| Library / Tipiṭaka / ತಿಪಿಟಕ • Tipiṭaka / ಖುದ್ದಸಿಕ್ಖಾ-ಮೂಲಸಿಕ್ಖಾ • Khuddasikkhā-mūlasikkhā |
೪೦. ಅವೇಭಙ್ಗಿಯನಿದ್ದೇಸವಣ್ಣನಾ
40. Avebhaṅgiyaniddesavaṇṇanā
೩೨೨-೪. ಆರಾಮಾರಾಮವತ್ಥೂನೀತಿ ಏತ್ಥ (ಚೂಳವ॰ ೩೨೧; ಚೂಳವ॰ ಅಟ್ಠ॰ ೩೨೧) ಆರಾಮೋ ನಾಮ ಪುಪ್ಫಾರಾಮೋ ವಾ ಫಲಾರಾಮೋ ವಾ। ಮಞ್ಚೋ ಪೀಠಂ ಭಿಸಿ ಬಿಬ್ಬೋಹನಾದಿಸಯನಾಸನಂ। ಲೋಹಕುಮ್ಭೀಆದಯೋ ಕಾಳಲೋಹತಮ್ಬಲೋಹಾದಿಮಯಾ। ಭಾಣಕೋ ಉದಕಚಾಟಿ। ಪಞ್ಚೇತೇ ಅವಿಭಾಜಿಯಾತಿ ಭಾಜೇತ್ವಾ ನ ಗಹೇತಬ್ಬಾ, ಗಹಿತಾಪಿ ಸಙ್ಘಸನ್ತಕಾ ಏವಾತಿ ಅತ್ಥೋ। ಏತ್ಥ ಪನ ಆರಾಮೋ ಆರಾಮವತ್ಥೂತಿ ಪಠಮಂ, ವಿಹಾರೋ ವಿಹಾರವತ್ಥೂತಿ ದುತಿಯಂ, ಮಞ್ಚೋ ಪೀಠಂ ಭಿಸಿ ಬಿಬ್ಬೋಹನನ್ತಿ ತತಿಯಂ, ಲೋಹಕುಮ್ಭೀ…ಪೇ॰… ನಿಖಾದನನ್ತಿ ಚತುತ್ಥಂ, ವಲ್ಲಿ…ಪೇ॰… ದಾರುಭಣ್ಡಂ ಮತ್ತಿಕಭಣ್ಡನ್ತಿ ಪಞ್ಚಮನ್ತಿ ಏವಂ ಇಮಾನಿ ರಾಸಿವಸೇನ ಪಞ್ಚ ಹೋನ್ತಿ, ಸರುಪವಸೇನ ಅನೇಕಾನಿ ಹೋನ್ತಿ। ಹೋನ್ತಿ ಚೇತ್ಥ –
322-4.Ārāmārāmavatthūnīti ettha (cūḷava. 321; cūḷava. aṭṭha. 321) ārāmo nāma pupphārāmo vā phalārāmo vā. Mañco pīṭhaṃ bhisi bibbohanādisayanāsanaṃ. Lohakumbhīādayo kāḷalohatambalohādimayā. Bhāṇako udakacāṭi. Pañcete avibhājiyāti bhājetvā na gahetabbā, gahitāpi saṅghasantakā evāti attho. Ettha pana ārāmo ārāmavatthūti paṭhamaṃ, vihāro vihāravatthūti dutiyaṃ, mañco pīṭhaṃ bhisi bibbohananti tatiyaṃ, lohakumbhī…pe… nikhādananti catutthaṃ, valli…pe… dārubhaṇḍaṃ mattikabhaṇḍanti pañcamanti evaṃ imāni rāsivasena pañca honti, sarupavasena anekāni honti. Honti cettha –
‘‘ದ್ವಿಸಙ್ಗಹಾನಿ ದ್ವೇ ಹೋನ್ತಿ, ತತಿಯಂ ಚತುಸಙ್ಗಹಂ।
‘‘Dvisaṅgahāni dve honti, tatiyaṃ catusaṅgahaṃ;
ಚತುತ್ಥಂ ನವಕೋಟ್ಠಾಸಂ, ಪಞ್ಚಮಂ ಅಟ್ಠಭೇದನ’’ನ್ತಿ॥ (ಚೂಳವ॰ ಅಟ್ಠ॰ ೩೨೧)।
Catutthaṃ navakoṭṭhāsaṃ, pañcamaṃ aṭṭhabhedana’’nti. (cūḷava. aṭṭha. 321);
