༡. ཨཝིཛྫཱསུཏྟཾ

1. Avijjāsuttaṃ

༦༡. ‘‘པུརིམཱ , བྷིཀྑཝེ, ཀོཊི ན པཉྙཱཡཏི ཨཝིཛྫཱཡ – ‘ཨིཏོ པུབྦེ ཨཝིཛྫཱ ནཱཧོསི, ཨཐ པཙྪཱ སམབྷཝཱི’ཏི། ཨེཝཉྩེཏཾ, བྷིཀྑཝེ, ཝུཙྩཏི, ཨཐ ཙ པན པཉྙཱཡཏི – ‘ཨིདཔྤཙྩཡཱ ཨཝིཛྫཱ’ཏི།

61. ‘‘Purimā , bhikkhave, koṭi na paññāyati avijjāya – ‘ito pubbe avijjā nāhosi, atha pacchā samabhavī’ti. Evañcetaṃ, bhikkhave, vuccati, atha ca pana paññāyati – ‘idappaccayā avijjā’ti.

‘‘ཨཝིཛྫམྤཱཧཾ ¹, བྷིཀྑཝེ, སཱཧཱརཾ ཝདཱམི, ནོ ཨནཱཧཱརཾ། ཀོ ཙཱཧཱརོ ཨཝིཛྫཱཡ? ‘པཉྩ ནཱིཝརཎཱ’ཏིསྶ ཝཙནཱིཡཾ། པཉྩཔཱཧཾ, བྷིཀྑཝེ, ནཱིཝརཎེ སཱཧཱརེ ཝདཱམི , ནོ ཨནཱཧཱརེ། ཀོ ཙཱཧཱརོ པཉྩནྣཾ ནཱིཝརཎཱནཾ? ‘ཏཱིཎི དུཙྩརིཏཱནཱི’ཏིསྶ ཝཙནཱིཡཾ། ཏཱིཎིཔཱཧཾ, བྷིཀྑཝེ, དུཙྩརིཏཱནི སཱཧཱརཱནི ཝདཱམི, ནོ ཨནཱཧཱརཱནི། ཀོ ཙཱཧཱརོ ཏིཎྞཾ དུཙྩརིཏཱནཾ? ‘ཨིནྡྲིཡཨསཾཝརོ’ཏིསྶ ཝཙནཱིཡཾ། ཨིནྡྲིཡཨསཾཝརམྤཱཧཾ, བྷིཀྑཝེ, སཱཧཱརཾ ཝདཱམི, ནོ ཨནཱཧཱརཾ། ཀོ ཙཱཧཱརོ ཨིནྡྲིཡཨསཾཝརསྶ? ‘ཨསཏཱསམྤཛཉྙ’ནྟིསྶ ཝཙནཱིཡཾ། ཨསཏཱསམྤཛཉྙམྤཱཧཾ, བྷིཀྑཝེ, སཱཧཱརཾ ཝདཱམི, ནོ ཨནཱཧཱརཾ། ཀོ ཙཱཧཱརོ ཨསཏཱསམྤཛཉྙསྶ? ‘ཨཡོནིསོམནསིཀཱརོ’ཏིསྶ ཝཙནཱིཡཾ། ཨཡོནིསོམནསིཀཱརམྤཱཧཾ, བྷིཀྑཝེ, སཱཧཱརཾ ཝདཱམི, ནོ ཨནཱཧཱརཾ། ཀོ ཙཱཧཱརོ ཨཡོནིསོམནསིཀཱརསྶ? ‘ཨསྶདྡྷིཡ’ནྟིསྶ ཝཙནཱིཡཾ། ཨསྶདྡྷིཡམྤཱཧཾ, བྷིཀྑཝེ, སཱཧཱརཾ ཝདཱམི, ནོ ཨནཱཧཱརཾ། ཀོ ཙཱཧཱརོ ཨསྶདྡྷིཡསྶ? ‘ཨསདྡྷམྨསྶཝན’ནྟིསྶ ཝཙནཱིཡཾ། ཨསདྡྷམྨསྶཝནམྤཱཧཾ, བྷིཀྑཝེ, སཱཧཱརཾ ཝདཱམི, ནོ ཨནཱཧཱརཾ། ཀོ ཙཱཧཱརོ ཨསདྡྷམྨསྶཝནསྶ? ‘ཨསཔྤུརིསསཾསེཝོ’ཏིསྶ ཝཙནཱིཡཾ།

