| Library / Tipiṭaka / திபிடக • Tipiṭaka / பாசித்யாதி³யோஜனாபாளி • Pācityādiyojanāpāḷi |
4. போ⁴ஜனவக்³கோ³
4. Bhojanavaggo
1. ஆவஸத²பிண்ட³ஸிக்கா²பத³-அத்த²யோஜனா
1. Āvasathapiṇḍasikkhāpada-atthayojanā
203. போ⁴ஜனவக்³க³ஸ்ஸ பட²மே ஆவஸதே² பஞ்ஞத்தோ பிண்டோ³ ஆவஸத²பிண்டோ³தி த³ஸ்ஸெந்தோ ஆஹ ‘‘ஸமந்தா’’திஆதி³. பரிக்கி²த்தந்தி பரிவுதங் ஆவஸத²ந்தி ஸம்ப³ந்தோ⁴. அத்³த⁴ங் பத²ங் க³ச்ச²ந்தீதி அத்³தி⁴கா. கி³லாயந்தி ருஜந்தீதி கி³லானா. க³ப்³போ⁴ குச்சி²ட்ட²ஸத்தோ ஏதாஸந்தி க³ப்³பி⁴னியோ. மலங் பப்³பா³ஜெந்தீதி பப்³ப³ஜிதா, தேஸங் யதா²னுரூபந்தி ஸம்ப³ந்தோ⁴. பஞ்ஞத்தானி மஞ்சபீடா²னி எத்தா²தி பஞ்ஞத்தமஞ்சபீடோ², தங். அனேகக³ப்³ப⁴பரிச்சே²த³ங் அனேகபமுக²பரிச்சே²த³ங் ஆவஸத²ங் கத்வாதி யோஜனா. தத்தா²தி ஆவஸதே². தேஸங் தேஸந்தி அத்³தி⁴காதீ³னங். ஹிய்யோஸத்³த³ஸ்ஸ அதீதானந்தராஹஸ்ஸ ச அனாக³தானந்தராஹஸ்ஸ ச வாசகத்தா இத⁴ அனாக³தானந்தராஹவாசகோதி ஆஹ ‘‘ஸ்வேபீ’’தி. குஹிங் க³தா இதி வுத்தேதி யோஜனா. ‘‘குக்குச்சாயந்தோ’’திபத³ஸ்ஸ நாமதா⁴துங் த³ஸ்ஸெந்தோ ஆஹ ‘‘குக்குச்சங் கரொந்தோ’’தி.
203. Bhojanavaggassa paṭhame āvasathe paññatto piṇḍo āvasathapiṇḍoti dassento āha ‘‘samantā’’tiādi. Parikkhittanti parivutaṃ āvasathanti sambandho. Addhaṃ pathaṃ gacchantīti addhikā. Gilāyanti rujantīti gilānā. Gabbho kucchiṭṭhasatto etāsanti gabbhiniyo. Malaṃ pabbājentīti pabbajitā, tesaṃ yathānurūpanti sambandho. Paññattāni mañcapīṭhāni etthāti paññattamañcapīṭho, taṃ. Anekagabbhaparicchedaṃ anekapamukhaparicchedaṃ āvasathaṃ katvāti yojanā. Tatthāti āvasathe. Tesaṃ tesanti addhikādīnaṃ. Hiyyosaddassa atītānantarāhassa ca anāgatānantarāhassa ca vācakattā idha anāgatānantarāhavācakoti āha ‘‘svepī’’ti. Kuhiṃ gatā iti vutteti yojanā. ‘‘Kukkuccāyanto’’tipadassa nāmadhātuṃ dassento āha ‘‘kukkuccaṃ karonto’’ti.
206. ‘‘அத்³த⁴யோஜனங் வா யோஜனங் வா’’திஇமினா ‘‘பக்கமிது’’ந்திபத³ஸ்ஸ கம்மங் த³ஸ்ஸேதி. ‘‘க³ந்து’’ந்திஇமினா கமுஸத்³த³ஸ்ஸ பத³விக்கே²பத்த²ங் த³ஸ்ஸேதி. ‘‘அனோதி³ஸ்ஸா’’திபத³ஸ்ஸ த்வாபச்சயந்தபா⁴வங் த³ஸ்ஸேதுங் ‘‘அனுத்³தி³ஸித்வா’’தி வுத்தங். பாஸங் டே³தீதி பாஸண்டோ³, ஸத்தானங் சித்தேஸு தி³ட்டி²பாஸங் கி²பதீதி அத்தோ². அத² வா தண்ஹாபாஸங், தி³ட்டி²பாஸஞ்ச டே³தி உட்³டே³தீதி பாஸண்டோ³, தங் பாஸண்ட³ங். யாவதத்தோ² பஞ்ஞத்தோ ஹோதீதி யாவதா அத்தோ² ஹோதி, தாவதா பஞ்ஞத்தோ ஹோதீதி யோஜனா. ‘‘யாவத³த்தோ²’’திபி பாடோ², அயமேவத்தோ². த³காரோ பத³ஸந்தி⁴கரோ. ஸகிங் பு⁴ஞ்ஜிதப்³ப³ந்தி ஏகதி³வஸங் ஸகிங் பு⁴ஞ்ஜிதப்³ப³ந்தி அத்தோ². தேனாஹ ‘‘ஏகதி³வஸங் பு⁴ஞ்ஜிதப்³ப³’’ந்தி.
