| Library / Tipiṭaka / திபிடக • Tipiṭaka / சூளவக்³க³பாளி • Cūḷavaggapāḷi |
2. ஆவாஸிகவத்தகதா²
2. Āvāsikavattakathā
358. தேன கோ² பன ஸமயேன ஆவாஸிகா பி⁴க்கூ² ஆக³ந்துகே பி⁴க்கூ² தி³ஸ்வா நேவ ஆஸனங் பஞ்ஞபெந்தி, ந பாதோ³த³கங் பாத³பீட²ங் பாத³கத²லிகங் உபனிக்கி²பந்தி, ந பச்சுக்³க³ந்த்வா பத்தசீவரங் படிக்³க³ண்ஹந்தி, ந பானீயேன புச்ச²ந்தி 1, ந வுட்³ட⁴தரேபி ஆக³ந்துகே பி⁴க்கூ² அபி⁴வாதெ³ந்தி, ந ஸேனாஸனங் பஞ்ஞபெந்தி. யே தே பி⁴க்கூ² அப்பிச்சா²…பே॰… தே உஜ்ஜா²யந்தி கி²ய்யந்தி விபாசெந்தி – ‘‘கத²ஞ்ஹி நாம ஆவாஸிகா பி⁴க்கூ² ஆக³ந்துகே பி⁴க்கூ² தி³ஸ்வா நேவ ஆஸனங் பஞ்ஞபெஸ்ஸந்தி, ந பாதோ³த³கங் பாத³பீட²ங் பாத³கத²லிகங் உபனிக்கி²பிஸ்ஸந்தி, ந பச்சுக்³க³ந்த்வா பத்தசீவரங் படிக்³க³ஹிஸ்ஸந்தி, ந பானீயேன புச்சி²ஸ்ஸந்தி, வுட்³ட⁴தரேபி ஆக³ந்துகே பி⁴க்கூ² ந அபி⁴வாதெ³ஸ்ஸந்தி, ந ஸேனாஸனங் பஞ்ஞபெஸ்ஸந்தீ’’தி! அத² கோ² தே பி⁴க்கூ² ப⁴க³வதோ ஏதமத்த²ங் ஆரோசேஸுங்…பே॰… ஸச்சங் கிரங், பி⁴க்க²வே…பே॰… ஸச்சங் ப⁴க³வாதி…பே॰… விக³ரஹித்வா…பே॰… த⁴ம்மிங் கத²ங் கத்வா பி⁴க்கூ² ஆமந்தேஸி –
358. Tena kho pana samayena āvāsikā bhikkhū āgantuke bhikkhū disvā neva āsanaṃ paññapenti, na pādodakaṃ pādapīṭhaṃ pādakathalikaṃ upanikkhipanti, na paccuggantvā pattacīvaraṃ paṭiggaṇhanti, na pānīyena pucchanti 2, na vuḍḍhatarepi āgantuke bhikkhū abhivādenti, na senāsanaṃ paññapenti. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma āvāsikā bhikkhū āgantuke bhikkhū disvā neva āsanaṃ paññapessanti, na pādodakaṃ pādapīṭhaṃ pādakathalikaṃ upanikkhipissanti, na paccuggantvā pattacīvaraṃ paṭiggahissanti, na pānīyena pucchissanti, vuḍḍhatarepi āgantuke bhikkhū na abhivādessanti, na senāsanaṃ paññapessantī’’ti! Atha kho te bhikkhū bhagavato etamatthaṃ ārocesuṃ…pe… saccaṃ kiraṃ, bhikkhave…pe… saccaṃ bhagavāti…pe… vigarahitvā…pe… dhammiṃ kathaṃ katvā bhikkhū āmantesi –
359. ‘‘தேன ஹி, பி⁴க்க²வே, ஆவாஸிகானங் பி⁴க்கூ²னங் வத்தங் பஞ்ஞபெஸ்ஸாமி யதா² ஆவாஸிகேஹி பி⁴க்கூ²ஹி ஸம்மா வத்திதப்³ப³ங். ஆவாஸிகேன, பி⁴க்க²வே, பி⁴க்கு²னா ஆக³ந்துகங் பி⁴க்கு²ங் வுட்³ட⁴தரங் தி³ஸ்வா ஆஸனங் பஞ்ஞபேதப்³ப³ங், பாதோ³த³கங் பாத³பீட²ங் பாத³கத²லிகங் உபனிக்கி²பிதப்³ப³ங் , பச்சுக்³க³ந்த்வா பத்தசீவரங் படிக்³க³ஹேதப்³ப³ங், பானீயேன புச்சி²தப்³போ³ 3. ஸசே உஸ்ஸஹதி, உபாஹனா புஞ்சி²தப்³பா³. உபாஹனா புஞ்ச²ந்தேன பட²மங் ஸுக்கே²ன சோளகேன புஞ்சி²தப்³பா³, பச்சா² அல்லேன. உபாஹனாபுஞ்ச²னசோளகங் தோ⁴வித்வா 4 ஏகமந்தங் விஸ்ஸஜ்ஜேதப்³ப³ங்.
