| Library / Tipiṭaka / ತಿಪಿಟಕ • Tipiṭaka / ಪರಿವಾರ-ಅಟ್ಠಕಥಾ • Parivāra-aṭṭhakathā |
ಸೇದಮೋಚನಗಾಥಾ
Sedamocanagāthā
(೧) ಅವಿಪ್ಪವಾಸಪಞ್ಹಾವಣ್ಣನಾ
(1) Avippavāsapañhāvaṇṇanā
೪೭೯. ಸೇದಮೋಚನಗಾಥಾಸು ಅಸಂವಾಸೋತಿ ಉಪೋಸಥಪವಾರಣಾದಿನಾ ಸಂವಾಸೇನ ಅಸಂವಾಸೋ। ಸಮ್ಭೋಗೋ ಏಕಚ್ಚೋ ತಹಿಂ ನ ಲಬ್ಭತೀತಿ ಅಕಪ್ಪಿಯಸಮ್ಭೋಗೋ ನ ಲಬ್ಭತಿ, ನಹಾಪನಭೋಜನಾದಿಪಟಿಜಗ್ಗನಂ ಪನ ಮಾತರಾಯೇವ ಕಾತುಂ ಲಬ್ಭತಿ। ಅವಿಪ್ಪವಾಸೇನ ಅನಾಪತ್ತೀತಿ ಸಹಗಾರಸೇಯ್ಯಾಯ ಅನಾಪತ್ತಿ। ಪಞ್ಹಾ ಮೇಸಾ ಕುಸಲೇಹಿ ಚಿನ್ತಿತಾತಿ ಏಸಾ ಪಞ್ಹಾ ಕುಸಲೇಹಿ ಪಣ್ಡಿತೇಹಿ ಚಿನ್ತಿತಾ। ಅಸ್ಸಾ ವಿಸ್ಸಜ್ಜನಂ ದಾರಕಮಾತುಯಾ ಭಿಕ್ಖುನಿಯಾ ವೇದಿತಬ್ಬಂ, ತಸ್ಸಾ ಹಿ ಪುತ್ತಂ ಸನ್ಧಾಯೇತಂ ವುತ್ತನ್ತಿ।
479. Sedamocanagāthāsu asaṃvāsoti uposathapavāraṇādinā saṃvāsena asaṃvāso. Sambhogo ekacco tahiṃ na labbhatīti akappiyasambhogo na labbhati, nahāpanabhojanādipaṭijagganaṃ pana mātarāyeva kātuṃ labbhati. Avippavāsena anāpattīti sahagāraseyyāya anāpatti. Pañhā mesā kusalehi cintitāti esā pañhā kusalehi paṇḍitehi cintitā. Assā vissajjanaṃ dārakamātuyā bhikkhuniyā veditabbaṃ, tassā hi puttaṃ sandhāyetaṃ vuttanti.
ಅವಿಸ್ಸಜ್ಜಿತಗಾಥಾ ಗರುಭಣ್ಡಂ ಸನ್ಧಾಯ ವುತ್ತಾ, ಅತ್ಥೋ ಪನಸ್ಸಾ ಗರುಭಣ್ಡವಿನಿಚ್ಛಯೇ ವುತ್ತೋಯೇವ।
Avissajjitagāthā garubhaṇḍaṃ sandhāya vuttā, attho panassā garubhaṇḍavinicchaye vuttoyeva.
ದಸ ಪುಗ್ಗಲೇ ನ ವದಾಮೀತಿ ಸೇನಾಸನಕ್ಖನ್ಧಕೇ ವುತ್ತೇ ದಸ ಪುಗ್ಗಲೇ ನ ವದಾಮಿ। ಏಕಾದಸ ವಿವಜ್ಜಿಯಾತಿ ಯೇ ಮಹಾಖನ್ಧಕೇ ಏಕಾದಸ ವಿವಜ್ಜನೀಯಪುಗ್ಗಲಾ ವುತ್ತಾ, ತೇಪಿ ನ ವದಾಮಿ। ಅಯಂ ಪಞ್ಹಾ ನಗ್ಗಂ ಭಿಕ್ಖುಂ ಸನ್ಧಾಯ ವುತ್ತಾ।
Dasa puggale na vadāmīti senāsanakkhandhake vutte dasa puggale na vadāmi. Ekādasa vivajjiyāti ye mahākhandhake ekādasa vivajjanīyapuggalā vuttā, tepi na vadāmi. Ayaṃ pañhā naggaṃ bhikkhuṃ sandhāya vuttā.
