| Library / Tipiṭaka / திபிடக • Tipiṭaka / ஸாரத்த²தீ³பனீ-டீகா • Sāratthadīpanī-ṭīkā |
4. போ⁴ஜனவக்³கோ³
4. Bhojanavaggo
1. ஆவஸத²பிண்ட³ஸிக்கா²பத³வண்ணனா
1. Āvasathapiṇḍasikkhāpadavaṇṇanā
206. போ⁴ஜனவக்³க³ஸ்ஸ பட²மஸிக்கா²பதே³ அத்³த⁴யோஜனங் வா யோஜனங் வா க³ந்துங் ஸக்கோதீதி எத்த² தத்தகங் க³ந்துங் ஸக்கொந்தஸ்ஸபி தாவதகங் க³ந்த்வா அலத்³த⁴பி⁴க்க²ஸ்ஸ இதோ பு⁴ஞ்ஜிதுங் வட்டதி. இமேஸங்யேவாதி இமேஸங் பாஸண்டா³னங்யேவ. எத்தகானந்தி இமஸ்மிங் பாஸண்டே³ எத்தகானங். ஏகதி³வஸங் பு⁴ஞ்ஜிதப்³ப³ந்தி ஏகதி³வஸங் ஸகிங்யேவ பு⁴ஞ்ஜிதப்³ப³ங். ‘‘ஏகதி³வஸங் பு⁴ஞ்ஜிதப்³ப³’’ந்தி வசனதோ பன ஏகஸ்மிங் தி³வஸே புனப்புனங் பு⁴ஞ்ஜிதுங் வட்டதீதி ந க³ஹேதப்³ப³ங். புன ஆதி³தோ பட்டா²ய பு⁴ஞ்ஜிதுங் ந வட்டதீதி இமினா பட²மங் பு⁴த்தட்டா²னேஸு புன ஏகஸ்மிம்பி டா²னே பு⁴ஞ்ஜிதுங் ந வட்டதீதி த³ஸ்ஸேதி.
206. Bhojanavaggassa paṭhamasikkhāpade addhayojanaṃ vā yojanaṃ vā gantuṃ sakkotīti ettha tattakaṃ gantuṃ sakkontassapi tāvatakaṃ gantvā aladdhabhikkhassa ito bhuñjituṃ vaṭṭati. Imesaṃyevāti imesaṃ pāsaṇḍānaṃyeva. Ettakānanti imasmiṃ pāsaṇḍe ettakānaṃ. Ekadivasaṃ bhuñjitabbanti ekadivasaṃ sakiṃyeva bhuñjitabbaṃ. ‘‘Ekadivasaṃ bhuñjitabba’’nti vacanato pana ekasmiṃ divase punappunaṃ bhuñjituṃ vaṭṭatīti na gahetabbaṃ. Puna ādito paṭṭhāya bhuñjituṃ na vaṭṭatīti iminā paṭhamaṃ bhuttaṭṭhānesu puna ekasmimpi ṭhāne bhuñjituṃ na vaṭṭatīti dasseti.
208. ‘‘க³ச்ச²ந்தோ வா ஆக³ச்ச²ந்தோ வாதி இத³ங் அத்³த⁴யோஜனவஸேன க³ஹேதப்³ப³’’ந்தி வத³ந்தி. அந்தராமக்³கே³ க³தட்டா²னேதி ஏகஸ்ஸேவ ஸந்தகங் ஸந்தா⁴ய வுத்தங். ‘‘ஆக³ச்ச²ந்தேபி ஏஸேவ நயோ’’தி ஸங்கே²பேன வுத்தமேவத்த²ங் விபா⁴வெந்தோ ‘‘க³ந்த்வா பச்சாக³ச்ச²ந்தோ’’திஆதி³மாஹ. ஆபத்திட்டா²னேயேவ புன பு⁴ஞ்ஜந்தஸ்ஸ அனாபத்தி வத்தப்³பா³தி க³மனே ஆக³மனே ச பட²மங் போ⁴ஜனங் அவத்வா அந்தராமக்³கே³ ஏகதி³வஸங் க³தட்டா²னே ச ஏகதி³வஸந்தி புனப்புனங் போ⁴ஜனமேவ த³ஸ்ஸிதங், க³மனதி³வஸே பன ஆக³மனதி³வஸே ச ‘‘க³மிஸ்ஸாமி ஆக³மிஸ்ஸாமீ’’தி பு⁴ஞ்ஜிதுங் வட்டதியேவ. ஸுத்³த⁴சித்தேன புனப்புனங் பு⁴ஞ்ஜந்தஸ்ஸபி புனப்புனங் போ⁴ஜனே அனாபத்தி. அஞ்ஞஸ்ஸத்தா²ய உத்³தி³ஸித்வா பஞ்ஞத்தங் பி⁴க்கு²னோ க³ஹேதுமேவ ந வட்டதீதி ஆஹ ‘‘பி⁴க்கூ²னங்யேவ அத்தா²யா’’தி. ஸேஸமெத்த² உத்தானமேவ. ஆவஸத²பிண்ட³தா, அகி³லானதா, அனுவஸித்வா போ⁴ஜனந்தி இமானி பனெத்த² தீணி அங்கா³னி.
208.‘‘Gacchanto vā āgacchanto vāti idaṃ addhayojanavasena gahetabba’’nti vadanti. Antarāmagge gataṭṭhāneti ekasseva santakaṃ sandhāya vuttaṃ. ‘‘Āgacchantepi eseva nayo’’ti saṅkhepena vuttamevatthaṃ vibhāvento ‘‘gantvā paccāgacchanto’’tiādimāha. Āpattiṭṭhāneyeva puna bhuñjantassa anāpatti vattabbāti gamane āgamane ca paṭhamaṃ bhojanaṃ avatvā antarāmagge ekadivasaṃ gataṭṭhāne ca ekadivasanti punappunaṃ bhojanameva dassitaṃ, gamanadivase pana āgamanadivase ca ‘‘gamissāmi āgamissāmī’’ti bhuñjituṃ vaṭṭatiyeva. Suddhacittena punappunaṃ bhuñjantassapi punappunaṃ bhojane anāpatti. Aññassatthāya uddisitvā paññattaṃ bhikkhuno gahetumeva na vaṭṭatīti āha ‘‘bhikkhūnaṃyeva atthāyā’’ti. Sesamettha uttānameva. Āvasathapiṇḍatā, agilānatā, anuvasitvā bhojananti imāni panettha tīṇi aṅgāni.
ஆவஸத²பிண்ட³ஸிக்கா²பத³வண்ணனா நிட்டி²தா.
Āvasathapiṇḍasikkhāpadavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 4. போ⁴ஜனவக்³கோ³ • 4. Bhojanavaggo
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 1. ஆவஸத²பிண்ட³ஸிக்கா²பத³வண்ணனா • 1. Āvasathapiṇḍasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 1. ஆவஸத²பிண்ட³ஸிக்கா²பத³வண்ணனா • 1. Āvasathapiṇḍasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 1. ஆவஸத²பிண்ட³ஸிக்கா²பத³வண்ணனா • 1. Āvasathapiṇḍasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 1. ஆவஸத²பிண்ட³ஸிக்கா²பத³-அத்த²யோஜனா • 1. Āvasathapiṇḍasikkhāpada-atthayojanā
