| Library / Tipiṭaka / ತಿಪಿಟಕ • Tipiṭaka / ಸಂಯುತ್ತನಿಕಾಯ (ಟೀಕಾ) • Saṃyuttanikāya (ṭīkā) |
೫. ಅವಿಜ್ಜಾಪಚ್ಚಯಸುತ್ತವಣ್ಣನಾ
5. Avijjāpaccayasuttavaṇṇanā
೩೫. ದೇಸನಂ ಓಸಾಪೇಸೀತಿ ಯಥಾರದ್ಧಕಥಂ ಠಪೇಸಿ। ತತ್ಥ ನಿಸಿನ್ನಸ್ಸ ದಿಟ್ಠಿಗತಿಕಸ್ಸ ಲದ್ಧಿಯಾ ಭಿನ್ದನವಸೇನ ಉಪರಿ ಕಥೇತುಕಾಮೋ। ಬುದ್ಧಾನಞ್ಹಿ ದೇಸನಾವಾರಂ ಪಚ್ಛಿನ್ದಾಪೇತ್ವಾ ಪುಚ್ಛಿತುಂ ಸಮತ್ಥೋ ನಾಮ ಕೋಚಿ ನತ್ಥಿ। ತೇನಾಹ ‘‘ದಿಟ್ಠಿಗತಿಕಸ್ಸ ಓಕಾಸದಾನತ್ಥ’’ನ್ತಿ। ದುಪ್ಪಞ್ಹೋ ಏಸೋ ಸತ್ತೂಪಲದ್ಧಿಯಾ ಪುಚ್ಛಿತತ್ತಾ । ಸತ್ತೂಪಲದ್ಧಿವಾದಪದೇನಾತಿ ‘‘ಸತ್ತೋ ಜೀವೋ ಉಪಲಬ್ಭತೀ’’ತಿ ಏವಂ ಪವತ್ತದಿಟ್ಠಿದೀಪಕಪದವಸೇನ। ವದನ್ತಿ ಏತೇನಾತಿ ವಾದೋ। ದಿಟ್ಠಿ-ಸದ್ದೋ ಪನ ದ್ವಯಸಙ್ಗಹಿತೋ, ಬ್ರಹ್ಮಚರಿಯವಾಸೋ ಪನ ಪರಮತ್ಥತೋ ಅರಿಯಮಗ್ಗಭಾವನಾತಿ ಆಹ ‘‘ಅರಿಯಮಗ್ಗವಾಸೋ’’ತಿ। ಅಯಂ ದಿಟ್ಠೀತಿ ಅನಞ್ಞೇ ಸರೀರಜೀವಾತಿ ದಿಟ್ಠಿ। ‘‘ಜೀವೋ’’ತಿ ಚ ಜೀವಿತಮೇವ ವದನ್ತಿ। ವಟ್ಟನ್ತಿ ದುವಿಧಂ ವಟ್ಟಂ। ನಿರೋಧೇನ್ತೋತಿ ಅನುಪ್ಪತ್ತಿಧಮ್ಮತಂ ಆಪಾದೇನ್ತೋ। ಸಮುಚ್ಛಿನ್ದನ್ತೋತಿ ಅಪ್ಪವತ್ತಿಯಂ ಪಾಪನೇನ ಉಪಚ್ಛಿನ್ದನ್ತೋ। ತದೇತಂ ಮಗ್ಗೇನ ನಿರೋಧೇತಬ್ಬಂ ವಟ್ಟಂ ನಿರುಜ್ಝತೀತಿ ಯೋಜನಾ। ‘‘ಅಯಂ ಸತ್ತೋ ವಿನಾಸಂ ಅಭಾವಂ ಪತ್ವಾ ಸಬ್ಬಸೋ ಉಚ್ಛಿಜ್ಜತೀ’’ತಿ ಏವಂ ಉಚ್ಛೇದದಿಟ್ಠಿಯಾ ಗಹಿತಾಕಾರಸ್ಸ ಸಮ್ಭವೇ ಸಚ್ಚಭಾವೇ ಸತಿ। ನ ಹೋತೀತಿ ಸಾತ್ಥಕೋ ನ ಹೋತಿ।
35.Desanaṃ osāpesīti yathāraddhakathaṃ ṭhapesi. Tattha nisinnassa diṭṭhigatikassa laddhiyā bhindanavasena upari kathetukāmo. Buddhānañhi desanāvāraṃ pacchindāpetvā pucchituṃ samattho nāma koci natthi. Tenāha ‘‘diṭṭhigatikassa okāsadānattha’’nti. Duppañho eso sattūpaladdhiyā pucchitattā . Sattūpaladdhivādapadenāti ‘‘satto jīvo upalabbhatī’’ti evaṃ pavattadiṭṭhidīpakapadavasena. Vadanti etenāti vādo. Diṭṭhi-saddo pana dvayasaṅgahito, brahmacariyavāso pana paramatthato ariyamaggabhāvanāti āha ‘‘ariyamaggavāso’’ti. Ayaṃ diṭṭhīti anaññe sarīrajīvāti diṭṭhi. ‘‘Jīvo’’ti ca jīvitameva vadanti. Vaṭṭanti duvidhaṃ vaṭṭaṃ. Nirodhentoti anuppattidhammataṃ āpādento. Samucchindantoti appavattiyaṃ pāpanena upacchindanto. Tadetaṃ maggena nirodhetabbaṃ vaṭṭaṃ nirujjhatīti yojanā. ‘‘Ayaṃ satto vināsaṃ abhāvaṃ patvā sabbaso ucchijjatī’’ti evaṃ ucchedadiṭṭhiyā gahitākārassa sambhave saccabhāve sati. Na hotīti sātthako na hoti.
