| Library / Tipiṭaka / திபிடக • Tipiṭaka / பரிவார-அட்ட²கதா² • Parivāra-aṭṭhakathā |
ஸேத³மோசனகா³தா²
Sedamocanagāthā
(1) அவிப்பவாஸபஞ்ஹாவண்ணனா
(1) Avippavāsapañhāvaṇṇanā
479. ஸேத³மோசனகா³தா²ஸு அஸங்வாஸோதி உபோஸத²பவாரணாதி³னா ஸங்வாஸேன அஸங்வாஸோ. ஸம்போ⁴கோ³ ஏகச்சோ தஹிங் ந லப்³ப⁴தீதி அகப்பியஸம்போ⁴கோ³ ந லப்³ப⁴தி, நஹாபனபோ⁴ஜனாதி³படிஜக்³க³னங் பன மாதராயேவ காதுங் லப்³ப⁴தி. அவிப்பவாஸேன அனாபத்தீதி ஸஹகா³ரஸெய்யாய அனாபத்தி. பஞ்ஹா மேஸா குஸலேஹி சிந்திதாதி ஏஸா பஞ்ஹா குஸலேஹி பண்டி³தேஹி சிந்திதா. அஸ்ஸா விஸ்ஸஜ்ஜனங் தா³ரகமாதுயா பி⁴க்கு²னியா வேதி³தப்³ப³ங், தஸ்ஸா ஹி புத்தங் ஸந்தா⁴யேதங் வுத்தந்தி.
479. Sedamocanagāthāsu asaṃvāsoti uposathapavāraṇādinā saṃvāsena asaṃvāso. Sambhogo ekacco tahiṃ na labbhatīti akappiyasambhogo na labbhati, nahāpanabhojanādipaṭijagganaṃ pana mātarāyeva kātuṃ labbhati. Avippavāsena anāpattīti sahagāraseyyāya anāpatti. Pañhā mesā kusalehi cintitāti esā pañhā kusalehi paṇḍitehi cintitā. Assā vissajjanaṃ dārakamātuyā bhikkhuniyā veditabbaṃ, tassā hi puttaṃ sandhāyetaṃ vuttanti.
அவிஸ்ஸஜ்ஜிதகா³தா² க³ருப⁴ண்ட³ங் ஸந்தா⁴ய வுத்தா, அத்தோ² பனஸ்ஸா க³ருப⁴ண்ட³வினிச்ச²யே வுத்தோயேவ.
Avissajjitagāthā garubhaṇḍaṃ sandhāya vuttā, attho panassā garubhaṇḍavinicchaye vuttoyeva.
த³ஸ புக்³க³லே ந வதா³மீதி ஸேனாஸனக்க²ந்த⁴கே வுத்தே த³ஸ புக்³க³லே ந வதா³மி. ஏகாத³ஸ விவஜ்ஜியாதி யே மஹாக²ந்த⁴கே ஏகாத³ஸ விவஜ்ஜனீயபுக்³க³லா வுத்தா, தேபி ந வதா³மி. அயங் பஞ்ஹா நக்³க³ங் பி⁴க்கு²ங் ஸந்தா⁴ய வுத்தா.
Dasa puggale na vadāmīti senāsanakkhandhake vutte dasa puggale na vadāmi. Ekādasa vivajjiyāti ye mahākhandhake ekādasa vivajjanīyapuggalā vuttā, tepi na vadāmi. Ayaṃ pañhā naggaṃ bhikkhuṃ sandhāya vuttā.
கத²ங் நு ஸிக்கா²ய அஸாதா⁴ரணோதி பஞ்ஹா நஹாபிதபுப்³ப³கங் பி⁴க்கு²ங் ஸந்தா⁴ய வுத்தா. அயஞ்ஹி கு²ரப⁴ண்ட³ங் பரிஹரிதுங் ந லப⁴தி, அஞ்ஞே லப⁴ந்தி; தஸ்மா ஸிக்கா²ய அஸாதா⁴ரணோ.
Kathaṃ nu sikkhāya asādhāraṇoti pañhā nahāpitapubbakaṃ bhikkhuṃ sandhāya vuttā. Ayañhi khurabhaṇḍaṃ pariharituṃ na labhati, aññe labhanti; tasmā sikkhāya asādhāraṇo.
