| Library / Tipiṭaka / ཏིཔིཊཀ • Tipiṭaka / ཙཱུལ༹ཝགྒཔཱལི༹ • Cūḷavaggapāḷi |
ཨཝེབྷངྒིཡཝཏྠུ
Avebhaṅgiyavatthu
༣༢༢. ཨཐ ཁོ བྷགཝཱ སཱཝཏྠིཡཾ ཡཐཱབྷིརནྟཾ ཝིཧརིཏྭཱ ཡེན ཀཱིཊཱགིརི ཏེན ཙཱརིཀཾ པཀྐཱམི མཧཏཱ བྷིཀྑུསངྒྷེན སདྡྷིཾ པཉྩམཏྟེཧི བྷིཀྑུསཏེཧི སཱརིཔུཏྟམོགྒལླཱནེཧི ཙ། ཨསྶོསུཾ ཁོ ཨསྶཛིཔུནབྦསུཀཱ བྷིཀྑཱུ – ‘‘བྷགཝཱ ཀིར ཀཱིཊཱགིརིཾ ཨཱགཙྪཏི མཧཏཱ བྷིཀྑུསངྒྷེན སདྡྷིཾ པཉྩམཏྟེཧི བྷིཀྑུསཏེཧི སཱརིཔུཏྟམོགྒལླཱནེཧི ཙ’’། ‘‘ཧནྡ མཡཾ, ཨཱཝུསོ, སབྦཾ སངྒྷིཀཾ སེནཱསནཾ བྷཱཛེམ། པཱཔིཙྪཱ སཱརིཔུཏྟམོགྒལླཱནཱ, པཱཔིཀཱནཾ ཨིཙྪཱནཾ ཝསཾ གཏཱ; ན མཡཾ ཏེསཾ སེནཱསནཾ པཉྙཔེསྶཱམཱ’’ཏི, ཏེ སབྦཾ སངྒྷིཀཾ སེནཱསནཾ བྷཱཛེསུཾ། ཨཐ ཁོ བྷགཝཱ ཨནུཔུབྦེན ཙཱརིཀཾ ཙརམཱནོ ཡེན ཀཱིཊཱགིརི ཏདཝསརི། ཨཐ ཁོ བྷགཝཱ སམྦཧུལེ བྷིཀྑཱུ ཨཱམནྟེསི – ‘‘གཙྪཐ ཏུམྷེ, བྷིཀྑཝེ; ཨསྶཛིཔུནབྦསུཀེ བྷིཀྑཱུ ཨུཔསངྐམིཏྭཱ ཨེཝཾ ཝདེཐ – ‘བྷགཝཱ, ཨཱཝུསོ, ཨཱགཙྪཏི མཧཏཱ བྷིཀྑུསངྒྷེན སདྡྷིཾ པཉྩམཏྟེཧི བྷིཀྑུསཏེཧི སཱརིཔུཏྟམོགྒལླཱནེཧི ཙ། བྷགཝཏོ ཙ, ཨཱཝུསོ, སེནཱསནཾ པཉྙཔེཐ, བྷིཀྑུསངྒྷསྶ ཙ, སཱརིཔུཏྟམོགྒལླཱནཱནཉྩཱ’’’ཏི། ‘‘ཨེཝཾ བྷནྟེ’’ཏི ཁོ ཏེ བྷིཀྑཱུ བྷགཝཏོ པཊིསྶུཏྭཱ ཡེན ཨསྶཛིཔུནབྦསུཀཱ བྷིཀྑཱུ ཏེནུཔསངྐམིཾསུ, ཨུཔསངྐམིཏྭཱ ཨསྶཛིཔུནབྦསུཀེ བྷིཀྑཱུ ཨེཏདཝོཙུཾ – ‘‘བྷགཝཱ, ཨཱཝུསོ, ཨཱགཙྪཏི མཧཏཱ བྷིཀྑུསངྒྷེན སདྡྷིཾ པཉྩམཏྟེཧི བྷིཀྑུསཏེཧི སཱརིཔུཏྟམོགྒལླཱནེཧི ཙ ། བྷགཝཏོ ཙ, ཨཱཝུསོ, སེནཱསནཾ པཉྙཔེཐ, བྷིཀྑུསངྒྷསྶ ཙ, སཱརིཔུཏྟམོགྒལླཱནཱནཉྩཱ’’ཏི། ‘‘ནཏྠཱཝུསོ, སངྒྷིཀཾ སེནཱསནཾ། སབྦཾ ཨམྷེཧི བྷཱཛིཏཾ། སྭཱགཏཾ, ཨཱཝུསོ, བྷགཝཏོ། ཡསྨིཾ ཝིཧཱརེ བྷགཝཱ ཨིཙྪིསྶཏི ཏསྨིཾ ཝིཧཱརེ ཝསིསྶཏི། པཱཔིཙྪཱ སཱརིཔུཏྟམོགྒལླཱནཱ, པཱཔིཀཱནཾ ཨིཙྪཱནཾ ཝསཾ གཏཱ། ན མཡཾ ཏེསཾ སེནཱསནཾ པཉྙཔེསྶཱམཱ’’ཏི། ‘‘ཀིཾ པན ཏུམྷེ, ཨཱཝུསོ, སངྒྷིཀཾ སེནཱསནཾ བྷཱཛིཏྠཱ’’ཏི? ‘‘ཨེཝམཱཝུསོ’’ཏི། ཡེ ཏེ བྷིཀྑཱུ ཨཔྤིཙྪཱ…པེ॰… ཏེ ཨུཛ྄ཛྷཱཡནྟི ཁིཡྻནྟི ཝིཔཱཙེནྟི – ‘‘ཀཐཉྷི ནཱམ ཨསྶཛིཔུནབྦསུཀཱ བྷིཀྑཱུ སངྒྷིཀཾ སེནཱསནཾ བྷཱཛེསྶནྟཱི’’ཏི! ཨཐ ཁོ ཏེ བྷིཀྑཱུ བྷགཝཏོ ཨེཏམཏྠཾ ཨཱརོཙེསུཾ…པེ॰… སཙྩཾ ཀིར, བྷིཀྑཝེ…པེ॰… ‘‘སཙྩཾ བྷགཝཱ’’ཏི། ཝིགརཧི བུདྡྷོ བྷགཝཱ…པེ॰… ‘‘ཀཐཉྷི ནཱམ ཏེ, བྷིཀྑཝེ, མོགྷཔུརིསཱ སངྒྷིཀཾ སེནཱསནཾ བྷཱཛེསྶནྟི? ནེཏཾ, བྷིཀྑཝེ, ཨཔྤསནྣཱནཾ ཝཱ པསཱདཱཡ…པེ॰… ཝིགརཧིཏྭཱ…པེ॰… དྷམྨིཾ ཀཐཾ ཀཏྭཱ བྷིཀྑཱུ ཨཱམནྟེསི –
322. Atha kho bhagavā sāvatthiyaṃ yathābhirantaṃ viharitvā yena kīṭāgiri tena cārikaṃ pakkāmi mahatā bhikkhusaṅghena saddhiṃ pañcamattehi bhikkhusatehi sāriputtamoggallānehi ca. Assosuṃ kho assajipunabbasukā bhikkhū – ‘‘bhagavā kira kīṭāgiriṃ āgacchati mahatā bhikkhusaṅghena saddhiṃ pañcamattehi bhikkhusatehi sāriputtamoggallānehi ca’’. ‘‘Handa mayaṃ, āvuso, sabbaṃ saṅghikaṃ senāsanaṃ bhājema. Pāpicchā sāriputtamoggallānā, pāpikānaṃ icchānaṃ vasaṃ gatā; na mayaṃ tesaṃ senāsanaṃ paññapessāmā’’ti, te sabbaṃ saṅghikaṃ senāsanaṃ bhājesuṃ. Atha kho bhagavā anupubbena cārikaṃ caramāno yena kīṭāgiri tadavasari. Atha kho bhagavā sambahule bhikkhū āmantesi – ‘‘gacchatha tumhe, bhikkhave; assajipunabbasuke bhikkhū upasaṅkamitvā evaṃ vadetha – ‘bhagavā, āvuso, āgacchati mahatā bhikkhusaṅghena saddhiṃ pañcamattehi bhikkhusatehi sāriputtamoggallānehi ca. Bhagavato ca, āvuso, senāsanaṃ paññapetha, bhikkhusaṅghassa ca, sāriputtamoggallānānañcā’’’ti. ‘‘Evaṃ bhante’’ti kho te bhikkhū bhagavato paṭissutvā yena assajipunabbasukā bhikkhū tenupasaṅkamiṃsu, upasaṅkamitvā assajipunabbasuke bhikkhū etadavocuṃ – ‘‘bhagavā, āvuso, āgacchati mahatā bhikkhusaṅghena saddhiṃ pañcamattehi bhikkhusatehi sāriputtamoggallānehi ca . Bhagavato ca, āvuso, senāsanaṃ paññapetha, bhikkhusaṅghassa ca, sāriputtamoggallānānañcā’’ti. ‘‘Natthāvuso, saṅghikaṃ senāsanaṃ. Sabbaṃ amhehi bhājitaṃ. Svāgataṃ, āvuso, bhagavato. Yasmiṃ vihāre bhagavā icchissati tasmiṃ vihāre vasissati. Pāpicchā sāriputtamoggallānā, pāpikānaṃ icchānaṃ vasaṃ gatā. Na mayaṃ tesaṃ senāsanaṃ paññapessāmā’’ti. ‘‘Kiṃ pana tumhe, āvuso, saṅghikaṃ senāsanaṃ bhājitthā’’ti? ‘‘Evamāvuso’’ti. