| Library / Tipiṭaka / තිපිටක • Tipiṭaka / පරිවාර-අට්‌ඨකථා • Parivāra-aṭṭhakathā |
සෙදමොචනගාථා
Sedamocanagāthā
(1) අවිප්‌පවාසපඤ්‌හාවණ්‌ණනා
(1) Avippavāsapañhāvaṇṇanā
479. සෙදමොචනගාථාසු අසංවාසොති උපොසථපවාරණාදිනා සංවාසෙන අසංවාසො. සම්‌භොගො එකච්‌චො තහිං න ලබ්‌භතීති අකප්‌පියසම්‌භොගො න ලබ්‌භති, නහාපනභොජනාදිපටිජග්‌ගනං පන මාතරායෙව කාතුං ලබ්‌භති. අවිප්‌පවාසෙන අනාපත්‌තීති සහගාරසෙය්‍යාය අනාපත්‌ති. පඤ්‌හා මෙසා කුසලෙහි චින්‌තිතාති එසා පඤ්‌හා කුසලෙහි පණ්‌ඩිතෙහි චින්‌තිතා. අස්‌සා විස්‌සජ්‌ජනං දාරකමාතුයා භික්‌ඛුනියා වෙදිතබ්‌බං, තස්‌සා හි පුත්‌තං සන්‌ධායෙතං වුත්‌තන්‌ති.
479. Sedamocanagāthāsu asaṃvāsoti uposathapavāraṇādinā saṃvāsena asaṃvāso. Sambhogo ekacco tahiṃ na labbhatīti akappiyasambhogo na labbhati, nahāpanabhojanādipaṭijagganaṃ pana mātarāyeva kātuṃ labbhati. Avippavāsena anāpattīti sahagāraseyyāya anāpatti. Pañhā mesā kusalehi cintitāti esā pañhā kusalehi paṇḍitehi cintitā. Assā vissajjanaṃ dārakamātuyā bhikkhuniyā veditabbaṃ, tassā hi puttaṃ sandhāyetaṃ vuttanti.
අවිස්‌සජ්‌ජිතගාථා ගරුභණ්‌ඩං සන්‌ධාය වුත්‌තා, අත්‌ථො පනස්‌සා ගරුභණ්‌ඩවිනිච්‌ඡයෙ වුත්‌තොයෙව.
Avissajjitagāthā garubhaṇḍaṃ sandhāya vuttā, attho panassā garubhaṇḍavinicchaye vuttoyeva.
දස පුග්‌ගලෙ න වදාමීති සෙනාසනක්‌ඛන්‌ධකෙ වුත්‌තෙ දස පුග්‌ගලෙ න වදාමි. එකාදස විවජ්‌ජියාති යෙ මහාඛන්‌ධකෙ එකාදස විවජ්‌ජනීයපුග්‌ගලා වුත්‌තා, තෙපි න වදාමි. අයං පඤ්‌හා නග්‌ගං භික්‌ඛුං සන්‌ධාය වුත්‌තා.
Dasa puggale na vadāmīti senāsanakkhandhake vutte dasa puggale na vadāmi. Ekādasa vivajjiyāti ye mahākhandhake ekādasa vivajjanīyapuggalā vuttā, tepi na vadāmi. Ayaṃ pañhā naggaṃ bhikkhuṃ sandhāya vuttā.
කථං නු සික්‌ඛාය අසාධාරණොති පඤ්‌හා නහාපිතපුබ්‌බකං භික්‌ඛුං සන්‌ධාය වුත්‌තා. අයඤ්‌හි ඛුරභණ්‌ඩං පරිහරිතුං න ලභති, අඤ්‌ඤෙ ලභන්‌ති; තස්‌මා සික්‌ඛාය අසාධාරණො.
Kathaṃ nu sikkhāya asādhāraṇoti pañhā nahāpitapubbakaṃ bhikkhuṃ sandhāya vuttā. Ayañhi khurabhaṇḍaṃ pariharituṃ na labhati, aññe labhanti; tasmā sikkhāya asādhāraṇo.
තං පුග්‌ගලං කතමං වදන්‌ති බුද්‌ධාති අයං පඤ්‌හා නිම්‌මිතබුද්‌ධං සන්‌ධාය වුත්‌තා.
Taṃ puggalaṃ katamaṃ vadanti buddhāti ayaṃ pañhā nimmitabuddhaṃ sandhāya vuttā.
