| Library / Tipiṭaka / តិបិដក • Tipiṭaka / ចូឡវគ្គបាឡិ • Cūḷavaggapāḷi |
អវេភង្គិយវត្ថុ
Avebhaṅgiyavatthu
៣២២. អថ ខោ ភគវា សាវត្ថិយំ យថាភិរន្តំ វិហរិត្វា យេន កីដាគិរិ តេន ចារិកំ បក្កាមិ មហតា ភិក្ខុសង្ឃេន សទ្ធិំ បញ្ចមត្តេហិ ភិក្ខុសតេហិ សារិបុត្តមោគ្គល្លានេហិ ច។ អស្សោសុំ ខោ អស្សជិបុនព្ពសុកា ភិក្ខូ – ‘‘ភគវា កិរ កីដាគិរិំ អាគច្ឆតិ មហតា ភិក្ខុសង្ឃេន សទ្ធិំ បញ្ចមត្តេហិ ភិក្ខុសតេហិ សារិបុត្តមោគ្គល្លានេហិ ច’’។ ‘‘ហន្ទ មយំ, អាវុសោ, សព្ពំ សង្ឃិកំ សេនាសនំ ភាជេម។ បាបិច្ឆា សារិបុត្តមោគ្គល្លានា, បាបិកានំ ឥច្ឆានំ វសំ គតា; ន មយំ តេសំ សេនាសនំ បញ្ញបេស្សាមា’’តិ, តេ សព្ពំ សង្ឃិកំ សេនាសនំ ភាជេសុំ។ អថ ខោ ភគវា អនុបុព្ពេន ចារិកំ ចរមានោ យេន កីដាគិរិ តទវសរិ។ អថ ខោ ភគវា សម្ពហុលេ ភិក្ខូ អាមន្តេសិ – ‘‘គច្ឆថ តុម្ហេ, ភិក្ខវេ; អស្សជិបុនព្ពសុកេ ភិក្ខូ ឧបសង្កមិត្វា ឯវំ វទេថ – ‘ភគវា, អាវុសោ, អាគច្ឆតិ មហតា ភិក្ខុសង្ឃេន សទ្ធិំ បញ្ចមត្តេហិ ភិក្ខុសតេហិ សារិបុត្តមោគ្គល្លានេហិ ច។ ភគវតោ ច, អាវុសោ, សេនាសនំ បញ្ញបេថ, ភិក្ខុសង្ឃស្ស ច, សារិបុត្តមោគ្គល្លានានញ្ចា’’’តិ។ ‘‘ឯវំ ភន្តេ’’តិ ខោ តេ ភិក្ខូ ភគវតោ បដិស្សុត្វា យេន អស្សជិបុនព្ពសុកា ភិក្ខូ តេនុបសង្កមិំសុ, ឧបសង្កមិត្វា អស្សជិបុនព្ពសុកេ ភិក្ខូ ឯតទវោចុំ – ‘‘ភគវា, អាវុសោ, អាគច្ឆតិ មហតា ភិក្ខុសង្ឃេន សទ្ធិំ បញ្ចមត្តេហិ ភិក្ខុសតេហិ សារិបុត្តមោគ្គល្លានេហិ ច ។ ភគវតោ ច, អាវុសោ, សេនាសនំ បញ្ញបេថ, ភិក្ខុសង្ឃស្ស ច, សារិបុត្តមោគ្គល្លានានញ្ចា’’តិ។ ‘‘នត្ថាវុសោ, សង្ឃិកំ សេនាសនំ។ សព្ពំ អម្ហេហិ ភាជិតំ។ ស្វាគតំ, អាវុសោ, ភគវតោ។ យស្មិំ វិហារេ ភគវា ឥច្ឆិស្សតិ តស្មិំ វិហារេ វសិស្សតិ។ បាបិច្ឆា សារិបុត្តមោគ្គល្លានា, បាបិកានំ ឥច្ឆានំ វសំ គតា។ ន មយំ តេសំ សេនាសនំ បញ្ញបេស្សាមា’’តិ។ ‘‘កិំ បន តុម្ហេ, អាវុសោ, សង្ឃិកំ សេនាសនំ ភាជិត្ថា’’តិ? ‘‘ឯវមាវុសោ’’តិ។ យេ តេ ភិក្ខូ អប្បិច្ឆា…បេ.… តេ ឧជ្ឈាយន្តិ ខិយ្យន្តិ វិបាចេន្តិ – ‘‘កថញ្ហិ នាម អស្សជិបុនព្ពសុកា ភិក្ខូ សង្ឃិកំ សេនាសនំ ភាជេស្សន្តី’’តិ! អថ ខោ តេ ភិក្ខូ ភគវតោ ឯតមត្ថំ អារោចេសុំ…បេ.… សច្ចំ កិរ, ភិក្ខវេ…បេ.… ‘‘សច្ចំ ភគវា’’តិ។ វិគរហិ ពុទ្ធោ ភគវា…បេ.… ‘‘កថញ្ហិ នាម តេ, ភិក្ខវេ, មោឃបុរិសា សង្ឃិកំ សេនាសនំ ភាជេស្សន្តិ? នេតំ, ភិក្ខវេ, អប្បសន្នានំ វា បសាទាយ…បេ.… វិគរហិត្វា…បេ.… ធម្មិំ កថំ កត្វា ភិក្ខូ អាមន្តេសិ –
322. Atha kho bhagavā sāvatthiyaṃ yathābhirantaṃ viharitvā yena kīṭāgiri tena cārikaṃ pakkāmi mahatā bhikkhusaṅghena saddhiṃ pañcamattehi bhikkhusatehi sāriputtamoggallānehi ca. Assosuṃ kho assajipunabbasukā bhikkhū – ‘‘bhagavā kira kīṭāgiriṃ āgacchati mahatā bhikkhusaṅghena saddhiṃ pañcamattehi bhikkhusatehi sāriputtamoggallānehi ca’’. ‘‘Handa mayaṃ, āvuso, sabbaṃ saṅghikaṃ senāsanaṃ bhājema. Pāpicchā sāriputtamoggallānā, pāpikānaṃ icchānaṃ vasaṃ gatā; na mayaṃ tesaṃ senāsanaṃ paññapessāmā’’ti, te sabbaṃ saṅghikaṃ senāsanaṃ bhājesuṃ. Atha kho bhagavā anupubbena cārikaṃ caramāno yena kīṭāgiri tadavasari. Atha kho bhagavā sambahule bhikkhū āmantesi – ‘‘gacchatha tumhe, bhikkhave; assajipunabbasuke bhikkhū upasaṅkamitvā evaṃ vadetha – ‘bhagavā, āvuso, āgacchati mahatā bhikkhusaṅghena saddhiṃ pañcamattehi bhikkhusatehi sāriputtamoggallānehi ca. Bhagavato ca, āvuso, senāsanaṃ paññapetha, bhikkhusaṅghassa ca, sāriputtamoggallānānañcā’’’ti. ‘‘Evaṃ bhante’’ti kho te bhikkhū bhagavato paṭissutvā yena assajipunabbasukā bhikkhū tenupasaṅkamiṃsu, upasaṅkamitvā assajipunabbasuke bhikkhū etadavocuṃ – ‘‘bhagavā, āvuso, āgacchati mahatā bhikkhusaṅghena saddhiṃ pañcamattehi bhikkhusatehi sāriputtamoggallānehi ca . Bhagavato ca, āvuso, senāsanaṃ paññapetha, bhikkhusaṅghassa ca, sāriputtamoggallānānañcā’’ti. ‘‘Natthāvuso, saṅghikaṃ senāsanaṃ. Sabbaṃ amhehi bhājitaṃ. Svāgataṃ, āvuso, bhagavato. Yasmiṃ vihāre bhagavā icchissati tasmiṃ vihāre vasissati. Pāpicchā sāriputtamoggallānā, pāpikānaṃ icchānaṃ vasaṃ gatā. Na mayaṃ tesaṃ senāsanaṃ paññapessāmā’’ti. ‘‘Kiṃ pana tumhe, āvuso, saṅghikaṃ senāsanaṃ bhājitthā’’ti? ‘‘Evamāvuso’’ti. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma assajipunabbasukā bhikkhū saṅghikaṃ senāsanaṃ bhājessantī’’ti! Atha kho te bhikkhū bhagavato etamatthaṃ ārocesuṃ…pe… saccaṃ kira, bhikkhave…pe… ‘‘saccaṃ bhagavā’’ti. Vigarahi buddho bhagavā…pe… ‘‘kathañhi nāma te, bhikkhave, moghapurisā saṅghikaṃ senāsanaṃ bhājessanti? Netaṃ, bhikkhave, appasannānaṃ vā pasādāya…pe… vigarahitvā…pe… dhammiṃ kathaṃ katvā bhikkhū āmantesi –
‘‘បញ្ចិមានិ, ភិក្ខវេ, អវេភង្គិយានិ 1, ន វិភជិតព្ពានិ, សង្ឃេន វា គណេន វា បុគ្គលេន វា។ វិភត្តានិបិ អវិភត្តានិ ហោន្តិ។ យោ វិភជេយ្យ, អាបត្តិ ថុល្លច្ចយស្ស។ កតមានិ បញ្ច? អារាមោ, អារាមវត្ថុ – ឥទំ បឋមំ អវេភង្គិយំ, ន វិភជិតព្ពំ, សង្ឃេន វា គណេន វា បុគ្គលេន វា។ វិភត្តម្បិ អវិភត្តំ ហោតិ។ យោ វិភជេយ្យ, អាបត្តិ ថុល្លច្ចយស្ស។
‘‘Pañcimāni, bhikkhave, avebhaṅgiyāni 2, na vibhajitabbāni, saṅghena vā gaṇena vā puggalena vā. Vibhattānipi avibhattāni honti. Yo vibhajeyya, āpatti thullaccayassa. Katamāni pañca? Ārāmo, ārāmavatthu – idaṃ paṭhamaṃ avebhaṅgiyaṃ, na vibhajitabbaṃ, saṅghena vā gaṇena vā puggalena vā. Vibhattampi avibhattaṃ hoti. Yo vibhajeyya, āpatti thullaccayassa.
