| Library / Tipiṭaka / তিপিটক • Tipiṭaka / নেত্তিপ্পকরণ-টীকা • Nettippakaraṇa-ṭīkā |
৭. আৰট্টহারৰিভঙ্গৰণ্ণনা
7. Āvaṭṭahāravibhaṅgavaṇṇanā
২৯. অকুসলানং ধম্মানং ৰিদ্ধংসনসভাৰত্তা, অকুসলানং ৰা পজহনে কুসলানং সম্পাদনে পট্ঠপনসভাৰত্তা আরম্ভধাতু। তথাভূতাতি সীলাদীহি সমঙ্গীভূতা। কামধাতুআদিকা তিধাতুযোৰ তেধাতু। তস্স অভিভৰনতো তেধাতুইস্সরো মচ্চুরাজা। অনাদিমতিসংসারে চিরকালং লদ্ধপতিট্ঠাপি অচিরকালং ভাৰিতেহি কুসলেহি ধম্মেহি সমুচ্ছিন্দনীযত্তা অবলা কিলেসাতি ৰুত্তং ‘‘অবলং দুব্বল’’ন্তি। তেনাহ ‘‘অবলা নং বলীযন্তী’’তি।
29. Akusalānaṃ dhammānaṃ viddhaṃsanasabhāvattā, akusalānaṃ vā pajahane kusalānaṃ sampādane paṭṭhapanasabhāvattā ārambhadhātu. Tathābhūtāti sīlādīhi samaṅgībhūtā. Kāmadhātuādikā tidhātuyova tedhātu. Tassa abhibhavanato tedhātuissaro maccurājā. Anādimatisaṃsāre cirakālaṃ laddhapatiṭṭhāpi acirakālaṃ bhāvitehi kusalehi dhammehi samucchindanīyattā abalā kilesāti vuttaṃ ‘‘abalaṃ dubbala’’nti. Tenāha ‘‘abalā naṃ balīyantī’’ti.
ইদং ৰচনং অযং গাথাপাদো। সমাধিস্স পদট্ঠানন্তি এত্থ সমাধিস্স কারণং সমতানুযোগে নিযোজনতোতি যোজেতব্বং। এস নযো সেসেসুপি। পপঞ্চাতি রাগাদযোৰ। তথা চেৰ সংৰণ্ণিতন্তি দেসনায পদট্ঠানভাৰেনেৰ অত্থসংৰণ্ণনা কতাতি অত্থো।
Idaṃ vacanaṃ ayaṃ gāthāpādo. Samādhissa padaṭṭhānanti ettha samādhissa kāraṇaṃ samatānuyoge niyojanatoti yojetabbaṃ. Esa nayo sesesupi. Papañcāti rāgādayova. Tathā ceva saṃvaṇṇitanti desanāya padaṭṭhānabhāveneva atthasaṃvaṇṇanā katāti attho.
ন্তি তং দেসনং। তস্সাতি সভাগাদিৰসেন আৰট্টনস্স। পরিপক্কঞাণানং ৰিসেসাধিগমায। লাভৰিনিচ্ছযপরিগ্গহমচ্ছরিযানীতিআদীসু লাভোতি রূপাদিআরম্মণপ্পটিলাভো। সো পরিযেসনায সতি হোতীতি পরিযেসনাগ্গহণেন গহিতো। ৰিনিচ্ছযোতি ‘‘এত্তকং মে রূপারম্মণত্থায ভৰিস্সতি, এত্তকং সদ্দাদিআরম্মণত্থায, এত্তকং ময্হং, এত্তকং পরস্স, এত্তকং পরিভুঞ্জিস্সামি, এত্তকং নিদহিস্সামী’’তি এৰং পৰত্তো ৰিতক্কো ৰিনিচ্ছযো। সো লাপিতহেতুকত্তা পরিযেসনমূলকতায পরিযেসনাগ্গহণেনেৰ গহিতো, তথা পরিগ্গহমচ্ছরিযানি। তত্থ পরিগ্গহো ‘‘মম ইদ’’ন্তি পরিগ্গণ্হনং। মচ্ছরিযং ‘‘ময্হেৰ হোতূ’’তি পরেহি সাধারণভাৰাসহনং। তেনেৰস্স পোরাণা এৰং ৰচনত্থং ৰদন্তি ‘‘ময্হেৰিদমচ্ছরিযং হোতু, মা অঞ্ঞেসং অচ্ছরিযং হোতূতি পৰত্তত্তা মচ্ছরিযন্তি ৰুচ্চতী’’তি (দী॰ নি॰ অট্ঠ॰ ২.১০৩; অ॰ নি॰ অট্ঠ॰ ৩.৯.২৩)। পরিভোগত্থানং পন ৰিনিচ্ছযাদীনং পরিভোগন্তোগধতা ৰেদিতব্বা। ছন্দরাগো দুব্বলরাগো। অজ্ঝোসানং ‘‘মম ইদ’’ন্তি তণ্হাৰসেন বলৰসন্নিট্ঠানন্তি আহ ‘‘ছন্দরাগঅজ্ঝোসানা তণ্হা এৰা’’তি। আরক্খনিমিত্তং দ্ৰারপিদহনমঞ্জূসাগোপনাদিনা সুট্ঠু রক্খণনিমিত্তং। পাপানি করোন্তো পরিভোগনিমিত্তং রত্তো গিদ্ধো গধিতো মুচ্ছিতো হুত্ৰা মিগোৰ পরিভুঞ্জননিমিত্তং পমাদং আপজ্জতীতি এৰং পরিযেনারক্খা পরিভোগনিমিত্তং। পমাদো তিৰিধো তণ্হায ৰসেন কথিতোতি দস্সেন্তো ‘‘তিৰিধো তণ্হাযাতি ৰুত্ত’’ন্তি আহ।