359. ‘‘Tena hi, bhikkhave, āvāsikānaṃ bhikkhūnaṃ vattaṃ paññapessāmi yathā āvāsikehi bhikkhūhi sammā vattitabbaṃ. Āvāsikena, bhikkhave, bhikkhunā āgantukaṃ bhikkhuṃ vuḍḍhataraṃ disvā āsanaṃ paññapetabbaṃ, pādodakaṃ pādapīṭhaṃ pādakathalikaṃ upanikkhipitabbaṃ , paccuggantvā pattacīvaraṃ paṭiggahetabbaṃ, pānīyena pucchitabbo 5. Sace ussahati, upāhanā puñchitabbā. Upāhanā puñchantena paṭhamaṃ sukkhena coḷakena puñchitabbā, pacchā allena. Upāhanāpuñchanacoḷakaṃ dhovitvā 6 ekamantaṃ vissajjetabbaṃ.
‘‘ஆக³ந்துகோ பி⁴க்கு² வுட்³ட⁴தரோ அபி⁴வாதே³தப்³போ³. ஸேனாஸனங் பஞ்ஞபேதப்³ப³ங் – ‘ஏதங் தே ஸேனாஸனங் பாபுணாதீ’தி. அஜ்ஜா²வுட்ட²ங் வா அனஜ்ஜா²வுட்ட²ங் வா ஆசிக்கி²தப்³ப³ங். கோ³சரோ ஆசிக்கி²தப்³போ³. அகோ³சரோ ஆசிக்கி²தப்³போ³. ஸெக்க²ஸம்மதானி குலானி ஆசிக்கி²தப்³பா³னி. வச்சட்டா²னங் ஆசிக்கி²தப்³ப³ங். பஸ்ஸாவட்டா²னங் ஆசிக்கி²தப்³ப³ங். பானீயங் ஆசிக்கி²தப்³ப³ங். பரிபோ⁴ஜனீயங் ஆசிக்கி²தப்³ப³ங். கத்தரத³ண்டோ³ ஆசிக்கி²தப்³போ³. ஸங்க⁴ஸ்ஸ கதிகஸண்டா²னங் ஆசிக்கி²தப்³ப³ங் – ‘இமங் காலங் பவிஸிதப்³ப³ங், இமங் காலங் நிக்க²மிதப்³ப³’ந்தி .
‘‘Āgantuko bhikkhu vuḍḍhataro abhivādetabbo. Senāsanaṃ paññapetabbaṃ – ‘etaṃ te senāsanaṃ pāpuṇātī’ti. Ajjhāvuṭṭhaṃ vā anajjhāvuṭṭhaṃ vā ācikkhitabbaṃ. Gocaro ācikkhitabbo. Agocaro ācikkhitabbo. Sekkhasammatāni kulāni ācikkhitabbāni. Vaccaṭṭhānaṃ ācikkhitabbaṃ. Passāvaṭṭhānaṃ ācikkhitabbaṃ. Pānīyaṃ ācikkhitabbaṃ. Paribhojanīyaṃ ācikkhitabbaṃ. Kattaradaṇḍo ācikkhitabbo. Saṅghassa katikasaṇṭhānaṃ ācikkhitabbaṃ – ‘imaṃ kālaṃ pavisitabbaṃ, imaṃ kālaṃ nikkhamitabba’nti .