අධොනාභිං විවජ්‌ජියාති අධොනාභිං විවජ්‌ජෙත්‌වා. අයං පඤ්‌හා යං තං අසීසකං කබන්‌ධං, යස්‌ස උරෙ අක්‌ඛීනි චෙව මුඛඤ්‌ච හොති, තං සන්‌ධාය වුත්‌තා.
Adhonābhiṃvivajjiyāti adhonābhiṃ vivajjetvā. Ayaṃ pañhā yaṃ taṃ asīsakaṃ kabandhaṃ, yassa ure akkhīni ceva mukhañca hoti, taṃ sandhāya vuttā.
භික්‌ඛු සඤ්‌ඤාචිකාය කුටින්‌ති අයං පඤ්‌හා තිණච්‌ඡාදනං කුටිං සන්‌ධාය වුත්‌තා. දුතියපඤ්‌හා සබ්‌බමත්‌තිකාමයං කුටිං සන්‌ධාය වුත්‌තා.
Bhikkhu saññācikāya kuṭinti ayaṃ pañhā tiṇacchādanaṃ kuṭiṃ sandhāya vuttā. Dutiyapañhā sabbamattikāmayaṃ kuṭiṃ sandhāya vuttā.
ආපජ්‌ජෙය්‍ය ගරුකං ඡෙජ්‌ජවත්‌ථුන්‌ති අයං පඤ්‌හා වජ්‌ජපටිච්‌ඡාදිකං භික්‌ඛුනිං සන්‌ධාය වුත්‌තා. දුතියපඤ්‌හා පණ්‌ඩකාදයො අභබ්‌බපුග්‌ගලෙ සන්‌ධාය වුත්‌තා. එකාදසපි හි තෙ ගිහිභාවෙයෙව පාරාජිකං පත්‌තා.
Āpajjeyya garukaṃ chejjavatthunti ayaṃ pañhā vajjapaṭicchādikaṃ bhikkhuniṃ sandhāya vuttā. Dutiyapañhā paṇḍakādayo abhabbapuggale sandhāya vuttā. Ekādasapi hi te gihibhāveyeva pārājikaṃ pattā.
වාචාති වාචාය අනාලපන්‌තො. ගිරං නො ච පරෙ භණෙය්‍යාති ‘‘ඉති ඉමෙ සොස්‌සන්‌තී’’ති පරපුග්‌ගලෙ සන්‌ධාය සද්‌දම්‌පි න නිච්‌ඡාරෙය්‍ය. අයං පඤ්‌හා ‘‘සන්‌තිං ආපත්‌තිං නාවිකරෙය්‍ය, සම්‌පජානමුසාවාදස්‌ස හොතී’’ති ඉමං මුසාවාදං සන්‌ධාය වුත්‌තා. තස්‌ස හි භික්‌ඛුනො අධම්‌මිකාය පටිඤ්‌ඤාය තුණ්‌හීභූතස්‌ස නිසින්‌නස්‌ස මනොද්‌වාරෙ ආපත්‌ති නාම නත්‌ථි. යස්‌මා පන ආවිකාතබ්‌බං න ආවිකරොති, තෙනස්‌ස වචීද්‌වාරෙ අකිරියතො අයං ආපත්‌ති සමුට්‌ඨාතීති වෙදිතබ්‌බා.
Vācāti vācāya anālapanto. Giraṃ no ca pare bhaṇeyyāti ‘‘iti ime sossantī’’ti parapuggale sandhāya saddampi na nicchāreyya. Ayaṃ pañhā ‘‘santiṃ āpattiṃ nāvikareyya, sampajānamusāvādassa hotī’’ti imaṃ musāvādaṃ sandhāya vuttā. Tassa hi bhikkhuno adhammikāya paṭiññāya tuṇhībhūtassa nisinnassa manodvāre āpatti nāma natthi. Yasmā pana āvikātabbaṃ na āvikaroti, tenassa vacīdvāre akiriyato ayaṃ āpatti samuṭṭhātīti veditabbā.
සඞ්‌ඝාදිසෙසා චතුරොති අයං පඤ්‌හා අරුණුග්‌ගෙ ගාමන්‌තරපරියාපන්‌නං නදිපාරං ඔක්‌කන්‌තභික්‌ඛුනිං සන්‌ධාය වුත්‌තා, සා හි සකගාමතො පච්‌චූසසමයෙ නික්‌ඛමිත්‌වා අරුණුග්‌ගමනකාලෙ වුත්‌තප්‌පකාරං නදිපාරං ඔක්‌කන්‌තමත්‌තාව රත්‌තිවිප්‌පවාසගාමන්‌තරනදිපාරගණම්‌හාඔහීයනලක්‌ඛණෙන එකප්‌පහාරෙනෙව චතුරො සඞ්‌ඝාදිසෙසෙ ආපජ්‌ජති.
