| Library / Tipiṭaka / តិបិដក • Tipiṭaka / បញ្ចបករណ-អដ្ឋកថា • Pañcapakaraṇa-aṭṭhakathā |
១១. អវិញ្ញត្តិ ទុស្សីល្យន្តិកថាវណ្ណនា
11. Aviññatti dussīlyantikathāvaṇṇanā
៦០៣-៦០៤. ឥទានិ អវិញ្ញត្តិ ទុស្សីល្យន្តិកថា នាម ហោតិ។ តត្ថ ចិត្តវិប្បយុត្តំ អបុញ្ញូបចយញ្ចេវ អាណត្តិយា ច បាណាតិបាតាទីសុ អង្គបារិបូរិំ សន្ធាយ ‘‘អវិញ្ញត្តិ ទុស្សីល្យ’’ន្តិ យេសំ លទ្ធិ, សេយ្យថាបិ មហាសំឃិកានំ, តេ សន្ធាយ បុច្ឆា សកវាទិស្ស, បដិញ្ញា ឥតរស្ស។ អថ នំ ‘‘សចេ សា ទុស្សីល្យំ, បាណាតិបាតាទីសុ អញ្ញតរា សិយា’’តិ ចោទេតុំ បាណាតិបាតោតិអាទិមាហ។ បាបកម្មំ សមាទិយិត្វាតិ ‘‘អសុកំ នាម ឃាតេស្សាមិ, អសុកំ ភណ្ឌំ អវហរិស្សាមី’’តិ ឯវំ បាបសមាទានំ កត្វា។ ឧភោ វឌ្ឍន្តីតិ បុដ្ឋោ ទានក្ខណេ បាបស្ស អនុប្បត្តិំ សន្ធាយ បដិក្ខិបតិ។ ទុតិយំ បុដ្ឋោ ចិត្តវិប្បយុត្តំ បាបូបចយំ សន្ធាយ បដិជានាតិ។ សេសមេត្ថ បរិភោគមយកថាយំ វុត្តនយេនេវ វេទិតព្ពំ។ លទ្ធិបតិដ្ឋាបនម្បិស្ស បាបសមាទិន្នបុព្ពភាគមេវ សាធេតិ; ន អវិញ្ញត្តិយា ទុស្សីលភាវន្តិ។
603-604. Idāni aviññatti dussīlyantikathā nāma hoti. Tattha cittavippayuttaṃ apuññūpacayañceva āṇattiyā ca pāṇātipātādīsu aṅgapāripūriṃ sandhāya ‘‘aviññatti dussīlya’’nti yesaṃ laddhi, seyyathāpi mahāsaṃghikānaṃ, te sandhāya pucchā sakavādissa, paṭiññā itarassa. Atha naṃ ‘‘sace sā dussīlyaṃ, pāṇātipātādīsu aññatarā siyā’’ti codetuṃ pāṇātipātotiādimāha. Pāpakammaṃ samādiyitvāti ‘‘asukaṃ nāma ghātessāmi, asukaṃ bhaṇḍaṃ avaharissāmī’’ti evaṃ pāpasamādānaṃ katvā. Ubho vaḍḍhantīti puṭṭho dānakkhaṇe pāpassa anuppattiṃ sandhāya paṭikkhipati. Dutiyaṃ puṭṭho cittavippayuttaṃ pāpūpacayaṃ sandhāya paṭijānāti. Sesamettha paribhogamayakathāyaṃ vuttanayeneva veditabbaṃ. Laddhipatiṭṭhāpanampissa pāpasamādinnapubbabhāgameva sādheti; na aviññattiyā dussīlabhāvanti.
អវិញ្ញត្តិ ទុស្សីល្យន្តិកថាវណ្ណនា។
Aviññatti dussīlyantikathāvaṇṇanā.
ទសមោ វគ្គោ។
Dasamo vaggo.
ទុតិយបណ្ណាសកោ សមត្តោ។
Dutiyapaṇṇāsako samatto.
Related texts:
តិបិដក (មូល) • Tipiṭaka (Mūla) / អភិធម្មបិដក • Abhidhammapiṭaka / កថាវត្ថុបាឡិ • Kathāvatthupāḷi / (១០៥) ១១. អវិញ្ញត្តិ ទុស្សិល្យន្តិកថា • (105) 11. Aviññatti dussilyantikathā
ដីកា • Tīkā / អភិធម្មបិដក (ដីកា) • Abhidhammapiṭaka (ṭīkā) / បញ្ចបករណ-មូលដីកា • Pañcapakaraṇa-mūlaṭīkā / ១១. អវិញ្ញត្តិទុស្សីល្យន្តិកថាវណ្ណនា • 11. Aviññattidussīlyantikathāvaṇṇanā
ដីកា • Tīkā / អភិធម្មបិដក (ដីកា) • Abhidhammapiṭaka (ṭīkā) / បញ្ចបករណ-អនុដីកា • Pañcapakaraṇa-anuṭīkā / ១១. អវិញ្ញត្តិទុស្សីល្យន្តិកថាវណ្ណនា • 11. Aviññattidussīlyantikathāvaṇṇanā