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma assajipunabbasukā bhikkhū saṅghikaṃ senāsanaṃ bhājessantī’’ti! Atha kho te bhikkhū bhagavato etamatthaṃ ārocesuṃ…pe… saccaṃ kira, bhikkhave…pe… ‘‘saccaṃ bhagavā’’ti. Vigarahi buddho bhagavā…pe… ‘‘kathañhi nāma te, bhikkhave, moghapurisā saṅghikaṃ senāsanaṃ bhājessanti? Netaṃ, bhikkhave, appasannānaṃ vā pasādāya…pe… vigarahitvā…pe… dhammiṃ kathaṃ katvā bhikkhū āmantesi –
‘‘པཉྩིམཱནི, བྷིཀྑཝེ, ཨཝེབྷངྒིཡཱནི 1, ན ཝིབྷཛིཏབྦཱནི, སངྒྷེན ཝཱ གཎེན ཝཱ པུགྒལེན ཝཱ། ཝིབྷཏྟཱནིཔི ཨཝིབྷཏྟཱནི ཧོནྟི། ཡོ ཝིབྷཛེཡྻ, ཨཱཔཏྟི ཐུལླཙྩཡསྶ། ཀཏམཱནི པཉྩ? ཨཱརཱམོ, ཨཱརཱམཝཏྠུ – ཨིདཾ པཋམཾ ཨཝེབྷངྒིཡཾ, ན ཝིབྷཛིཏབྦཾ, སངྒྷེན ཝཱ གཎེན ཝཱ པུགྒལེན ཝཱ། ཝིབྷཏྟམྤི ཨཝིབྷཏྟཾ ཧོཏི། ཡོ ཝིབྷཛེཡྻ, ཨཱཔཏྟི ཐུལླཙྩཡསྶ།
‘‘Pañcimāni, bhikkhave, avebhaṅgiyāni 2, na vibhajitabbāni, saṅghena vā gaṇena vā puggalena vā. Vibhattānipi avibhattāni honti. Yo vibhajeyya, āpatti thullaccayassa. Katamāni pañca? Ārāmo, ārāmavatthu – idaṃ paṭhamaṃ avebhaṅgiyaṃ, na vibhajitabbaṃ, saṅghena vā gaṇena vā puggalena vā. Vibhattampi avibhattaṃ hoti. Yo vibhajeyya, āpatti thullaccayassa.
‘‘ཝིཧཱརོ, ཝིཧཱརཝཏྠུ – ཨིདཾ དུཏིཡཾ ཨཝེབྷངྒིཡཾ, ན ཝིབྷཛིཏབྦཾ, སངྒྷེན ཝཱ གཎེན ཝཱ པུགྒལེན ཝཱ། ཝིབྷཏྟམྤི ཨཝིབྷཏྟཾ ཧོཏི། ཡོ ཝིབྷཛེཡྻ, ཨཱཔཏྟི ཐུལླཙྩཡསྶ།
‘‘Vihāro, vihāravatthu – idaṃ dutiyaṃ avebhaṅgiyaṃ, na vibhajitabbaṃ, saṅghena vā gaṇena vā puggalena vā. Vibhattampi avibhattaṃ hoti. Yo vibhajeyya, āpatti thullaccayassa.