ಕಥಂ ನು ಸಿಕ್ಖಾಯ ಅಸಾಧಾರಣೋತಿ ಪಞ್ಹಾ ನಹಾಪಿತಪುಬ್ಬಕಂ ಭಿಕ್ಖುಂ ಸನ್ಧಾಯ ವುತ್ತಾ। ಅಯಞ್ಹಿ ಖುರಭಣ್ಡಂ ಪರಿಹರಿತುಂ ನ ಲಭತಿ, ಅಞ್ಞೇ ಲಭನ್ತಿ; ತಸ್ಮಾ ಸಿಕ್ಖಾಯ ಅಸಾಧಾರಣೋ।
Kathaṃ nu sikkhāya asādhāraṇoti pañhā nahāpitapubbakaṃ bhikkhuṃ sandhāya vuttā. Ayañhi khurabhaṇḍaṃ pariharituṃ na labhati, aññe labhanti; tasmā sikkhāya asādhāraṇo.
ತಂ ಪುಗ್ಗಲಂ ಕತಮಂ ವದನ್ತಿ ಬುದ್ಧಾತಿ ಅಯಂ ಪಞ್ಹಾ ನಿಮ್ಮಿತಬುದ್ಧಂ ಸನ್ಧಾಯ ವುತ್ತಾ।
Taṃ puggalaṃ katamaṃ vadanti buddhāti ayaṃ pañhā nimmitabuddhaṃ sandhāya vuttā.
ಅಧೋನಾಭಿಂ ವಿವಜ್ಜಿಯಾತಿ ಅಧೋನಾಭಿಂ ವಿವಜ್ಜೇತ್ವಾ। ಅಯಂ ಪಞ್ಹಾ ಯಂ ತಂ ಅಸೀಸಕಂ ಕಬನ್ಧಂ, ಯಸ್ಸ ಉರೇ ಅಕ್ಖೀನಿ ಚೇವ ಮುಖಞ್ಚ ಹೋತಿ, ತಂ ಸನ್ಧಾಯ ವುತ್ತಾ।
Adhonābhiṃvivajjiyāti adhonābhiṃ vivajjetvā. Ayaṃ pañhā yaṃ taṃ asīsakaṃ kabandhaṃ, yassa ure akkhīni ceva mukhañca hoti, taṃ sandhāya vuttā.
ಭಿಕ್ಖು ಸಞ್ಞಾಚಿಕಾಯ ಕುಟಿನ್ತಿ ಅಯಂ ಪಞ್ಹಾ ತಿಣಚ್ಛಾದನಂ ಕುಟಿಂ ಸನ್ಧಾಯ ವುತ್ತಾ। ದುತಿಯಪಞ್ಹಾ ಸಬ್ಬಮತ್ತಿಕಾಮಯಂ ಕುಟಿಂ ಸನ್ಧಾಯ ವುತ್ತಾ।
Bhikkhu saññācikāya kuṭinti ayaṃ pañhā tiṇacchādanaṃ kuṭiṃ sandhāya vuttā. Dutiyapañhā sabbamattikāmayaṃ kuṭiṃ sandhāya vuttā.
ಆಪಜ್ಜೇಯ್ಯ ಗರುಕಂ ಛೇಜ್ಜವತ್ಥುನ್ತಿ ಅಯಂ ಪಞ್ಹಾ ವಜ್ಜಪಟಿಚ್ಛಾದಿಕಂ ಭಿಕ್ಖುನಿಂ ಸನ್ಧಾಯ ವುತ್ತಾ। ದುತಿಯಪಞ್ಹಾ ಪಣ್ಡಕಾದಯೋ ಅಭಬ್ಬಪುಗ್ಗಲೇ ಸನ್ಧಾಯ ವುತ್ತಾ। ಏಕಾದಸಪಿ ಹಿ ತೇ ಗಿಹಿಭಾವೇಯೇವ ಪಾರಾಜಿಕಂ ಪತ್ತಾ।
Āpajjeyya garukaṃ chejjavatthunti ayaṃ pañhā vajjapaṭicchādikaṃ bhikkhuniṃ sandhāya vuttā. Dutiyapañhā paṇḍakādayo abhabbapuggale sandhāya vuttā. Ekādasapi hi te gihibhāveyeva pārājikaṃ pattā.
