| Library / Tipiṭaka / ತಿಪಿಟಕ • Tipiṭaka / ಚೂಳವಗ್ಗಪಾಳಿ • Cūḷavaggapāḷi |
೨. ಆವಾಸಿಕವತ್ತಕಥಾ
2. Āvāsikavattakathā
೩೫೮. ತೇನ ಖೋ ಪನ ಸಮಯೇನ ಆವಾಸಿಕಾ ಭಿಕ್ಖೂ ಆಗನ್ತುಕೇ ಭಿಕ್ಖೂ ದಿಸ್ವಾ ನೇವ ಆಸನಂ ಪಞ್ಞಪೇನ್ತಿ, ನ ಪಾದೋದಕಂ ಪಾದಪೀಠಂ ಪಾದಕಥಲಿಕಂ ಉಪನಿಕ್ಖಿಪನ್ತಿ, ನ ಪಚ್ಚುಗ್ಗನ್ತ್ವಾ ಪತ್ತಚೀವರಂ ಪಟಿಗ್ಗಣ್ಹನ್ತಿ, ನ ಪಾನೀಯೇನ ಪುಚ್ಛನ್ತಿ 1, ನ ವುಡ್ಢತರೇಪಿ ಆಗನ್ತುಕೇ ಭಿಕ್ಖೂ ಅಭಿವಾದೇನ್ತಿ, ನ ಸೇನಾಸನಂ ಪಞ್ಞಪೇನ್ತಿ। ಯೇ ತೇ ಭಿಕ್ಖೂ ಅಪ್ಪಿಚ್ಛಾ…ಪೇ॰… ತೇ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಕಥಞ್ಹಿ ನಾಮ ಆವಾಸಿಕಾ ಭಿಕ್ಖೂ ಆಗನ್ತುಕೇ ಭಿಕ್ಖೂ ದಿಸ್ವಾ ನೇವ ಆಸನಂ ಪಞ್ಞಪೇಸ್ಸನ್ತಿ, ನ ಪಾದೋದಕಂ ಪಾದಪೀಠಂ ಪಾದಕಥಲಿಕಂ ಉಪನಿಕ್ಖಿಪಿಸ್ಸನ್ತಿ, ನ ಪಚ್ಚುಗ್ಗನ್ತ್ವಾ ಪತ್ತಚೀವರಂ ಪಟಿಗ್ಗಹಿಸ್ಸನ್ತಿ, ನ ಪಾನೀಯೇನ ಪುಚ್ಛಿಸ್ಸನ್ತಿ, ವುಡ್ಢತರೇಪಿ ಆಗನ್ತುಕೇ ಭಿಕ್ಖೂ ನ ಅಭಿವಾದೇಸ್ಸನ್ತಿ, ನ ಸೇನಾಸನಂ ಪಞ್ಞಪೇಸ್ಸನ್ತೀ’’ತಿ! ಅಥ ಖೋ ತೇ ಭಿಕ್ಖೂ ಭಗವತೋ ಏತಮತ್ಥಂ ಆರೋಚೇಸುಂ…ಪೇ॰… ಸಚ್ಚಂ ಕಿರಂ, ಭಿಕ್ಖವೇ…ಪೇ॰… ಸಚ್ಚಂ ಭಗವಾತಿ…ಪೇ॰… ವಿಗರಹಿತ್ವಾ…ಪೇ॰… ಧಮ್ಮಿಂ ಕಥಂ ಕತ್ವಾ ಭಿಕ್ಖೂ ಆಮನ್ತೇಸಿ –
358. Tena kho pana samayena āvāsikā bhikkhū āgantuke bhikkhū disvā neva āsanaṃ paññapenti, na pādodakaṃ pādapīṭhaṃ pādakathalikaṃ upanikkhipanti, na paccuggantvā pattacīvaraṃ paṭiggaṇhanti, na pānīyena pucchanti 2, na vuḍḍhatarepi āgantuke bhikkhū abhivādenti, na senāsanaṃ paññapenti. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma āvāsikā bhikkhū āgantuke bhikkhū disvā neva āsanaṃ paññapessanti, na pādodakaṃ pādapīṭhaṃ pādakathalikaṃ upanikkhipissanti, na paccuggantvā pattacīvaraṃ paṭiggahissanti, na pānīyena pucchissanti, vuḍḍhatarepi āgantuke bhikkhū na abhivādessanti, na senāsanaṃ paññapessantī’’ti! Atha kho te bhikkhū bhagavato etamatthaṃ ārocesuṃ…pe… saccaṃ kiraṃ, bhikkhave…pe… saccaṃ bhagavāti…pe… vigarahitvā…pe… dhammiṃ kathaṃ katvā bhikkhū āmantesi –
೩೫೯. ‘‘ತೇನ ಹಿ, ಭಿಕ್ಖವೇ, ಆವಾಸಿಕಾನಂ ಭಿಕ್ಖೂನಂ ವತ್ತಂ ಪಞ್ಞಪೇಸ್ಸಾಮಿ ಯಥಾ ಆವಾಸಿಕೇಹಿ ಭಿಕ್ಖೂಹಿ ಸಮ್ಮಾ ವತ್ತಿತಬ್ಬಂ। ಆವಾಸಿಕೇನ, ಭಿಕ್ಖವೇ, ಭಿಕ್ಖುನಾ ಆಗನ್ತುಕಂ ಭಿಕ್ಖುಂ ವುಡ್ಢತರಂ ದಿಸ್ವಾ ಆಸನಂ ಪಞ್ಞಪೇತಬ್ಬಂ, ಪಾದೋದಕಂ ಪಾದಪೀಠಂ ಪಾದಕಥಲಿಕಂ ಉಪನಿಕ್ಖಿಪಿತಬ್ಬಂ , ಪಚ್ಚುಗ್ಗನ್ತ್ವಾ ಪತ್ತಚೀವರಂ ಪಟಿಗ್ಗಹೇತಬ್ಬಂ, ಪಾನೀಯೇನ ಪುಚ್ಛಿತಬ್ಬೋ 3। ಸಚೇ ಉಸ್ಸಹತಿ, ಉಪಾಹನಾ ಪುಞ್ಛಿತಬ್ಬಾ। ಉಪಾಹನಾ ಪುಞ್ಛನ್ತೇನ ಪಠಮಂ ಸುಕ್ಖೇನ ಚೋಳಕೇನ ಪುಞ್ಛಿತಬ್ಬಾ, ಪಚ್ಛಾ ಅಲ್ಲೇನ। ಉಪಾಹನಾಪುಞ್ಛನಚೋಳಕಂ ಧೋವಿತ್ವಾ 4 ಏಕಮನ್ತಂ ವಿಸ್ಸಜ್ಜೇತಬ್ಬಂ।
359. ‘‘Tena hi, bhikkhave, āvāsikānaṃ bhikkhūnaṃ vattaṃ paññapessāmi yathā āvāsikehi bhikkhūhi sammā vattitabbaṃ. Āvāsikena, bhikkhave, bhikkhunā āgantukaṃ bhikkhuṃ vuḍḍhataraṃ disvā āsanaṃ paññapetabbaṃ, pādodakaṃ pādapīṭhaṃ pādakathalikaṃ upanikkhipitabbaṃ , paccuggantvā pattacīvaraṃ paṭiggahetabbaṃ, pānīyena pucchitabbo 5. Sace ussahati, upāhanā puñchitabbā. Upāhanā puñchantena paṭhamaṃ sukkhena coḷakena puñchitabbā, pacchā allena. Upāhanāpuñchanacoḷakaṃ dhovitvā 6 ekamantaṃ vissajjetabbaṃ.
