| Library / Tipiṭaka / តិបិដក • Tipiṭaka / កថាវត្ថុបាឡិ • Kathāvatthupāḷi |
១០. ទសមវគ្គោ
10. Dasamavaggo
(១០៥) ១១. អវិញ្ញត្តិ ទុស្សិល្យន្តិកថា
(105) 11. Aviññatti dussilyantikathā
៦០៣. អវិញ្ញត្តិ ទុស្សិល្យន្តិ? អាមន្តា។ បាណាតិបាតោតិ? ន ហេវំ វត្តព្ពេ…បេ.… អទិន្នាទានន្តិ? ន ហេវំ វត្តព្ពេ…បេ.… កាមេសុមិច្ឆាចារោតិ? ន ហេវំ វត្តព្ពេ…បេ.… មុសាវាទោតិ? ន ហេវំ វត្តព្ពេ…បេ.… សុរាមេរយមជ្ជបមាទដ្ឋានន្តិ? ន ហេវំ វត្តព្ពេ…បេ.…។
603. Aviññatti dussilyanti? Āmantā. Pāṇātipātoti? Na hevaṃ vattabbe…pe… adinnādānanti? Na hevaṃ vattabbe…pe… kāmesumicchācāroti? Na hevaṃ vattabbe…pe… musāvādoti? Na hevaṃ vattabbe…pe… surāmerayamajjapamādaṭṭhānanti? Na hevaṃ vattabbe…pe….
បាបកម្មំ សមាទិយិត្វា ទានំ ទទន្តស្ស បុញ្ញញ្ច អបុញ្ញញ្ច ឧភោ វឌ្ឍន្តីតិ? ន ហេវំ វត្តព្ពេ…បេ.… បុញ្ញញ្ច អបុញ្ញញ្ច ឧភោ វឌ្ឍន្តីតិ? អាមន្តា ។ ទ្វិន្នំ ផស្សានំ…បេ.… ទ្វិន្នំ ចិត្តានំ សមោធានំ ហោតីតិ? ន ហេវំ វត្តព្ពេ…បេ.… ទ្វិន្នំ ផស្សានំ…បេ.… ទ្វិន្នំ ចិត្តានំ សមោធានំ ហោតីតិ? អាមន្តា។ កុសលាកុសលា សាវជ្ជានវជ្ជា ហីនបណីតា កណ្ហសុក្កសប្បដិភាគា ធម្មា សម្មុខីភាវំ អាគច្ឆន្តីតិ? ន ហេវំ វត្តព្ពេ…បេ.…។
Pāpakammaṃ samādiyitvā dānaṃ dadantassa puññañca apuññañca ubho vaḍḍhantīti? Na hevaṃ vattabbe…pe… puññañca apuññañca ubho vaḍḍhantīti? Āmantā . Dvinnaṃ phassānaṃ…pe… dvinnaṃ cittānaṃ samodhānaṃ hotīti? Na hevaṃ vattabbe…pe… dvinnaṃ phassānaṃ…pe… dvinnaṃ cittānaṃ samodhānaṃ hotīti? Āmantā. Kusalākusalā sāvajjānavajjā hīnapaṇītā kaṇhasukkasappaṭibhāgā dhammā sammukhībhāvaṃ āgacchantīti? Na hevaṃ vattabbe…pe….
កុសលាកុសលា សាវជ្ជានវជ្ជា ហីនបណីតា កណ្ហសុក្កសប្បដិភាគា ធម្មា សម្មុខីភាវំ អាគច្ឆន្តីតិ? អាមន្តា។ ននុ វុត្តំ ភគវតា – ‘‘ចត្តារិមានិ, ភិក្ខវេ, សុវិទូរវិទូរានិ ! កតមានិ ចត្តារិ? នភញ្ច, ភិក្ខវេ, បថវី ច – ឥទំ បឋមំ សុវិទូរវិទូរំ…បេ.… តស្មា សតំ ធម្មោ អសព្ភិ អារកា’’តិ។ អត្ថេវ សុត្តន្តោតិ? អាមន្តា។ តេន ហិ ន វត្តព្ពំ – ‘‘កុសលាកុសលា សាវជ្ជានវជ្ជា ហីនបណីតា កណ្ហសុក្កសប្បដិភាគា ធម្មា សម្មុខីភាវំ អាគច្ឆន្តី’’តិ។
Kusalākusalā sāvajjānavajjā hīnapaṇītā kaṇhasukkasappaṭibhāgā dhammā sammukhībhāvaṃ āgacchantīti? Āmantā. Nanu vuttaṃ bhagavatā – ‘‘cattārimāni, bhikkhave, suvidūravidūrāni ! Katamāni cattāri? Nabhañca, bhikkhave, pathavī ca – idaṃ paṭhamaṃ suvidūravidūraṃ…pe… tasmā sataṃ dhammo asabbhi ārakā’’ti. Attheva suttantoti? Āmantā. Tena hi na vattabbaṃ – ‘‘kusalākusalā sāvajjānavajjā hīnapaṇītā kaṇhasukkasappaṭibhāgā dhammā sammukhībhāvaṃ āgacchantī’’ti.