ವಾಚಾತಿ ವಾಚಾಯ ಅನಾಲಪನ್ತೋ। ಗಿರಂ ನೋ ಚ ಪರೇ ಭಣೇಯ್ಯಾತಿ ‘‘ಇತಿ ಇಮೇ ಸೋಸ್ಸನ್ತೀ’’ತಿ ಪರಪುಗ್ಗಲೇ ಸನ್ಧಾಯ ಸದ್ದಮ್ಪಿ ನ ನಿಚ್ಛಾರೇಯ್ಯ। ಅಯಂ ಪಞ್ಹಾ ‘‘ಸನ್ತಿಂ ಆಪತ್ತಿಂ ನಾವಿಕರೇಯ್ಯ, ಸಮ್ಪಜಾನಮುಸಾವಾದಸ್ಸ ಹೋತೀ’’ತಿ ಇಮಂ ಮುಸಾವಾದಂ ಸನ್ಧಾಯ ವುತ್ತಾ। ತಸ್ಸ ಹಿ ಭಿಕ್ಖುನೋ ಅಧಮ್ಮಿಕಾಯ ಪಟಿಞ್ಞಾಯ ತುಣ್ಹೀಭೂತಸ್ಸ ನಿಸಿನ್ನಸ್ಸ ಮನೋದ್ವಾರೇ ಆಪತ್ತಿ ನಾಮ ನತ್ಥಿ। ಯಸ್ಮಾ ಪನ ಆವಿಕಾತಬ್ಬಂ ನ ಆವಿಕರೋತಿ, ತೇನಸ್ಸ ವಚೀದ್ವಾರೇ ಅಕಿರಿಯತೋ ಅಯಂ ಆಪತ್ತಿ ಸಮುಟ್ಠಾತೀತಿ ವೇದಿತಬ್ಬಾ।
Vācāti vācāya anālapanto. Giraṃ no ca pare bhaṇeyyāti ‘‘iti ime sossantī’’ti parapuggale sandhāya saddampi na nicchāreyya. Ayaṃ pañhā ‘‘santiṃ āpattiṃ nāvikareyya, sampajānamusāvādassa hotī’’ti imaṃ musāvādaṃ sandhāya vuttā. Tassa hi bhikkhuno adhammikāya paṭiññāya tuṇhībhūtassa nisinnassa manodvāre āpatti nāma natthi. Yasmā pana āvikātabbaṃ na āvikaroti, tenassa vacīdvāre akiriyato ayaṃ āpatti samuṭṭhātīti veditabbā.
ಸಙ್ಘಾದಿಸೇಸಾ ಚತುರೋತಿ ಅಯಂ ಪಞ್ಹಾ ಅರುಣುಗ್ಗೇ ಗಾಮನ್ತರಪರಿಯಾಪನ್ನಂ ನದಿಪಾರಂ ಓಕ್ಕನ್ತಭಿಕ್ಖುನಿಂ ಸನ್ಧಾಯ ವುತ್ತಾ, ಸಾ ಹಿ ಸಕಗಾಮತೋ ಪಚ್ಚೂಸಸಮಯೇ ನಿಕ್ಖಮಿತ್ವಾ ಅರುಣುಗ್ಗಮನಕಾಲೇ ವುತ್ತಪ್ಪಕಾರಂ ನದಿಪಾರಂ ಓಕ್ಕನ್ತಮತ್ತಾವ ರತ್ತಿವಿಪ್ಪವಾಸಗಾಮನ್ತರನದಿಪಾರಗಣಮ್ಹಾಓಹೀಯನಲಕ್ಖಣೇನ ಏಕಪ್ಪಹಾರೇನೇವ ಚತುರೋ ಸಙ್ಘಾದಿಸೇಸೇ ಆಪಜ್ಜತಿ।
Saṅghādisesā caturoti ayaṃ pañhā aruṇugge gāmantarapariyāpannaṃ nadipāraṃ okkantabhikkhuniṃ sandhāya vuttā, sā hi sakagāmato paccūsasamaye nikkhamitvā aruṇuggamanakāle vuttappakāraṃ nadipāraṃ okkantamattāva rattivippavāsagāmantaranadipāragaṇamhāohīyanalakkhaṇena ekappahāreneva caturo saṅghādisese āpajjati.