Saṅghādisesā caturoti ayaṃ pañhā aruṇugge gāmantarapariyāpannaṃ nadipāraṃ okkantabhikkhuniṃ sandhāya vuttā, sā hi sakagāmato paccūsasamaye nikkhamitvā aruṇuggamanakāle vuttappakāraṃ nadipāraṃ okkantamattāva rattivippavāsagāmantaranadipāragaṇamhāohīyanalakkhaṇena ekappahāreneva caturo saṅghādisese āpajjati.
සියා ආපත්‌තියො නානාති අයං පඤ්‌හා එකතොඋපසම්‌පන්‌නා ද්‌වෙ භික්‌ඛුනියො සන්‌ධාය වුත්‌තා. තාසු හි භික්‌ඛූනං සන්‌තිකෙ එකතොඋපසම්‌පන්‌නාය හත්‌ථතො ගණ්‌හන්‌තස්‌ස පාචිත්‌තියං, භික්‌ඛුනීනං සන්‌තිකෙ එකතොඋපසම්‌පන්‌නාය හත්‌ථතො ගණ්‌හන්‌තස්‌ස දුක්‌කටං.
Siyā āpattiyo nānāti ayaṃ pañhā ekatoupasampannā dve bhikkhuniyo sandhāya vuttā. Tāsu hi bhikkhūnaṃ santike ekatoupasampannāya hatthato gaṇhantassa pācittiyaṃ, bhikkhunīnaṃ santike ekatoupasampannāya hatthato gaṇhantassa dukkaṭaṃ.
චතුරො ජනා සංවිධායාති ආචරියො ච තයො ච අන්‌තෙවාසිකා ඡමාසකං භණ්‌ඩං අවහරිංසු, ආචරියස්‌ස සාහත්‌ථිකා තයො මාසකා, ආණත්‌තියාපි තයොව තස්‌මා ථුල්‌ලච්‌චයං ආපජ්‌ජති , ඉතරෙසං සාහත්‌ථිකො එකෙකො, ආණත්‌තිකා පඤ්‌චාති තස්‌මා පාරාජිකං ආපජ්‌ජිංසු. අයමෙත්‌ථ සඞ්‌ඛෙපො. විත්‌ථාරො පන අදින්‌නාදානපාරාජිකෙ සංවිදාවහාරවණ්‌ණනායං වුත්‌තො.
Caturo janā saṃvidhāyāti ācariyo ca tayo ca antevāsikā chamāsakaṃ bhaṇḍaṃ avahariṃsu, ācariyassa sāhatthikā tayo māsakā, āṇattiyāpi tayova tasmā thullaccayaṃ āpajjati , itaresaṃ sāhatthiko ekeko, āṇattikā pañcāti tasmā pārājikaṃ āpajjiṃsu. Ayamettha saṅkhepo. Vitthāro pana adinnādānapārājike saṃvidāvahāravaṇṇanāyaṃ vutto.
Related texts:
තිපිටක (මූල) • Tipiṭaka (Mūla) / විනයපිටක • Vinayapiṭaka / පරිවාරපාළි • Parivārapāḷi / 1. අවිප්‌පවාසපඤ්‌හා • 1. Avippavāsapañhā
ටීකා • Tīkā / විනයපිටක (ටීකා) • Vinayapiṭaka (ṭīkā) / සාරත්‌ථදීපනී-ටීකා • Sāratthadīpanī-ṭīkā / අවිප්‌පවාසාදිපඤ්‌හවණ්‌ණනා • Avippavāsādipañhavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / වජිරබුද්‌ධි-ටීකා • Vajirabuddhi-ṭīkā / අවිප්‌පවාසපඤ්‌හාවණ්‌ණනා • Avippavāsapañhāvaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / විමතිවිනොදනී-ටීකා • Vimativinodanī-ṭīkā / අවිප්‌පවාසපඤ්‌හාවණ්‌ණනා • Avippavāsapañhāvaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / පාචිත්‍යාදියොජනාපාළි • Pācityādiyojanāpāḷi / (1) අවිප්‌පවාසපඤ්‌හාවණ්‌ණනා • (1) Avippavāsapañhāvaṇṇanā
