| Library / Tipiṭaka / තිපිටක • Tipiṭaka / සාරත්‌ථදීපනී-ටීකා • Sāratthadīpanī-ṭīkā |
සෙදමොචනගාථා
Sedamocanagāthā
අවිප්‌පවාසාදිපඤ්‌හවණ්‌ණනා
Avippavāsādipañhavaṇṇanā
479. සෙදමොචනගාථාසු තහින්‌ති තස්‌මිං පුග්‌ගලෙ. ‘‘අකප්‌පියසම්‌භොගො නාම මෙථුනධම්‌මාදී’’ති ගණ්‌ඨිපදෙසු වුත්‌තං. එසා පඤ්‌හා කුසලෙහි චින්‌තිතාති ලිඞ්‌ගවිපල්‌ලාසවසෙනෙතං වුත්‌තං, එසො පඤ්‌හො කුසලෙහි චින්‌තිතොති අත්‌ථො.
479. Sedamocanagāthāsu tahinti tasmiṃ puggale. ‘‘Akappiyasambhogo nāma methunadhammādī’’ti gaṇṭhipadesu vuttaṃ. Esā pañhā kusalehi cintitāti liṅgavipallāsavasenetaṃ vuttaṃ, eso pañho kusalehi cintitoti attho.
දසාති අවන්‌දියෙ දස. එකාදසාති පණ්‌ඩකාදයො එකාදස. උබ්‌භක්‌ඛකෙ න වදාමීති ඉමිනා මුඛෙ මෙථුනධම්‌මාභාවං දීපෙති. අධොනාභිං විවජ්‌ජියාති ඉමිනා වච්‌චමග්‌ගපස්‌සාවමග්‌ගෙසු.
Dasāti avandiye dasa. Ekādasāti paṇḍakādayo ekādasa. Ubbhakkhake na vadāmīti iminā mukhe methunadhammābhāvaṃ dīpeti. Adhonābhiṃ vivajjiyāti iminā vaccamaggapassāvamaggesu.
ගාමන්‌තරපරියාපන්‌නං නදීපාරං ඔක්‌කන්‌තභික්‌ඛුනිං සන්‌ධායාති එත්‌ථ නදී භික්‌ඛුනියා ගාමපරියාපන්‌නා, පරතීරං ගාමන්‌තරපරියාපන්‌නං. තත්‌ථ පරතීරෙ පඨමලෙඩ්‌ඩුපාතප්‌පමාණො ගාමූපචාරො නදීපරියන්‌තෙන පරිච්‌ඡින්‌නො, තස්‌මා පරතීරෙ රතනමත්‌තම්‌පි අරඤ්‌ඤං නත්‌ථි, පරතීරඤ්‌ච තිණාදීහි පටිච්‌ඡන්‌නත්‌තා දස්‌සනූපචාරවිරහිතං කරොති. තත්‌ථ අත්‌තනො ගාමෙ ආපත්‌ති නත්‌ථි, පරතීරෙ පන පඨමලෙඩ්‌ඩුපාතසඞ්‌ඛාතෙ ගාමූපචාරෙයෙව පාදං ඨපෙති. අන්‌තරෙ අභිධම්‌මෙ වුත්‌තනයෙන අරඤ්‌ඤභූතං සකගාමං අතික්‌කමති නාම, තස්‌මා ගණම්‌හා ඔහීයනා නාම හොතීති වෙදිතබ්‌බං.
Gāmantarapariyāpannaṃ nadīpāraṃ okkantabhikkhuniṃ sandhāyāti ettha nadī bhikkhuniyā gāmapariyāpannā, paratīraṃ gāmantarapariyāpannaṃ. Tattha paratīre paṭhamaleḍḍupātappamāṇo gāmūpacāro nadīpariyantena paricchinno, tasmā paratīre ratanamattampi araññaṃ natthi, paratīrañca tiṇādīhi paṭicchannattā dassanūpacāravirahitaṃ karoti. Tattha attano gāme āpatti natthi, paratīre pana paṭhamaleḍḍupātasaṅkhāte gāmūpacāreyeva pādaṃ ṭhapeti. Antare abhidhamme vuttanayena araññabhūtaṃ sakagāmaṃ atikkamati nāma, tasmā gaṇamhā ohīyanā nāma hotīti veditabbaṃ.
භික්‌ඛූනං සන්‌තිකෙ එකතොඋපසම්‌පන්‌නා නාම මහාපජාපතිපමුඛා පඤ්‌චසතසාකිනියො භික්‌ඛුනියො. මහාපජාපතිපි හි ආනන්‌දත්‌ථෙරෙන දින්‌නඔවාදස්‌ස පටිග්‌ගහිතත්‌තා භික්‌ඛූනං සන්‌තිකෙ උපසම්‌පන්‌නා නාම.
Bhikkhūnaṃ santike ekatoupasampannā nāma mahāpajāpatipamukhā pañcasatasākiniyo bhikkhuniyo. Mahāpajāpatipi hi ānandattherena dinnaovādassa paṭiggahitattā bhikkhūnaṃ santike upasampannā nāma.
Related texts:
තිපිටක (මූල) • Tipiṭaka (Mūla) / විනයපිටක • Vinayapiṭaka / පරිවාරපාළි • Parivārapāḷi / 1. අවිප්‌පවාසපඤ්‌හා • 1. Avippavāsapañhā
අට්‌ඨකථා • Aṭṭhakathā / විනයපිටක (අට්‌ඨකථා) • Vinayapiṭaka (aṭṭhakathā) / පරිවාර-අට්‌ඨකථා • Parivāra-aṭṭhakathā / (1) අවිප්‌පවාසපඤ්‌හාවණ්‌ණනා • (1) Avippavāsapañhāvaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / වජිරබුද්‌ධි-ටීකා • Vajirabuddhi-ṭīkā / අවිප්‌පවාසපඤ්‌හාවණ්‌ණනා • Avippavāsapañhāvaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / විමතිවිනොදනී-ටීකා • Vimativinodanī-ṭīkā / අවිප්‌පවාසපඤ්‌හාවණ්‌ණනා • Avippavāsapañhāvaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / පාචිත්‍යාදියොජනාපාළි • Pācityādiyojanāpāḷi / (1) අවිප්‌පවාසපඤ්‌හාවණ්‌ණනා • (1) Avippavāsapañhāvaṇṇanā