೩೨೫. ‘‘ಪಞ್ಚಿಮಾನಿ, ಭಿಕ್ಖವೇ, ಅವಿಸ್ಸಜ್ಜಿಯಾನಿ ನ ವಿಸ್ಸಜ್ಜೇತಬ್ಬಾನಿ ಸಙ್ಘೇನ ವಾ ಗಣೇನ ವಾ ಪುಗ್ಗಲೇನ ವಾ, ವಿಸ್ಸಜ್ಜಿತಾನಿಪಿ ಅವಿಸ್ಸಜ್ಜಿತಾನಿ ಹೋನ್ತಿ। ಯೋ ವಿಸ್ಸಜ್ಜೇಯ್ಯ, ಆಪತ್ತಿ ಥುಲ್ಲಚ್ಚಯಸ್ಸಾ’’ತಿ (ಚೂಳವ॰ ೩೨೧) ವುತ್ತತ್ತಾ ‘‘ಭಾಜಿತಾಪಿ ಅಭಾಜಿತಾ’’ತಿ ವುತ್ತಂ। ಏತೇತಿ ವುತ್ತಪ್ಪಕಾರಾ ಪಞ್ಚಪಿ ‘‘ಗರುಭಣ್ಡಾನೀ’’ತಿ ಚ ‘‘ಅವಿಸ್ಸಜ್ಜಿಯಾನೀ’’ತಿ ಚ ಚ-ಸದ್ದೇನ ‘‘ಅವೇಭಙ್ಗಿಯಾನೀ’’ತಿ ಚ ವುಚ್ಚನ್ತೀತಿ ಅತ್ಥೋ।
325. ‘‘Pañcimāni, bhikkhave, avissajjiyāni na vissajjetabbāni saṅghena vā gaṇena vā puggalena vā, vissajjitānipi avissajjitāni honti. Yo vissajjeyya, āpatti thullaccayassā’’ti (cūḷava. 321) vuttattā ‘‘bhājitāpi abhājitā’’ti vuttaṃ. Eteti vuttappakārā pañcapi ‘‘garubhaṇḍānī’’ti ca ‘‘avissajjiyānī’’ti ca ca-saddena ‘‘avebhaṅgiyānī’’ti ca vuccantīti attho.
೩೨೬-೮. ಇದಾನಿ ಪುರಿಮೇಸು ತೀಸು ರಾಸೀಸು ಸಬ್ಬಸ್ಸ ಗರುಭಣ್ಡತ್ತಾ ತೇ ಅನಾಮಸಿತ್ವಾ ಪಚ್ಛಿಮೇಸು ದ್ವೀಸು ರಾಸೀಸು ಏಕಚ್ಚಸ್ಸ ಅಗರುಭಣ್ಡಸ್ಸಾಪಿ ಅತ್ಥಿತಾಯ ತಂ ದಸ್ಸೇತುಂ ಆರಭನ್ತೋಪಿ ತೇಸು ದ್ವೀಸು ಬಹುವಿಸಯಂ ಪಠಮಂ ದಸ್ಸೇತುಂ ‘‘ವಲ್ಲಿಡ್ಢಬಾಹುಮತ್ತಾಪೀ’’ತಿಆದಿಮಾಹಾತಿ ಞಾತಬ್ಬಂ। ತಸ್ಸಾಯಂ ಸಙ್ಖೇಪೋ (ಚೂಳವ॰ ಅಟ್ಠ॰ ೩೨೧) – ವಲ್ಲಿ ಅಡ್ಢಬಾಹುಮತ್ತಾಪಿ ವೇಳು ಅಟ್ಠಙ್ಗುಲಾಯತೋಪಿ ತಿಣಾದಿ ಮುಟ್ಠಿಮತ್ತಮ್ಪೀತಿ ಏತ್ಥ ಆದಿ-ಸದ್ದೇನ ಮುಞ್ಜಪಬ್ಬಜಂ ಸಙ್ಗಣ್ಹಾತಿ, ಪಣ್ಣಂ ಏಕಮ್ಪಿ ಮತ್ತಿಕಾ ಪಾಕತಾ ವಾ ಪಞ್ಚವಣ್ಣಾ ವಾ ಸುಧಾಕಙ್ಗುಟ್ಠಆದಿಕಾತಿ ಆದಿ-ಸದ್ದೇನ ಸಜ್ಜುಲಸಜಾತಿಹಿಙ್ಗುಲಕಾದಿ ವಾ ತಾಲಪಕ್ಕಪ್ಪಮಾಣಾಪಿ ಯೇಹಿ ಕೇಹಿಚಿ ಸಙ್ಘಸ್ಸ ದಿನ್ನಾ ವಾ ಸಙ್ಘಿಕೇ ತಿಣಖೇತ್ತಾದಿಮ್ಹಿ ಜಾತಾ ವಾ ರಕ್ಖಿತಗೋಪಿತಭೂಮಿಭಾಗೇ ಉಪ್ಪನ್ನಾ ತತ್ಥಜಾತಕಾ ವಾ ಸಙ್ಘಿಕಾ ರಕ್ಖಿತಾ ಏವ ಅಭಾಜಿಯಾತಿ ಅತ್ಥೋ।
326-8. Idāni purimesu tīsu rāsīsu sabbassa garubhaṇḍattā te anāmasitvā pacchimesu dvīsu rāsīsu ekaccassa agarubhaṇḍassāpi atthitāya taṃ dassetuṃ ārabhantopi tesu dvīsu bahuvisayaṃ paṭhamaṃ dassetuṃ ‘‘valliḍḍhabāhumattāpī’’tiādimāhāti ñātabbaṃ. Tassāyaṃ saṅkhepo (cūḷava. aṭṭha. 