| Library / Tipiṭaka / তিপিটক • Tipiṭaka / পাচিত্যাদিযোজনাপাল়ি • Pācityādiyojanāpāḷi |
সেদমোচিকগাথা
Sedamocikagāthā
(১) অৰিপ্পৰাসপঞ্হাৰণ্ণনা
(1) Avippavāsapañhāvaṇṇanā
৪৭৯. সেদমোচিকগাথাসূতি অধিপ্পাযত্থস্স গম্ভীরত্তা তং চিন্তেন্তানং ৰিনযধরানং কাযে সেদং মোচেতীতি সেদমোচিকা, সাযেৰ গাথা সেদমোচিকগাথা, তাসু। ‘‘অকপ্পিযসম্ভোগো ন লব্ভতী’’তি ইমিনা কপ্পিযসম্ভোগো লব্ভতীতি দস্সেতি। কপ্পিযসম্ভোগং দস্সেতুং ‘‘নহাপনভোজনাদী’’তি ৰুত্তং। অনাপত্তীতি মাতুভিক্খুনিযা অনাপত্তি। এসা পঞ্হাতি এত্থ পঞ্হসদ্দো সভাৰতিলিঙ্গোতি সদ্দসত্থেসু (সদ্দনীতিধাতুমালাযং ১৬ হকারন্তধাতু; অভিধানপ্পদীপিকাযং ১১৫ গাথাযং) ৰুত্তো, ইধ ইত্থিলিঙ্গৰসেন ৰুত্তো। ‘‘পণ্ডিতেহী’’তি ইমিনা কুসলস্স কারণং দস্সেতি, পণ্ডিতত্তা কুসলোতি অধিপ্পাযো। অস্সাতি পঞ্হায। এতন্তি ৰিস্সজ্জনং। অস্সাতি গাথায।
479.Sedamocikagāthāsūti adhippāyatthassa gambhīrattā taṃ cintentānaṃ vinayadharānaṃ kāye sedaṃ mocetīti sedamocikā, sāyeva gāthā sedamocikagāthā, tāsu. ‘‘Akappiyasambhogo na labbhatī’’ti iminā kappiyasambhogo labbhatīti dasseti. Kappiyasambhogaṃ dassetuṃ ‘‘nahāpanabhojanādī’’ti vuttaṃ. Anāpattīti mātubhikkhuniyā anāpatti. Esā pañhāti ettha pañhasaddo sabhāvatiliṅgoti saddasatthesu (saddanītidhātumālāyaṃ 16 hakārantadhātu; abhidhānappadīpikāyaṃ 115 gāthāyaṃ) vutto, idha itthiliṅgavasena vutto. ‘‘Paṇḍitehī’’ti iminā kusalassa kāraṇaṃ dasseti, paṇḍitattā kusaloti adhippāyo. Assāti pañhāya. Etanti vissajjanaṃ. Assāti gāthāya.
একাদস ৰিৰজ্জিযাতি অৰিভত্তিকনিদ্দেসো, একাদস ৰিৰজ্জিযেতি অত্থো। তেন ৰুত্তং ‘‘যে’’তিআদি। তেপীতি পিসদ্দো গাথাযং লুত্তনিদ্দিট্ঠগম্যমানভাৰং দস্সেতি।
Ekādasa vivajjiyāti avibhattikaniddeso, ekādasa vivajjiyeti attho. Tena vuttaṃ ‘‘ye’’tiādi. Tepīti pisaddo gāthāyaṃ luttaniddiṭṭhagamyamānabhāvaṃ dasseti.
অযন্তি ন্হাপিতপুব্বকো ভিক্খু। নিম্মিতবুদ্ধন্তি বুদ্ধেন নিম্মিতং বুদ্ধরূপং।
Ayanti nhāpitapubbako bhikkhu. Nimmitabuddhanti buddhena nimmitaṃ buddharūpaṃ.
ৰিৰজ্জিযাতি এত্থ যকারো ত্ৰাপচ্চযস্স কারিযোতি আহ ‘‘ৰিৰজ্জেত্ৰা’’তি। অসীসকং যং তং কবন্ধং অত্থীতি যোজনা। অসীসকত্তা কেন সরীরেন জীৰিতং বন্ধতীতি কবন্ধো। যস্সাতি কবন্ধস্স।
Vivajjiyāti ettha yakāro tvāpaccayassa kāriyoti āha ‘‘vivajjetvā’’ti. Asīsakaṃ yaṃ taṃ kabandhaṃ atthīti yojanā. Asīsakattā kena sarīrena jīvitaṃ bandhatīti kabandho. Yassāti kabandhassa.
