| Library / Tipiṭaka / திபிடக • Tipiṭaka / மஹாவிப⁴ங்க³-அட்ட²கதா² • Mahāvibhaṅga-aṭṭhakathā |
4. போ⁴ஜனவக்³கோ³
4. Bhojanavaggo
1. ஆவஸத²பிண்ட³ஸிக்கா²பத³வண்ணனா
1. Āvasathapiṇḍasikkhāpadavaṇṇanā
203. போ⁴ஜனவக்³க³ஸ்ஸ பட²மஸிக்கா²பதே³ – ஆவஸத²பிண்டோ³தி ஆவஸதே² பிண்டோ³. ஸமந்தா பரிக்கி²த்தங் அத்³தி⁴ககி³லானக³ப்³பி⁴னிபப்³ப³ஜிதானங் யதா²னுரூபங் பஞ்ஞத்தமஞ்சபீட²ங் அனேகக³ப்³ப⁴பமுக²பரிச்சே²த³ங் ஆவஸத²ங் கத்வா தத்த² புஞ்ஞகாமதாய பிண்டோ³ பஞ்ஞத்தோ ஹோதி, யாகு³ப⁴த்தபே⁴ஸஜ்ஜாதி³ ஸப்³ப³ங் தேஸங் தேஸங் தா³னத்தா²ய ட²பிதங் ஹோதீதி அத்தோ². ஹிய்யோபீதி ஸ்வேபி. அபஸக்கந்தீதி அபக³ச்ச²ந்தி. மனுஸ்ஸா உஜ்ஜா²யந்தீதி தித்தி²யே அபஸ்ஸந்தா ‘‘தித்தி²யா குஹிங் க³தா’’‘‘இமே பஸ்ஸித்வா பக்கந்தா’’தி ஸுத்வா உஜ்ஜா²யந்தி. குக்குச்சாயந்தோதி குக்குச்சங் கரொந்தோ, அகப்பியஸஞ்ஞங் உப்பாதெ³ந்தோதி அத்தோ².
203. Bhojanavaggassa paṭhamasikkhāpade – āvasathapiṇḍoti āvasathe piṇḍo. Samantā parikkhittaṃ addhikagilānagabbhinipabbajitānaṃ yathānurūpaṃ paññattamañcapīṭhaṃ anekagabbhapamukhaparicchedaṃ āvasathaṃ katvā tattha puññakāmatāya piṇḍo paññatto hoti, yāgubhattabhesajjādi sabbaṃ tesaṃ tesaṃ dānatthāya ṭhapitaṃ hotīti attho. Hiyyopīti svepi. Apasakkantīti apagacchanti. Manussā ujjhāyantīti titthiye apassantā ‘‘titthiyā kuhiṃ gatā’’‘‘ime passitvā pakkantā’’ti sutvā ujjhāyanti. Kukkuccāyantoti kukkuccaṃ karonto, akappiyasaññaṃ uppādentoti attho.
206. ஸக்கோதி தம்ஹா ஆவஸதா² பக்கமிதுந்தி அத்³த⁴யோஜனங் வா யோஜனங் வா க³ந்துங் ஸக்கோதி. ந ஸக்கோதீதி எத்தகமேவ ந ஸக்கோதி. அனோதி³ஸ்ஸாதி இமேஸங்யேவ வா எத்தகானங்யேவ வாதி ஏகங் பாஸண்ட³ங் அனுத்³தி³ஸித்வா ஸப்³பே³ஸங் பஞ்ஞத்தோ ஹோதி. யாவத³த்தோ²தி போ⁴ஜனம்பி எத்தகந்தி அபரிச்சி²ந்தி³த்வா யாவத³த்தோ² பஞ்ஞத்தோ ஹோதி. ஸகிங் பு⁴ஞ்ஜிதப்³ப³ந்தி ஏகதி³வஸங் பு⁴ஞ்ஜிதப்³ப³ங், து³தியதி³வஸதோ பட்டா²ய படிக்³க³ஹணே து³க்கடங், அஜ்ஜோ²ஹாரே அஜ்ஜோ²ஹாரே பாசித்தியங்.
206.Sakkoti tamhā āvasathā pakkamitunti addhayojanaṃ vā yojanaṃ vā gantuṃ sakkoti. Na sakkotīti ettakameva na sakkoti. Anodissāti imesaṃyeva vā ettakānaṃyeva vāti ekaṃ pāsaṇḍaṃ anuddisitvā sabbesaṃ paññatto hoti. Yāvadatthoti bhojanampi ettakanti aparicchinditvā yāvadattho paññatto hoti. Sakiṃ bhuñjitabbanti ekadivasaṃ bhuñjitabbaṃ, dutiyadivasato paṭṭhāya paṭiggahaṇe dukkaṭaṃ, ajjhohāre ajjhohāre pācittiyaṃ.