321) – valli aḍḍhabāhumattāpi veḷu aṭṭhaṅgulāyatopi tiṇādi muṭṭhimattampīti ettha ādi-saddena muñjapabbajaṃ saṅgaṇhāti, paṇṇaṃ ekampi mattikā pākatā vā pañcavaṇṇā vā sudhākaṅguṭṭhaādikāti ādi-saddena sajjulasajātihiṅgulakādi vā tālapakkappamāṇāpi yehi kehici saṅghassa dinnā vā saṅghike tiṇakhettādimhi jātā vā rakkhitagopitabhūmibhāge uppannā tatthajātakā vā saṅghikā rakkhitā eva abhājiyāti attho.
ಇದಾನಿ ಯೇ ಚೇತ್ಥ ಭಾಜಿತಬ್ಬಾ, ತೇ ದಸ್ಸೇತುಂ ‘‘ನಿಟ್ಠಿತೇ’’ತಿಆದಿಮಾಹ, ಸಙ್ಘಸ್ಸ ವಾ ಚೇತಿಯಸ್ಸ ವಾ ಕಮ್ಮೇ ನಿಟ್ಠಿತೇ ಭಾಜಿಯಾತಿ ಅಧಿಪ್ಪಾಯೋ। ಏತ್ಥ ಪನ ಯಂ ಕಿಞ್ಚಿ ವಲ್ಲಿವೇಳುತಿಣಪಣ್ಣಮತ್ತಿಕಾದಿ ಸಙ್ಘಸ್ಸ ದಿನ್ನಂ ವಾ ಸಙ್ಘಿಕೇ ತಿಣಖೇತ್ತಾದಿಮ್ಹಿ ಜಾತಕಂ ವಾ ರಕ್ಖಿತಗೋಪಿತಂ ಗರುಭಣ್ಡಂ, ತಂ ಸಙ್ಘಕಮ್ಮೇ ಚ ಚೇತಿಯಕಮ್ಮೇ ಚ ನಿಟ್ಠಿತೇ ಅವಸೇಸಂ ಪುಗ್ಗಲಿಕಕಮ್ಮೇಪಿ ದಾತುಂ ವಟ್ಟತಿ, ಅಗರುಭಣ್ಡತ್ತಾ ಭಾಜಿತುಮ್ಪಿ ಲಬ್ಭತಿ। ಸೇನಾಸನತ್ಥಾಯ ರಕ್ಖಿತಗೋಪಿತಮೇವ ಗರುಭಣ್ಡಂ ಹೋತಿ, ನ ಇತರಂ। ಸೀಹಳದೀಪೇ ತುಮೂಲಸೋಮವಿಹಾರೇ ಸಙ್ಘಸ್ಸ ಪಾಕವತ್ತಮ್ಪಿ ತಾಲಪಣ್ಣಂ ವಿಕ್ಕಿಣಿತ್ವಾ ಕರೀಯತಿ। ಕಸ್ಮಾ? ನ ಹಿ ತತ್ಥ ಪಣ್ಣೇನ ಅತ್ಥೋ ಅತ್ಥಿ, ಸಬ್ಬೇಪಿ ಇಟ್ಠಕಚ್ಛನ್ನಾ ಪಾಸಾದಾದಯೋತಿ। ಏವಂ ಅಞ್ಞತ್ಥಾಪಿ ಕರೀಯತಿ ಏವಾತಿ ವದನ್ತಿ।
Idāni ye cettha bhājitabbā, te dassetuṃ ‘‘niṭṭhite’’tiādimāha, saṅghassa vā cetiyassa vā kamme niṭṭhite bhājiyāti adhippāyo. Ettha pana yaṃ kiñci valliveḷutiṇapaṇṇamattikādi saṅghassa dinnaṃ vā saṅghike tiṇakhettādimhi jātakaṃ vā rakkhitagopitaṃ garubhaṇḍaṃ, taṃ saṅghakamme ca cetiyakamme ca niṭṭhite avasesaṃ puggalikakammepi dātuṃ vaṭṭati, agarubhaṇḍattā bhājitumpi labbhati. Senāsanatthāya rakkhitagopitameva garubhaṇḍaṃ hoti, na itaraṃ. Sīhaḷadīpe tumūlasomavihāre saṅghassa pākavattampi tālapaṇṇaṃ vikkiṇitvā karīyati. Kasmā? Na hi tattha paṇṇena attho atthi, sabbepi iṭṭhakacchannā pāsādādayoti. Evaṃ aññatthāpi karīyati evāti vadanti.