‘‘མཉྩོ, པཱིཋཾ, བྷིསི, བིབྦོཧནཾ – ཨིདཾ ཏཏིཡཾ ཨཝེབྷངྒིཡཾ, ན ཝིབྷཛིཏབྦཾ, སངྒྷེན ཝཱ གཎེན ཝཱ པུགྒལེན ཝཱ། ཝིབྷཏྟམྤི ཨཝིབྷཏྟཾ ཧོཏི། ཡོ ཝིབྷཛེཡྻ, ཨཱཔཏྟི ཐུལླཙྩཡསྶ།
‘‘Mañco, pīṭhaṃ, bhisi, bibbohanaṃ – idaṃ tatiyaṃ avebhaṅgiyaṃ, na vibhajitabbaṃ, saṅghena vā gaṇena vā puggalena vā. Vibhattampi avibhattaṃ hoti. Yo vibhajeyya, āpatti thullaccayassa.
‘‘ལོཧཀུམྦྷཱི, ལོཧབྷཱཎཀཾ, ལོཧཝཱརཀོ, ལོཧཀཊཱཧཾ, ཝཱསཱི, པརསུ, ཀུཋཱརཱི, ཀུདཱལོ, ནིཁཱདནཾ – ཨིདཾ ཙཏུཏྠཾ ཨཝེབྷངྒིཡཾ, ན ཝིབྷཛིཏབྦཾ, སངྒྷེན ཝཱ གཎེན ཝཱ པུགྒལེན ཝཱ། ཝིབྷཏྟམྤི ཨཝིབྷཏྟཾ ཧོཏི། ཡོ ཝིབྷཛེཡྻ, ཨཱཔཏྟི ཐུལླཙྩཡསྶ།
‘‘Lohakumbhī, lohabhāṇakaṃ, lohavārako, lohakaṭāhaṃ, vāsī, parasu, kuṭhārī, kudālo, nikhādanaṃ – idaṃ catutthaṃ avebhaṅgiyaṃ, na vibhajitabbaṃ, saṅghena vā gaṇena vā puggalena vā. Vibhattampi avibhattaṃ hoti. Yo vibhajeyya, āpatti thullaccayassa.
‘‘ཝལླཱི, ཝེལུ༹, མུཉྫཾ, པབྦཛཾ, ཏིཎཾ, མཏྟིཀཱ, དཱརུབྷཎྜཾ, མཏྟིཀཱབྷཎྜཾ – ཨིདཾ པཉྩམཾ ཨཝེབྷངྒིཡཾ, ན ཝིབྷཛིཏབྦཾ, སངྒྷེན ཝཱ གཎེན ཝཱ པུགྒལེན ཝཱ། ཝིབྷཏྟམྤི ཨཝིབྷཏྟཾ ཧོཏི། ཡོ ཝིབྷཛེཡྻ, ཨཱཔཏྟི ཐུལླཙྩཡསྶ། ཨིམཱནི ཁོ, བྷིཀྑཝེ, པཉྩ ཨཝེབྷངྒིཡཱནི, ན ཝིབྷཛིཏབྦཱནི, སངྒྷེན ཝཱ གཎེན ཝཱ པུགྒལེན ཝཱ། ཝིབྷཏྟཱནིཔི ཨཝིབྷཏྟཱནི ཧོནྟི། ཡོ ཝིབྷཛེཡྻ, ཨཱཔཏྟི ཐུལླཙྩཡསྶཱ’’ཏི།
‘‘Vallī, veḷu, muñjaṃ, pabbajaṃ, tiṇaṃ, mattikā, dārubhaṇḍaṃ, mattikābhaṇḍaṃ – idaṃ pañcamaṃ avebhaṅgiyaṃ, na vibhajitabbaṃ, saṅghena vā gaṇena vā puggalena vā. Vibhattampi avibhattaṃ hoti. Yo vibhajeyya, āpatti thullaccayassa. Imāni kho, bhikkhave, pañca avebhaṅgiyāni, na vibhajitabbāni, saṅghena vā gaṇena vā puggalena vā. Vibhattānipi avibhattāni honti. Yo vibhajeyya, āpatti thullaccayassā’’ti.
Footnotes:
