| Library / Tipiṭaka / д̇ибидага • Tipiṭaka / сам̣яуд̇д̇анигааяа (дийгаа) • Saṃyuttanikāya (ṭīkā) |
намо д̇асса бхаг̇авад̇о арахад̇о саммаасамб̣уд̣̇д̇хасса
Namo tassa bhagavato arahato sammāsambuddhassa
сам̣яуд̇д̇анигааяз
Saṃyuttanikāye
махааваг̇г̇адийгаа
Mahāvaggaṭīkā
1. маг̇г̇асам̣яуд̇д̇ам̣
1. Maggasaṃyuttaṃ
1. авиж̇ж̇ааваг̇г̇о
1. Avijjāvaggo
1-2. авиж̇ж̇аасуд̇д̇аад̣̇иван̣н̣анаа
1-2. Avijjāsuttādivaṇṇanā
1-2. буб̣б̣ан̇г̇амаад̇и буб̣б̣зжараа. авиж̇ж̇аа хи ан̃н̃аан̣алагкан̣аа саммуяханаагаарзна аарамман̣з бавад̇д̇ад̇ийд̇и самбаяуд̇д̇ад̇хаммаанамби д̇ад̣̇аагаараанувид̇хаанад̇ааяа бажжаяо ход̇и. д̇ат̇аа хи д̇з анижжаасубхад̣̇угкаанад̇д̇асабхаавзби д̇хаммз нижжаад̣̇ид̇о г̇ан̣ханд̇и, аяамассаа д̇зсам̣ сахаж̇аад̇авасзна буб̣б̣ан̇г̇амад̇аа. яам̣ бана мохзна абхибхууд̇о баабагирияааяа аад̣̇ийнавам̣ абассанд̇о баан̣ам̣ ханад̇и, ад̣̇иннам̣ аад̣̇ияад̇и, гаамзсу мижчаа жарад̇и, мусаа бхан̣ад̇и, ан̃н̃амби вивид̇хам̣ д̣̇уссийляам̣ аажарад̇и, аяамасса сахаж̇аад̇авасзна жа убаниссаяавасзна жа буб̣б̣ан̇г̇амад̇аа. самаабаж̇ж̇анааяаад̇и д̇аб̣бхааваабаж̇ж̇анааяа агусалаббад̇д̇ияаа. сабхаавабадилаабхааяаад̇и ад̇д̇алаабхааяа. д̇знааха ‘‘уббад̇д̇ияаа’’д̇и. саа банзсаа вуд̇д̇аагаарзна агусалаанам̣ буб̣б̣ан̇г̇амабхууд̇аа авиж̇ж̇аа уббаж̇ж̇ад̇ийд̇и самб̣анд̇хо. яад̣̇зд̇анд̇и яам̣ зд̇ам̣ баабааж̇иг̇ужчанад̇ааяа баабад̇о алаж̇ж̇анаагаарасан̣тид̇ам̣ ахиригам̣, баабаануд̇раасад̇ааяа баабад̇о абхааяанаагаарасан̣тид̇ан̃жа анод̇д̇аббам̣, зд̇ам̣ д̣̇ваяам̣ ануд̣̇зва анвааг̇ад̇амзва. ану-сад̣̇д̣̇зна жзд̇т̇а зд̇анд̇и убаяог̇аважанам̣. ануд̣̇зваад̇и зд̇асса ад̇т̇о сахзва згад̇од̇и. зд̇т̇а авиж̇ж̇ааяа вуд̇д̇анаяаанусаарзна д̇аббадибагкад̇о жа ад̇т̇о взд̣̇ид̇аб̣б̣о. аяам̣ бана висзсо – д̇ад̇т̇а яат̇аа агусалагаммабат̇авасзна бавад̇д̇ияам̣ буб̣б̣ан̇г̇амад̇аа авиж̇ж̇ааяа, звам̣ гусалагаммабат̇авасзна бун̃н̃агирияавад̇т̇увасзна жа бавад̇д̇ияам̣ виж̇ж̇ааяа буб̣б̣ан̇г̇амад̇аа вад̇д̇аб̣б̣аа. виймам̣саад̇хибад̇ивасзна бавад̇д̇ияам̣ аад̇хибажжаагааравасзна жа буб̣б̣ан̇г̇амад̇аа взд̣̇ид̇аб̣б̣аа. д̣̇вийхзваад̇и жа авад̇хааран̣ам̣ аад̇хибажжаагаарасса сахаж̇аад̇знзва сан̇г̇ахзд̇аб̣б̣ад̇о.
