| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
9. அவிஜ்ஜாபஞ்ஹாஸுத்தங்
9. Avijjāpañhāsuttaṃ
322. ‘‘‘அவிஜ்ஜா, அவிஜ்ஜா’தி, ஆவுஸோ ஸாரிபுத்த, வுச்சதி. கதமா நு கோ², ஆவுஸோ, அவிஜ்ஜா’’தி? ‘‘யங் கோ², ஆவுஸோ, து³க்கே² அஞ்ஞாணங், து³க்க²ஸமுத³யே அஞ்ஞாணங், து³க்க²னிரோதே⁴ அஞ்ஞாணங், து³க்க²னிரோத⁴கா³மினியா படிபதா³ய அஞ்ஞாணங் – அயங் வுச்சதாவுஸோ, அவிஜ்ஜா’’தி. ‘‘அத்தி² பனாவுஸோ, மக்³கோ³ அத்தி² படிபதா³, ஏதிஸ்ஸா அவிஜ்ஜாய பஹானாயா’’தி? ‘‘அத்தி² கோ², ஆவுஸோ, மக்³கோ³ அத்தி² படிபதா³, ஏதிஸ்ஸா அவிஜ்ஜாய பஹானாயா’’தி. ‘‘கதமோ பனாவுஸோ, மக்³கோ³ கதமா படிபதா³, ஏதிஸ்ஸா அவிஜ்ஜாய பஹானாயா’’தி? ‘‘அயமேவ கோ², ஆவுஸோ, அரியோ அட்ட²ங்கி³கோ மக்³கோ³, ஏதிஸ்ஸா அவிஜ்ஜாய பஹானாய, ஸெய்யதி²த³ங் – ஸம்மாதி³ட்டி² ஸம்மாஸங்கப்போ ஸம்மாவாசா ஸம்மாகம்மந்தோ ஸம்மாஆஜீவோ ஸம்மாவாயாமோ ஸம்மாஸதி ஸம்மாஸமாதி⁴. அயங் கோ², ஆவுஸோ, மக்³கோ³ அயங் படிபதா³, ஏதிஸ்ஸா அவிஜ்ஜாய பஹானாயா’’தி. ‘‘ப⁴த்³த³கோ, ஆவுஸோ, மக்³கோ³ ப⁴த்³தி³கா படிபதா³, ஏதிஸ்ஸா அவிஜ்ஜாய பஹானாய. அலஞ்ச பனாவுஸோ ஸாரிபுத்த, அப்பமாதா³யா’’தி. நவமங்.
322. ‘‘‘Avijjā, avijjā’ti, āvuso sāriputta, vuccati. Katamā nu kho, āvuso, avijjā’’ti? ‘‘Yaṃ kho, āvuso, dukkhe aññāṇaṃ, dukkhasamudaye aññāṇaṃ, dukkhanirodhe aññāṇaṃ, dukkhanirodhagāminiyā paṭipadāya aññāṇaṃ – ayaṃ vuccatāvuso, avijjā’’ti. ‘‘Atthi panāvuso, maggo atthi paṭipadā, etissā avijjāya pahānāyā’’ti? ‘‘Atthi kho, āvuso, maggo atthi paṭipadā, etissā avijjāya pahānāyā’’ti. ‘‘Katamo panāvuso, maggo katamā paṭipadā, etissā avijjāya pahānāyā’’ti? ‘‘Ayameva kho, āvuso, ariyo aṭṭhaṅgiko maggo, etissā avijjāya pahānāya, seyyathidaṃ – sammādiṭṭhi sammāsaṅkappo sammāvācā sammākammanto sammāājīvo sammāvāyāmo sammāsati sammāsamādhi. Ayaṃ kho, āvuso, maggo ayaṃ paṭipadā, etissā avijjāya pahānāyā’’ti. ‘‘Bhaddako, āvuso, maggo bhaddikā paṭipadā, etissā avijjāya pahānāya. Alañca panāvuso sāriputta, appamādāyā’’ti. Navamaṃ.
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 3-15. த⁴ம்மவாதீ³பஞ்ஹாஸுத்தாதி³வண்ணனா • 3-15. Dhammavādīpañhāsuttādivaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 3-15. த⁴ம்மவாதீ³பஞ்ஹஸுத்தாதி³வண்ணனா • 3-15. Dhammavādīpañhasuttādivaṇṇanā
