| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
நமோ தஸ்ஸ ப⁴க³வதோ அரஹதோ ஸம்மாஸம்பு³த்³த⁴ஸ்ஸ
Namo tassa bhagavato arahato sammāsambuddhassa
ஸங்யுத்தனிகாயே
Saṃyuttanikāye
மஹாவக்³க³-அட்ட²கதா²
Mahāvagga-aṭṭhakathā
1. மக்³க³ஸங்யுத்தங்
1. Maggasaṃyuttaṃ
1. அவிஜ்ஜாவக்³கோ³
1. Avijjāvaggo
1-2. அவிஜ்ஜாஸுத்தாதி³வண்ணனா
1-2. Avijjāsuttādivaṇṇanā
1-2. மஹாவக்³க³ஸ்ஸ பட²மே புப்³ப³ங்க³மாதி ஸஹஜாதவஸேன ச உபனிஸ்ஸயவஸேன சாதி த்³வீஹாகாரேஹி புப்³ப³ங்க³மா. ஸமாபத்தியாதி ஸமாபஜ்ஜனாய ஸபா⁴வபடிலாபா⁴ய, உப்பத்தியாதி அத்தோ². அன்வதே³வ அஹிரிகங் அனொத்தப்பந்தி ஸா பனேஸா யதே³தங் அலஜ்ஜனாகாரஸண்டி²கங் அஹிரிகங், அபா⁴யனாகாரஸண்டி²தஞ்ச அனொத்தப்பங், ஏதங் அனுதே³வ ஸஹேவ ஏகதோவ, ந வினா தேன உப்பஜ்ஜதீதி அத்தோ². அவிஜ்ஜாக³தஸ்ஸாதி அவிஜ்ஜாய உபக³தஸ்ஸ ஸமன்னாக³தஸ்ஸ. மிச்சா²தி³ட்டீ²தி அயாதா²வதி³ட்டி² அனிய்யானிகதி³ட்டி². பஹோதீதி ஹோதி உப்பஜ்ஜதி. மிச்சா²ஸங்கப்பாதீ³ஸுபி அயாதா²வஅனிய்யானிகவஸேனேவ மிச்சா²பா⁴வோ வேதி³தப்³போ³. இதி இமானி அட்ட²பி அகுஸலத⁴ம்மஸமாபத்தியா மிச்ச²த்தஅங்கா³னி நாம ஹொந்தி. தானி பன ந ஏகக்க²ணே ஸப்³பா³னி லப்³ப⁴ந்தி, நானக்க²ணே லப்³ப⁴ந்தி.
1-2. Mahāvaggassa paṭhame pubbaṅgamāti sahajātavasena ca upanissayavasena cāti dvīhākārehi pubbaṅgamā. Samāpattiyāti samāpajjanāya sabhāvapaṭilābhāya, uppattiyāti attho. Anvadeva ahirikaṃ anottappanti sā panesā yadetaṃ alajjanākārasaṇṭhikaṃ ahirikaṃ, abhāyanākārasaṇṭhitañca anottappaṃ, etaṃ anudeva saheva ekatova, na vinā tena uppajjatīti attho. Avijjāgatassāti avijjāya upagatassa samannāgatassa. Micchādiṭṭhīti ayāthāvadiṭṭhi aniyyānikadiṭṭhi. Pahotīti hoti uppajjati. Micchāsaṅkappādīsupi ayāthāvaaniyyānikavaseneva micchābhāvo veditabbo. Iti imāni aṭṭhapi akusaladhammasamāpattiyā micchattaaṅgāni nāma honti. Tāni pana na ekakkhaṇe sabbāni labbhanti, nānakkhaṇe labbhanti.
