| Library / Tipiṭaka / တိပိဋက • Tipiṭaka / စူဠဝဂ္ဂပာဠိ • Cūḷavaggapāḷi |
၂. အာဝာသိကဝတ္တကထာ
2. Āvāsikavattakathā
၃၅၈. တေန ခော ပန သမယေန အာဝာသိကာ ဘိက္ခူ အာဂန္တုကေ ဘိက္ခူ ဒိသ္ဝာ နေဝ အာသနံ ပညပေန္တိ, န ပာဒောဒကံ ပာဒပီဌံ ပာဒကထလိကံ ဥပနိက္ခိပန္တိ, န ပစ္စုဂ္ဂန္တ္ဝာ ပတ္တစီဝရံ ပဋိဂ္ဂဏ္ဟန္တိ, န ပာနီယေန ပုစ္ဆန္တိ 1, န ဝုဍ္ဎတရေပိ အာဂန္တုကေ ဘိက္ခူ အဘိဝာဒေန္တိ, န သေနာသနံ ပညပေန္တိ။ ယေ တေ ဘိက္ခူ အပ္ပိစ္ဆာ။ပေ.။ တေ ဥဇ္ဈာယန္တိ ခိယ္ယန္တိ ဝိပာစေန္တိ – ‘‘ကထဉ္ဟိ နာမ အာဝာသိကာ ဘိက္ခူ အာဂန္တုကေ ဘိက္ခူ ဒိသ္ဝာ နေဝ အာသနံ ပညပေသ္သန္တိ, န ပာဒောဒကံ ပာဒပီဌံ ပာဒကထလိကံ ဥပနိက္ခိပိသ္သန္တိ, န ပစ္စုဂ္ဂန္တ္ဝာ ပတ္တစီဝရံ ပဋိဂ္ဂဟိသ္သန္တိ, န ပာနီယေန ပုစ္ဆိသ္သန္တိ, ဝုဍ္ဎတရေပိ အာဂန္တုကေ ဘိက္ခူ န အဘိဝာဒေသ္သန္တိ, န သေနာသနံ ပညပေသ္သန္တီ’’တိ! အထ ခော တေ ဘိက္ခူ ဘဂဝတော ဧတမတ္ထံ အာရောစေသုံ။ပေ.။ သစ္စံ ကိရံ, ဘိက္ခဝေ။ပေ.။ သစ္စံ ဘဂဝာတိ။ပေ.။ ဝိဂရဟိတ္ဝာ။ပေ.။ ဓမ္မိံ ကထံ ကတ္ဝာ ဘိက္ခူ အာမန္တေသိ –
358. Tena kho pana samayena āvāsikā bhikkhū āgantuke bhikkhū disvā neva āsanaṃ paññapenti, na pādodakaṃ pādapīṭhaṃ pādakathalikaṃ upanikkhipanti, na paccuggantvā pattacīvaraṃ paṭiggaṇhanti, na pānīyena pucchanti 2, na vuḍḍhatarepi āgantuke bhikkhū abhivādenti, na senāsanaṃ paññapenti. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma āvāsikā bhikkhū āgantuke bhikkhū disvā neva āsanaṃ paññapessanti, na pādodakaṃ pādapīṭhaṃ pādakathalikaṃ upanikkhipissanti, na paccuggantvā pattacīvaraṃ paṭiggahissanti, na pānīyena pucchissanti, vuḍḍhatarepi āgantuke bhikkhū na abhivādessanti, na senāsanaṃ paññapessantī’’ti! Atha kho te bhikkhū bhagavato etamatthaṃ ārocesuṃ…pe… saccaṃ kiraṃ, bhikkhave…pe… saccaṃ bhagavāti…pe… vigarahitvā…pe… dhammiṃ kathaṃ katvā bhikkhū āmantesi –