தங் புக்³க³லங் கதமங் வத³ந்தி பு³த்³தா⁴தி அயங் பஞ்ஹா நிம்மிதபு³த்³த⁴ங் ஸந்தா⁴ய வுத்தா.
Taṃ puggalaṃ katamaṃ vadanti buddhāti ayaṃ pañhā nimmitabuddhaṃ sandhāya vuttā.
அதோ⁴னாபி⁴ங் விவஜ்ஜியாதி அதோ⁴னாபி⁴ங் விவஜ்ஜெத்வா. அயங் பஞ்ஹா யங் தங் அஸீஸகங் கப³ந்த⁴ங், யஸ்ஸ உரே அக்கீ²னி சேவ முக²ஞ்ச ஹோதி, தங் ஸந்தா⁴ய வுத்தா.
Adhonābhiṃvivajjiyāti adhonābhiṃ vivajjetvā. Ayaṃ pañhā yaṃ taṃ asīsakaṃ kabandhaṃ, yassa ure akkhīni ceva mukhañca hoti, taṃ sandhāya vuttā.
பி⁴க்கு² ஸஞ்ஞாசிகாய குடிந்தி அயங் பஞ்ஹா திணச்சா²த³னங் குடிங் ஸந்தா⁴ய வுத்தா. து³தியபஞ்ஹா ஸப்³ப³மத்திகாமயங் குடிங் ஸந்தா⁴ய வுத்தா.
Bhikkhu saññācikāya kuṭinti ayaṃ pañhā tiṇacchādanaṃ kuṭiṃ sandhāya vuttā. Dutiyapañhā sabbamattikāmayaṃ kuṭiṃ sandhāya vuttā.
ஆபஜ்ஜெய்ய க³ருகங் சே²ஜ்ஜவத்து²ந்தி அயங் பஞ்ஹா வஜ்ஜபடிச்சா²தி³கங் பி⁴க்கு²னிங் ஸந்தா⁴ய வுத்தா. து³தியபஞ்ஹா பண்ட³காத³யோ அப⁴ப்³ப³புக்³க³லே ஸந்தா⁴ய வுத்தா. ஏகாத³ஸபி ஹி தே கி³ஹிபா⁴வேயேவ பாராஜிகங் பத்தா.
Āpajjeyya garukaṃ chejjavatthunti ayaṃ pañhā vajjapaṭicchādikaṃ bhikkhuniṃ sandhāya vuttā. Dutiyapañhā paṇḍakādayo abhabbapuggale sandhāya vuttā. Ekādasapi hi te gihibhāveyeva pārājikaṃ pattā.
வாசாதி வாசாய அனாலபந்தோ. கி³ரங் நோ ச பரே ப⁴ணெய்யாதி ‘‘இதி இமே ஸொஸ்ஸந்தீ’’தி பரபுக்³க³லே ஸந்தா⁴ய ஸத்³த³ம்பி ந நிச்சா²ரெய்ய. அயங் பஞ்ஹா ‘‘ஸந்திங் ஆபத்திங் நாவிகரெய்ய, ஸம்பஜானமுஸாவாத³ஸ்ஸ ஹோதீ’’தி இமங் முஸாவாத³ங் ஸந்தா⁴ய வுத்தா. தஸ்ஸ ஹி பி⁴க்கு²னோ அத⁴ம்மிகாய படிஞ்ஞாய துண்ஹீபூ⁴தஸ்ஸ நிஸின்னஸ்ஸ மனொத்³வாரே ஆபத்தி நாம நத்தி². யஸ்மா பன ஆவிகாதப்³ப³ங் ந ஆவிகரோதி, தேனஸ்ஸ வசீத்³வாரே அகிரியதோ அயங் ஆபத்தி ஸமுட்டா²தீதி வேதி³தப்³பா³.
Vācāti vācāya anālapanto. Giraṃ no ca pare bhaṇeyyāti ‘‘iti ime sossantī’’ti parapuggale sandhāya saddampi na nicchāreyya. Ayaṃ pañhā ‘‘santiṃ āpattiṃ nāvikareyya, sampajānamusāvādassa hotī’’ti imaṃ musāvādaṃ sandhāya vuttā. Tassa hi bhikkhuno adhammikāya paṭiññāya tuṇhībhūtassa nisinnassa manodvāre āpatti nāma natthi. Yasmā pana āvikātabbaṃ na āvikaroti, tenassa vacīdvāre akiriyato ayaṃ āpatti samuṭṭhātīti veditabbā.