៦០៤. ន វត្តព្ពំ – ‘‘អវិញ្ញត្តិ ទុស្សិល្យ’’ន្តិ? អាមន្តា។ ននុ បាបកម្មំ សមាទិន្នោ អាសីតិ? អាមន្តា។ ហញ្ចិ បាបកម្មំ សមាទិន្នោ អាសិ, តេន វត រេ វត្តព្ពេ – ‘‘អវិញ្ញត្តិ ទុស្សិល្យ’’ន្តិ។
604. Na vattabbaṃ – ‘‘aviññatti dussilya’’nti? Āmantā. Nanu pāpakammaṃ samādinno āsīti? Āmantā. Hañci pāpakammaṃ samādinno āsi, tena vata re vattabbe – ‘‘aviññatti dussilya’’nti.
អវិញ្ញត្តិ ទុស្សិល្យន្តិកថា និដ្ឋិតា។
Aviññatti dussilyantikathā niṭṭhitā.
ទសមវគ្គោ។
Dasamavaggo.
តស្សុទ្ទានំ –
Tassuddānaṃ –
ឧបបត្តេសិយេ បញ្ចក្ខន្ធេ អនិរុទ្ធេ កិរិយា បញ្ចក្ខន្ធា ឧប្បជ្ជន្តិ, មគ្គសមង្គិស្ស រូបំ មគ្គោ, បញ្ចវិញ្ញាណសមង្គិស្ស អត្ថិ មគ្គភាវនា, បញ្ចវិញ្ញាណា កុសលាបិ អកុសលាបិ, បញ្ចវិញ្ញាណា សាភោគា, មគ្គសមង្គី ទ្វីហិ សីលេហិ សមន្នាគតោ, សីលំ អចេតសិកំ, សីលំ ន ចិត្តានុបរិវត្តិ, សមាទានហេតុកំ សីលំ វឌ្ឍតីតិ, វិញ្ញត្តិសីលំ អវិញ្ញត្តិ ទុស្សិល្យន្តិ។
Upapattesiye pañcakkhandhe aniruddhe kiriyā pañcakkhandhā uppajjanti, maggasamaṅgissa rūpaṃ maggo, pañcaviññāṇasamaṅgissa atthi maggabhāvanā, pañcaviññāṇā kusalāpi akusalāpi, pañcaviññāṇā sābhogā, maggasamaṅgī dvīhi sīlehi samannāgato, sīlaṃ acetasikaṃ, sīlaṃ na cittānuparivatti, samādānahetukaṃ sīlaṃ vaḍḍhatīti, viññattisīlaṃ aviññatti dussilyanti.
ទុតិយោ បណ្ណាសកោ។
Dutiyo paṇṇāsako.
តស្សុទ្ទានំ –
Tassuddānaṃ –
Footnotes:
Related texts:
អដ្ឋកថា • Aṭṭhakathā / អភិធម្មបិដក (អដ្ឋកថា) • Abhidhammapiṭaka (aṭṭhakathā) / បញ្ចបករណ-អដ្ឋកថា • Pañcapakaraṇa-aṭṭhakathā / ១១. អវិញ្ញត្តិ ទុស្សីល្យន្តិកថាវណ្ណនា • 11. Aviññatti dussīlyantikathāvaṇṇanā
ដីកា • Tīkā / អភិធម្មបិដក (ដីកា) • Abhidhammapiṭaka (ṭīkā) / បញ្ចបករណ-មូលដីកា • Pañcapakaraṇa-mūlaṭīkā / ១១. អវិញ្ញត្តិទុស្សីល្យន្តិកថាវណ្ណនា • 11. Aviññattidussīlyantikathāvaṇṇanā
ដីកា • Tīkā / អភិធម្មបិដក (ដីកា) • Abhidhammapiṭaka (ṭīkā) / បញ្ចបករណ-អនុដីកា • Pañcapakaraṇa-anuṭīkā / ១១. អវិញ្ញត្តិទុស្សីល្យន្តិកថាវណ្ណនា • 11. Aviññattidussīlyantikathāvaṇṇanā