ಗಚ್ಛತೀತಿ ಸರೀರತೋ ನಿಕ್ಖಮಿತ್ವಾ ಗಚ್ಛತಿ। ವಿವಟ್ಟೇನ್ತೋತಿ ಅಪ್ಪವತ್ತಿಂ ಕರೋನ್ತೋತಿ ಅತ್ಥೋ। ವಿವಟ್ಟೇತುಂ ನ ಸಕ್ಕೋತಿ ನಿಚ್ಚಸ್ಸ ಅಪ್ಪವತ್ತಿಂ ಪಾಪೇತುಂ ಅಸಕ್ಕುಣೇಯ್ಯತ್ತಾ। ಮಿಚ್ಛಾದಿಟ್ಠಿ ಸಮ್ಮಾದಿಟ್ಠಿಂ ವಿಜ್ಝತಿ ಅಸಮಾಹಿತಪುಗ್ಗಲಸೇವನವಸೇನ ತಥಾ ಪವತ್ತಿತುಂ ಅಪ್ಪದಾನವಸೇನ ಚ ಪಜಹಿತಬ್ಬಾಪಜಹನವಸೇನ ಸಮ್ಮಾದಿಟ್ಠಿಂ ವಿಜ್ಝತಿ। ವಿಸೂಕಮಿವಾತಿ ಕಣ್ಡಕೋ ವಿಯ। ನ ಕೇವಲಂ ಅನನುವತ್ತಕೋವ, ಅಥ ಖೋ ವಿರೋಧೋಪಿ ‘‘ನಿಚ್ಚ’’ನ್ತಿಆದಿನಾ ಪವತ್ತನಧಮ್ಮತಾಯ ವಿಞ್ಞಾಪನತೋ। ವಿರೂಪಂ ಬೀಭಚ್ಛಂ ಫನ್ದಿತಂ ವಿಪ್ಫನ್ದಿತಂ। ಪಣ್ಣಪುಪ್ಫಫಲಪಲ್ಲವಾನಂ ಅವತ್ಥುಭೂತೋ ತಾಲೋ ಏವ ತಾಲಾವತ್ಥು ‘‘ಅಸಿವೇ ಸಿವಾ’’ತಿ ವೋಹಾರೋ ವಿಯ। ಕೇಚಿ ಪನ ‘‘ತಾಲವತ್ಥುಕತಾನೀ’’ತಿ ಪಠನ್ತಿ, ಅವತ್ಥುಭೂತತಾಯ ತಾಲೋ ವಿಯ ಕತಾನೀತಿ ಅತ್ಥೋ। ತೇನಾಹ ‘‘ಮತ್ಥಕಚ್ಛಿನ್ನತಾಲೋ ವಿಯಾ’’ತಿ। ಅನುಅಭಾವನ್ತಿ ವಿನಾಸಂ।
Gacchatīti sarīrato nikkhamitvā gacchati. Vivaṭṭentoti appavattiṃ karontoti attho. Vivaṭṭetuṃ na sakkoti niccassa appavattiṃ pāpetuṃ asakkuṇeyyattā. Micchādiṭṭhi sammādiṭṭhiṃ vijjhati asamāhitapuggalasevanavasena tathā pavattituṃ appadānavasena ca pajahitabbāpajahanavasena sammādiṭṭhiṃ vijjhati. Visūkamivāti kaṇḍako viya. Na kevalaṃ ananuvattakova, atha kho virodhopi ‘‘nicca’’ntiādinā pavattanadhammatāya viññāpanato. Virūpaṃ bībhacchaṃ phanditaṃ vipphanditaṃ. Paṇṇapupphaphalapallavānaṃ avatthubhūto tālo eva tālāvatthu ‘‘asive sivā’’ti vohāro viya. Keci pana ‘‘tālavatthukatānī’’ti paṭhanti, avatthubhūtatāya tālo viya katānīti attho. Tenāha ‘‘matthakacchinnatālo viyā’’ti. Anuabhāvanti vināsaṃ.
ಅವಿಜ್ಜಾಪಚ್ಚಯಸುತ್ತವಣ್ಣನಾ ನಿಟ್ಠಿತಾ।
Avijjāpaccayasuttavaṇṇanā niṭṭhitā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಸಂಯುತ್ತನಿಕಾಯ • Saṃyuttanikāya / ೫. ಅವಿಜ್ಜಾಪಚ್ಚಯಸುತ್ತಂ • 5. Avijjāpaccayasuttaṃ
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಸಂಯುತ್ತನಿಕಾಯ (ಅಟ್ಠಕಥಾ) • Saṃyuttanikāya (aṭṭhakathā) / ೫. ಅವಿಜ್ಜಾಪಚ್ಚಯಸುತ್ತವಣ್ಣನಾ • 5. Avijjāpaccayasuttavaṇṇanā
