| Library / Tipiṭaka / திபிடக • Tipiṭaka / கு²த்³த³ஸிக்கா²-மூலஸிக்கா² • Khuddasikkhā-mūlasikkhā |
40. அவேப⁴ங்கி³யனித்³தே³ஸவண்ணனா
40. Avebhaṅgiyaniddesavaṇṇanā
322-5. ஆராமா…பே॰… மத்திகப⁴ண்டா³னீதி ஏதே பஞ்ச அவிபா⁴ஜியாதி ஸம்ப³ந்தி⁴தப்³ப³ங் . பஞ்சாதி ‘‘ஆராமாராமவத்தூ²னி ஏக’’ந்திஆதி³னா ராஸிவஸேன பஞ்ச, ஸரூபவஸேன பனேதானி பண்ணங் திணே பக்கி²பித்வா பஞ்சவீஸதிவிதா⁴னி ஹொந்தி. ததா² சாஹ –
322-5. Ārāmā…pe… mattikabhaṇḍānīti ete pañca avibhājiyāti sambandhitabbaṃ . Pañcāti ‘‘ārāmārāmavatthūni eka’’ntiādinā rāsivasena pañca, sarūpavasena panetāni paṇṇaṃ tiṇe pakkhipitvā pañcavīsatividhāni honti. Tathā cāha –
‘‘த்³விஸங்க³ஹானி த்³வே ஹொந்தி, ததியங் சதுஸங்க³ஹங்;
‘‘Dvisaṅgahāni dve honti, tatiyaṃ catusaṅgahaṃ;
சதுத்த²ங் நவகொட்டா²ஸங், பஞ்சமங் அட்ட²பே⁴த³னங்.
Catutthaṃ navakoṭṭhāsaṃ, pañcamaṃ aṭṭhabhedanaṃ.
‘‘இதி பஞ்சஹி ராஸீஹி, பஞ்சனிம்மலலோசனோ;
‘‘Iti pañcahi rāsīhi, pañcanimmalalocano;
பஞ்சவீஸவித⁴ங் நாதோ², க³ருப⁴ண்ட³ங் பகாஸயீ’’தி. (சூளவ॰ அட்ட²॰ 321);
Pañcavīsavidhaṃ nātho, garubhaṇḍaṃ pakāsayī’’ti. (cūḷava. aṭṭha. 321);
தத்த² ஆராமோ நாம புப்பா²ராமோ வா ப²லாராமோ வா. ஆராமவத்து² நாம தேஸங்யேவ பதிட்டா²னோகாஸோ, வினட்டே²ஸு வா தேஸு போராணகபூ⁴மிபா⁴கோ³. விஹாரோ நாம பாஸாதா³தி³ யங் கிஞ்சி ஸேனாஸனங். லோஹகும்பீ⁴ நாம காளலோஹேன வா தம்ப³லோஹேன வா கதகும்பீ⁴. கடாஹாதீ³ஸுபி ஏஸேவ நயோ. எத்த² பா⁴ணகந்தி அரஞ்ஜரோ வுச்சதி. வாரகோதி க⁴டோ. ராஸிங் அபெக்கி²த்வா ஏதேதி புல்லிங்க³னித்³தே³ஸோ. அவிபா⁴ஜியாதி மூலச்சே²ஜ்ஜவஸேன அவேப⁴ங்கி³யா. பரிவத்தனவஸேன பன பரிபு⁴ஞ்ஜந்தஸ்ஸ விஸ்ஸஜ்ஜெந்தஸ்ஸ ச அனாபத்தி. அவிஸ்ஸஜ்ஜியானி சாதி ச-ஸத்³தே³ன அவேப⁴ங்கி³யானி சாதி அவுத்தங் ஸம்பிண்டே³தி.