‘‘Avijjampāhaṃ ², bhikkhave, sāhāraṃ vadāmi, no anāhāraṃ. Ko cāhāro avijjāya? ‘Pañca nīvaraṇā’tissa vacanīyaṃ. Pañcapāhaṃ, bhikkhave, nīvaraṇe sāhāre vadāmi , no anāhāre. Ko cāhāro pañcannaṃ nīvaraṇānaṃ? ‘Tīṇi duccaritānī’tissa vacanīyaṃ. Tīṇipāhaṃ, bhikkhave, duccaritāni sāhārāni vadāmi, no anāhārāni. Ko cāhāro tiṇṇaṃ duccaritānaṃ? ‘Indriyaasaṃvaro’tissa vacanīyaṃ. Indriyaasaṃvarampāhaṃ, bhikkhave, sāhāraṃ vadāmi, no anāhāraṃ. Ko cāhāro indriyaasaṃvarassa? ‘Asatāsampajañña’ntissa vacanīyaṃ. Asatāsampajaññampāhaṃ, bhikkhave, sāhāraṃ vadāmi, no anāhāraṃ. Ko cāhāro asatāsampajaññassa? ‘Ayonisomanasikāro’tissa vacanīyaṃ. Ayonisomanasikārampāhaṃ, bhikkhave, sāhāraṃ vadāmi, no anāhāraṃ. Ko cāhāro ayonisomanasikārassa? ‘Assaddhiya’ntissa vacanīyaṃ. Assaddhiyampāhaṃ, bhikkhave, sāhāraṃ vadāmi, no anāhāraṃ. Ko cāhāro assaddhiyassa? ‘Asaddhammassavana’ntissa vacanīyaṃ. Asaddhammassavanampāhaṃ, bhikkhave, sāhāraṃ vadāmi, no anāhāraṃ. Ko cāhāro asaddhammassavanassa? ‘Asappurisasaṃsevo’tissa vacanīyaṃ.

‘‘ཨིཏི ཁོ, བྷིཀྑཝེ, ཨསཔྤུརིསསཾསེཝོ པརིཔཱུརོ ཨསདྡྷམྨསྶཝནཾ པརིཔཱུརེཏི, ཨསདྡྷམྨསྶཝནཾ པརིཔཱུརཾ ཨསྶདྡྷིཡཾ པརིཔཱུརེཏི, ཨསྶདྡྷིཡཾ པརིཔཱུརཾ ཨཡོནིསོམནསིཀཱརཾ པརིཔཱུརེཏི, ཨཡོནིསོམནསིཀཱརོ པརིཔཱུརོ ཨསཏཱསམྤཛཉྙཾ པརིཔཱུརེཏི, ཨསཏཱསམྤཛཉྙཾ པརིཔཱུརཾ ཨིནྡྲིཡཨསཾཝརཾ པརིཔཱུརེཏི, ཨིནྡྲིཡཨསཾཝརོ པརིཔཱུརོ ཏཱིཎི དུཙྩརིཏཱནི པརིཔཱུརེཏི, ཏཱིཎི དུཙྩརིཏཱནི པརིཔཱུརཱནི པཉྩ ནཱིཝརཎེ པརིཔཱུརེནྟི, པཉྩ ནཱིཝརཎཱ པརིཔཱུརཱ ཨཝིཛྫཾ པརིཔཱུརེནྟི། ཨེཝམེཏིསྶཱ ཨཝིཛྫཱཡ ཨཱཧཱརོ ཧོཏི, ཨེཝཉྩ པཱརིཔཱུརི།