‘‘ಆಗನ್ತುಕೋ ಭಿಕ್ಖು ವುಡ್ಢತರೋ ಅಭಿವಾದೇತಬ್ಬೋ। ಸೇನಾಸನಂ ಪಞ್ಞಪೇತಬ್ಬಂ – ‘ಏತಂ ತೇ ಸೇನಾಸನಂ ಪಾಪುಣಾತೀ’ತಿ। ಅಜ್ಝಾವುಟ್ಠಂ ವಾ ಅನಜ್ಝಾವುಟ್ಠಂ ವಾ ಆಚಿಕ್ಖಿತಬ್ಬಂ। ಗೋಚರೋ ಆಚಿಕ್ಖಿತಬ್ಬೋ। ಅಗೋಚರೋ ಆಚಿಕ್ಖಿತಬ್ಬೋ। ಸೇಕ್ಖಸಮ್ಮತಾನಿ ಕುಲಾನಿ ಆಚಿಕ್ಖಿತಬ್ಬಾನಿ। ವಚ್ಚಟ್ಠಾನಂ ಆಚಿಕ್ಖಿತಬ್ಬಂ। ಪಸ್ಸಾವಟ್ಠಾನಂ ಆಚಿಕ್ಖಿತಬ್ಬಂ। ಪಾನೀಯಂ ಆಚಿಕ್ಖಿತಬ್ಬಂ। ಪರಿಭೋಜನೀಯಂ ಆಚಿಕ್ಖಿತಬ್ಬಂ। ಕತ್ತರದಣ್ಡೋ ಆಚಿಕ್ಖಿತಬ್ಬೋ। ಸಙ್ಘಸ್ಸ ಕತಿಕಸಣ್ಠಾನಂ ಆಚಿಕ್ಖಿತಬ್ಬಂ – ‘ಇಮಂ ಕಾಲಂ ಪವಿಸಿತಬ್ಬಂ, ಇಮಂ ಕಾಲಂ ನಿಕ್ಖಮಿತಬ್ಬ’ನ್ತಿ ।
‘‘Āgantuko bhikkhu vuḍḍhataro abhivādetabbo. Senāsanaṃ paññapetabbaṃ – ‘etaṃ te senāsanaṃ pāpuṇātī’ti. Ajjhāvuṭṭhaṃ vā anajjhāvuṭṭhaṃ vā ācikkhitabbaṃ. Gocaro ācikkhitabbo. Agocaro ācikkhitabbo. Sekkhasammatāni kulāni ācikkhitabbāni. Vaccaṭṭhānaṃ ācikkhitabbaṃ. Passāvaṭṭhānaṃ ācikkhitabbaṃ. Pānīyaṃ ācikkhitabbaṃ. Paribhojanīyaṃ ācikkhitabbaṃ. Kattaradaṇḍo ācikkhitabbo. Saṅghassa katikasaṇṭhānaṃ ācikkhitabbaṃ – ‘imaṃ kālaṃ pavisitabbaṃ, imaṃ kālaṃ nikkhamitabba’nti .
‘‘ಸಚೇ ನವಕೋ ಹೋತಿ, ನಿಸಿನ್ನಕೇನೇವ ಆಚಿಕ್ಖಿತಬ್ಬಂ – ‘ಅತ್ರ ಪತ್ತಂ ನಿಕ್ಖಿಪಾಹಿ, ಅತ್ರ ಚೀವರಂ ನಿಕ್ಖಿಪಾಹಿ, ಇದಂ ಆಸನಂ ನಿಸೀದಾಹೀ’ತಿ। ಪಾನೀಯಂ ಆಚಿಕ್ಖಿತಬ್ಬಂ। ಪರಿಭೋಜನೀಯಂ ಆಚಿಕ್ಖಿತಬ್ಬಂ। ಉಪಾಹನಾಪುಞ್ಛನಚೋಳಕಂ ಆಚಿಕ್ಖಿತಬ್ಬಂ। ಆಗನ್ತುಕೋ ಭಿಕ್ಖು ನವಕೋ ಅಭಿವಾದಾಪೇತಬ್ಬೋ। ಸೇನಾಸನಂ ಆಚಿಕ್ಖಿತಬ್ಬಂ – ‘ಏತಂ ತೇ ಸೇನಾಸನಂ ಪಾಪುಣಾತೀ’ತಿ। ಅಜ್ಝಾವುಟ್ಠಂ ವಾ ಅನಜ್ಝಾವುಟ್ಠಂ ವಾ ಆಚಿಕ್ಖಿತಬ್ಬಂ। ಗೋಚರೋ ಆಚಿಕ್ಖಿತಬ್ಬೋ। ಅಗೋಚರೋ ಆಚಿಕ್ಖಿತಬ್ಬೋ। ಸೇಕ್ಖಸಮ್ಮತಾನಿ ಕುಲಾನಿ ಆಚಿಕ್ಖಿತಬ್ಬಾನಿ। ವಚ್ಚಟ್ಠಾನಂ ಆಚಿಕ್ಖಿತಬ್ಬಂ। ಪಸ್ಸಾವಟ್ಠಾನಂ ಆಚಿಕ್ಖಿತಬ್ಬಂ। ಪಾನೀಯಂ ಆಚಿಕ್ಖಿತಬ್ಬಂ। ಪರಿಭೋಜನೀಯಂ ಆಚಿಕ್ಖಿತಬ್ಬಂ। ಕತ್ತರದಣ್ಡೋ ಆಚಿಕ್ಖಿತಬ್ಬೋ। ಸಙ್ಘಸ್ಸ ಕತಿಕಸಣ್ಠಾನಂ ಆಚಿಕ್ಖಿತಬ್ಬಂ – ‘ಇಮಂ ಕಾಲಂ ಪವಿಸಿತಬ್ಬಂ, ಇಮಂ ಕಾಲಂ ನಿಕ್ಖಮಿತಬ್ಬ’ನ್ತಿ। ಇದಂ ಖೋ, ಭಿಕ್ಖವೇ , ಆವಾಸಿಕಾನಂ ಭಿಕ್ಖೂನಂ ವತ್ತಂ ಯಥಾ ಆವಾಸಿಕೇಹಿ ಭಿಕ್ಖೂಹಿ ಸಮ್ಮಾ ವತ್ತಿತಬ್ಬ’’ನ್ತಿ।
