна, на д̇знад̇т̇ам̣ аб̣анд̇хи суу’’д̇и.
Migova jātarūpena, na tenatthaṃ abandhi sū’’ti.
д̇ад̇т̇а бхад̇д̇ам̣ бхиннанд̇и бхад̇д̇абаад̇и бхиннаа. хад̇аад̇и бахад̇аа. чамаад̇и бхуумияам̣. миг̇ова ж̇аад̇аруубзнаад̇и яат̇аа миг̇о суван̣н̣ам̣ ваа хиран̃н̃ам̣ ваа муд̇д̇ааман̣иаад̣̇ийни ваа мад̣̇д̣̇ид̇ваа г̇ажчанд̇оби ад̇т̇арид̇ваа нибаж̇ж̇анд̇оби д̇зна ж̇аад̇аруубзна ад̇д̇ано ад̇т̇ам̣ вад̣дхзд̇ум̣ ниб̣б̣ад̇д̇зд̇ум̣ на саггод̇и, звамзва со анд̇хаб̣аало бан̣д̣ид̇зхи д̣̇иннам̣ оваад̣̇ам̣ суд̇вааби ад̇д̇ано ад̇т̇ам̣ вад̣дхзд̇ум̣ ниб̣б̣ад̇д̇зд̇ум̣ наасагкийд̇и вуд̇д̇ам̣ ход̇и. аб̣анд̇хи сууд̇и зд̇т̇а аб̣анд̇хи сод̇и звамад̇т̇о д̣̇адтаб̣б̣о. са-оид̇и имзсам̣ бад̣̇аанан̃хи сууд̇и санд̇хи ход̇и.
Tattha bhattaṃ bhinnanti bhattapāti bhinnā. Hatāti pahatā. Chamāti bhūmiyaṃ. Migova jātarūpenāti yathā migo suvaṇṇaṃ vā hiraññaṃ vā muttāmaṇiādīni vā madditvā gacchantopi attharitvā nipajjantopi tena jātarūpena attano atthaṃ vaḍḍhetuṃ nibbattetuṃ na sakkoti, evameva so andhabālo paṇḍitehi dinnaṃ ovādaṃ sutvāpi attano atthaṃ vaḍḍhetuṃ nibbattetuṃ nāsakkhīti vuttaṃ hoti. Abandhi sūti ettha abandhi soti evamattho daṭṭhabbo. Sa-oiti imesaṃ padānañhi sūti sandhi hoti.
сад̇т̇аа имам̣ д̇хаммад̣̇зсанам̣ аахарид̇ваа сажжаани багаасзд̇ваа ж̇аад̇агам̣ самод̇хаанзси, сажжабарияосаанз со бхигку сод̇аабад̇д̇ипалз бад̇идтахи. д̇ад̣̇аа наавиго ид̣̇аани наавигова ахоси, рааж̇аа аананд̣̇о, д̇аабасо бана ахамзва ахосинд̇и.
Satthā imaṃ dhammadesanaṃ āharitvā saccāni pakāsetvā jātakaṃ samodhānesi, saccapariyosāne so bhikkhu sotāpattiphale patiṭṭhahi. Tadā nāviko idāni nāvikova ahosi, rājā ānando, tāpaso pana ahameva ahosinti.
аваарияаж̇аад̇агаван̣н̣анаа батамаа.
Avāriyajātakavaṇṇanā paṭhamā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / ж̇аад̇агабаал̣и • Jātakapāḷi / 376. аваарияаж̇аад̇агам̣ • 376. Avāriyajātakaṃ
