| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
6. අවිජ්‌ජාවග්‌ගො
6. Avijjāvaggo
1. අවිජ්‌ජාපහානසුත්‌තං
1. Avijjāpahānasuttaṃ
53. සාවත්‌ථිනිදානං . අථ ඛො අඤ්‌ඤතරො භික්‌ඛු යෙන භගවා තෙනුපසඞ්‌කමි; උපසඞ්‌කමිත්‌වා භගවන්‌තං අභිවාදෙත්‌වා එකමන්‌තං නිසීදි. එකමන්‌තං නිසින්‌නො ඛො සො භික්‌ඛු භගවන්‌තං එතදවොච – ‘‘කථං නු ඛො, භන්‌තෙ, ජානතො කථං පස්‌සතො අවිජ්‌ජා පහීයති, විජ්‌ජා උප්‌පජ්‌ජතී’’ති?
53. Sāvatthinidānaṃ . Atha kho aññataro bhikkhu yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho so bhikkhu bhagavantaṃ etadavoca – ‘‘kathaṃ nu kho, bhante, jānato kathaṃ passato avijjā pahīyati, vijjā uppajjatī’’ti?
‘‘චක්‌ඛුං ඛො, භික්‌ඛු, අනිච්‌චතො ජානතො පස්‌සතො අවිජ්‌ජා පහීයති, විජ්‌ජා උප්‌පජ්‌ජති. රූපෙ අනිච්‌චතො ජානතො පස්‌සතො අවිජ්‌ජා පහීයති, විජ්‌ජා උප්‌පජ්‌ජති. චක්‌ඛුවිඤ්‌ඤාණං… චක්‌ඛුසම්‌ඵස්‌සං… යම්‌පිදං චක්‌ඛුසම්‌ඵස්‌සපච්‌චයා උප්‌පජ්‌ජති වෙදයිතං සුඛං වා දුක්‌ඛං වා අදුක්‌ඛමසුඛං වා තම්‌පි අනිච්‌චතො ජානතො පස්‌සතො අවිජ්‌ජා පහීයති, විජ්‌ජා උප්‌පජ්‌ජති. සොතං… ඝානං… ජිව්‌හං… කායං… මනං අනිච්‌චතො ජානතො පස්‌සතො අවිජ්‌ජා පහීයති, විජ්‌ජා උප්‌පජ්‌ජති. ධම්‌මෙ … මනොවිඤ්‌ඤාණං… මනොසම්‌ඵස්‌සං… යම්‌පිදං මනොසම්‌ඵස්‌සපච්‌චයා උප්‌පජ්‌ජති වෙදයිතං සුඛං වා දුක්‌ඛං වා අදුක්‌ඛමසුඛං වා තම්‌පි අනිච්‌චතො ජානතො පස්‌සතො අවිජ්‌ජා පහීයති, විජ්‌ජා උප්‌පජ්‌ජති. එවං ඛො, භික්‌ඛු, ජානතො එවං පස්‌සතො අවිජ්‌ජා පහීයති, විජ්‌ජා උප්‌පජ්‌ජතී’’ති. පඨමං.
‘‘Cakkhuṃ kho, bhikkhu, aniccato jānato passato avijjā pahīyati, vijjā uppajjati. Rūpe aniccato jānato passato avijjā pahīyati, vijjā uppajjati. Cakkhuviññāṇaṃ… cakkhusamphassaṃ… yampidaṃ cakkhusamphassapaccayā uppajjati vedayitaṃ sukhaṃ vā dukkhaṃ vā adukkhamasukhaṃ vā tampi aniccato jānato passato avijjā pahīyati, vijjā uppajjati. Sotaṃ… ghānaṃ… jivhaṃ… kāyaṃ… manaṃ aniccato jānato passato avijjā pahīyati, vijjā uppajjati. Dhamme … manoviññāṇaṃ… manosamphassaṃ… yampidaṃ manosamphassapaccayā uppajjati vedayitaṃ sukhaṃ vā dukkhaṃ vā adukkhamasukhaṃ vā tampi aniccato jānato passato avijjā pahīyati, vijjā uppajjati. Evaṃ kho, bhikkhu, jānato evaṃ passato avijjā pahīyati, vijjā uppajjatī’’ti. Paṭhamaṃ.
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 6. අවිජ්‌ජාවග්‌ගවණ්‌ණනා • 6. Avijjāvaggavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 6. අවිජ්‌ජාවග්‌ගවණ්‌ණනා • 6. Avijjāvaggavaṇṇanā