1-2.Pubbaṅgamāti pubbecarā. Avijjā hi aññāṇalakkhaṇā sammuyhanākārena ārammaṇe pavattatīti sampayuttadhammānampi tadākārānuvidhānatāya paccayo hoti. Tathā hi te aniccāsubhadukkhānattasabhāvepi dhamme niccādito gaṇhanti, ayamassā tesaṃ sahajātavasena pubbaṅgamatā. Yaṃ pana mohena abhibhūto pāpakiriyāya ādīnavaṃ apassanto pāṇaṃ hanati, adinnaṃ ādiyati, kāmesu micchā carati, musā bhaṇati, aññampi vividhaṃ dussīlyaṃ ācarati, ayamassa sahajātavasena ca upanissayavasena ca pubbaṅgamatā. Samāpajjanāyāti tabbhāvāpajjanāya akusalappattiyā. Sabhāvapaṭilābhāyāti attalābhāya. Tenāha ‘‘uppattiyā’’ti. Sā panesā vuttākārena akusalānaṃ pubbaṅgamabhūtā avijjā uppajjatīti sambandho. Yadetanti yaṃ etaṃ pāpājigucchanatāya pāpato alajjanākārasaṇṭhitaṃ ahirikaṃ, pāpānutrāsatāya pāpato abhāyanākārasaṇṭhitañca anottappaṃ, etaṃ dvayaṃ anudeva anvāgatameva. Anu-saddena cettha etanti upayogavacanaṃ. Anudevāti etassa attho saheva ekatoti. Ettha avijjāya vuttanayānusārena tappaṭipakkhato ca attho veditabbo. Ayaṃ pana viseso – tattha yathā akusalakammapathavasena pavattiyaṃ pubbaṅgamatā avijjāya, evaṃ kusalakammapathavasena puññakiriyavatthuvasena ca pavattiyaṃ vijjāya pubbaṅgamatā vattabbā. Vīmaṃsādhipativasena pavattiyaṃ ādhipaccākāravasena ca pubbaṅgamatā veditabbā. Dvīhevāti ca avadhāraṇaṃ ādhipaccākārassa sahajāteneva saṅgahetabbato.
лаж̇ж̇анаагаарасан̣тид̇аад̇и баабад̇о ж̇иг̇ужчанаагаарасан̣тид̇аа. бхааяанаагаарасан̣тид̇анд̇и уд̇д̇асанаагаарасан̣тид̇ам̣. зд̇т̇аад̇и хириод̇д̇аббз. вид̣̇ад̇и, винд̣̇ад̇ийд̇и ваа виж̇ж̇аа. вид̣̇д̣̇асууд̇и жа саббан̃н̃абарияааяод̇и ааха ‘‘вид̣̇д̣̇асунод̇и вид̣̇уно’’д̇и. яаат̇аавад̣̇идтийд̇и авибарийд̇аа д̣̇идти, сам̣гилзсад̇о нияяаанигад̣̇идти. саммаад̣̇идти баход̇ийд̇и зд̇т̇а саа виж̇ж̇аа саммаад̣̇идти взд̣̇ид̇аб̣б̣аа. на згад̇о саб̣б̣аани лаб̣бханд̇и саммааваажаагамманд̇ааж̇ийваанам̣ буб̣б̣аабхисан̇каарасса анзгаруубад̇д̇аа. логуд̇д̇арамаг̇г̇агкан̣з згад̇о лаб̣бханд̇и гижжад̇о бхиннаанамби д̇аасам̣ д̇ад̇т̇а саруубад̇о абхиннад̇д̇аа. згаа зва хи вирад̇и маг̇г̇агкан̣з д̇иссаннамби вирад̇ийнам̣ гижжам̣ саад̇хзнд̇ий бавад̇д̇ад̇и, яат̇аа згаа зва саммаад̣̇идти бариж̇аананаад̣̇ивасзна жад̇уб̣б̣ид̇хагижжам̣ саад̇хзнд̇ий бавад̇д̇ад̇и. д̇аани жа ко саб̣б̣аани адтаби батамаж̇жхаанигз маг̇г̇з лаб̣бханд̇ийд̇и яож̇анаа. батамаж̇жхаанигзд̇и батамажхаанаванд̇з.