Tattha ārāmo nāma pupphārāmo vā phalārāmo vā. Ārāmavatthu nāma tesaṃyeva patiṭṭhānokāso, vinaṭṭhesu vā tesu porāṇakabhūmibhāgo. Vihāro nāma pāsādādi yaṃ kiñci senāsanaṃ. Lohakumbhī nāma kāḷalohena vā tambalohena vā katakumbhī. Kaṭāhādīsupi eseva nayo. Ettha bhāṇakanti arañjaro vuccati. Vārakoti ghaṭo. Rāsiṃ apekkhitvā eteti pulliṅganiddeso. Avibhājiyāti mūlacchejjavasena avebhaṅgiyā. Parivattanavasena pana paribhuñjantassa vissajjentassa ca anāpatti. Avissajjiyāni cāti ca-saddena avebhaṅgiyāni cāti avuttaṃ sampiṇḍeti.
326-8. ஏகந்தக³ருப⁴ண்ட³த்தா ஆதி³தோ தயோ ராஸீ ட²பெத்வா சதுத்த²ராஸிதோ பட்டா²ய க³ருப⁴ண்டா³க³ருப⁴ண்டே³ விப⁴ஜிதுங் ‘‘வல்லீ’’திஆதி³ ஆரத்³த⁴ங். அட்³ட⁴பா³ஹுமத்தாபி வல்லி ச அட்ட²ங்கு³லாயதோ வேளு ச முட்டி²மத்தம்பி திணாதி³ ச ஏகம்பி பண்ணஞ்ச பாகதா வா பஞ்சவண்ணா வா தாலபக்கப்பமாணாபி மத்திகா ச தாலபக்கப்பமாணாபி ஸுதா⁴ ச தாலபக்கப்பமாணாபி கங்கு³ட்ட²ஆதி³கா ச தி³ன்னா வா தத்த²ஜாதகா வா ஸங்கி⁴கா ரக்கி²தா அபா⁴ஜியா, ரஜ்ஜுயொத்தாதி³ ச தி³ன்னா ஸங்கி⁴கா அபா⁴ஜியாதி யோஜனா. வேளு பரிணாஹதோ பண்ணஸூசித³ண்ட³மத்தோ க³ஹேதப்³போ³. திணங் முஞ்ஜங் பப்³ப³ஜஞ்ச ஆதி³ஸத்³த³ஸங்க³ஹிதங் ட²பெத்வா அவஸேஸங் யங் கிஞ்சி திணங். பண்ணோ அட்ட²ங்கு³லப்பமாணோ ரித்தபொத்த²கோ க³ருப⁴ண்ட³மேவ. பாகதாதி பகதியா ஜாதா. பஞ்சவண்ணாதி ரத்தஸேதாதி³பஞ்சவண்ணா. ஸுதா⁴கங்கு³ட்டா²த³யோ மத்திகக்³க³ஹணேன க³ஹிதா. கங்கு³ட்ட²ஆதி³காதி ஆதி³-ஸத்³தே³ன ஸஜ்ஜுரஸஜாதிஹிங்கு³லகாதீ³னங் க³ஹணங். தி³ன்னாதி ஸங்க⁴ஸ்ஸ தி³ன்னா. தத்த²ஜாதாதி ஸங்கி⁴கபூ⁴மியங் ஜாதா. ரஜ்ஜுயொத்தாதீ³தி ஸுத்தமகசிவாகனாளிகேரஹீரசம்மமயா ரஜ்ஜு ச யொத்தாதி³ ச. ஆதி³-ஸத்³தே³ன மகசிவாகாதி³கே வட்டெத்வா கதா ஏகவட்டா க³ஹிதா. ப்³யதிரேகவஸேன பனெத்த² சதுத்த²ராஸிம்ஹி இதரே பா⁴ஜியாதி வேதி³தப்³பா³. ஸங்கி⁴கே கம்மே, சேதியஸ்ஸ வா கம்மே நிட்டி²தே பா⁴ஜியாதி யோஜனீயங்.