‘‘Sace navako hoti, nisinnakeneva ācikkhitabbaṃ – ‘atra pattaṃ nikkhipāhi, atra cīvaraṃ nikkhipāhi, idaṃ āsanaṃ nisīdāhī’ti. Pānīyaṃ ācikkhitabbaṃ. Paribhojanīyaṃ ācikkhitabbaṃ. Upāhanāpuñchanacoḷakaṃ ācikkhitabbaṃ. Āgantuko bhikkhu navako abhivādāpetabbo. Senāsanaṃ ācikkhitabbaṃ – ‘etaṃ te senāsanaṃ pāpuṇātī’ti. Ajjhāvuṭṭhaṃ vā anajjhāvuṭṭhaṃ vā ācikkhitabbaṃ. Gocaro ācikkhitabbo. Agocaro ācikkhitabbo. Sekkhasammatāni kulāni ācikkhitabbāni. Vaccaṭṭhānaṃ ācikkhitabbaṃ. Passāvaṭṭhānaṃ ācikkhitabbaṃ. Pānīyaṃ ācikkhitabbaṃ. Paribhojanīyaṃ ācikkhitabbaṃ. Kattaradaṇḍo ācikkhitabbo. Saṅghassa katikasaṇṭhānaṃ ācikkhitabbaṃ – ‘imaṃ kālaṃ pavisitabbaṃ, imaṃ kālaṃ nikkhamitabba’nti. Idaṃ kho, bhikkhave , āvāsikānaṃ bhikkhūnaṃ vattaṃ yathā āvāsikehi bhikkhūhi sammā vattitabba’’nti.
Footnotes:
Related texts:
ಅಟ್ಠಕಥಾ • Aṭṭhakathā / ವಿನಯಪಿಟಕ (ಅಟ್ಠಕಥಾ) • Vinayapiṭaka (aṭṭhakathā) / ಚೂಳವಗ್ಗ-ಅಟ್ಠಕಥಾ • Cūḷavagga-aṭṭhakathā / ಆವಾಸಿಕವತ್ತಕಥಾ • Āvāsikavattakathā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ಸಾರತ್ಥದೀಪನೀ-ಟೀಕಾ • Sāratthadīpanī-ṭīkā / ಆವಾಸಿಕವತ್ತಕಥಾವಣ್ಣನಾ • Āvāsikavattakathāvaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ವಿಮತಿವಿನೋದನೀ-ಟೀಕಾ • Vimativinodanī-ṭīkā / ಆವಾಸಿಕವತ್ತಕಥಾವಣ್ಣನಾ • Āvāsikavattakathāvaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ಪಾಚಿತ್ಯಾದಿಯೋಜನಾಪಾಳಿ • Pācityādiyojanāpāḷi / ೨. ಆವಾಸಿಕವತ್ತಕಥಾ • 2. Āvāsikavattakathā