அயங் பனெத்த² வினிச்ச²யோ – ஏககுலேன வா நானாகுலேஹி வா ஏகதோ ஹுத்வா ஏகஸ்மிங் டா²னே வா நானாடா²னேஸு வா ‘‘அஜ்ஜ ஏகஸ்மிங்; ஸ்வே ஏகஸ்மி’’ந்தி ஏவங் அனியமிதட்டா²னே வா பஞ்ஞத்தங் ஏகஸ்மிங் டா²னே ஏகதி³வஸங் பு⁴ஞ்ஜித்வா து³தியதி³வஸே தஸ்மிங் டா²னே அஞ்ஞஸ்மிங் வா பு⁴ஞ்ஜிதுங் ந வட்டதி. நானாகுலேஹி பன நானாடா²னேஸு பஞ்ஞத்தங் ஏகஸ்மிங் டா²னே ஏகதி³வஸங் பு⁴ஞ்ஜித்வா து³தியதி³வஸே அஞ்ஞத்த² பு⁴ஞ்ஜிதுங் வட்டதி. படிபாடிங் பன கே²பெத்வா புன ஆதி³தோ பட்டா²ய பு⁴ஞ்ஜிதுங் ந வட்டதீதி மஹாபச்சரியங் வுத்தங். ஏகபூக³னானாபூக³ஏககா³மனானாகா³மேஸுபி ஏஸேவ நயோ. யோபி ஏககுலஸ்ஸ வா நானாகுலானங் வா ஏகதோ பஞ்ஞத்தோ தண்டு³லாதீ³னங் அபா⁴வேன அந்தரந்தரா சி²ஜ்ஜதி, ஸோபி ந பு⁴ஞ்ஜிதப்³போ³. ஸசே பன ‘‘ந ஸக்கோம தா³து’’ந்தி உபச்சி²ந்தி³த்வா புன கல்யாணசித்தே உப்பன்னே தா³துங் ஆரப⁴ந்தி, ஏதங் புன ஏகதி³வஸங் பு⁴ஞ்ஜிதுங் வட்டதீதி மஹாபச்சரியங் வுத்தங்.
Ayaṃ panettha vinicchayo – ekakulena vā nānākulehi vā ekato hutvā ekasmiṃ ṭhāne vā nānāṭhānesu vā ‘‘ajja ekasmiṃ; sve ekasmi’’nti evaṃ aniyamitaṭṭhāne vā paññattaṃ ekasmiṃ ṭhāne ekadivasaṃ bhuñjitvā dutiyadivase tasmiṃ ṭhāne aññasmiṃ vā bhuñjituṃ na vaṭṭati. Nānākulehi pana nānāṭhānesu paññattaṃ ekasmiṃ ṭhāne ekadivasaṃ bhuñjitvā dutiyadivase aññattha bhuñjituṃ vaṭṭati. Paṭipāṭiṃ pana khepetvā puna ādito paṭṭhāya bhuñjituṃ na vaṭṭatīti mahāpaccariyaṃ vuttaṃ. Ekapūganānāpūgaekagāmanānāgāmesupi eseva nayo. Yopi ekakulassa vā nānākulānaṃ vā ekato paññatto taṇḍulādīnaṃ abhāvena antarantarā chijjati, sopi na bhuñjitabbo. Sace pana ‘‘na sakkoma dātu’’nti upacchinditvā puna kalyāṇacitte uppanne dātuṃ ārabhanti, etaṃ puna ekadivasaṃ bhuñjituṃ vaṭṭatīti mahāpaccariyaṃ vuttaṃ.