‘‘Iti kho, bhikkhave, asappurisasaṃsevo paripūro asaddhammassavanaṃ paripūreti, asaddhammassavanaṃ paripūraṃ assaddhiyaṃ paripūreti, assaddhiyaṃ paripūraṃ ayonisomanasikāraṃ paripūreti, ayonisomanasikāro paripūro asatāsampajaññaṃ paripūreti, asatāsampajaññaṃ paripūraṃ indriyaasaṃvaraṃ paripūreti, indriyaasaṃvaro paripūro tīṇi duccaritāni paripūreti, tīṇi duccaritāni paripūrāni pañca nīvaraṇe paripūrenti, pañca nīvaraṇā paripūrā avijjaṃ paripūrenti. Evametissā avijjāya āhāro hoti, evañca pāripūri.

‘‘སེཡྻཐཱཔི , བྷིཀྑཝེ, ཨུཔརིཔབྦཏེ ཐུལླཕུསིཏཀེ དེཝེ ཝསྶནྟེ ( ) ³ ཏཾ ཨུདཀཾ ཡཐཱནིནྣཾ པཝཏྟམཱནཾ པབྦཏཀནྡརཔདརསཱཁཱ པརིཔཱུརེཏི, པབྦཏཀནྡརཔདརསཱཁཱ པརིཔཱུརཱ ཀུསོབྦྷེ ⁴ པརིཔཱུརེནྟི། ཀུསོབྦྷཱ པརིཔཱུརཱ མཧཱསོབྦྷེ ⁵ པརིཔཱུརེནྟི, མཧཱསོབྦྷཱ པརིཔཱུརཱ ཀུནྣདིཡོ པརིཔཱུརེནྟི, ཀུནྣདིཡོ པརིཔཱུརཱ མཧཱནདིཡོ པརིཔཱུརེནྟི, མཧཱནདིཡོ པརིཔཱུརཱ མཧཱསམུདྡཾ སཱགརཾ པརིཔཱུརེནྟི; ཨེཝམེཏསྶ མཧཱསམུདྡསྶ སཱགརསྶ ཨཱཧཱརོ ཧོཏི, ཨེཝཉྩ པཱརིཔཱུརི།

‘‘Seyyathāpi , bhikkhave, uparipabbate thullaphusitake deve vassante ( ) ⁶ taṃ udakaṃ yathāninnaṃ pavattamānaṃ pabbatakandarapadarasākhā paripūreti, pabbatakandarapadarasākhā paripūrā kusobbhe ⁷ paripūrenti. Kusobbhā paripūrā mahāsobbhe ⁸ paripūrenti, mahāsobbhā paripūrā kunnadiyo paripūrenti, kunnadiyo paripūrā mahānadiyo paripūrenti, mahānadiyo paripūrā mahāsamuddaṃ sāgaraṃ paripūrenti; evametassa mahāsamuddassa sāgarassa āhāro hoti, evañca pāripūri.

‘‘ཨེཝམེཝཾ ཁོ, བྷིཀྑཝེ, ཨསཔྤུརིསསཾསེཝོ པརིཔཱུརོ ཨསདྡྷམྨསྶཝནཾ པརིཔཱུརེཏི, ཨསདྡྷམྨསྶཝནཾ པརིཔཱུརཾ ཨསྶདྡྷིཡཾ པརིཔཱུརེཏི, ཨསྶདྡྷིཡཾ པརིཔཱུརཾ ཨཡོནིསོམནསིཀཱརཾ པརིཔཱུརེཏི, ཨཡོནིསོམནསིཀཱརོ པརིཔཱུརོ ཨསཏཱསམྤཛཉྙཾ པརིཔཱུརེཏི, ཨསཏཱསམྤཛཉྙཾ པརིཔཱུརཾ ཨིནྡྲིཡཨསཾཝརཾ པརིཔཱུརེཏི, ཨིནྡྲིཡཨསཾཝརོ པརིཔཱུརོ ཏཱིཎི དུཙྩརིཏཱནི པརིཔཱུརེཏི, ཏཱིཎི དུཙྩརིཏཱནི པརིཔཱུརཱནི པཉྩ ནཱིཝརཎེ པརིཔཱུརེནྟི, པཉྩ ནཱིཝརཎཱ པརིཔཱུརཱ ཨཝིཛྫཾ པརིཔཱུརེནྟི; ཨེཝམེཏིསྶཱ ཨཝིཛྫཱཡ ཨཱཧཱརོ ཧོཏི, ཨེཝཉྩ པཱརིཔཱུརི།