206. ‘‘Addhayojanaṃ vā yojanaṃ vā’’tiiminā ‘‘pakkamitu’’ntipadassa kammaṃ dasseti. ‘‘Gantu’’ntiiminā kamusaddassa padavikkhepatthaṃ dasseti. ‘‘Anodissā’’tipadassa tvāpaccayantabhāvaṃ dassetuṃ ‘‘anuddisitvā’’ti vuttaṃ. Pāsaṃ ḍetīti pāsaṇḍo, sattānaṃ cittesu diṭṭhipāsaṃ khipatīti attho. Atha vā taṇhāpāsaṃ, diṭṭhipāsañca ḍeti uḍḍetīti pāsaṇḍo, taṃ pāsaṇḍaṃ. Yāvatattho paññatto hotīti yāvatā attho hoti, tāvatā paññatto hotīti yojanā. ‘‘Yāvadattho’’tipi pāṭho, ayamevattho. Dakāro padasandhikaro. Sakiṃ bhuñjitabbanti ekadivasaṃ sakiṃ bhuñjitabbanti attho. Tenāha ‘‘ekadivasaṃ bhuñjitabba’’nti.
எத்தா²தி இமஸ்மிங் ஸிக்கா²பதே³. ஏககுலேன வா பஞ்ஞத்தந்தி ஸம்ப³ந்தோ⁴. பு⁴ஞ்ஜிதுங் ந வட்டதி ஏகதோ ஹுத்வா பஞ்ஞத்தத்தாதி அதி⁴ப்பாயோ. நானாகுலேஹி பஞ்ஞத்தங் பிண்ட³ந்தி யோஜனா. பு⁴ஞ்ஜிதுங் வட்டதி நானாகுலானி ஏகதோ அஹுத்வா விஸுங் விஸுங் பஞ்ஞத்தத்தாதி அதி⁴ப்பாயோ. யோபி பிண்டோ³ சி²ஜ்ஜதீதி ஸம்ப³ந்தோ⁴. உபச்சி²ந்தி³த்வாதி அஸத்³தி⁴யாதி³பாபசித்தத்தா உபச்சி²ந்தி³த்வா.
Etthāti imasmiṃ sikkhāpade. Ekakulena vā paññattanti sambandho. Bhuñjituṃ na vaṭṭati ekato hutvā paññattattāti adhippāyo. Nānākulehi paññattaṃ piṇḍanti yojanā. Bhuñjituṃ vaṭṭati nānākulāni ekato ahutvā visuṃ visuṃ paññattattāti adhippāyo. Yopi piṇḍo chijjatīti sambandho. Upacchinditvāti asaddhiyādipāpacittattā upacchinditvā.
208. அனுவஸித்வாதி புனப்புனங் வஸித்வா. அந்தராமக்³கே³ க³ச்ச²ந்தத்தா ‘‘க³ச்ச²ந்தோ பு⁴ஞ்ஜதீ’’தி இத³ங் தாவ யுத்தங் ஹோது, க³தட்டா²னே பன க³மிதத்தா கத²ங்? பச்சுப்பன்னஸமீபோபி அதீதோ தேன ஸங்க³ஹிதத்தா யுத்தங். ‘‘குதோ நு த்வங் பி⁴க்கு² ஆக³ச்ச²ஸீ’’திஆதீ³ஸு (ஸங்॰ நி॰ 1.130) விய. தங்ஸமீபோபி ஹி தாதி³ஸோ. நானாட்டா²னேஸு நானாகுலானங் ஸந்தகே பகதியா அனாபத்திபா⁴வதோ நானாட்டா²னேஸு ஏககுலஸ்ஸேவ ஸந்தகங் ஸந்தா⁴ய வுத்தங் ‘‘அனாபத்தீ’’தி. ஆரத்³த⁴ஸ்ஸ விச்சே²த³த்தா ‘‘புன ஏகதி³வஸங் பு⁴ஞ்ஜிதுங் லப⁴தீ’’தி வுத்தங். ‘‘ஓதி³ஸ்ஸா’’தி ஸாமஞ்ஞதோ வுத்தேபி பி⁴க்கூ²யேவ க³ஹேதப்³பா³தி ஆஹ ‘‘பி⁴க்கூ²னங்யேவா’’தி. பட²மங்.
208.Anuvasitvāti punappunaṃ vasitvā. Antarāmagge gacchantattā ‘‘gacchanto bhuñjatī’’ti idaṃ tāva yuttaṃ hotu, gataṭṭhāne pana gamitattā kathaṃ? Paccuppannasamīpopi atīto tena saṅgahitattā yuttaṃ. ‘‘Kuto nu tvaṃ bhikkhu āgacchasī’’tiādīsu (saṃ. ni. 1.130) viya. Taṃsamīpopi hi tādiso. Nānāṭṭhānesu nānākulānaṃ santake pakatiyā anāpattibhāvato nānāṭṭhānesu ekakulasseva santakaṃ sandhāya vuttaṃ ‘‘anāpattī’’ti. Āraddhassa vicchedattā ‘‘puna ekadivasaṃ bhuñjituṃ labhatī’’ti vuttaṃ. ‘‘Odissā’’ti sāmaññato vuttepi bhikkhūyeva gahetabbāti āha ‘‘bhikkhūnaṃyevā’’ti. Paṭhamaṃ.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 4. போ⁴ஜனவக்³கோ³ • 4. Bhojanavaggo
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 1. ஆவஸத²பிண்ட³ஸிக்கா²பத³வண்ணனா • 1. Āvasathapiṇḍasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / 1. ஆவஸத²பிண்ட³ஸிக்கா²பத³வண்ணனா • 1. Āvasathapiṇḍasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 1. ஆவஸத²பிண்ட³ஸிக்கா²பத³வண்ணனா • 1. Āvasathapiṇḍasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 1. ஆவஸத²பிண்ட³ஸிக்கா²பத³வண்ணனா • 1. Āvasathapiṇḍasikkhāpadavaṇṇanā