கத²ங்? யதா³ ஹி தி³ட்டி²ஸம்பயுத்தசித்தங் காயவிஞ்ஞத்திங் ஸமுட்டா²பெந்தங் உப்பஜ்ஜதி, ததா³ மிச்சா²தி³ட்டி² மிச்சா²ஸங்கப்போ மிச்சா²வாயாமோ மிச்சா²ஸதி மிச்சா²ஸமாதி⁴ மிச்சா²கம்மந்தோதி ச² அங்கா³னி ஹொந்தி. யதா³ தி³ட்டி²விப்பயுத்தங், ததா³ மிச்சா²தி³ட்டி²வஜ்ஜானி பஞ்ச. யதா³ தானேவ த்³வே வசீவிஞ்ஞத்திங் ஸமுட்டா²பெந்தி, ததா³ மிச்சா²கம்மந்தட்டா²னே மிச்சா²வாசாய ஸத்³தி⁴ங் தானேவ ச² வா பஞ்ச வா. அயங் ஆஜீவோ நாம குப்பமானோ காயவசீத்³வாரேஸுயேவ அஞ்ஞதரஸ்மிங் குப்பதி, ந மனொத்³வாரே. தஸ்மா யதா³ ஆஜீவஸீஸேன தானேவ சித்தானி காயவசீவிஞ்ஞத்தியோ ஸமுட்டா²பெந்தி, ததா³ காயகம்மங் மிச்சா²ஜீவோ நாம ஹோதி, ததா² வசீகம்மந்தி மிச்சா²ஜீவஸ்ஸ வஸேன தானேவ ச² வா பஞ்ச வா. யதா³ பன விஞ்ஞத்திங் அஸமுட்டா²பெத்வா தானி சித்தானி உப்பஜ்ஜந்தி , ததா³ மிச்சா²தி³ட்டி²மிச்சா²ஸங்கப்பமிச்சா²வாயாமமிச்சா²ஸதிமிச்சா²ஸமாதி⁴வஸேன பஞ்ச வா, மிச்சா²ஸங்கப்பாதி³வஸேன சத்தாரி வா ஹொந்தீதி ஏவங் ந ஏகக்க²ணே ஸப்³பா³னி லப்³ப⁴ந்தி, நானக்க²ணே லப்³ப⁴ந்தீதி.
Kathaṃ? Yadā hi diṭṭhisampayuttacittaṃ kāyaviññattiṃ samuṭṭhāpentaṃ uppajjati, tadā micchādiṭṭhi micchāsaṅkappo micchāvāyāmo micchāsati micchāsamādhi micchākammantoti cha aṅgāni honti. Yadā diṭṭhivippayuttaṃ, tadā micchādiṭṭhivajjāni pañca. Yadā tāneva dve vacīviññattiṃ samuṭṭhāpenti, tadā micchākammantaṭṭhāne micchāvācāya saddhiṃ tāneva cha vā pañca vā. Ayaṃ ājīvo nāma kuppamāno kāyavacīdvāresuyeva aññatarasmiṃ kuppati, na manodvāre. Tasmā yadā ājīvasīsena tāneva cittāni kāyavacīviññattiyo samuṭṭhāpenti, tadā kāyakammaṃ micchājīvo nāma hoti, tathā vacīkammanti micchājīvassa vasena tāneva cha vā pañca vā. Yadā pana viññattiṃ asamuṭṭhāpetvā tāni cittāni uppajjanti , tadā micchādiṭṭhimicchāsaṅkappamicchāvāyāmamicchāsatimicchāsamādhivasena pañca vā, micchāsaṅkappādivasena cattāri vā hontīti evaṃ na ekakkhaṇe sabbāni labbhanti, nānakkhaṇe labbhantīti.
ஸுக்கபக்கே² விஜ்ஜாதி கம்மஸ்ஸகதஞாணங். இஹாபி ஸஹஜாதவஸேன ச உபனிஸ்ஸயவஸேன சாதி த்³வீஹாகாரேஹி புப்³ப³ங்க³மதா வேதி³தப்³பா³. ஹிரொத்தப்பந்தி ஹிரீ ச ஒத்தப்பஞ்ச. தத்த² லஜ்ஜனாகாரஸண்டி²தா ஹிரீ, பா⁴யனாகாரஸண்டி²தங் ஒத்தப்பங். அயமெத்த² ஸங்கே²போ, வித்தா²ரோ பன விஸுத்³தி⁴மக்³கே³ வுத்தோவ. விஜ்ஜாக³தஸ்ஸாதி விஜ்ஜாய உபக³தஸ்ஸ ஸமன்னாக³தஸ்ஸ. வித்³த³ஸுனோதி விது³னோ பண்டி³தஸ்ஸ. ஸம்மாதி³ட்டீ²தி யாதா²வதி³ட்டி² நிய்யானிகதி³ட்டி². ஸம்மாகம்மந்தாதீ³ஸுபி ஏஸேவ நயோ. இதி குஸலத⁴ம்மஸமாபத்தியா இமானி அட்ட²ங்கா³னி ஹொந்தி, தானி லோகியமக்³க³க்க²ணே ந ஏகதோ ஸப்³பா³னி லப்³ப⁴ந்தி, லோகுத்தரமக்³க³க்க²ணே பன லப்³ப⁴ந்தி. தானி ச கோ² பட²மஜ்ஜா²னிகமக்³கே³, து³தியஜ்ஜா²னிகாதீ³ஸு பன ஸம்மாஸங்கப்பவஜ்ஜானி ஸத்தேவ ஹொந்தி.