‘‘Evamevaṃ kho, bhikkhave, asappurisasaṃsevo paripūro asaddhammassavanaṃ paripūreti, asaddhammassavanaṃ paripūraṃ assaddhiyaṃ paripūreti, assaddhiyaṃ paripūraṃ ayonisomanasikāraṃ paripūreti, ayonisomanasikāro paripūro asatāsampajaññaṃ paripūreti, asatāsampajaññaṃ paripūraṃ indriyaasaṃvaraṃ paripūreti, indriyaasaṃvaro paripūro tīṇi duccaritāni paripūreti, tīṇi duccaritāni paripūrāni pañca nīvaraṇe paripūrenti, pañca nīvaraṇā paripūrā avijjaṃ paripūrenti; evametissā avijjāya āhāro hoti, evañca pāripūri.

‘‘ཝིཛྫཱཝིམུཏྟིམྤཱཧཾ, བྷིཀྑཝེ, སཱཧཱརཾ ཝདཱམི, ནོ ཨནཱཧཱརཾ། ཀོ ཙཱཧཱརོ ཝིཛྫཱཝིམུཏྟིཡཱ? ‘སཏྟ བོཛ྄ཛྷངྒཱ’ཏིསྶ ཝཙནཱིཡཾ། སཏྟཔཱཧཾ, བྷིཀྑཝེ, བོཛ྄ཛྷངྒེ སཱཧཱརེ ཝདཱམི, ནོ ཨནཱཧཱརེ། ཀོ ཙཱཧཱརོ སཏྟནྣཾ བོཛ྄ཛྷངྒཱནཾ? ‘ཙཏྟཱརོ སཏིཔཊྛཱནཱ’ཏིསྶ ཝཙནཱིཡཾ། ཙཏྟཱརོཔཱཧཾ, བྷིཀྑཝེ, སཏིཔཊྛཱནེ སཱཧཱརེ ཝདཱམི, ནོ ཨནཱཧཱརེ། ཀོ ཙཱཧཱརོ ཙཏུནྣཾ སཏིཔཊྛཱནཱནཾ? ‘ཏཱིཎི སུཙརིཏཱནཱི’ཏིསྶ ཝཙནཱིཡཾ། ཏཱིཎིཔཱཧཾ, བྷིཀྑཝེ, སུཙརིཏཱནི སཱཧཱརཱནི ཝདཱམི, ནོ ཨནཱཧཱརཱནི། ཀོ ཙཱཧཱརོ ཏིཎྞཾ སུཙརིཏཱནཾ? ‘ཨིནྡྲིཡསཾཝརོ’ཏིསྶ ཝཙནཱིཡཾ། ཨིནྡྲིཡསཾཝརམྤཱཧཾ, བྷིཀྑཝེ, སཱཧཱརཾ ཝདཱམི, ནོ ཨནཱཧཱརཾ། ཀོ ཙཱཧཱརོ ཨིནྡྲིཡསཾཝརསྶ? ‘སཏིསམྤཛཉྙ’ནྟིསྶ ཝཙནཱིཡཾ། སཏིསམྤཛཉྙམྤཱཧཾ, བྷིཀྑཝེ, སཱཧཱརཾ ཝདཱམི, ནོ ཨནཱཧཱརཾ། ཀོ ཙཱཧཱརོ སཏིསམྤཛཉྙསྶ? ‘ཡོནིསོམནསིཀཱརོ’ཏིསྶ ཝཙནཱིཡཾ། ཡོནིསོམནསིཀཱརམྤཱཧཾ, བྷིཀྑཝེ, སཱཧཱརཾ ཝདཱམི, ནོ ཨནཱཧཱརཾ། ཀོ ཙཱཧཱརོ ཡོནིསོམནསིཀཱརསྶ? ‘སདྡྷཱ’ཏིསྶ ཝཙནཱིཡཾ། སདྡྷམྤཱཧཾ, བྷིཀྑཝེ, སཱཧཱརཾ ཝདཱམི, ནོ ཨནཱཧཱརཾ། ཀོ ཙཱཧཱརོ སདྡྷཱཡ ? ‘སདྡྷམྨསྶཝན’ནྟིསྶ ཝཙནཱིཡཾ། སདྡྷམྨསྶཝནམྤཱཧཾ, བྷིཀྑཝེ , སཱཧཱརཾ ཝདཱམི, ནོ ཨནཱཧཱརཾ། ཀོ ཙཱཧཱརོ སདྡྷམྨསྶཝནསྶ? ‘སཔྤུརིསསཾསེཝོ’ཏིསྶ ཝཙནཱིཡཾ།