‘‘ஸசே நவகோ ஹோதி, நிஸின்னகேனேவ ஆசிக்கி²தப்³ப³ங் – ‘அத்ர பத்தங் நிக்கி²பாஹி, அத்ர சீவரங் நிக்கி²பாஹி, இத³ங் ஆஸனங் நிஸீதா³ஹீ’தி. பானீயங் ஆசிக்கி²தப்³ப³ங். பரிபோ⁴ஜனீயங் ஆசிக்கி²தப்³ப³ங். உபாஹனாபுஞ்ச²னசோளகங் ஆசிக்கி²தப்³ப³ங். ஆக³ந்துகோ பி⁴க்கு² நவகோ அபி⁴வாதா³பேதப்³போ³. ஸேனாஸனங் ஆசிக்கி²தப்³ப³ங் – ‘ஏதங் தே ஸேனாஸனங் பாபுணாதீ’தி. அஜ்ஜா²வுட்ட²ங் வா அனஜ்ஜா²வுட்ட²ங் வா ஆசிக்கி²தப்³ப³ங். கோ³சரோ ஆசிக்கி²தப்³போ³. அகோ³சரோ ஆசிக்கி²தப்³போ³. ஸெக்க²ஸம்மதானி குலானி ஆசிக்கி²தப்³பா³னி. வச்சட்டா²னங் ஆசிக்கி²தப்³ப³ங். பஸ்ஸாவட்டா²னங் ஆசிக்கி²தப்³ப³ங். பானீயங் ஆசிக்கி²தப்³ப³ங். பரிபோ⁴ஜனீயங் ஆசிக்கி²தப்³ப³ங். கத்தரத³ண்டோ³ ஆசிக்கி²தப்³போ³. ஸங்க⁴ஸ்ஸ கதிகஸண்டா²னங் ஆசிக்கி²தப்³ப³ங் – ‘இமங் காலங் பவிஸிதப்³ப³ங், இமங் காலங் நிக்க²மிதப்³ப³’ந்தி. இத³ங் கோ², பி⁴க்க²வே , ஆவாஸிகானங் பி⁴க்கூ²னங் வத்தங் யதா² ஆவாஸிகேஹி பி⁴க்கூ²ஹி ஸம்மா வத்திதப்³ப³’’ந்தி.
‘‘Sace navako hoti, nisinnakeneva ācikkhitabbaṃ – ‘atra pattaṃ nikkhipāhi, atra cīvaraṃ nikkhipāhi, idaṃ āsanaṃ nisīdāhī’ti. Pānīyaṃ ācikkhitabbaṃ. Paribhojanīyaṃ ācikkhitabbaṃ. Upāhanāpuñchanacoḷakaṃ ācikkhitabbaṃ. Āgantuko bhikkhu navako abhivādāpetabbo. Senāsanaṃ ācikkhitabbaṃ – ‘etaṃ te senāsanaṃ pāpuṇātī’ti. Ajjhāvuṭṭhaṃ vā anajjhāvuṭṭhaṃ vā ācikkhitabbaṃ. Gocaro ācikkhitabbo. Agocaro ācikkhitabbo. Sekkhasammatāni kulāni ācikkhitabbāni. Vaccaṭṭhānaṃ ācikkhitabbaṃ. Passāvaṭṭhānaṃ ācikkhitabbaṃ. Pānīyaṃ ācikkhitabbaṃ. Paribhojanīyaṃ ācikkhitabbaṃ. Kattaradaṇḍo ācikkhitabbo. Saṅghassa katikasaṇṭhānaṃ ācikkhitabbaṃ – ‘imaṃ kālaṃ pavisitabbaṃ, imaṃ kālaṃ nikkhamitabba’nti. Idaṃ kho, bhikkhave , āvāsikānaṃ bhikkhūnaṃ vattaṃ yathā āvāsikehi bhikkhūhi sammā vattitabba’’nti.
Footnotes:
Related texts:
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / சூளவக்³க³-அட்ட²கதா² • Cūḷavagga-aṭṭhakathā / ஆவாஸிகவத்தகதா² • Āvāsikavattakathā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / ஆவாஸிகவத்தகதா²வண்ணனா • Āvāsikavattakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / ஆவாஸிகவத்தகதா²வண்ணனா • Āvāsikavattakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 2. ஆவாஸிகவத்தகதா² • 2. Āvāsikavattakathā