হীতি সচ্চং। তেতি অভব্বপুগ্গলা।
Hīti saccaṃ. Teti abhabbapuggalā.
ৰাচাতি এত্থ যকারলোপোতি আহ ‘‘ৰাচাযা’’তি। ইতি মেতি এৰং মম। এৰং ৰদমানে মম ৰচনন্তি যোজনা। অথৰা ইতিমেতি এৰং ইমে, এৰং ৰদমানে ইমে জনাতি যোজনা। সদ্দম্পীতি ইমিনা গিরসদ্দো সদ্দপরিযাযোতি দস্সেতি। হীতি সচ্চং। তুণ্হীভূতস্স নিসিন্নস্স তস্স ভিক্খুনোতি যোজনা। যদি মনোদ্ৰারে আপত্তি নাম নত্থি, এৰং সতি কস্মা আপজ্জেয্য ৰাচসিকন্তি ৰুত্তন্তি আহ ‘‘যস্মা পনা’’তিআদি। তেনাতি তস্মা। অস্সাতি ভিক্খুস্স।
Vācāti ettha yakāralopoti āha ‘‘vācāyā’’ti. Iti meti evaṃ mama. Evaṃ vadamāne mama vacananti yojanā. Athavā itimeti evaṃ ime, evaṃ vadamāne ime janāti yojanā. Saddampīti iminā girasaddo saddapariyāyoti dasseti. Hīti saccaṃ. Tuṇhībhūtassa nisinnassa tassa bhikkhunoti yojanā. Yadi manodvāre āpatti nāma natthi, evaṃ sati kasmā āpajjeyya vācasikanti vuttanti āha ‘‘yasmā panā’’tiādi. Tenāti tasmā. Assāti bhikkhussa.
সাতি ভিক্খুনী, আপজ্জতীতি সম্বন্ধো। ৰুত্তপ্পকারন্তি ‘‘গামন্তরপরিযাপন্ন’’ন্তি ৰুত্তপ্পকারং।
Sāti bhikkhunī, āpajjatīti sambandho. Vuttappakāranti ‘‘gāmantarapariyāpanna’’nti vuttappakāraṃ.
তাসূতি দ্ৰীসু ভিক্খুনীসু।
Tāsūti dvīsu bhikkhunīsu.
চতুরো জনাতি এত্থ চতুন্নং জনানং সরূপং দস্সেন্তো আহ ‘‘আচরিযো চ তযো চ অন্তেৰাসিকা’’তি । সাহত্থিকাতি সহত্থা অৰহরিতা। আণত্তিযাপীতি আণত্তেন অৰহরিতাপি। ইতরেসন্তি অন্তেৰাসিকানং, একেকো মাসকোতি সম্বন্ধো। এত্থাতি পরিৰারে সেদমোচিকগাথাযং।
Caturo janāti ettha catunnaṃ janānaṃ sarūpaṃ dassento āha ‘‘ācariyo ca tayo ca antevāsikā’’ti . Sāhatthikāti sahatthā avaharitā. Āṇattiyāpīti āṇattena avaharitāpi. Itaresanti antevāsikānaṃ, ekeko māsakoti sambandho. Etthāti parivāre sedamocikagāthāyaṃ.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / পরিৰারপাল়ি • Parivārapāḷi / ১. অৰিপ্পৰাসপঞ্হা • 1. Avippavāsapañhā
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / পরিৰার-অট্ঠকথা • Parivāra-aṭṭhakathā / (১) অৰিপ্পৰাসপঞ্হাৰণ্ণনা • (1) Avippavāsapañhāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / অৰিপ্পৰাসাদিপঞ্হৰণ্ণনা • Avippavāsādipañhavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / অৰিপ্পৰাসপঞ্হাৰণ্ণনা • Avippavāsapañhāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / অৰিপ্পৰাসপঞ্হাৰণ্ণনা • Avippavāsapañhāvaṇṇanā