‘‘Vijjāvimuttimpāhaṃ, bhikkhave, sāhāraṃ vadāmi, no anāhāraṃ. Ko cāhāro vijjāvimuttiyā? ‘Satta bojjhaṅgā’tissa vacanīyaṃ. Sattapāhaṃ, bhikkhave, bojjhaṅge sāhāre vadāmi, no anāhāre. Ko cāhāro sattannaṃ bojjhaṅgānaṃ? ‘Cattāro satipaṭṭhānā’tissa vacanīyaṃ. Cattāropāhaṃ, bhikkhave, satipaṭṭhāne sāhāre vadāmi, no anāhāre. Ko cāhāro catunnaṃ satipaṭṭhānānaṃ? ‘Tīṇi sucaritānī’tissa vacanīyaṃ. Tīṇipāhaṃ, bhikkhave, sucaritāni sāhārāni vadāmi, no anāhārāni. Ko cāhāro tiṇṇaṃ sucaritānaṃ? ‘Indriyasaṃvaro’tissa vacanīyaṃ. Indriyasaṃvarampāhaṃ, bhikkhave, sāhāraṃ vadāmi, no anāhāraṃ. Ko cāhāro indriyasaṃvarassa? ‘Satisampajañña’ntissa vacanīyaṃ. Satisampajaññampāhaṃ, bhikkhave, sāhāraṃ vadāmi, no anāhāraṃ. Ko cāhāro satisampajaññassa? ‘Yonisomanasikāro’tissa vacanīyaṃ. Yonisomanasikārampāhaṃ, bhikkhave, sāhāraṃ vadāmi, no anāhāraṃ. Ko cāhāro yonisomanasikārassa? ‘Saddhā’tissa vacanīyaṃ. Saddhampāhaṃ, bhikkhave, sāhāraṃ vadāmi, no anāhāraṃ. Ko cāhāro saddhāya ? ‘Saddhammassavana’ntissa vacanīyaṃ. Saddhammassavanampāhaṃ, bhikkhave , sāhāraṃ vadāmi, no anāhāraṃ. Ko cāhāro saddhammassavanassa? ‘Sappurisasaṃsevo’tissa vacanīyaṃ.

‘‘ཨིཏི ཁོ, བྷིཀྑཝེ, སཔྤུརིསསཾསེཝོ པརིཔཱུརོ སདྡྷམྨསྶཝནཾ པརིཔཱུརེཏི, སདྡྷམྨསྶཝནཾ པརིཔཱུརཾ སདྡྷཾ པརིཔཱུརེཏི, སདྡྷཱ པརིཔཱུརཱ ཡོནིསོམནསིཀཱརཾ པརིཔཱུརེཏི, ཡོནིསོམནསིཀཱརོ པརིཔཱུརོ སཏིསམྤཛཉྙཾ པརིཔཱུརེཏི, སཏིསམྤཛཉྙཾ པརིཔཱུརཾ ཨིནྡྲིཡསཾཝརཾ པརིཔཱུརེཏི, ཨིནྡྲིཡསཾཝརོ པརིཔཱུརོ ཏཱིཎི སུཙརིཏཱནི པརིཔཱུརེཏི, ཏཱིཎི སུཙརིཏཱནི པརིཔཱུརཱནི ཙཏྟཱརོ སཏིཔཊྛཱནེ པརིཔཱུརེནྟི, ཙཏྟཱརོ སཏིཔཊྛཱནཱ པརིཔཱུརཱ སཏྟ བོཛ྄ཛྷངྒེ པརིཔཱུརེནྟི, སཏྟ བོཛ྄ཛྷངྒཱ པརིཔཱུརཱ ཝིཛྫཱཝིམུཏྟིཾ པརིཔཱུརེནྟི; ཨེཝམེཏིསྶཱ ཝིཛྫཱཝིམུཏྟིཡཱ ཨཱཧཱརོ ཧོཏི, ཨེཝཉྩ པཱརིཔཱུརི།