೩೨೯. ಇದಾನಿ ಲೋಹಭಣ್ಡಾದೀಸು ಏಕನ್ತಭಾಜೇತಬ್ಬಭಣ್ಡಂ ದಸ್ಸೇತುಂ ‘‘ಪತ್ತಾದೀ’’ತಿಆದಿಮಾಹ। ಏತ್ಥ (ಚೂಳವ॰ ಅಟ್ಠ॰ ೨೨೧) ಪನ ಆದಿ-ಸದ್ದೇನ ಲೋಹಥಾಲಕತಮ್ಬ ಕುಣ್ಡಿಕಾ ಕಟಚ್ಛು ಸರಕ ಅಞ್ಜನಿ ಅಞ್ಜನಿಸಲಾಕಾಕಣ್ಣಮಲಹರಣೀಸೂಚಿಸಣ್ಡಾಸಕತ್ತರಯಟ್ಠಿಆದೀನಿ ಗಹಿತಾನೇವ। ತಥಾತಿ ಭಾಜಿಯಮೇವಾತಿ ಅತ್ಥೋ। ವಿಪ್ಪಕತಞ್ಚ ಅವಿಪ್ಪಕತಞ್ಚ। ಪಾದಗಣ್ಹಕನ್ತಿ ಮಗಧನಾಳಿಯಾ ಪಞ್ಚನಾಳಿಯಾ ಗಣ್ಹನಂ।
329. Idāni lohabhaṇḍādīsu ekantabhājetabbabhaṇḍaṃ dassetuṃ ‘‘pattādī’’tiādimāha. Ettha (cūḷava. aṭṭha. 221) pana ādi-saddena lohathālakatamba kuṇḍikā kaṭacchu saraka añjani añjanisalākākaṇṇamalaharaṇīsūcisaṇḍāsakattarayaṭṭhiādīni gahitāneva. Tathāti bhājiyamevāti attho. Vippakatañca avippakatañca. Pādagaṇhakanti magadhanāḷiyā pañcanāḷiyā gaṇhanaṃ.