Sukkapakkhe vijjāti kammassakatañāṇaṃ. Ihāpi sahajātavasena ca upanissayavasena cāti dvīhākārehi pubbaṅgamatā veditabbā. Hirottappanti hirī ca ottappañca. Tattha lajjanākārasaṇṭhitā hirī, bhāyanākārasaṇṭhitaṃ ottappaṃ. Ayamettha saṅkhepo, vitthāro pana visuddhimagge vuttova. Vijjāgatassāti vijjāya upagatassa samannāgatassa. Viddasunoti viduno paṇḍitassa. Sammādiṭṭhīti yāthāvadiṭṭhi niyyānikadiṭṭhi. Sammākammantādīsupi eseva nayo. Iti kusaladhammasamāpattiyā imāni aṭṭhaṅgāni honti, tāni lokiyamaggakkhaṇe na ekato sabbāni labbhanti, lokuttaramaggakkhaṇe pana labbhanti. Tāni ca kho paṭhamajjhānikamagge, dutiyajjhānikādīsu pana sammāsaṅkappavajjāni satteva honti.
தத்த² யோ ஏவங் வதெ³ய்ய ‘‘யஸ்மா மஜ்ஜி²மனிகாயம்ஹி மஹாஸளாயதனிகஸுத்தே (ம॰ நி॰ 3.431) ‘யா ததா²பூ⁴தஸ்ஸ தி³ட்டி², ஸாஸ்ஸ ஹோதி ஸம்மாதி³ட்டி². யோ ததா²பூ⁴தஸ்ஸ, ஸங்கப்போ, ஸ்வாஸ்ஸ ஹோதி ஸம்மாஸங்கப்போ. யோ ததா²பூ⁴தஸ்ஸ வாயாமோ, ஸ்வாஸ்ஸ ஹோதி ஸம்மாவாயாமோ. யா ததா²பூ⁴தஸ்ஸ ஸதி, ஸ்வாஸ்ஸ ஹோதி ஸம்மாஸதி. யோ ததா²பூ⁴தஸ்ஸ ஸமாதி⁴, ஸ்வாஸ்ஸ ஹோதி ஸம்மாஸமாதி⁴. புப்³பே³வ கோ² பனஸ்ஸ காயகம்மங் வசீகம்மங் ஆஜீவோ ச ஸுபரிஸுத்³தோ⁴’தி வுத்தங் தஸ்மா பஞ்சங்கி³கோபி லோகுத்தரமக்³கோ³ ஹோதீ’’தி ஸோ வத்தப்³போ³ – தஸ்மிங்யேவ ஸுத்தே ‘‘ஏவமஸ்ஸாயங் அரியோ அட்ட²ங்கி³கோ மக்³கோ³ பா⁴வனாபாரிபூரிங் க³ச்ச²தீ’’தி இத³ங் கஸ்மா ந பஸ்ஸஸி ? யங் பனேதங் ‘‘புப்³பே³வ கோ² பனஸ்ஸா’’தி வுத்தங், தங் பப்³ப³ஜிததி³வஸதோ பட்டா²ய பரிஸுத்³த⁴பா⁴வத³ஸ்ஸனத்த²ங். பப்³ப³ஜிததி³வஸதோ பட்டா²ய ஹி பரிஸுத்³தா⁴னி காயகம்மாதீ³னி லோகுத்தரமக்³க³க்க²ணே அதிபரிஸுத்³தா⁴னி ஹொந்தீதி அயமத்தோ² தீ³பிதோ.
Tattha yo evaṃ vadeyya ‘‘yasmā majjhimanikāyamhi mahāsaḷāyatanikasutte (ma. ni. 3.431) ‘yā tathābhūtassa diṭṭhi, sāssa hoti sammādiṭṭhi. Yo tathābhūtassa, saṅkappo, svāssa hoti sammāsaṅkappo. Yo tathābhūtassa vāyāmo, svāssa hoti sammāvāyāmo. Yā tathābhūtassa sati, svāssa hoti sammāsati. Yo tathābhūtassa samādhi, svāssa hoti sammāsamādhi. Pubbeva kho panassa kāyakammaṃ vacīkammaṃ ājīvo ca suparisuddho’ti vuttaṃ tasmā pañcaṅgikopi lokuttaramaggo hotī’’ti so vattabbo – tasmiṃyeva sutte ‘‘evamassāyaṃ ariyo aṭṭhaṅgiko maggo bhāvanāpāripūriṃ gacchatī’’ti idaṃ kasmā na passasi ? Yaṃ panetaṃ ‘‘pubbeva kho panassā’’ti vuttaṃ, taṃ pabbajitadivasato paṭṭhāya parisuddhabhāvadassanatthaṃ. Pabbajitadivasato paṭṭhāya hi parisuddhāni kāyakammādīni lokuttaramaggakkhaṇe atiparisuddhāni hontīti ayamattho dīpito.