ஸங்கா⁴தி³ஸேஸா சதுரோதி அயங் பஞ்ஹா அருணுக்³கே³ கா³மந்தரபரியாபன்னங் நதி³பாரங் ஓக்கந்தபி⁴க்கு²னிங் ஸந்தா⁴ய வுத்தா, ஸா ஹி ஸககா³மதோ பச்சூஸஸமயே நிக்க²மித்வா அருணுக்³க³மனகாலே வுத்தப்பகாரங் நதி³பாரங் ஓக்கந்தமத்தாவ ரத்திவிப்பவாஸகா³மந்தரனதி³பாரக³ணம்ஹாஓஹீயனலக்க²ணேன ஏகப்பஹாரேனேவ சதுரோ ஸங்கா⁴தி³ஸேஸே ஆபஜ்ஜதி.
Saṅghādisesā caturoti ayaṃ pañhā aruṇugge gāmantarapariyāpannaṃ nadipāraṃ okkantabhikkhuniṃ sandhāya vuttā, sā hi sakagāmato paccūsasamaye nikkhamitvā aruṇuggamanakāle vuttappakāraṃ nadipāraṃ okkantamattāva rattivippavāsagāmantaranadipāragaṇamhāohīyanalakkhaṇena ekappahāreneva caturo saṅghādisese āpajjati.
ஸியா ஆபத்தியோ நானாதி அயங் பஞ்ஹா ஏகதோஉபஸம்பன்னா த்³வே பி⁴க்கு²னியோ ஸந்தா⁴ய வுத்தா. தாஸு ஹி பி⁴க்கூ²னங் ஸந்திகே ஏகதோஉபஸம்பன்னாய ஹத்த²தோ க³ண்ஹந்தஸ்ஸ பாசித்தியங், பி⁴க்கு²னீனங் ஸந்திகே ஏகதோஉபஸம்பன்னாய ஹத்த²தோ க³ண்ஹந்தஸ்ஸ து³க்கடங்.
Siyā āpattiyo nānāti ayaṃ pañhā ekatoupasampannā dve bhikkhuniyo sandhāya vuttā. Tāsu hi bhikkhūnaṃ santike ekatoupasampannāya hatthato gaṇhantassa pācittiyaṃ, bhikkhunīnaṃ santike ekatoupasampannāya hatthato gaṇhantassa dukkaṭaṃ.
சதுரோ ஜனா ஸங்விதா⁴யாதி ஆசரியோ ச தயோ ச அந்தேவாஸிகா ச²மாஸகங் ப⁴ண்ட³ங் அவஹரிங்ஸு, ஆசரியஸ்ஸ ஸாஹத்தி²கா தயோ மாஸகா, ஆணத்தியாபி தயோவ தஸ்மா து²ல்லச்சயங் ஆபஜ்ஜதி , இதரேஸங் ஸாஹத்தி²கோ ஏகேகோ, ஆணத்திகா பஞ்சாதி தஸ்மா பாராஜிகங் ஆபஜ்ஜிங்ஸு. அயமெத்த² ஸங்கே²போ. வித்தா²ரோ பன அதி³ன்னாதா³னபாராஜிகே ஸங்விதா³வஹாரவண்ணனாயங் வுத்தோ.
Caturo janā saṃvidhāyāti ācariyo ca tayo ca antevāsikā chamāsakaṃ bhaṇḍaṃ avahariṃsu, ācariyassa sāhatthikā tayo māsakā, āṇattiyāpi tayova tasmā thullaccayaṃ āpajjati , itaresaṃ sāhatthiko ekeko, āṇattikā pañcāti tasmā pārājikaṃ āpajjiṃsu. Ayamettha saṅkhepo. Vitthāro pana adinnādānapārājike saṃvidāvahāravaṇṇanāyaṃ vutto.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / பரிவாரபாளி • Parivārapāḷi / 1. அவிப்பவாஸபஞ்ஹா • 1. Avippavāsapañhā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / அவிப்பவாஸாதி³பஞ்ஹவண்ணனா • Avippavāsādipañhavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / அவிப்பவாஸபஞ்ஹாவண்ணனா • Avippavāsapañhāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / அவிப்பவாஸபஞ்ஹாவண்ணனா • Avippavāsapañhāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / (1) அவிப்பவாஸபஞ்ஹாவண்ணனா • (1) Avippavāsapañhāvaṇṇanā