೩೩೧-೨. ಅನುಞ್ಞಾತವಾಸಿ ಯಂ ಸಕ್ಕಾ ಸಿಪಾಟಿಕಾಯ ಪಕ್ಖಿಪಿತ್ವಾ ಪರಿಹರಿತುನ್ತಿ ವುತ್ತಾ। ತಚ್ಛಿತಾನಿಟ್ಠಿತನ್ತಿ ವಿಪ್ಪಕತಂ। ಯದಿ ತಚ್ಛಿತಂ, ಗರುಭಣ್ಡಮೇವ। ದನ್ತಂ ಪನ ಅತಚ್ಛಿತಞ್ಚ ಅನಿಟ್ಠಿತಞ್ಚ ಭಾಜಿಯಮೇವ। ಅನಿಟ್ಠಿತಂ ಮಞ್ಚಪಾದಾದಿಕಂ ಗರುಭಣ್ಡಂ। ಇದಾನಿ ಮತ್ತಿಕಭಣ್ಡಂ ದಸ್ಸೇತುಂ ‘‘ಭಿಕ್ಖೂಪಕರಣೇ’’ತಿಆದಿಮಾಹ। ಪತ್ತಥಾಲಕಕುಣ್ಡಿಕಾದಿಭಿಕ್ಖೂಪಕರಣೇ ಚ। ಪಾದಘಟಕೋತಿ ಪಾದಗಣ್ಹನಕೋ ಘಟಕೋ ಚ ಮತ್ತಿಕಾಮಯೋ ಭಾಜಿಯೋ ಭಾಜೇತಬ್ಬೋತಿ ಅತ್ಥೋ। ಸಙ್ಖಥಾಲಕಮ್ಪಿ ಭಾಜಿಯಮೇವ।
331-2.Anuññātavāsi yaṃ sakkā sipāṭikāya pakkhipitvā pariharitunti vuttā. Tacchitāniṭṭhitanti vippakataṃ. Yadi tacchitaṃ, garubhaṇḍameva. Dantaṃ pana atacchitañca aniṭṭhitañca bhājiyameva. Aniṭṭhitaṃ mañcapādādikaṃ garubhaṇḍaṃ. Idāni mattikabhaṇḍaṃ dassetuṃ ‘‘bhikkhūpakaraṇe’’tiādimāha. Pattathālakakuṇḍikādibhikkhūpakaraṇe ca. Pādaghaṭakoti pādagaṇhanako ghaṭako ca mattikāmayo bhājiyo bhājetabboti attho. Saṅkhathālakampi bhājiyameva.
೩೩೩-೪. ಮಿಗಚಮ್ಮಾದಿಕಂ ಕಪ್ಪಿಯಚಮ್ಮಂ ಭಾಜಿಯಂ, ಸೀಹಚಮ್ಮಾದಿಕಂ ಅಕಪ್ಪಿಯಚಮ್ಮಂ ಗರುಭಣ್ಡಂ। ತಂ ಪನ ಭೂಮತ್ಥರಣಂ ಕಾತುಂ ವಟ್ಟತಿ। ಏಳಚಮ್ಮಂ ಪನ ಪಚ್ಚತ್ಥರಣಗತಿಕತ್ತಾ ಗರುಭಣ್ಡಂ ಹೋತಿ। ಇದಾನಿ ಇಮಾನಿ ಪನ ಪಞ್ಚ ಚೀವರಪಿಣ್ಡಪಾತಭೇಸಜ್ಜಾನಂ ಅತ್ಥಾಯ ಪರಿವತ್ತೇತುಂ ನ ವಟ್ಟತಿ, ಗರುಭಣ್ಡೇನ ಪನ ಗರುಭಣ್ಡಞ್ಚ ಥಾವರಞ್ಚ ಥಾವರೇನ ಥಾವರಮೇವ ಪರಿವತ್ತೇತ್ವಾ ಪರಿಭುಞ್ಜಿತಬ್ಬಾನೀತಿ ದಸ್ಸೇತುಂ ‘‘ಗರುನಾ’’ತಿಆದಿಮಾಹ। ತತ್ಥ (ಚೂಳವ॰ ಅಟ್ಠ॰ ೩೨೧) ಗರುನಾತಿ ಗರುಭಣ್ಡೇನ ಗರುಭಣ್ಡಞ್ಚ ಥಾವರಞ್ಚ ಪರಿವತ್ತೇಯ್ಯಾತಿ ಸಮ್ಬನ್ಧೋ। ಥಾವರೇನ ಚ ಥಾವರಮೇವ ಪರಿವತ್ತೇಯ್ಯ, ನ ಗರುಭಣ್ಡನ್ತಿ ಅಧಿಪ್ಪಾಯೋ। ಪಞ್ಚಸು ಕೋಟ್ಠಾಸೇಸು ಪಚ್ಛಿಮತ್ತಯಂ ಗರುಭಣ್ಡಂ, ಪುರಿಮದ್ವಯಂ ಥಾವರನ್ತಿ ವೇದಿತಬ್ಬಂ । ತಥಾ ಕತ್ವಾ ಚ ಭುಞ್ಜತೂತಿ ಏವಂ ಪರಿವತ್ತೇತ್ವಾ ತತೋ ಆಭತಂ ಕಪ್ಪಿಯಭಣ್ಡಂ ಪರಿಭುಞ್ಜತೂತಿ ಅತ್ಥೋ। ಕಥಂ ಞಾಯತೀತಿ ಚೇ? ವುತ್ತಞ್ಹೇತಂ ಪರಿವಾರೇ-