Nti taṃ desanaṃ. Tassāti sabhāgādivasena āvaṭṭanassa. Paripakkañāṇānaṃ visesādhigamāya. Lābhavinicchayapariggahamacchariyānītiādīsu lābhoti rūpādiārammaṇappaṭilābho. So pariyesanāya sati hotīti pariyesanāggahaṇena gahito. Vinicchayoti ‘‘ettakaṃ me rūpārammaṇatthāya bhavissati, ettakaṃ saddādiārammaṇatthāya, ettakaṃ mayhaṃ, ettakaṃ parassa, ettakaṃ paribhuñjissāmi, ettakaṃ nidahissāmī’’ti evaṃ pavatto vitakko vinicchayo. So lāpitahetukattā pariyesanamūlakatāya pariyesanāggahaṇeneva gahito, tathā pariggahamacchariyāni. Tattha pariggaho ‘‘mama ida’’nti pariggaṇhanaṃ. Macchariyaṃ ‘‘mayheva hotū’’ti parehi sādhāraṇabhāvāsahanaṃ. Tenevassa porāṇā evaṃ vacanatthaṃ vadanti ‘‘mayhevidamacchariyaṃ hotu, mā aññesaṃ acchariyaṃ hotūti pavattattā macchariyanti vuccatī’’ti (dī. ni. aṭṭha. 2.103; a. ni. aṭṭha. 3.9.23). Paribhogatthānaṃ pana vinicchayādīnaṃ paribhogantogadhatā veditabbā. Chandarāgo dubbalarāgo. Ajjhosānaṃ ‘‘mama ida’’nti taṇhāvasena balavasanniṭṭhānanti āha ‘‘chandarāgaajjhosānā taṇhā evā’’ti. Ārakkhanimittaṃ dvārapidahanamañjūsāgopanādinā suṭṭhu rakkhaṇanimittaṃ. Pāpāni karonto paribhoganimittaṃ ratto giddho gadhito mucchito hutvā migova paribhuñjananimittaṃ pamādaṃ āpajjatīti evaṃ pariyenārakkhā paribhoganimittaṃ. Pamādo tividho taṇhāya vasena kathitoti dassento ‘‘tividho taṇhāyāti vutta’’nti āha.
অৰিসেসেন ৰুত্তন্তি ‘‘কতমেন উপাদানেন সউপাদানা’’তি ৰিভাগেন পুচ্ছিত্ৰাপি ‘‘অৰিজ্জায চ তণ্হায চা’’তি অৰিনিব্ভুজিত্ৰা ৰুত্তং। তণ্হঞ্চ অৰিজ্জঞ্চ চতুরুপাদানং ৰসেনাতি কামুপাদানাদীনং চতুন্নং উপাদানানং ৰসেন ৰিভজিত্ৰা খন্ধানং দুক্খভাৰেন দুক্খসচ্চভাৰেন সহ পরিঞ্ঞেয্যভাৰং, উপাদানানং সমুদযভাৰেন সমুদযসচ্চভাৰেন সহ পহাতব্বভাৰং দস্সেতীতি যোজনা।
Avisesena vuttanti ‘‘katamena upādānena saupādānā’’ti vibhāgena pucchitvāpi ‘‘avijjāya ca taṇhāya cā’’ti avinibbhujitvā vuttaṃ. Taṇhañca avijjañca caturupādānaṃvasenāti kāmupādānādīnaṃ catunnaṃ upādānānaṃ vasena vibhajitvā khandhānaṃ dukkhabhāvena dukkhasaccabhāvena saha pariññeyyabhāvaṃ, upādānānaṃ samudayabhāvena samudayasaccabhāvena saha pahātabbabhāvaṃ dassetīti yojanā.