326-8. Ekantagarubhaṇḍattā ādito tayo rāsī ṭhapetvā catuttharāsito paṭṭhāya garubhaṇḍāgarubhaṇḍe vibhajituṃ ‘‘vallī’’tiādi āraddhaṃ. Aḍḍhabāhumattāpi valli ca aṭṭhaṅgulāyato veḷu ca muṭṭhimattampi tiṇādi ca ekampi paṇṇañca pākatā vā pañcavaṇṇā vā tālapakkappamāṇāpi mattikā ca tālapakkappamāṇāpi sudhā ca tālapakkappamāṇāpi kaṅguṭṭhaādikā ca dinnā vā tatthajātakā vā saṅghikā rakkhitā abhājiyā, rajjuyottādi ca dinnā saṅghikā abhājiyāti yojanā. Veḷu pariṇāhato paṇṇasūcidaṇḍamatto gahetabbo. Tiṇaṃ muñjaṃ pabbajañca ādisaddasaṅgahitaṃ ṭhapetvā avasesaṃ yaṃ kiñci tiṇaṃ. Paṇṇo aṭṭhaṅgulappamāṇo rittapotthako garubhaṇḍameva. Pākatāti pakatiyā jātā. Pañcavaṇṇāti rattasetādipañcavaṇṇā. Sudhākaṅguṭṭhādayo mattikaggahaṇena gahitā. Kaṅguṭṭhaādikāti ādi-saddena sajjurasajātihiṅgulakādīnaṃ gahaṇaṃ. Dinnāti saṅghassa dinnā. Tatthajātāti saṅghikabhūmiyaṃ jātā. Rajjuyottādīti suttamakacivākanāḷikerahīracammamayā rajju ca yottādi ca. Ādi-saddena makacivākādike vaṭṭetvā katā ekavaṭṭā gahitā. Byatirekavasena panettha catuttharāsimhi itare bhājiyāti veditabbā. Saṅghike kamme, cetiyassa vā kamme niṭṭhite bhājiyāti yojanīyaṃ.
329. லோஹப⁴ண்டே³ஸு பி⁴க்கு²ஸாருப்பங் பத்தாதி³ வா ததா² விப்பகதாகதங் லோஹப⁴ண்ட³ங் ததா² பாத³க³ண்ஹகங் வாரகங் பா⁴ஜியந்தி யோஜனா. பத்தாதீ³தி அயோபத்தோ அயதா²லகங் தம்ப³லோஹதா²லகங் அஞ்ஜனிஸலாகா கண்ணமலஹரணீ ஸூசி பண்ணஸூசி கு²த்³த³கோ பிப்ப²லகோ கு²த்³த³கங் ஆரகண்ட³கங் குஞ்சிகா தாளாதி³. விப்பகதந்தி அபரினிட்டி²தங். அகதந்தி ஸப்³ப³ஸோ அகதங். பாத³க³ண்ஹகந்தி ஸீஹளதீ³பே பாத³க³ண்ஹனகங். பாதோ³ நாம சதுத்த²ங்ஸோ, மக³த⁴னாளியா பஞ்சனாளிமத்தா. மக³த⁴னாளி ச நாமேஸா ஊனபஞ்சபஸதா வேதி³தப்³பா³. ததா² க⁴டகோ தேலபா⁴ஜனஞ்ச. யாய வாஸியா ட²பெத்வா த³ந்தகட்ட²ச்சே²த³னங் வா உச்சு²தச்ச²னங் வா அஞ்ஞங் மஹாகம்மங் காதுங் ந ஸக்கா, அயங் பா⁴ஜியா. ஸம்முஞ்ஜனித³ண்ட³க²ணனகங் பன அத³ண்ட³கங் ப²லமத்தமேவ, யங் ஸக்கா ஸிபாடிகாய பக்கி²பித்வா பரிஹரிதுங், அயங் பா⁴ஜனீயா. திபுகொட்டகஉபகரணேஸு திபுச்சே²த³னகஸத்த²கங் ஸுவண்ணகாரூபகரணேஸு ஸுவண்ணச்சே²த³னகஸத்த²கங் சம்மகாரஉபகரணேஸு சம்மசி²ந்த³னகங் கு²த்³த³கஸத்த²ங் நஹாபிததுண்ணகாரஉபகரணேஸு ட²பெத்வா மஹாகத்தரிங் மஹாஸண்டா³ஸஞ்ச மஹாபிப்ப²லகஞ்ச ஸப்³பா³னி பா⁴ஜனீயப⁴ண்டா³னி. ததா² குஞ்சிகா. வுத்தவிபல்லாஸேன பன லோஹப⁴ண்டே³ அபா⁴ஜியாதி வேதி³தப்³பா³.