333-4. Migacammādikaṃ kappiyacammaṃ bhājiyaṃ, sīhacammādikaṃ akappiyacammaṃ garubhaṇḍaṃ. Taṃ pana bhūmattharaṇaṃ kātuṃ vaṭṭati. Eḷacammaṃ pana paccattharaṇagatikattā garubhaṇḍaṃ hoti. Idāni imāni pana pañca cīvarapiṇḍapātabhesajjānaṃ atthāya parivattetuṃ na vaṭṭati, garubhaṇḍena pana garubhaṇḍañca thāvarañca thāvarena thāvarameva parivattetvā paribhuñjitabbānīti dassetuṃ ‘‘garunā’’tiādimāha. Tattha (cūḷava. aṭṭha. 321) garunāti garubhaṇḍena garubhaṇḍañca thāvarañca parivatteyyāti sambandho. Thāvarena ca thāvarameva parivatteyya, na garubhaṇḍanti adhippāyo. Pañcasu koṭṭhāsesu pacchimattayaṃ garubhaṇḍaṃ, purimadvayaṃ thāvaranti veditabbaṃ . Tathā katvā ca bhuñjatūti evaṃ parivattetvā tato ābhataṃ kappiyabhaṇḍaṃ paribhuñjatūti attho. Kathaṃ ñāyatīti ce? Vuttañhetaṃ parivāre-
‘‘ಅವಿಸ್ಸಜ್ಜಿಯಂ ಅವೇಭಙ್ಗಿಯಂ, ಪಞ್ಚ ವುತ್ತಾ ಮಹೇಸಿನಾ।
‘‘Avissajjiyaṃ avebhaṅgiyaṃ, pañca vuttā mahesinā;
ವಿಸ್ಸಜ್ಜೇನ್ತಸ್ಸ ಪರಿಭುಞ್ಜನ್ತಸ್ಸ ಅನಾಪತ್ತಿ,
Vissajjentassa paribhuñjantassa anāpatti,
ಪಞ್ಹಾ ಮೇಸಾ ಕುಸಲೇಹಿ ಚಿನ್ತಿತಾ’’ತಿ॥ (ಪರಿ॰ ೪೭೯)।
Pañhā mesā kusalehi cintitā’’ti. (pari. 479);
ಏತ್ಥ ಪನ ಗರುಭಣ್ಡೇನ ಗರುಭಣ್ಡಞ್ಚ ಥಾವರಞ್ಚ ಥಾವರೇನ ಥಾವರಮೇವ ಪರಿವತ್ತನವಿಧಿಂ ಸನ್ಧಾಯ ‘‘ವಿಸ್ಸಜ್ಜನ್ತಸ್ಸ ಅನಾಪತ್ತೀ’’ತಿ ವುತ್ತಂ। ಪುನ ತತೋ ನಿಬ್ಬತ್ತಞ್ಚ ಚತುಪಚ್ಚಯಂ ಪರಿಭುಞ್ಜಿತುಂ ಲಬ್ಭತೀತಿ ದೀಪೇತುಂ ‘‘ಪರಿಭುಞ್ಜನ್ತಸ್ಸ ಅನಾಪತ್ತೀ’’ತಿ ವುತ್ತಂ। ಅಯಂ ಇಮಿಸ್ಸಾ ಗಾಥಾಯ ಅಧಿಪ್ಪಾಯೋ। ಸೇಸನ್ತಿ (ಚೂಳವ॰ ಅಟ್ಠ॰ ೩೨೧) ಆರಾಮಾದಿ ಅಭಾಜಿಯನ್ತಿ ಅತ್ಥೋ। ಅವೇಭಙ್ಗಿಯವಿನಿಚ್ಛಯೋ।
Ettha pana garubhaṇḍena garubhaṇḍañca thāvarañca thāvarena thāvarameva parivattanavidhiṃ sandhāya ‘‘vissajjantassa anāpattī’’ti vuttaṃ. Puna tato nibbattañca catupaccayaṃ paribhuñjituṃ labbhatīti dīpetuṃ ‘‘paribhuñjantassa anāpattī’’ti vuttaṃ. Ayaṃ imissā gāthāya adhippāyo. Sesanti (cūḷava. aṭṭha. 321) ārāmādi abhājiyanti attho. Avebhaṅgiyavinicchayo.
ಅವೇಭಙ್ಗಿಯನಿದ್ದೇಸವಣ್ಣನಾ ನಿಟ್ಠಿತಾ।
Avebhaṅgiyaniddesavaṇṇanā niṭṭhitā.