৩০. ‘‘যো’’তিআদিনা ৰুত্তো তিৰিধো পমাদো পরিযেসতি, আরক্খণঞ্চ করোতি, পরিভোগনিমিত্তঞ্চাতি সম্বন্ধো। পমাদো হি পমজ্জন্তস্স পুগ্গলস্স ভোগানং পরিযেসনায, আরক্খণায চ হেতুভূতো কত্তুভাৰেন উপচরিতো, পরিভোগস্স পন নিমিত্তং। ‘‘তপ্পটিপক্খেনা’’তি পদস্স অত্থং ৰিৰরতি ‘‘অপ্পমাদানুযোগেনা’’তি, তেন সমথভাৰং দস্সেতি । খেপনাতি খযপাপনা। ৰোদানপক্খৰিসভাগধম্মৰসেনাতি ৰোদানপক্খো চ সো পমাদস্স ৰিসভাগধম্মো চাতি ৰোদান…পে॰… ধম্মো, সমথো, তস্স ৰসেন।
30.‘‘Yo’’tiādinā vutto tividho pamādo pariyesati, ārakkhaṇañca karoti, paribhoganimittañcāti sambandho. Pamādo hi pamajjantassa puggalassa bhogānaṃ pariyesanāya, ārakkhaṇāya ca hetubhūto kattubhāvena upacarito, paribhogassa pana nimittaṃ. ‘‘Tappaṭipakkhenā’’ti padassa atthaṃ vivarati ‘‘appamādānuyogenā’’ti, tena samathabhāvaṃ dasseti . Khepanāti khayapāpanā. Vodānapakkhavisabhāgadhammavasenāti vodānapakkho ca so pamādassa visabhāgadhammo cāti vodāna…pe… dhammo, samatho, tassa vasena.
সমথে সতীতি অধিট্ঠানভূতে ঝানে সতি, তং পাদকং কত্ৰাতি অত্থো। যা পঞ্ঞাতি নামরূপপরিচ্ছেদাদিৰসেন পৰত্তপঞ্ঞা। তেনাহ ‘‘অযং ৰিপস্সনা’’তি। পহীনেসূতি পহীযমানেসু।
Samathe satīti adhiṭṭhānabhūte jhāne sati, taṃ pādakaṃ katvāti attho. Yā paññāti nāmarūpaparicchedādivasena pavattapaññā. Tenāha ‘‘ayaṃ vipassanā’’ti. Pahīnesūti pahīyamānesu.
ৰোদানপক্খন্তি আরম্ভধাতুআদিৰোদানপক্খং নিক্খিপিত্ৰা। ৰিসভাগধম্মৰসেনাতি পমাদৰসেনেৰ। সভাগধম্মৰসেনাতি পুব্বে নিক্খিত্তস্স আরম্ভধাতুআদিৰোদানধম্মস্স সমথাদিসভাগধম্মৰসেন।
Vodānapakkhanti ārambhadhātuādivodānapakkhaṃ nikkhipitvā. Visabhāgadhammavasenāti pamādavaseneva. Sabhāgadhammavasenāti pubbe nikkhittassa ārambhadhātuādivodānadhammassa samathādisabhāgadhammavasena.
পুন অপরিযোদাপনিযং সিখাপ্পত্তপরিযোদাপনং ইধাধিপ্পেতন্তি আহ ‘‘তং পন অরহত্তেন হোতী’’তি।
Puna apariyodāpaniyaṃ sikhāppattapariyodāpanaṃ idhādhippetanti āha ‘‘taṃ pana arahattena hotī’’ti.
মোহসমুট্ঠানতা ৰুত্তা ‘‘মোহো এৰ সমুট্ঠান’’ন্তি কত্ৰা। অঞ্ঞথা পিসুণাৰাচায দোসসমুট্ঠানতা মুসাৰাদস্স ৰিয মোহসমুট্ঠানভাৰা ৰত্তব্বা সিযা।
Mohasamuṭṭhānatā vuttā ‘‘moho eva samuṭṭhāna’’nti katvā. Aññathā pisuṇāvācāya dosasamuṭṭhānatā musāvādassa viya mohasamuṭṭhānabhāvā vattabbā siyā.