၃၅၉. ‘‘တေန ဟိ, ဘိက္ခဝေ, အာဝာသိကာနံ ဘိက္ခူနံ ဝတ္တံ ပညပေသ္သာမိ ယထာ အာဝာသိကေဟိ ဘိက္ခူဟိ သမ္မာ ဝတ္တိတဗ္ဗံ။ အာဝာသိကေန, ဘိက္ခဝေ, ဘိက္ခုနာ အာဂန္တုကံ ဘိက္ခုံ ဝုဍ္ဎတရံ ဒိသ္ဝာ အာသနံ ပညပေတဗ္ဗံ, ပာဒောဒကံ ပာဒပီဌံ ပာဒကထလိကံ ဥပနိက္ခိပိတဗ္ဗံ , ပစ္စုဂ္ဂန္တ္ဝာ ပတ္တစီဝရံ ပဋိဂ္ဂဟေတဗ္ဗံ, ပာနီယေန ပုစ္ဆိတဗ္ဗော 3။ သစေ ဥသ္သဟတိ, ဥပာဟနာ ပုဉ္ဆိတဗ္ဗာ။ ဥပာဟနာ ပုဉ္ဆန္တေန ပဌမံ သုက္ခေန စောဠကေန ပုဉ္ဆိတဗ္ဗာ, ပစ္ဆာ အလ္လေန။ ဥပာဟနာပုဉ္ဆနစောဠကံ ဓောဝိတ္ဝာ 4 ဧကမန္တံ ဝိသ္သဇ္ဇေတဗ္ဗံ။
359. ‘‘Tena hi, bhikkhave, āvāsikānaṃ bhikkhūnaṃ vattaṃ paññapessāmi yathā āvāsikehi bhikkhūhi sammā vattitabbaṃ. Āvāsikena, bhikkhave, bhikkhunā āgantukaṃ bhikkhuṃ vuḍḍhataraṃ disvā āsanaṃ paññapetabbaṃ, pādodakaṃ pādapīṭhaṃ pādakathalikaṃ upanikkhipitabbaṃ , paccuggantvā pattacīvaraṃ paṭiggahetabbaṃ, pānīyena pucchitabbo 5. Sace ussahati, upāhanā puñchitabbā. Upāhanā puñchantena paṭhamaṃ sukkhena coḷakena puñchitabbā, pacchā allena. Upāhanāpuñchanacoḷakaṃ dhovitvā 6 ekamantaṃ vissajjetabbaṃ.
‘‘အာဂန္တုကော ဘိက္ခု ဝုဍ္ဎတရော အဘိဝာဒေတဗ္ဗော။ သေနာသနံ ပညပေတဗ္ဗံ – ‘ဧတံ တေ သေနာသနံ ပာပုဏာတီ’တိ။ အဇ္ဈာဝုဋ္ဌံ ဝာ အနဇ္ဈာဝုဋ္ဌံ ဝာ အာစိက္ခိတဗ္ဗံ။ ဂောစရော အာစိက္ခိတဗ္ဗော။ အဂောစရော အာစိက္ခိတဗ္ဗော။ သေက္ခသမ္မတာနိ ကုလာနိ အာစိက္ခိတဗ္ဗာနိ။ ဝစ္စဋ္ဌာနံ အာစိက္ခိတဗ္ဗံ။ ပသ္သာဝဋ္ဌာနံ အာစိက္ခိတဗ္ဗံ။ ပာနီယံ အာစိက္ခိတဗ္ဗံ။ ပရိဘောဇနီယံ အာစိက္ခိတဗ္ဗံ။ ကတ္တရဒဏ္ဍော အာစိက္ခိတဗ္ဗော။ သင္ဃသ္သ ကတိကသဏ္ဌာနံ အာစိက္ခိတဗ္ဗံ – ‘ဣမံ ကာလံ ပဝိသိတဗ္ဗံ, ဣမံ ကာလံ နိက္ခမိတဗ္ဗ’န္တိ ။
‘‘Āgantuko bhikkhu vuḍḍhataro abhivādetabbo. Senāsanaṃ paññapetabbaṃ – ‘etaṃ te senāsanaṃ pāpuṇātī’ti. Ajjhāvuṭṭhaṃ vā anajjhāvuṭṭhaṃ vā ācikkhitabbaṃ. Gocaro ācikkhitabbo. Agocaro ācikkhitabbo. Sekkhasammatāni kulāni ācikkhitabbāni. Vaccaṭṭhānaṃ ācikkhitabbaṃ. Passāvaṭṭhānaṃ ācikkhitabbaṃ. Pānīyaṃ ācikkhitabbaṃ. Paribhojanīyaṃ ācikkhitabbaṃ. Kattaradaṇḍo ācikkhitabbo. Saṅghassa katikasaṇṭhānaṃ ācikkhitabbaṃ – ‘imaṃ kālaṃ pavisitabbaṃ, imaṃ kālaṃ nikkhamitabba’nti .