‘‘វិហារោ, វិហារវត្ថុ – ឥទំ ទុតិយំ អវេភង្គិយំ, ន វិភជិតព្ពំ, សង្ឃេន វា គណេន វា បុគ្គលេន វា។ វិភត្តម្បិ អវិភត្តំ ហោតិ។ យោ វិភជេយ្យ, អាបត្តិ ថុល្លច្ចយស្ស។
‘‘Vihāro, vihāravatthu – idaṃ dutiyaṃ avebhaṅgiyaṃ, na vibhajitabbaṃ, saṅghena vā gaṇena vā puggalena vā. Vibhattampi avibhattaṃ hoti. Yo vibhajeyya, āpatti thullaccayassa.
‘‘មញ្ចោ, បីឋំ, ភិសិ, ពិព្ពោហនំ – ឥទំ តតិយំ អវេភង្គិយំ, ន វិភជិតព្ពំ, សង្ឃេន វា គណេន វា បុគ្គលេន វា។ វិភត្តម្បិ អវិភត្តំ ហោតិ។ យោ វិភជេយ្យ, អាបត្តិ ថុល្លច្ចយស្ស។
‘‘Mañco, pīṭhaṃ, bhisi, bibbohanaṃ – idaṃ tatiyaṃ avebhaṅgiyaṃ, na vibhajitabbaṃ, saṅghena vā gaṇena vā puggalena vā. Vibhattampi avibhattaṃ hoti. Yo vibhajeyya, āpatti thullaccayassa.
‘‘លោហកុម្ភី, លោហភាណកំ, លោហវារកោ, លោហកដាហំ, វាសី, បរសុ, កុឋារី, កុទាលោ, និខាទនំ – ឥទំ ចតុត្ថំ អវេភង្គិយំ, ន វិភជិតព្ពំ, សង្ឃេន វា គណេន វា បុគ្គលេន វា។ វិភត្តម្បិ អវិភត្តំ ហោតិ។ យោ វិភជេយ្យ, អាបត្តិ ថុល្លច្ចយស្ស។
‘‘Lohakumbhī, lohabhāṇakaṃ, lohavārako, lohakaṭāhaṃ, vāsī, parasu, kuṭhārī, kudālo, nikhādanaṃ – idaṃ catutthaṃ avebhaṅgiyaṃ, na vibhajitabbaṃ, saṅghena vā gaṇena vā puggalena vā. Vibhattampi avibhattaṃ hoti. Yo vibhajeyya, āpatti thullaccayassa.
‘‘វល្លី, វេឡុ, មុញ្ជំ, បព្ពជំ, តិណំ, មត្តិកា, ទារុភណ្ឌំ, មត្តិកាភណ្ឌំ – ឥទំ បញ្ចមំ អវេភង្គិយំ, ន វិភជិតព្ពំ, សង្ឃេន វា គណេន វា បុគ្គលេន វា។ វិភត្តម្បិ អវិភត្តំ ហោតិ។ យោ វិភជេយ្យ, អាបត្តិ ថុល្លច្ចយស្ស។ ឥមានិ ខោ, ភិក្ខវេ, បញ្ច អវេភង្គិយានិ, ន វិភជិតព្ពានិ, សង្ឃេន វា គណេន វា បុគ្គលេន វា។ វិភត្តានិបិ អវិភត្តានិ ហោន្តិ។ យោ វិភជេយ្យ, អាបត្តិ ថុល្លច្ចយស្សា’’តិ។
‘‘Vallī, veḷu, muñjaṃ, pabbajaṃ, tiṇaṃ, mattikā, dārubhaṇḍaṃ, mattikābhaṇḍaṃ – idaṃ pañcamaṃ avebhaṅgiyaṃ, na vibhajitabbaṃ, saṅghena vā gaṇena vā puggalena vā. Vibhattampi avibhattaṃ hoti. Yo vibhajeyya, āpatti thullaccayassa. Imāni kho, bhikkhave, pañca avebhaṅgiyāni, na vibhajitabbāni, saṅghena vā gaṇena vā puggalena vā. Vibhattānipi avibhattāni honti. Yo vibhajeyya, āpatti thullaccayassā’’ti.
Footnotes:
