| Library / Tipiṭaka / তিপিটক • Tipiṭaka / চূল়ৰগ্গ-অট্ঠকথা • Cūḷavagga-aṭṭhakathā |
আৰাসিকৰত্তকথা
Āvāsikavattakathā
৩৫৯. আৰাসিকৰত্তে – আসনং পঞ্ঞপেতব্বন্তি এৰমাদি সব্বং ৰুড্ঢতরে আগতে চীৰরকম্মং ৰা নৰকম্মং ৰা ঠপেত্ৰাপি কাতব্বং। চেতিযঙ্গণং সম্মজ্জন্তেন সম্মজ্জনিং নিক্খিপিত্ৰা তস্স ৰত্তং কাতুং আরভিতব্বং। পণ্ডিতো হি আগন্তুকো ‘‘সম্মজ্জাহি তাৰ চেতিযঙ্গণ’’ন্তি ৰক্খতি। গিলানভেসজ্জং করোন্তেন পন সচে নাতিআতুরো গিলানো হোতি, ভেসজ্জং অকত্ৰা ৰত্তমেৰ কাতব্বং। মহাগিলানস্স পন ভেসজ্জমেৰ কাতব্বং। পণ্ডিতো হি আগন্তুকো ‘‘করোহি তাৰ ভেসজ্জ’’ন্তি ৰক্খতি। পানীযেন পুচ্ছন্তেন সচে সকিং আনীতং পানীযং সব্বং পিৰতি , ‘‘পুন আনেমী’’তি পুচ্ছিতব্বোযেৰ। অপিচ বীজনেনপি বীজিতব্বো, বীজন্তেন সকিং পাদপিট্ঠিযং বীজিত্ৰা সকিং মজ্ঝে সকিং সীসে বীজিতব্বং, ‘‘অলং হোতূ’’তি ৰুত্তেন ততো মন্দতরং বীজিতব্বং। পুন ‘‘অল’’ন্তি ৰুত্তেন ততো মন্দতরং বীজিতব্বং। ততিযৰারং ৰুত্তেন বীজনী ঠপেতব্বা। পাদাপিস্স ধোৰিতব্বা, ধোৰিত্ৰা সচে অত্তনো তেলং অত্থি, তেন মক্খেতব্বা। নো চে অত্থি, তস্স সন্তকেন মক্খেতব্বা। উপাহনাপুঞ্ছনং পন অত্তনো রুচিৰসেন কাতব্বং। তেনেৰ হেত্থ ‘‘সচে উস্সহতী’’তি ৰুত্তং। তস্মা উপাহনা অপুঞ্ছন্তস্সাপি অনাপত্তি। ‘‘কত্থ ময্হং সেনাসনং পাপুণাতী’’তি পুচ্ছিতেন সেনাসনং পঞ্ঞপেতব্বং, ‘‘এতং তুম্হাকং সেনাসনং পাপুণাতী’’তি এৰং আচিক্খিতব্বন্তি অত্থো। পপ্ফোটেত্ৰা হি পত্থরিতুং পন ৰট্টতিযেৰ।
359. Āvāsikavatte – āsanaṃ paññapetabbanti evamādi sabbaṃ vuḍḍhatare āgate cīvarakammaṃ vā navakammaṃ vā ṭhapetvāpi kātabbaṃ. Cetiyaṅgaṇaṃ sammajjantena sammajjaniṃ nikkhipitvā tassa vattaṃ kātuṃ ārabhitabbaṃ. Paṇḍito hi āgantuko ‘‘sammajjāhi tāva cetiyaṅgaṇa’’nti vakkhati. Gilānabhesajjaṃ karontena pana sace nātiāturo gilāno hoti, bhesajjaṃ akatvā vattameva kātabbaṃ. Mahāgilānassa pana bhesajjameva kātabbaṃ. Paṇḍito hi āgantuko ‘‘karohi tāva bhesajja’’nti vakkhati. Pānīyena pucchantena sace sakiṃ ānītaṃ pānīyaṃ sabbaṃ pivati , ‘‘puna ānemī’’ti pucchitabboyeva. Apica bījanenapi bījitabbo, bījantena sakiṃ pādapiṭṭhiyaṃ bījitvā sakiṃ majjhe sakiṃ sīse bījitabbaṃ, ‘‘alaṃ hotū’’ti vuttena tato mandataraṃ bījitabbaṃ. Puna ‘‘ala’’nti vuttena tato mandataraṃ bījitabbaṃ. Tatiyavāraṃ vuttena bījanī ṭhapetabbā. Pādāpissa dhovitabbā, dhovitvā sace attano telaṃ atthi, tena makkhetabbā. No ce atthi, tassa santakena makkhetabbā. Upāhanāpuñchanaṃ pana attano rucivasena kātabbaṃ. Teneva hettha ‘‘sace ussahatī’’ti vuttaṃ. Tasmā upāhanā apuñchantassāpi anāpatti. ‘‘Kattha mayhaṃ senāsanaṃ pāpuṇātī’’ti pucchitena senāsanaṃ paññapetabbaṃ, ‘‘etaṃ tumhākaṃ senāsanaṃ pāpuṇātī’’ti evaṃ ācikkhitabbanti attho. Papphoṭetvā hi pattharituṃ pana vaṭṭatiyeva.
নৰকস্স ৰত্তে – পানীযং আচিক্খিতব্বন্তি ‘‘এতং পানীযং গহেত্ৰা পিৰাহী’’তি আচিক্খিতব্বং। পরিভোজনীযেপি এসেৰ নযো। সেসং পুরিমসদিসমেৰ। মহাআৰাসেপি অত্তনো সন্তিকং সম্পত্তস্স আগন্তুকস্স ৰত্তং অকাতুং ন লভতি।
Navakassa vatte – pānīyaṃ ācikkhitabbanti ‘‘etaṃ pānīyaṃ gahetvā pivāhī’’ti ācikkhitabbaṃ. Paribhojanīyepi eseva nayo. Sesaṃ purimasadisameva. Mahāāvāsepi attano santikaṃ sampattassa āgantukassa vattaṃ akātuṃ na labhati.
আৰাসিকৰত্তকথা নিট্ঠিতা।
Āvāsikavattakathā niṭṭhitā.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / চূল়ৰগ্গপাল়ি • Cūḷavaggapāḷi / ২. আৰাসিকৰত্তকথা • 2. Āvāsikavattakathā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / আৰাসিকৰত্তকথাৰণ্ণনা • Āvāsikavattakathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / আৰাসিকৰত্তকথাৰণ্ণনা • Āvāsikavattakathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / ২. আৰাসিকৰত্তকথা • 2. Āvāsikavattakathā