329. Lohabhaṇḍesu bhikkhusāruppaṃ pattādi vā tathā vippakatākataṃ lohabhaṇḍaṃ tathā pādagaṇhakaṃ vārakaṃ bhājiyanti yojanā. Pattādīti ayopatto ayathālakaṃ tambalohathālakaṃ añjanisalākā kaṇṇamalaharaṇī sūci paṇṇasūci khuddako pipphalako khuddakaṃ ārakaṇḍakaṃ kuñcikā tāḷādi. Vippakatanti apariniṭṭhitaṃ. Akatanti sabbaso akataṃ. Pādagaṇhakanti sīhaḷadīpe pādagaṇhanakaṃ. Pādo nāma catutthaṃso, magadhanāḷiyā pañcanāḷimattā. Magadhanāḷi ca nāmesā ūnapañcapasatā veditabbā. Tathā ghaṭako telabhājanañca. Yāya vāsiyā ṭhapetvā dantakaṭṭhacchedanaṃ vā ucchutacchanaṃ vā aññaṃ mahākammaṃ kātuṃ na sakkā, ayaṃ bhājiyā. Sammuñjanidaṇḍakhaṇanakaṃ pana adaṇḍakaṃ phalamattameva, yaṃ sakkā sipāṭikāya pakkhipitvā pariharituṃ, ayaṃ bhājanīyā. Tipukoṭṭakaupakaraṇesu tipucchedanakasatthakaṃ suvaṇṇakārūpakaraṇesu suvaṇṇacchedanakasatthakaṃ cammakāraupakaraṇesu cammachindanakaṃ khuddakasatthaṃ nahāpitatuṇṇakāraupakaraṇesu ṭhapetvā mahākattariṃ mahāsaṇḍāsañca mahāpipphalakañca sabbāni bhājanīyabhaṇḍāni. Tathā kuñcikā. Vuttavipallāsena pana lohabhaṇḍe abhājiyāti veditabbā.
330. ‘‘வேளும்ஹீ’’திஆதி³னா தா³ருப⁴ண்டா³னி த³ஸ்ஸேதி. தா³ருப⁴ண்டே³ன பன ஸங்க³ஹெத்வா ஸப்³பா³பி தா³ருவேளுசம்முபாஹனாதி³விகதி வேதி³தப்³பா³. ச²த்தத³ண்டோ³ ச ஸலாகா சாதி த்³வந்தோ³. உபாஹனாய த³ண்ட³கோ உபாஹனத³ண்ட³கோ.
330.‘‘Veḷumhī’’tiādinā dārubhaṇḍāni dasseti. Dārubhaṇḍena pana saṅgahetvā sabbāpi dāruveḷucammupāhanādivikati veditabbā. Chattadaṇḍo ca salākā cāti dvando. Upāhanāya daṇḍako upāhanadaṇḍako.
331. அனுஞ்ஞாதவாஸித³ண்டோ³தி அனுஞ்ஞாதவாஸியா த³ண்டோ³. அரணஞ்ஜனிஸிங்கா³தீ³தி ஆதி³-ஸத்³தே³ன அஞ்ஜனிஸலாகா ச²த்தங் முட்டி²பண்ணங் உபாஹனா த⁴ம்மகரணோ பாத³க³ண்ஹனகதோ அனதிரித்தங் ஆமலகதும்ப³ங் ஆமலகக⁴டோ லாபு³கதும்ப³ங் லாபு³கக⁴டோ விஸாணதும்ப³ந்தி இத³ங் ஸங்க³ண்ஹாதி.
