| Library / Tipiṭaka / तिपिटक • Tipiṭaka / पञ्चपकरण-अट्ठकथा • Pañcapakaraṇa-aṭṭhakathā |
११. अविञ्ञत्ति दुस्सील्यन्तिकथावण्णना
11. Aviññatti dussīlyantikathāvaṇṇanā
६०३-६०४. इदानि अविञ्ञत्ति दुस्सील्यन्तिकथा नाम होति। तत्थ चित्तविप्पयुत्तं अपुञ्ञूपचयञ्चेव आणत्तिया च पाणातिपातादीसु अङ्गपारिपूरिं सन्धाय ‘‘अविञ्ञत्ति दुस्सील्य’’न्ति येसं लद्धि, सेय्यथापि महासंघिकानं, ते सन्धाय पुच्छा सकवादिस्स, पटिञ्ञा इतरस्स। अथ नं ‘‘सचे सा दुस्सील्यं, पाणातिपातादीसु अञ्ञतरा सिया’’ति चोदेतुं पाणातिपातोतिआदिमाह। पापकम्मं समादियित्वाति ‘‘असुकं नाम घातेस्सामि, असुकं भण्डं अवहरिस्सामी’’ति एवं पापसमादानं कत्वा। उभो वड्ढन्तीति पुट्ठो दानक्खणे पापस्स अनुप्पत्तिं सन्धाय पटिक्खिपति। दुतियं पुट्ठो चित्तविप्पयुत्तं पापूपचयं सन्धाय पटिजानाति। सेसमेत्थ परिभोगमयकथायं वुत्तनयेनेव वेदितब्बं। लद्धिपतिट्ठापनम्पिस्स पापसमादिन्नपुब्बभागमेव साधेति; न अविञ्ञत्तिया दुस्सीलभावन्ति।
603-604. Idāni aviññatti dussīlyantikathā nāma hoti. Tattha cittavippayuttaṃ apuññūpacayañceva āṇattiyā ca pāṇātipātādīsu aṅgapāripūriṃ sandhāya ‘‘aviññatti dussīlya’’nti yesaṃ laddhi, seyyathāpi mahāsaṃghikānaṃ, te sandhāya pucchā sakavādissa, paṭiññā itarassa. Atha naṃ ‘‘sace sā dussīlyaṃ, pāṇātipātādīsu aññatarā siyā’’ti codetuṃ pāṇātipātotiādimāha. Pāpakammaṃ samādiyitvāti ‘‘asukaṃ nāma ghātessāmi, asukaṃ bhaṇḍaṃ avaharissāmī’’ti evaṃ pāpasamādānaṃ katvā. Ubho vaḍḍhantīti puṭṭho dānakkhaṇe pāpassa anuppattiṃ sandhāya paṭikkhipati. Dutiyaṃ puṭṭho cittavippayuttaṃ pāpūpacayaṃ sandhāya paṭijānāti. Sesamettha paribhogamayakathāyaṃ vuttanayeneva veditabbaṃ. Laddhipatiṭṭhāpanampissa pāpasamādinnapubbabhāgameva sādheti; na aviññattiyā dussīlabhāvanti.
अविञ्ञत्ति दुस्सील्यन्तिकथावण्णना।
Aviññatti dussīlyantikathāvaṇṇanā.
दसमो वग्गो।
Dasamo vaggo.
दुतियपण्णासको समत्तो।
Dutiyapaṇṇāsako samatto.
Related texts:
तिपिटक (मूल) • Tipiṭaka (Mūla) / अभिधम्मपिटक • Abhidhammapiṭaka / कथावत्थुपाळि • Kathāvatthupāḷi / (१०५) ११. अविञ्ञत्ति दुस्सिल्यन्तिकथा • (105) 11. Aviññatti dussilyantikathā
टीका • Tīkā / अभिधम्मपिटक (टीका) • Abhidhammapiṭaka (ṭīkā) / पञ्चपकरण-मूलटीका • Pañcapakaraṇa-mūlaṭīkā / ११. अविञ्ञत्तिदुस्सील्यन्तिकथावण्णना • 11. Aviññattidussīlyantikathāvaṇṇanā
टीका • Tīkā / अभिधम्मपिटक (टीका) • Abhidhammapiṭaka (ṭīkā) / पञ्चपकरण-अनुटीका • Pañcapakaraṇa-anuṭīkā / ११. अविञ्ञत्तिदुस्सील्यन्तिकथावण्णना • 11. Aviññattidussīlyantikathāvaṇṇanā
