| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
3. ஆவேணிகது³க்க²ஸுத்தங்
3. Āveṇikadukkhasuttaṃ
282. ‘‘பஞ்சிமானி, பி⁴க்க²வே, மாதுகா³மஸ்ஸ ஆவேணிகானி து³க்கா²னி, யானி மாதுகா³மோ பச்சனுபோ⁴தி, அஞ்ஞத்ரேவ புரிஸேஹி. கதமானி பஞ்ச? இத⁴, பி⁴க்க²வே , மாதுகா³மோ த³ஹரோவ ஸமானோ பதிகுலங் க³ச்ச²தி, ஞாதகேஹி வினா ஹோதி. இத³ங், பி⁴க்க²வே, மாதுகா³மஸ்ஸ பட²மங் ஆவேணிகங் து³க்க²ங், யங் மாதுகா³மோ பச்சனுபோ⁴தி, அஞ்ஞத்ரேவ புரிஸேஹி. புன சபரங், பி⁴க்க²வே, மாதுகா³மோ உதுனீ ஹோதி. இத³ங், பி⁴க்க²வே, மாதுகா³மஸ்ஸ து³தியங் ஆவேணிகங் து³க்க²ங், யங் மாதுகா³மோ பச்சனுபோ⁴தி, அஞ்ஞத்ரேவ புரிஸேஹி. புன சபரங், பி⁴க்க²வே, மாதுகா³மோ க³ப்³பி⁴னீ ஹோதி. இத³ங், பி⁴க்க²வே, மாதுகா³மஸ்ஸ ததியங் ஆவேணிகங் து³க்க²ங், யங் மாதுகா³மோ பச்சனுபோ⁴தி, அஞ்ஞத்ரேவ புரிஸேஹி. புன சபரங், பி⁴க்க²வே, மாதுகா³மோ விஜாயதி. இத³ங், பி⁴க்க²வே, மாதுகா³மஸ்ஸ சதுத்த²ங் ஆவேணிகங் து³க்க²ங், யங் மாதுகா³மோ பச்சனுபோ⁴தி, அஞ்ஞத்ரேவ புரிஸேஹி. புன சபரங், பி⁴க்க²வே, மாதுகா³மோ புரிஸஸ்ஸ பாரிசரியங் உபேதி. இத³ங் கோ², பி⁴க்க²வே, மாதுகா³மஸ்ஸ பஞ்சமங் ஆவேணிகங் து³க்க²ங், யங் மாதுகா³மோ பச்சனுபோ⁴தி, அஞ்ஞத்ரேவ புரிஸேஹி. இமானி கோ², பி⁴க்க²வே, பஞ்ச மாதுகா³மஸ்ஸ ஆவேணிகானி து³க்கா²னி, யானி மாதுகா³மோ பச்சனுபோ⁴தி, அஞ்ஞத்ரேவ புரிஸேஹீ’’தி. ததியங்.
282. ‘‘Pañcimāni, bhikkhave, mātugāmassa āveṇikāni dukkhāni, yāni mātugāmo paccanubhoti, aññatreva purisehi. Katamāni pañca? Idha, bhikkhave , mātugāmo daharova samāno patikulaṃ gacchati, ñātakehi vinā hoti. Idaṃ, bhikkhave, mātugāmassa paṭhamaṃ āveṇikaṃ dukkhaṃ, yaṃ mātugāmo paccanubhoti, aññatreva purisehi. Puna caparaṃ, bhikkhave, mātugāmo utunī hoti. Idaṃ, bhikkhave, mātugāmassa dutiyaṃ āveṇikaṃ dukkhaṃ, yaṃ mātugāmo paccanubhoti, aññatreva purisehi. Puna caparaṃ, bhikkhave, mātugāmo gabbhinī hoti. Idaṃ, bhikkhave, mātugāmassa tatiyaṃ āveṇikaṃ dukkhaṃ, yaṃ mātugāmo paccanubhoti, aññatreva purisehi. Puna caparaṃ, bhikkhave, mātugāmo vijāyati. Idaṃ, bhikkhave, mātugāmassa catutthaṃ āveṇikaṃ dukkhaṃ, yaṃ mātugāmo paccanubhoti, aññatreva purisehi. Puna caparaṃ, bhikkhave, mātugāmo purisassa pāricariyaṃ upeti. Idaṃ kho, bhikkhave, mātugāmassa pañcamaṃ āveṇikaṃ dukkhaṃ, yaṃ mātugāmo paccanubhoti, aññatreva purisehi. Imāni kho, bhikkhave, pañca mātugāmassa āveṇikāni dukkhāni, yāni mātugāmo paccanubhoti, aññatreva purisehī’’ti. Tatiyaṃ.
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 3. ஆவேணிகது³க்க²ஸுத்தவண்ணனா • 3. Āveṇikadukkhasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 3. ஆவேணிகது³க்க²ஸுத்தவண்ணனா • 3. Āveṇikadukkhasuttavaṇṇanā