331.Anuññātavāsidaṇḍoti anuññātavāsiyā daṇḍo. Araṇañjanisiṅgādīti ādi-saddena añjanisalākā chattaṃ muṭṭhipaṇṇaṃ upāhanā dhammakaraṇo pādagaṇhanakato anatirittaṃ āmalakatumbaṃ āmalakaghaṭo lābukatumbaṃ lābukaghaṭo visāṇatumbanti idaṃ saṅgaṇhāti.
332. யதா²வுத்ததோ அஞ்ஞங் தா³ருப⁴ண்டே³ஸு க³ருப⁴ண்ட³ங். மத்திகாமயோ பாத³க⁴டகோ பா⁴ஜியோதி யோஜனா. பாத³க⁴டகோதி பாத³ஸ்ஸ பஹோனகோ க⁴டகோ. இமினா மத்திகாப⁴ண்ட³ங் உபலக்கே²தி, தஸ்மா பத்தோ தா²லகங் குண்டி³காதி இமானி பா⁴ஜனீயானி, வுத்தாவஸேஸா அபா⁴ஜியா.
332. Yathāvuttato aññaṃ dārubhaṇḍesu garubhaṇḍaṃ. Mattikāmayo pādaghaṭako bhājiyoti yojanā. Pādaghaṭakoti pādassa pahonako ghaṭako. Iminā mattikābhaṇḍaṃ upalakkheti, tasmā patto thālakaṃ kuṇḍikāti imāni bhājanīyāni, vuttāvasesā abhājiyā.
333-4. க³ருனா க³ருப⁴ண்ட³ஞ்ச தா²வரஞ்ச பரிவத்தெய்ய, தா²வரேன ச தா²வரம்பி பரிவத்தெய்யாதி யோஜேதப்³ப³ங். க³ருனா மஞ்சபீடா²தி³னா. தா²வரந்தி ஆராமாதி³ பட²மராஸித்³வயங். ததா² கத்வா ச பு⁴ஞ்ஜிதுந்தி ஏவஞ்ச பரிவத்தெத்வா ததோ ஆப⁴தங் கப்பியப⁴ண்ட³ங் பரிபு⁴ஞ்ஜெய்யாதி அத்தோ², விதி⁴ம்ஹி அயங் துங்பச்சயோ. பா²திகம்மேன வல்லாதி³ங் க³ண்ஹேதி ஸம்ப³ந்த⁴னீயங். பா²திகம்மங் நாம ஸமகங் வா அதிரேகங் வா தத³க்³க⁴னகங் வா வட்³டி⁴கம்மங். ஸேஸந்தி பட²மராஸித்திகந்தி.
333-4. Garunā garubhaṇḍañca thāvarañca parivatteyya, thāvarena ca thāvarampi parivatteyyāti yojetabbaṃ. Garunā mañcapīṭhādinā. Thāvaranti ārāmādi paṭhamarāsidvayaṃ. Tathā katvā ca bhuñjitunti evañca parivattetvā tato ābhataṃ kappiyabhaṇḍaṃ paribhuñjeyyāti attho, vidhimhi ayaṃ tuṃpaccayo. Phātikammena vallādiṃ gaṇheti sambandhanīyaṃ. Phātikammaṃ nāma samakaṃ vā atirekaṃ vā tadagghanakaṃ vā vaḍḍhikammaṃ. Sesanti paṭhamarāsittikanti.
அவேப⁴ங்கி³யனித்³தே³ஸவண்ணனா நிட்டி²தா.
Avebhaṅgiyaniddesavaṇṇanā niṭṭhitā.