Lajjanākārasaṇṭhitāti pāpato jigucchanākārasaṇṭhitā. Bhāyanākārasaṇṭhitanti uttasanākārasaṇṭhitaṃ. Etthāti hiriottappe. Vidati, vindatīti vā vijjā. Viddasūti ca sappaññapariyāyoti āha ‘‘viddasunoti viduno’’ti. Yāthāvadiṭṭhīti aviparītā diṭṭhi, saṃkilesato niyyānikadiṭṭhi. Sammādiṭṭhi pahotīti ettha sā vijjā sammādiṭṭhi veditabbā. Na ekato sabbāni labbhanti sammāvācākammantājīvānaṃ pubbābhisaṅkhārassa anekarūpattā. Lokuttaramaggakkhaṇe ekato labbhanti kiccato bhinnānampi tāsaṃ tattha sarūpato abhinnattā. Ekā eva hi virati maggakkhaṇe tissannampi viratīnaṃ kiccaṃ sādhentī pavattati, yathā ekā eva sammādiṭṭhi parijānanādivasena catubbidhakiccaṃ sādhentī pavattati. Tāni ca kho sabbāni aṭṭhapi paṭhamajjhānike magge labbhantīti yojanā. Paṭhamajjhāniketi paṭhamajhānavante.
д̇ат̇аабхууд̇ассаад̇и арияамаг̇г̇асаман̇г̇ино. яасмаа махаасал̣ааяад̇анасуд̇д̇з вуд̇д̇ам̣ ‘‘саммаад̣̇идтиаад̣̇ийнам̣ бан̃жаннам̣ зва ан̇г̇аанам̣ васзнаа’’д̇и, д̇асмаа бан̃жан̇г̇иго логуд̇д̇арамаг̇г̇о ход̇и. ‘‘буб̣б̣зва ко банаа’’д̇и хи важанам̣ д̇ад̣̇аа маг̇г̇агкан̣з вирад̇ийнам̣ абхаавам̣ н̃аабзд̇и, д̇асмаа гаамааважаражид̇д̇зсу вияа логуд̇д̇аражид̇д̇зсу вирад̇и анияад̇аад̇и ад̇хиббааяо. барисуд̣̇д̇хабхаавад̣̇ассананд̇и барисуд̣̇д̇хасийлабхаавад̣̇ассанад̇т̇ам̣. аяамад̇т̇о д̣̇ийбид̇о, на арияамаг̇г̇з вирад̇ийнам̣ абхааво.
Tathābhūtassāti ariyamaggasamaṅgino. Yasmā mahāsaḷāyatanasutte vuttaṃ ‘‘sammādiṭṭhiādīnaṃ pañcannaṃ eva aṅgānaṃ vasenā’’ti, tasmā pañcaṅgiko lokuttaramaggo hoti. ‘‘Pubbeva kho panā’’ti hi vacanaṃ tadā maggakkhaṇe viratīnaṃ abhāvaṃ ñāpeti, tasmā kāmāvacaracittesu viya lokuttaracittesu virati aniyatāti adhippāyo. Parisuddhabhāvadassananti parisuddhasīlabhāvadassanatthaṃ. Ayamattho dīpito, na ariyamagge viratīnaṃ abhāvo.