কম্মপথভাৰং পত্তানং, অপ্পত্তানঞ্চ অকুসলধম্মানং ‘‘সব্বপাপ’’ন্তি পদেন পরিগ্গহিতত্তা ৰুত্তং ‘‘কম্মপথকম্মৰিভাগেনা’’তি।
Kammapathabhāvaṃ pattānaṃ, appattānañca akusaladhammānaṃ ‘‘sabbapāpa’’nti padena pariggahitattā vuttaṃ ‘‘kammapathakammavibhāgenā’’ti.
৩১. সেসপদানন্তি ‘‘কুসলস্স উপসম্পদা’’তিআদীনং (দী॰ নি॰ ২.৯০; ধ॰ প॰ ১৮৩; নেত্তি॰ ৩০, ৫০, ১১৬, ১২৪; পেটকো॰ ২৯) গাথায অৰসিট্ঠপদানং। যথাধিগতন্তি অত্তনা অধিগতপ্পকারং, পচ্ছা ভূমিদিসা।
31.Sesapadānanti ‘‘kusalassa upasampadā’’tiādīnaṃ (dī. ni. 2.90; dha. pa. 183; netti. 30, 50, 116, 124; peṭako. 29) gāthāya avasiṭṭhapadānaṃ. Yathādhigatanti attanā adhigatappakāraṃ, pacchā bhūmidisā.
উপরি যাপেন্তীতি মনুস্সলোকতো উপরিট্ঠিমং দেৰলোকং গমেন্তি।
Upariyāpentīti manussalokato upariṭṭhimaṃ devalokaṃ gamenti.
৩২. যথাৰুত্তস্স ধম্মস্সাতি সীলস্স চ মগ্গস্স চ। তণ্হাৰিজ্জাদীনন্তি আদিসদ্দেন তদেকট্ঠকিলেসা গয্হন্তি, তেসং পদট্ঠানধম্মা চ। সমথৰিপস্সনাদীনন্তি আদিসদ্দেন সামঞ্ঞফলানং সঙ্গহো। যদগ্গেন চেত্থ ‘‘নিরোধো রক্খতী’’তি ৰুত্তো, তদগ্গেন মগ্গো রক্খণকিরিযায করণং ৰুত্তং ‘‘যেন রক্খতী’’তি। ৰিসভাগধম্মৰসেন পুরিমানি সভাগধম্মাৰট্টনৰসেন পচ্ছিমানি সচ্চানি নিদ্ধারিতানীতি যোজেতব্বং।
32.Yathāvuttassa dhammassāti sīlassa ca maggassa ca. Taṇhāvijjādīnanti ādisaddena tadekaṭṭhakilesā gayhanti, tesaṃ padaṭṭhānadhammā ca. Samathavipassanādīnanti ādisaddena sāmaññaphalānaṃ saṅgaho. Yadaggena cettha ‘‘nirodho rakkhatī’’ti vutto, tadaggena maggo rakkhaṇakiriyāya karaṇaṃ vuttaṃ ‘‘yena rakkhatī’’ti. Visabhāgadhammavasena purimāni sabhāgadhammāvaṭṭanavasena pacchimāni saccāni niddhāritānīti yojetabbaṃ.
আৰট্টহারৰিভঙ্গৰণ্ণনা নিট্ঠিতা।
Āvaṭṭahāravibhaṅgavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / নেত্তিপ্পকরণপাল়ি • Nettippakaraṇapāḷi / ৭. আৰট্টহারৰিভঙ্গো • 7. Āvaṭṭahāravibhaṅgo
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / খুদ্দকনিকায (অট্ঠকথা) • Khuddakanikāya (aṭṭhakathā) / নেত্তিপ্পকরণ-অট্ঠকথা • Nettippakaraṇa-aṭṭhakathā / ৭. আৰট্টহারৰিভঙ্গৰণ্ণনা • 7. Āvaṭṭahāravibhaṅgavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / খুদ্দকনিকায (টীকা) • Khuddakanikāya (ṭīkā) / নেত্তিৰিভাৰিনী • Nettivibhāvinī / ৭. আৰট্টহারৰিভঙ্গৰিভাৰনা • 7. Āvaṭṭahāravibhaṅgavibhāvanā