ಸಿಯಾ ಆಪತ್ತಿಯೋ ನಾನಾತಿ ಅಯಂ ಪಞ್ಹಾ ಏಕತೋಉಪಸಮ್ಪನ್ನಾ ದ್ವೇ ಭಿಕ್ಖುನಿಯೋ ಸನ್ಧಾಯ ವುತ್ತಾ। ತಾಸು ಹಿ ಭಿಕ್ಖೂನಂ ಸನ್ತಿಕೇ ಏಕತೋಉಪಸಮ್ಪನ್ನಾಯ ಹತ್ಥತೋ ಗಣ್ಹನ್ತಸ್ಸ ಪಾಚಿತ್ತಿಯಂ, ಭಿಕ್ಖುನೀನಂ ಸನ್ತಿಕೇ ಏಕತೋಉಪಸಮ್ಪನ್ನಾಯ ಹತ್ಥತೋ ಗಣ್ಹನ್ತಸ್ಸ ದುಕ್ಕಟಂ।
Siyā āpattiyo nānāti ayaṃ pañhā ekatoupasampannā dve bhikkhuniyo sandhāya vuttā. Tāsu hi bhikkhūnaṃ santike ekatoupasampannāya hatthato gaṇhantassa pācittiyaṃ, bhikkhunīnaṃ santike ekatoupasampannāya hatthato gaṇhantassa dukkaṭaṃ.
ಚತುರೋ ಜನಾ ಸಂವಿಧಾಯಾತಿ ಆಚರಿಯೋ ಚ ತಯೋ ಚ ಅನ್ತೇವಾಸಿಕಾ ಛಮಾಸಕಂ ಭಣ್ಡಂ ಅವಹರಿಂಸು, ಆಚರಿಯಸ್ಸ ಸಾಹತ್ಥಿಕಾ ತಯೋ ಮಾಸಕಾ, ಆಣತ್ತಿಯಾಪಿ ತಯೋವ ತಸ್ಮಾ ಥುಲ್ಲಚ್ಚಯಂ ಆಪಜ್ಜತಿ , ಇತರೇಸಂ ಸಾಹತ್ಥಿಕೋ ಏಕೇಕೋ, ಆಣತ್ತಿಕಾ ಪಞ್ಚಾತಿ ತಸ್ಮಾ ಪಾರಾಜಿಕಂ ಆಪಜ್ಜಿಂಸು। ಅಯಮೇತ್ಥ ಸಙ್ಖೇಪೋ। ವಿತ್ಥಾರೋ ಪನ ಅದಿನ್ನಾದಾನಪಾರಾಜಿಕೇ ಸಂವಿದಾವಹಾರವಣ್ಣನಾಯಂ ವುತ್ತೋ।
Caturo janā saṃvidhāyāti ācariyo ca tayo ca antevāsikā chamāsakaṃ bhaṇḍaṃ avahariṃsu, ācariyassa sāhatthikā tayo māsakā, āṇattiyāpi tayova tasmā thullaccayaṃ āpajjati , itaresaṃ sāhatthiko ekeko, āṇattikā pañcāti tasmā pārājikaṃ āpajjiṃsu. Ayamettha saṅkhepo. Vitthāro pana adinnādānapārājike saṃvidāvahāravaṇṇanāyaṃ vutto.
Related texts:
ತಿಪಿಟಕ (ಮೂಲ) • Tipiṭaka (Mūla) / ವಿನಯಪಿಟಕ • Vinayapiṭaka / ಪರಿವಾರಪಾಳಿ • Parivārapāḷi / ೧. ಅವಿಪ್ಪವಾಸಪಞ್ಹಾ • 1. Avippavāsapañhā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ಸಾರತ್ಥದೀಪನೀ-ಟೀಕಾ • Sāratthadīpanī-ṭīkā / ಅವಿಪ್ಪವಾಸಾದಿಪಞ್ಹವಣ್ಣನಾ • Avippavāsādipañhavaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ವಜಿರಬುದ್ಧಿ-ಟೀಕಾ • Vajirabuddhi-ṭīkā / ಅವಿಪ್ಪವಾಸಪಞ್ಹಾವಣ್ಣನಾ • Avippavāsapañhāvaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ವಿಮತಿವಿನೋದನೀ-ಟೀಕಾ • Vimativinodanī-ṭīkā / ಅವಿಪ್ಪವಾಸಪಞ್ಹಾವಣ್ಣನಾ • Avippavāsapañhāvaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ಪಾಚಿತ್ಯಾದಿಯೋಜನಾಪಾಳಿ • Pācityādiyojanāpāḷi / (೧) ಅವಿಪ್ಪವಾಸಪಞ್ಹಾವಣ್ಣನಾ • (1) Avippavāsapañhāvaṇṇanā
