| Library / Tipiṭaka / တိပိဋက • Tipiṭaka / သာရတ္ထဒီပနီ-ဋီကာ • Sāratthadīpanī-ṭīkā |
သေဒမောစနဂာထာ
Sedamocanagāthā
အဝိပ္ပဝာသာဒိပဉ္ဟဝဏ္ဏနာ
Avippavāsādipañhavaṇṇanā
၄၇၉. သေဒမောစနဂာထာသု တဟိန္တိ တသ္မိံ ပုဂ္ဂလေ။ ‘‘အကပ္ပိယသမ္ဘောဂော နာမ မေထုနဓမ္မာဒီ’’တိ ဂဏ္ဌိပဒေသု ဝုတ္တံ။ ဧသာ ပဉ္ဟာ ကုသလေဟိ စိန္တိတာတိ လိင္ဂဝိပလ္လာသဝသေနေတံ ဝုတ္တံ, ဧသော ပဉ္ဟော ကုသလေဟိ စိန္တိတောတိ အတ္ထော။
479. Sedamocanagāthāsu tahinti tasmiṃ puggale. ‘‘Akappiyasambhogo nāma methunadhammādī’’ti gaṇṭhipadesu vuttaṃ. Esā pañhā kusalehi cintitāti liṅgavipallāsavasenetaṃ vuttaṃ, eso pañho kusalehi cintitoti attho.
ဒသာတိ အဝန္ဒိယေ ဒသ။ ဧကာဒသာတိ ပဏ္ဍကာဒယော ဧကာဒသ။ ဥဗ္ဘက္ခကေ န ဝဒာမီတိ ဣမိနာ မုခေ မေထုနဓမ္မာဘာဝံ ဒီပေတိ။ အဓောနာဘိံ ဝိဝဇ္ဇိယာတိ ဣမိနာ ဝစ္စမဂ္ဂပသ္သာဝမဂ္ဂေသု။
Dasāti avandiye dasa. Ekādasāti paṇḍakādayo ekādasa. Ubbhakkhake na vadāmīti iminā mukhe methunadhammābhāvaṃ dīpeti. Adhonābhiṃ vivajjiyāti iminā vaccamaggapassāvamaggesu.
ဂာမန္တရပရိယာပန္နံ နဒီပာရံ ဩက္ကန္တဘိက္ခုနိံ သန္ဓာယာတိ ဧတ္ထ နဒီ ဘိက္ခုနိယာ ဂာမပရိယာပန္နာ, ပရတီရံ ဂာမန္တရပရိယာပန္နံ။ တတ္ထ ပရတီရေ ပဌမလေဍ္ဍုပာတပ္ပမာဏော ဂာမူပစာရော နဒီပရိယန္တေန ပရိစ္ဆိန္နော, တသ္မာ ပရတီရေ ရတနမတ္တမ္ပိ အရညံ နတ္ထိ, ပရတီရဉ္စ တိဏာဒီဟိ ပဋိစ္ဆန္နတ္တာ ဒသ္သနူပစာရဝိရဟိတံ ကရောတိ။ တတ္ထ အတ္တနော ဂာမေ အာပတ္တိ နတ္ထိ, ပရတီရေ ပန ပဌမလေဍ္ဍုပာတသင္ခာတေ ဂာမူပစာရေယေဝ ပာဒံ ဌပေတိ။ အန္တရေ အဘိဓမ္မေ ဝုတ္တနယေန အရညဘူတံ သကဂာမံ အတိက္ကမတိ နာမ, တသ္မာ ဂဏမ္ဟာ ဩဟီယနာ နာမ ဟောတီတိ ဝေဒိတဗ္ဗံ။
Gāmantarapariyāpannaṃ nadīpāraṃ okkantabhikkhuniṃ sandhāyāti ettha nadī bhikkhuniyā gāmapariyāpannā, paratīraṃ gāmantarapariyāpannaṃ. Tattha paratīre paṭhamaleḍḍupātappamāṇo gāmūpacāro nadīpariyantena paricchinno, tasmā paratīre ratanamattampi araññaṃ natthi, paratīrañca tiṇādīhi paṭicchannattā dassanūpacāravirahitaṃ karoti. Tattha attano gāme āpatti natthi, paratīre pana paṭhamaleḍḍupātasaṅkhāte gāmūpacāreyeva pādaṃ ṭhapeti. Antare abhidhamme vuttanayena araññabhūtaṃ sakagāmaṃ atikkamati nāma, tasmā gaṇamhā ohīyanā nāma hotīti veditabbaṃ.
ဘိက္ခူနံ သန္တိကေ ဧကတောဥပသမ္ပန္နာ နာမ မဟာပဇာပတိပမုခာ ပဉ္စသတသာကိနိယော ဘိက္ခုနိယော။ မဟာပဇာပတိပိ ဟိ အာနန္ဒတ္ထေရေန ဒိန္နဩဝာဒသ္သ ပဋိဂ္ဂဟိတတ္တာ ဘိက္ခူနံ သန္တိကေ ဥပသမ္ပန္နာ နာမ။
Bhikkhūnaṃ santike ekatoupasampannā nāma mahāpajāpatipamukhā pañcasatasākiniyo bhikkhuniyo. Mahāpajāpatipi hi ānandattherena dinnaovādassa paṭiggahitattā bhikkhūnaṃ santike upasampannā nāma.
Related texts:
တိပိဋက (မူလ) • Tipiṭaka (Mūla) / ဝိနယပိဋက • Vinayapiṭaka / ပရိဝာရပာဠိ • Parivārapāḷi / ၁. အဝိပ္ပဝာသပဉ္ဟာ • 1. Avippavāsapañhā
အဋ္ဌကထာ • Aṭṭhakathā / ဝိနယပိဋက (အဋ္ဌကထာ) • Vinayapiṭaka (aṭṭhakathā) / ပရိဝာရ-အဋ္ဌကထာ • Parivāra-aṭṭhakathā / (၁) အဝိပ္ပဝာသပဉ္ဟာဝဏ္ဏနာ • (1) Avippavāsapañhāvaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝဇိရဗုဒ္ဓိ-ဋီကာ • Vajirabuddhi-ṭīkā / အဝိပ္ပဝာသပဉ္ဟာဝဏ္ဏနာ • Avippavāsapañhāvaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝိမတိဝိနောဒနီ-ဋီကာ • Vimativinodanī-ṭīkā / အဝိပ္ပဝာသပဉ္ဟာဝဏ္ဏနာ • Avippavāsapañhāvaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ပာစိတ္ယာဒိယောဇနာပာဠိ • Pācityādiyojanāpāḷi / (၁) အဝိပ္ပဝာသပဉ္ဟာဝဏ္ဏနာ • (1) Avippavāsapañhāvaṇṇanā