яад̣̇и звам̣ гасмаа абхид̇хаммз маг̇г̇авибхан̇г̇з бан̃жан̇г̇игавааро ааг̇ад̇од̇и ааха ‘‘яамби абхид̇хаммз’’д̇иаад̣̇и. д̇анд̇и ‘‘бан̃жан̇г̇иго маг̇г̇о ход̇ий’’д̇и важанам̣. ‘‘згам̣ гижжанд̇арам̣ д̣̇ассзд̇ум̣ вуд̇д̇а’’нд̇и вад̇ваа д̇ам̣ д̣̇ассзд̇ум̣ ‘‘яасмин̃хи гаалз’’д̇иаад̣̇и вуд̇д̇ам̣. яасмин̃хи гаалзд̇и логияагаалз . д̇зна ‘‘згам̣ гижжанд̇ара’’нд̇и вуд̇д̇ам̣ адтан̇г̇игагижжам̣ д̣̇ассзд̇и. вирад̇иуббаад̣̇анзна мижчааваажаад̣̇ийни буг̇г̇алзна маг̇г̇асамаяз баж̇ахаабзнд̇ийд̇и саммаад̣̇идтиаад̣̇ийни ‘‘бан̃жа гаараган̇г̇ааний’’д̇и вуд̇д̇аани. саммааваажаад̣̇игирияаа хи вирад̇и, д̇ан̃жа зд̇аани гаараабзнд̇ийд̇и. вирад̇ивасзнаад̇и вираман̣агирияаавасзна гаараабагабхаавзна, гад̇д̇убхаавзна ваад̇и ад̇т̇о. ‘‘вирад̇ид̇д̇аяавасзнаа’’д̇и ваа баато.
Yadi evaṃ kasmā abhidhamme maggavibhaṅge pañcaṅgikavāro āgatoti āha ‘‘yampi abhidhamme’’tiādi. Tanti ‘‘pañcaṅgiko maggo hotī’’ti vacanaṃ. ‘‘Ekaṃkiccantaraṃ dassetuṃ vutta’’nti vatvā taṃ dassetuṃ ‘‘yasmiñhi kāle’’tiādi vuttaṃ. Yasmiñhi kāleti lokiyakāle . Tena ‘‘ekaṃ kiccantara’’nti vuttaṃ aṭṭhaṅgikakiccaṃ dasseti. Viratiuppādanena micchāvācādīni puggalena maggasamaye pajahāpentīti sammādiṭṭhiādīni ‘‘pañca kārakaṅgānī’’ti vuttāni. Sammāvācādikiriyā hi virati, tañca etāni kārāpentīti. Virativasenāti viramaṇakiriyāvasena kārāpakabhāvena, kattubhāvena vāti attho. ‘‘Viratittayavasenā’’ti vā pāṭho.
саммаагамманд̇о буурад̇ийд̇и имзхи саммаад̣̇идтиаад̣̇ийхи саммаагамманд̇агижжам̣ буурад̇и наама д̇зхи вийрияаад̣̇игзхи д̇ад̣̇ад̇т̇асид̣̇д̇хид̇о. д̇амби санд̇хааяа ‘‘згам̣ гижжанд̇арам̣ д̣̇ассзд̇у’’нд̇и вуд̇д̇ам̣. имам̣ гижжанд̇арам̣ д̣̇ассзд̇унд̇и логуд̇д̇арамаг̇г̇агкан̣зби имаанзва бан̃жа саммааваажаад̣̇ивирад̇ид̇д̇аяасса згагкан̣з гаараабаган̇г̇аанийд̇и д̣̇ассзд̇ум̣. звам̣ вуд̇д̇анд̇и ‘‘д̇асмим̣ самаяз бан̃жан̇г̇иго маг̇г̇о ход̇ий’’д̇и (вибха. 494) звам̣ вуд̇д̇ам̣. логияамаг̇г̇агкан̣з бан̃жзва хонд̇и, вирад̇и бана анияад̇аа, д̇асмаа ‘‘чаан̇г̇иго’’д̇и авад̇ваа ‘‘бан̃жан̇г̇иго’’ижжзва вуд̇д̇ам̣. д̇аяид̣̇ам̣ абхид̇хаммз бан̃жан̇г̇игаваарад̣̇зсанааяа гааран̣агид̇д̇анамаг̇г̇о, арияамаг̇г̇о бана адтан̇г̇иговаад̇и д̣̇ассзд̇ум̣, ‘‘яаа жа, бхигкавз’’д̇иаад̣̇имааха, д̇ам̣ сувин̃н̃зяяамзва. мижчаад̣̇идтиаад̣̇игаа д̣̇аса, д̇аббажжаяаа агусалаа жа д̣̇асаад̇и вийсад̇и агусалабагкияаа, саммаад̣̇идтиаад̣̇игаа д̣̇аса, д̇аббажжаяаа гусалаа жа д̣̇асаад̇и вийсад̇и гусалабагкияаа махаажад̇д̇аарийсагасуд̇д̇з вуд̇д̇аа. махаажад̇д̇аарийсаганд̇и д̇ассзд̇ам̣ наамам̣. миссагова гат̇ид̇о логуд̇д̇арассаби ид̇ха лаб̣бхамаанад̇д̇аа.