‘‘Iti kho, bhikkhave, sappurisasaṃsevo paripūro saddhammassavanaṃ paripūreti, saddhammassavanaṃ paripūraṃ saddhaṃ paripūreti, saddhā paripūrā yonisomanasikāraṃ paripūreti, yonisomanasikāro paripūro satisampajaññaṃ paripūreti, satisampajaññaṃ paripūraṃ indriyasaṃvaraṃ paripūreti, indriyasaṃvaro paripūro tīṇi sucaritāni paripūreti, tīṇi sucaritāni paripūrāni cattāro satipaṭṭhāne paripūrenti, cattāro satipaṭṭhānā paripūrā satta bojjhaṅge paripūrenti, satta bojjhaṅgā paripūrā vijjāvimuttiṃ paripūrenti; evametissā vijjāvimuttiyā āhāro hoti, evañca pāripūri.

‘‘སེཡྻཐཱཔི, བྷིཀྑཝེ, ཨུཔརིཔབྦཏེ ཐུལླཕུསིཏཀེ དེཝེ ཝསྶནྟེ ཏཾ ཨུདཀཾ ཡཐཱནིནྣཾ པཝཏྟམཱནཾ པབྦཏཀནྡརཔདརསཱཁཱ པརིཔཱུརེཏི, པབྦཏཀནྡརཔདརསཱཁཱ པརིཔཱུརཱ ཀུསོབྦྷེ པརིཔཱུརེནྟི, ཀུསོབྦྷཱ པརིཔཱུརཱ མཧཱསོབྦྷེ པརིཔཱུརེནྟི, མཧཱསོབྦྷཱ པརིཔཱུརཱ ཀུནྣདིཡོ པརིཔཱུརེནྟི, ཀུནྣདིཡོ པརིཔཱུརཱ མཧཱནདིཡོ པརིཔཱུརེནྟི, མཧཱནདིཡོ པརིཔཱུརཱ མཧཱསམུདྡཾ སཱགརཾ པརིཔཱུརེནྟི; ཨེཝམེཏསྶ མཧཱསམུདྡསྶ སཱགརསྶ ཨཱཧཱརོ ཧོཏི, ཨེཝཉྩ པཱརིཔཱུརི།

‘‘Seyyathāpi, bhikkhave, uparipabbate thullaphusitake deve vassante taṃ udakaṃ yathāninnaṃ pavattamānaṃ pabbatakandarapadarasākhā paripūreti, pabbatakandarapadarasākhā paripūrā kusobbhe paripūrenti, kusobbhā paripūrā mahāsobbhe paripūrenti, mahāsobbhā paripūrā kunnadiyo paripūrenti, kunnadiyo paripūrā mahānadiyo paripūrenti, mahānadiyo paripūrā mahāsamuddaṃ sāgaraṃ paripūrenti; evametassa mahāsamuddassa sāgarassa āhāro hoti, evañca pāripūri.