208. அனாபத்தி கி³லானஸ்ஸாதி கி³லானஸ்ஸ அனுவஸித்வா பு⁴ஞ்ஜந்தஸ்ஸ அனாபத்தி. க³ச்ச²ந்தோ வாதி யோ க³ச்ச²ந்தோ அந்தராமக்³கே³ ஏகதி³வஸங் க³தட்டா²னே ச ஏகதி³வஸங் பு⁴ஞ்ஜதி, தஸ்ஸாபி அனாபத்தி. ஆக³ச்ச²ந்தேபி ஏஸேவ நயோ. க³ந்த்வா பச்சாக³ச்ச²ந்தோபி அந்தராமக்³கே³ ஏகதி³வஸங் ஆக³தட்டா²னே ச ஏகதி³வஸங் பு⁴ஞ்ஜிதுங் லப⁴தி. க³ச்சி²ஸ்ஸாமீதி பு⁴ஞ்ஜித்வா நிக்க²ந்தஸ்ஸ நதீ³ வா பூரதி சோராதி³ப⁴யங் வா ஹோதி, ஸோ நிவத்தித்வா கே²மபா⁴வங் ஞத்வா க³ச்ச²ந்தோ புன ஏகதி³வஸங் பு⁴ஞ்ஜிதுங் லப⁴தீதி ஸப்³ப³மித³ங் மஹாபச்சரியாதீ³ஸு வுத்தங் . ஓதி³ஸ்ஸ பஞ்ஞத்தோ ஹோதீதி பி⁴க்கூ²னங்யேவ அத்தா²ய உத்³தி³ஸித்வா பஞ்ஞத்தோ ஹோதி. ந யாவத³த்தோ²தி யாவத³த்த²ங் பஞ்ஞத்தோ ந ஹோதி, தோ²கங் தோ²கங் லப்³ப⁴தி, தாதி³ஸங் நிச்சம்பி பு⁴ஞ்ஜிதுங் வட்டதி. பஞ்ச போ⁴ஜனானி ட²பெத்வா ஸப்³ப³த்தா²தி யாகு³க²ஜ்ஜகப²லாப²லாதி³பே⁴தே³ ஸப்³ப³த்த² அனாபத்தி. யாகு³ஆதீ³னி ஹி நிச்சம்பி பு⁴ஞ்ஜிதுங் வட்டதி. ஸேஸங் உத்தானமேவ. ஏளகலோமஸமுட்டா²னங் – காயதோ ச காயசித்ததோ ச ஸமுட்டா²தி, கிரியங், நோஸஞ்ஞாவிமொக்க²ங், அசித்தகங், பண்ணத்திவஜ்ஜங், காயகம்மங் திசித்தங், திவேத³னந்தி.
208.Anāpatti gilānassāti gilānassa anuvasitvā bhuñjantassa anāpatti. Gacchanto vāti yo gacchanto antarāmagge ekadivasaṃ gataṭṭhāne ca ekadivasaṃ bhuñjati, tassāpi anāpatti. Āgacchantepi eseva nayo. Gantvā paccāgacchantopi antarāmagge ekadivasaṃ āgataṭṭhāne ca ekadivasaṃ bhuñjituṃ labhati. Gacchissāmīti bhuñjitvā nikkhantassa nadī vā pūrati corādibhayaṃ vā hoti, so nivattitvā khemabhāvaṃ ñatvā gacchanto puna ekadivasaṃ bhuñjituṃ labhatīti sabbamidaṃ mahāpaccariyādīsu vuttaṃ . Odissa paññatto hotīti bhikkhūnaṃyeva atthāya uddisitvā paññatto hoti. Na yāvadatthoti yāvadatthaṃ paññatto na hoti, thokaṃ thokaṃ labbhati, tādisaṃ niccampi bhuñjituṃ vaṭṭati. Pañca bhojanāni ṭhapetvā sabbatthāti yāgukhajjakaphalāphalādibhede sabbattha anāpatti. Yāguādīni hi niccampi bhuñjituṃ vaṭṭati. Sesaṃ uttānameva. Eḷakalomasamuṭṭhānaṃ – kāyato ca kāyacittato ca samuṭṭhāti, kiriyaṃ, nosaññāvimokkhaṃ, acittakaṃ, paṇṇattivajjaṃ, kāyakammaṃ ticittaṃ, tivedananti.
ஆவஸத²பிண்ட³ஸிக்கா²பத³ங் பட²மங்.
Āvasathapiṇḍasikkhāpadaṃ paṭhamaṃ.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 4. போ⁴ஜனவக்³கோ³ • 4. Bhojanavaggo
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / 1. ஆவஸத²பிண்ட³ஸிக்கா²பத³வண்ணனா • 1. Āvasathapiṇḍasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 1. ஆவஸத²பிண்ட³ஸிக்கா²பத³வண்ணனா • 1. Āvasathapiṇḍasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 1. ஆவஸத²பிண்ட³ஸிக்கா²பத³வண்ணனா • 1. Āvasathapiṇḍasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 1. ஆவஸத²பிண்ட³ஸிக்கா²பத³-அத்த²யோஜனா • 1. Āvasathapiṇḍasikkhāpada-atthayojanā