Sammākammanto pūratīti imehi sammādiṭṭhiādīhi sammākammantakiccaṃ pūrati nāma tehi vīriyādikehi tadatthasiddhito. Tampi sandhāya ‘‘ekaṃ kiccantaraṃ dassetu’’nti vuttaṃ. Imaṃ kiccantaraṃ dassetunti lokuttaramaggakkhaṇepi imāneva pañca sammāvācādiviratittayassa ekakkhaṇe kārāpakaṅgānīti dassetuṃ. Evaṃ vuttanti ‘‘tasmiṃ samaye pañcaṅgiko maggo hotī’’ti (vibha. 494) evaṃ vuttaṃ. Lokiyamaggakkhaṇe pañceva honti, virati pana aniyatā, tasmā ‘‘chaaṅgiko’’ti avatvā ‘‘pañcaṅgiko’’icceva vuttaṃ. Tayidaṃ abhidhamme pañcaṅgikavāradesanāya kāraṇakittanamaggo, ariyamaggo pana aṭṭhaṅgikovāti dassetuṃ, ‘‘yā ca, bhikkhave’’tiādimāha, taṃ suviññeyyameva. Micchādiṭṭhiādikā dasa, tappaccayā akusalā ca dasāti vīsati akusalapakkhiyā, sammādiṭṭhiādikā dasa, tappaccayā kusalā ca dasāti vīsati kusalapakkhiyā mahācattārīsakasutte vuttā. Mahācattārīsakanti tassetaṃ nāmaṃ. Missakova kathito lokuttarassapi idha labbhamānattā.
яасмаа госаласам̣яуд̇д̇зби ид̇ха жа т̇зрзна ‘‘убад̣дхамид̣̇ам̣, бханд̇з, б̣рахмажарияассаа’’д̇иаад̣̇инаа вуд̇д̇ам̣ ‘‘маа хзвам̣ аананд̣̇аа’’д̇иаад̣̇инаа бадигкибид̇ваа ‘‘сагаламзвид̣̇ам̣ аананд̣̇аа’’д̇иаад̣̇инаа бхаг̇авад̇аа д̣̇зсид̇ам̣ суд̇д̇ам̣ ааг̇ад̇ам̣. д̇ассад̇т̇о госаласам̣яуд̇д̇аван̣н̣анааяам̣ вуд̇д̇о, д̇асмаа вуд̇д̇ам̣ ‘‘госаласам̣яуд̇д̇з вуд̇д̇ад̇т̇амзваа’’д̇и.
Yasmā kosalasaṃyuttepi idha ca therena ‘‘upaḍḍhamidaṃ, bhante, brahmacariyassā’’tiādinā vuttaṃ ‘‘mā hevaṃ ānandā’’tiādinā paṭikkhipitvā ‘‘sakalamevidaṃ ānandā’’tiādinā bhagavatā desitaṃ suttaṃ āgataṃ. Tassattho kosalasaṃyuttavaṇṇanāyaṃ vutto, tasmā vuttaṃ ‘‘kosalasaṃyutte vuttatthamevā’’ti.
авиж̇ж̇аасуд̇д̇аад̣̇иван̣н̣анаа нидтид̇аа.
Avijjāsuttādivaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / сам̣яуд̇д̇анигааяа • Saṃyuttanikāya
1. авиж̇ж̇аасуд̇д̇ам̣ • 1. Avijjāsuttaṃ
2. убад̣дхасуд̇д̇ам̣ • 2. Upaḍḍhasuttaṃ
адтагат̇аа • Aṭṭhakathā / суд̇д̇абидага (адтагат̇аа) • Suttapiṭaka (aṭṭhakathā) / сам̣яуд̇д̇анигааяа (адтагат̇аа) • Saṃyuttanikāya (aṭṭhakathā) / 1-2. авиж̇ж̇аасуд̇д̇аад̣̇иван̣н̣анаа • 1-2. Avijjāsuttādivaṇṇanā