‘‘ཨེཝམེཝཾ ཁོ, བྷིཀྑཝེ, སཔྤུརིསསཾསེཝོ པརིཔཱུརོ སདྡྷམྨསྶཝནཾ པརིཔཱུརེཏི, སདྡྷམྨསྶཝནཾ པརིཔཱུརཾ སདྡྷཾ པརིཔཱུརེཏི, སདྡྷཱ པརིཔཱུརཱ ཡོནིསོམནསིཀཱརཾ པརིཔཱུརེཏི, ཡོནིསོམནསིཀཱརོ པརིཔཱུརོ སཏིསམྤཛཉྙཾ པརིཔཱུརེཏི, སཏིསམྤཛཉྙཾ པརིཔཱུརཾ ཨིནྡྲིཡསཾཝརཾ པརིཔཱུརེཏི, ཨིནྡྲིཡསཾཝརོ པརིཔཱུརོ ཏཱིཎི སུཙརིཏཱནི པརིཔཱུརེཏི, ཏཱིཎི སུཙརིཏཱནི པརིཔཱུརཱནི ཙཏྟཱརོ སཏིཔཊྛཱནེ པརིཔཱུརེནྟི, ཙཏྟཱརོ སཏིཔཊྛཱནཱ པརིཔཱུརཱ སཏྟ བོཛ྄ཛྷངྒེ པརིཔཱུརེནྟི, སཏྟ བོཛ྄ཛྷངྒཱ པརིཔཱུརཱ ཝིཛྫཱཝིམུཏྟིཾ པརིཔཱུརེནྟི; ཨེཝམེཏིསྶཱ ཝིཛྫཱཝིམུཏྟིཡཱ ཨཱཧཱརོ ཧོཏི, ཨེཝཉྩ པཱརིཔཱུརཱི’’ཏི། པཋམཾ།

‘‘Evamevaṃ kho, bhikkhave, sappurisasaṃsevo paripūro saddhammassavanaṃ paripūreti, saddhammassavanaṃ paripūraṃ saddhaṃ paripūreti, saddhā paripūrā yonisomanasikāraṃ paripūreti, yonisomanasikāro paripūro satisampajaññaṃ paripūreti, satisampajaññaṃ paripūraṃ indriyasaṃvaraṃ paripūreti, indriyasaṃvaro paripūro tīṇi sucaritāni paripūreti, tīṇi sucaritāni paripūrāni cattāro satipaṭṭhāne paripūrenti, cattāro satipaṭṭhānā paripūrā satta bojjhaṅge paripūrenti, satta bojjhaṅgā paripūrā vijjāvimuttiṃ paripūrenti; evametissā vijjāvimuttiyā āhāro hoti, evañca pāripūrī’’ti. Paṭhamaṃ.

Next: ༢. ཌྟཎྷཱསུཏྟཾ • 2. Ḍtaṇhāsuttaṃ

Footnotes:

1. ཨཝིཛྫམྤཧཾ (སཱི॰ སྱཱ॰)

2. avijjampahaṃ (sī. syā.)

3. (གལགལཱཡནྟེ) (སཱི॰), (གལ༹གལཱ༹ཡནྟེ) (སྱཱ॰)

4. ཀུསྶུབྦྷེ (སཱི॰), ཀུསུབྦྷེ (སྱཱ॰), ཀུསོམྦྷེ (ཀ॰) ཨ॰ ནི॰ ༣.༩༦

5. མཧཱསོམྦྷེ (ཀ॰)

6. (galagalāyante) (sī.), (gaḷagaḷāyante) (syā.)

7. kussubbhe (sī.), kusubbhe (syā.), kusombhe (ka.) a. ni. 3.96

8. mahāsombhe (ka.)

Related texts:

ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / ཨངྒུཏྟརནིཀཱཡ (ཨཊྛཀཐཱ) • Aṅguttaranikāya (aṭṭhakathā) / ༡. ཨཝིཛྫཱསུཏྟཱདིཝཎྞནཱ • 1. Avijjāsuttādivaṇṇanā

ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / ཨངྒུཏྟརནིཀཱཡ (ཊཱིཀཱ) • Aṅguttaranikāya (ṭīkā) / ༡-༧. ཨཝིཛྫཱསུཏྟཱདིཝཎྞནཱ • 1-7. Avijjāsuttādivaṇṇanā

© 1991-2023 The Titi Tudorancea Bulletin | Titi Tudorancea^® is a Registered Trademark | Terms of use and privacy policy
Contact