யம்பி அபி⁴த⁴ம்மே வுத்தங் ‘‘தஸ்மிங் கோ² பன ஸமயே பஞ்சங்கி³கோ மக்³கோ³ ஹோதீ’’தி (விப⁴॰ 212), தங் ஏகங் கிச்சந்தரங் த³ஸ்ஸேதுங் வுத்தங். யஸ்மிஞ்ஹி காலே மிச்சா²கம்மந்தங் பஹாய ஸம்மாகம்மந்தங் பூரேதி, தஸ்மிங் காலே மிச்சா²வாசா வா மிச்சா²ஜீவோ வா ந ஹோதி, தி³ட்டி² ஸங்கப்போ வாயாமோ ஸதி ஸமாதீ⁴தி இமேஸுயேவ பஞ்சஸு காரகங்கே³ஸு ஸம்மாகம்மந்தோ பூரதி. விரதிவஸேன ஹி ஸம்மாகம்மந்தோ பூரதி நாம. ஸம்மாவாசாஸம்மாஆஜீவேஸுபி ஏஸேவ நயோ. இதி இமங் கிச்சந்தரங் த³ஸ்ஸேதுங் ஏவங் வுத்தங். லோகியமக்³க³க்க²ணே ச பஞ்சேவ ஹொந்தி, விரதி பன அனியதா. தஸ்மா ‘‘ச²அங்கி³கோ’’தி அவத்வா ‘‘பஞ்சங்கி³கோ’’த்வேவ வுத்தங். ‘‘யா ச, பி⁴க்க²வே, அரியசித்தஸ்ஸ அனாஸவசித்தஸ்ஸ அரியமக்³க³ஸமங்கி³னோ அரியமக்³க³ங் பா⁴வயதோ தீஹி காயது³ச்சரிதேஹி ஆரதி விரதி படிவிரதி வேரமணீ அகிரியா அகரணங், அயங் பி⁴க்க²வே ஸம்மாகம்மந்தோ அரியோ அனாஸவோ லோகுத்தரமக்³கோ³’’தி (ம॰ நி॰ 3.139). ஏவங் பன மஹாசத்தாலீஸகஸுத்தாதீ³ஸு அனேகேஸு ஸுத்தேஸு ஸம்மாகம்மந்தாதீ³னஞ்ச லோகுத்தரமக்³க³ஸ்ஸ அங்க³பா⁴வஸித்³தி⁴தோ அட்ட²ங்கி³கோவ லோகுத்தரமக்³கோ³ ஹோதீதி வேதி³தப்³போ³தி. இமஸ்மிங் ஸுத்தே அயங் அட்ட²ங்கி³கோ மக்³கோ³ லோகியலோகுத்தரமிஸ்ஸகோவ கதி²தோ. து³தியங் கோஸலஸங்யுத்தே வுத்தமேவ.
Yampi abhidhamme vuttaṃ ‘‘tasmiṃ kho pana samaye pañcaṅgiko maggo hotī’’ti (vibha. 212), taṃ ekaṃ kiccantaraṃ dassetuṃ vuttaṃ. Yasmiñhi kāle micchākammantaṃ pahāya sammākammantaṃ pūreti, tasmiṃ kāle micchāvācā vā micchājīvo vā na hoti, diṭṭhi saṅkappo vāyāmo sati samādhīti imesuyeva pañcasu kārakaṅgesu sammākammanto pūrati. Virativasena hi sammākammanto pūrati nāma. Sammāvācāsammāājīvesupi eseva nayo. Iti imaṃ kiccantaraṃ dassetuṃ evaṃ vuttaṃ. Lokiyamaggakkhaṇe ca pañceva honti, virati pana aniyatā. Tasmā ‘‘chaaṅgiko’’ti avatvā ‘‘pañcaṅgiko’’tveva vuttaṃ. ‘‘Yā ca, bhikkhave, ariyacittassa anāsavacittassa ariyamaggasamaṅgino ariyamaggaṃ bhāvayato tīhi kāyaduccaritehi ārati virati paṭivirati veramaṇī akiriyā akaraṇaṃ, ayaṃ bhikkhave sammākammanto ariyo anāsavo lokuttaramaggo’’ti (ma. ni. 3.139). Evaṃ pana mahācattālīsakasuttādīsu anekesu suttesu sammākammantādīnañca lokuttaramaggassa aṅgabhāvasiddhito aṭṭhaṅgikova lokuttaramaggo hotīti veditabboti. Imasmiṃ sutte ayaṃ aṭṭhaṅgiko maggo lokiyalokuttaramissakova kathito. Dutiyaṃ kosalasaṃyutte vuttameva.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya
1. அவிஜ்ஜாஸுத்தங் • 1. Avijjāsuttaṃ
2. உபட்³ட⁴ஸுத்தங் • 2. Upaḍḍhasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 1-2. அவிஜ்ஜாஸுத்தாதி³வண்ணனா • 1-2. Avijjāsuttādivaṇṇanā