‘‘သစေ နဝကော ဟောတိ, နိသိန္နကေနေဝ အာစိက္ခိတဗ္ဗံ – ‘အတ္ရ ပတ္တံ နိက္ခိပာဟိ, အတ္ရ စီဝရံ နိက္ခိပာဟိ, ဣဒံ အာသနံ နိသီဒာဟီ’တိ။ ပာနီယံ အာစိက္ခိတဗ္ဗံ။ ပရိဘောဇနီယံ အာစိက္ခိတဗ္ဗံ။ ဥပာဟနာပုဉ္ဆနစောဠကံ အာစိက္ခိတဗ္ဗံ။ အာဂန္တုကော ဘိက္ခု နဝကော အဘိဝာဒာပေတဗ္ဗော။ သေနာသနံ အာစိက္ခိတဗ္ဗံ – ‘ဧတံ တေ သေနာသနံ ပာပုဏာတီ’တိ။ အဇ္ဈာဝုဋ္ဌံ ဝာ အနဇ္ဈာဝုဋ္ဌံ ဝာ အာစိက္ခိတဗ္ဗံ။ ဂောစရော အာစိက္ခိတဗ္ဗော။ အဂောစရော အာစိက္ခိတဗ္ဗော။ သေက္ခသမ္မတာနိ ကုလာနိ အာစိက္ခိတဗ္ဗာနိ။ ဝစ္စဋ္ဌာနံ အာစိက္ခိတဗ္ဗံ။ ပသ္သာဝဋ္ဌာနံ အာစိက္ခိတဗ္ဗံ။ ပာနီယံ အာစိက္ခိတဗ္ဗံ။ ပရိဘောဇနီယံ အာစိက္ခိတဗ္ဗံ။ ကတ္တရဒဏ္ဍော အာစိက္ခိတဗ္ဗော။ သင္ဃသ္သ ကတိကသဏ္ဌာနံ အာစိက္ခိတဗ္ဗံ – ‘ဣမံ ကာလံ ပဝိသိတဗ္ဗံ, ဣမံ ကာလံ နိက္ခမိတဗ္ဗ’န္တိ။ ဣဒံ ခော, ဘိက္ခဝေ , အာဝာသိကာနံ ဘိက္ခူနံ ဝတ္တံ ယထာ အာဝာသိကေဟိ ဘိက္ခူဟိ သမ္မာ ဝတ္တိတဗ္ဗ’’န္တိ။
‘‘Sace navako hoti, nisinnakeneva ācikkhitabbaṃ – ‘atra pattaṃ nikkhipāhi, atra cīvaraṃ nikkhipāhi, idaṃ āsanaṃ nisīdāhī’ti. Pānīyaṃ ācikkhitabbaṃ. Paribhojanīyaṃ ācikkhitabbaṃ. Upāhanāpuñchanacoḷakaṃ ācikkhitabbaṃ. Āgantuko bhikkhu navako abhivādāpetabbo. Senāsanaṃ ācikkhitabbaṃ – ‘etaṃ te senāsanaṃ pāpuṇātī’ti. Ajjhāvuṭṭhaṃ vā anajjhāvuṭṭhaṃ vā ācikkhitabbaṃ. Gocaro ācikkhitabbo. Agocaro ācikkhitabbo. Sekkhasammatāni kulāni ācikkhitabbāni. Vaccaṭṭhānaṃ ācikkhitabbaṃ. Passāvaṭṭhānaṃ ācikkhitabbaṃ. Pānīyaṃ ācikkhitabbaṃ. Paribhojanīyaṃ ācikkhitabbaṃ. Kattaradaṇḍo ācikkhitabbo. Saṅghassa katikasaṇṭhānaṃ ācikkhitabbaṃ – ‘imaṃ kālaṃ pavisitabbaṃ, imaṃ kālaṃ nikkhamitabba’nti. Idaṃ kho, bhikkhave , āvāsikānaṃ bhikkhūnaṃ vattaṃ yathā āvāsikehi bhikkhūhi sammā vattitabba’’nti.
Footnotes:
Related texts:
အဋ္ဌကထာ • Aṭṭhakathā / ဝိနယပိဋက (အဋ္ဌကထာ) • Vinayapiṭaka (aṭṭhakathā) / စူဠဝဂ္ဂ-အဋ္ဌကထာ • Cūḷavagga-aṭṭhakathā / အာဝာသိကဝတ္တကထာ • Āvāsikavattakathā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / သာရတ္ထဒီပနီ-ဋီကာ • Sāratthadīpanī-ṭīkā / အာဝာသိကဝတ္တကထာဝဏ္ဏနာ • Āvāsikavattakathāvaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝိမတိဝိနောဒနီ-ဋီကာ • Vimativinodanī-ṭīkā / အာဝာသိကဝတ္တကထာဝဏ္ဏနာ • Āvāsikavattakathāvaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ပာစိတ္ယာဒိယောဇနာပာဠိ • Pācityādiyojanāpāḷi / ၂. အာဝာသိကဝတ္တကထာ • 2. Āvāsikavattakathā
