| Library / Tipiṭaka / ཏིཔིཊཀ • Tipiṭaka / སཱརཏྠདཱིཔནཱི-ཊཱིཀཱ • Sāratthadīpanī-ṭīkā |
སེདམོཙནགཱཐཱ
Sedamocanagāthā
ཨཝིཔྤཝཱསཱདིཔཉྷཝཎྞནཱ
Avippavāsādipañhavaṇṇanā
༤༧༩. སེདམོཙནགཱཐཱསུ ཏཧིནྟི ཏསྨིཾ པུགྒལེ། ‘‘ཨཀཔྤིཡསམྦྷོགོ ནཱམ མེཐུནདྷམྨཱདཱི’’ཏི གཎྛིཔདེསུ ཝུཏྟཾ། ཨེསཱ པཉྷཱ ཀུསལེཧི ཙིནྟིཏཱཏི ལིངྒཝིཔལླཱསཝསེནེཏཾ ཝུཏྟཾ, ཨེསོ པཉྷོ ཀུསལེཧི ཙིནྟིཏོཏི ཨཏྠོ།
479. Sedamocanagāthāsu tahinti tasmiṃ puggale. ‘‘Akappiyasambhogo nāma methunadhammādī’’ti gaṇṭhipadesu vuttaṃ. Esā pañhā kusalehi cintitāti liṅgavipallāsavasenetaṃ vuttaṃ, eso pañho kusalehi cintitoti attho.
དསཱཏི ཨཝནྡིཡེ དས། ཨེཀཱདསཱཏི པཎྜཀཱདཡོ ཨེཀཱདས། ཨུབྦྷཀྑཀེ ན ཝདཱམཱིཏི ཨིམིནཱ མུཁེ མེཐུནདྷམྨཱབྷཱཝཾ དཱིཔེཏི། ཨདྷོནཱབྷིཾ ཝིཝཛྫིཡཱཏི ཨིམིནཱ ཝཙྩམགྒཔསྶཱཝམགྒེསུ།
Dasāti avandiye dasa. Ekādasāti paṇḍakādayo ekādasa. Ubbhakkhake na vadāmīti iminā mukhe methunadhammābhāvaṃ dīpeti. Adhonābhiṃ vivajjiyāti iminā vaccamaggapassāvamaggesu.
གཱམནྟརཔརིཡཱཔནྣཾ ནདཱིཔཱརཾ ཨོཀྐནྟབྷིཀྑུནིཾ སནྡྷཱཡཱཏི ཨེཏྠ ནདཱི བྷིཀྑུནིཡཱ གཱམཔརིཡཱཔནྣཱ, པརཏཱིརཾ གཱམནྟརཔརིཡཱཔནྣཾ། ཏཏྠ པརཏཱིརེ པཋམལེཌྜུཔཱཏཔྤམཱཎོ གཱམཱུཔཙཱརོ ནདཱིཔརིཡནྟེན པརིཙྪིནྣོ, ཏསྨཱ པརཏཱིརེ རཏནམཏྟམྤི ཨརཉྙཾ ནཏྠི, པརཏཱིརཉྩ ཏིཎཱདཱིཧི པཊིཙྪནྣཏྟཱ དསྶནཱུཔཙཱརཝིརཧིཏཾ ཀརོཏི། ཏཏྠ ཨཏྟནོ གཱམེ ཨཱཔཏྟི ནཏྠི, པརཏཱིརེ པན པཋམལེཌྜུཔཱཏསངྑཱཏེ གཱམཱུཔཙཱརེཡེཝ པཱདཾ ཋཔེཏི། ཨནྟརེ ཨབྷིདྷམྨེ ཝུཏྟནཡེན ཨརཉྙབྷཱུཏཾ སཀགཱམཾ ཨཏིཀྐམཏི ནཱམ, ཏསྨཱ གཎམྷཱ ཨོཧཱིཡནཱ ནཱམ ཧོཏཱིཏི ཝེདིཏབྦཾ།
Gāmantarapariyāpannaṃ nadīpāraṃ okkantabhikkhuniṃ sandhāyāti ettha nadī bhikkhuniyā gāmapariyāpannā, paratīraṃ gāmantarapariyāpannaṃ. Tattha paratīre paṭhamaleḍḍupātappamāṇo gāmūpacāro nadīpariyantena paricchinno, tasmā paratīre ratanamattampi araññaṃ natthi, paratīrañca tiṇādīhi paṭicchannattā dassanūpacāravirahitaṃ karoti. Tattha attano gāme āpatti natthi, paratīre pana paṭhamaleḍḍupātasaṅkhāte gāmūpacāreyeva pādaṃ ṭhapeti. Antare abhidhamme vuttanayena araññabhūtaṃ sakagāmaṃ atikkamati nāma, tasmā gaṇamhā ohīyanā nāma hotīti veditabbaṃ.
བྷིཀྑཱུནཾ སནྟིཀེ ཨེཀཏོཨུཔསམྤནྣཱ ནཱམ མཧཱཔཛཱཔཏིཔམུཁཱ པཉྩསཏསཱཀིནིཡོ བྷིཀྑུནིཡོ། མཧཱཔཛཱཔཏིཔི ཧི ཨཱནནྡཏྠེརེན དིནྣཨོཝཱདསྶ པཊིགྒཧིཏཏྟཱ བྷིཀྑཱུནཾ སནྟིཀེ ཨུཔསམྤནྣཱ ནཱམ།
Bhikkhūnaṃ santike ekatoupasampannā nāma mahāpajāpatipamukhā pañcasatasākiniyo bhikkhuniyo. Mahāpajāpatipi hi ānandattherena dinnaovādassa paṭiggahitattā bhikkhūnaṃ santike upasampannā nāma.
Related texts:
ཏིཔིཊཀ (མཱུལ) • Tipiṭaka (Mūla) / ཝིནཡཔིཊཀ • Vinayapiṭaka / པརིཝཱརཔཱལི༹ • Parivārapāḷi / ༡. ཨཝིཔྤཝཱསཔཉྷཱ • 1. Avippavāsapañhā
ཨཊྛཀཐཱ • Aṭṭhakathā / ཝིནཡཔིཊཀ (ཨཊྛཀཐཱ) • Vinayapiṭaka (aṭṭhakathā) / པརིཝཱར-ཨཊྛཀཐཱ • Parivāra-aṭṭhakathā / (༡) ཨཝིཔྤཝཱསཔཉྷཱཝཎྞནཱ • (1) Avippavāsapañhāvaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝཛིརབུདྡྷི-ཊཱིཀཱ • Vajirabuddhi-ṭīkā / ཨཝིཔྤཝཱསཔཉྷཱཝཎྞནཱ • Avippavāsapañhāvaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝིམཏིཝིནོདནཱི-ཊཱིཀཱ • Vimativinodanī-ṭīkā / ཨཝིཔྤཝཱསཔཉྷཱཝཎྞནཱ • Avippavāsapañhāvaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / པཱཙིཏྱཱདིཡོཛནཱཔཱལི༹ • Pācityādiyojanāpāḷi / (༡) ཨཝིཔྤཝཱསཔཉྷཱཝཎྞནཱ • (1) Avippavāsapañhāvaṇṇanā
