| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
6. அவிஜ்ஜாவக்³கோ³
6. Avijjāvaggo
1. அவிஜ்ஜாபஹானஸுத்தங்
1. Avijjāpahānasuttaṃ
53. ஸாவத்தி²னிதா³னங் . அத² கோ² அஞ்ஞதரோ பி⁴க்கு² யேன ப⁴க³வா தேனுபஸங்கமி; உபஸங்கமித்வா ப⁴க³வந்தங் அபி⁴வாதெ³த்வா ஏகமந்தங் நிஸீதி³. ஏகமந்தங் நிஸின்னோ கோ² ஸோ பி⁴க்கு² ப⁴க³வந்தங் ஏதத³வோச – ‘‘கத²ங் நு கோ², ப⁴ந்தே, ஜானதோ கத²ங் பஸ்ஸதோ அவிஜ்ஜா பஹீயதி, விஜ்ஜா உப்பஜ்ஜதீ’’தி?
53. Sāvatthinidānaṃ . Atha kho aññataro bhikkhu yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho so bhikkhu bhagavantaṃ etadavoca – ‘‘kathaṃ nu kho, bhante, jānato kathaṃ passato avijjā pahīyati, vijjā uppajjatī’’ti?
‘‘சக்கு²ங் கோ², பி⁴க்கு², அனிச்சதோ ஜானதோ பஸ்ஸதோ அவிஜ்ஜா பஹீயதி, விஜ்ஜா உப்பஜ்ஜதி. ரூபே அனிச்சதோ ஜானதோ பஸ்ஸதோ அவிஜ்ஜா பஹீயதி, விஜ்ஜா உப்பஜ்ஜதி. சக்கு²விஞ்ஞாணங்… சக்கு²ஸம்ப²ஸ்ஸங்… யம்பித³ங் சக்கு²ஸம்ப²ஸ்ஸபச்சயா உப்பஜ்ஜதி வேத³யிதங் ஸுக²ங் வா து³க்க²ங் வா அது³க்க²மஸுக²ங் வா தம்பி அனிச்சதோ ஜானதோ பஸ்ஸதோ அவிஜ்ஜா பஹீயதி, விஜ்ஜா உப்பஜ்ஜதி. ஸோதங்… கா⁴னங்… ஜிவ்ஹங்… காயங்… மனங் அனிச்சதோ ஜானதோ பஸ்ஸதோ அவிஜ்ஜா பஹீயதி, விஜ்ஜா உப்பஜ்ஜதி. த⁴ம்மே … மனோவிஞ்ஞாணங்… மனோஸம்ப²ஸ்ஸங்… யம்பித³ங் மனோஸம்ப²ஸ்ஸபச்சயா உப்பஜ்ஜதி வேத³யிதங் ஸுக²ங் வா து³க்க²ங் வா அது³க்க²மஸுக²ங் வா தம்பி அனிச்சதோ ஜானதோ பஸ்ஸதோ அவிஜ்ஜா பஹீயதி, விஜ்ஜா உப்பஜ்ஜதி. ஏவங் கோ², பி⁴க்கு², ஜானதோ ஏவங் பஸ்ஸதோ அவிஜ்ஜா பஹீயதி, விஜ்ஜா உப்பஜ்ஜதீ’’தி. பட²மங்.
‘‘Cakkhuṃ kho, bhikkhu, aniccato jānato passato avijjā pahīyati, vijjā uppajjati. Rūpe aniccato jānato passato avijjā pahīyati, vijjā uppajjati. Cakkhuviññāṇaṃ… cakkhusamphassaṃ… yampidaṃ cakkhusamphassapaccayā uppajjati vedayitaṃ sukhaṃ vā dukkhaṃ vā adukkhamasukhaṃ vā tampi aniccato jānato passato avijjā pahīyati, vijjā uppajjati. Sotaṃ… ghānaṃ… jivhaṃ… kāyaṃ… manaṃ aniccato jānato passato avijjā pahīyati, vijjā uppajjati. Dhamme … manoviññāṇaṃ… manosamphassaṃ… yampidaṃ manosamphassapaccayā uppajjati vedayitaṃ sukhaṃ vā dukkhaṃ vā adukkhamasukhaṃ vā tampi aniccato jānato passato avijjā pahīyati, vijjā uppajjati. Evaṃ kho, bhikkhu, jānato evaṃ passato avijjā pahīyati, vijjā uppajjatī’’ti. Paṭhamaṃ.
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 6. அவிஜ்ஜாவக்³க³வண்ணனா • 6. Avijjāvaggavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 6. அவிஜ்ஜாவக்³க³வண்ணனா • 6. Avijjāvaggavaṇṇanā
